MI A nase na 1923 na Hemsworth, un pueblo den Yorkshire, Inglatera. Mi tabatin un ruman hòmber grandi ku yama Bob. Tempu mi tabatin mas o ménos nuebe aña, nos tata, kende tabatin rabia riba e hipokresia ku e tabata mira den e religionnan, a haña algun buki ku ta eksponé religion falsu. El a keda impreshoná ku loke el a lesa. Algun aña despues, Bob Atkinson a bin prediká na nos kas i a pone un tokadisko ku un diskurso di Ruman Rutherford toka. Nos a realisá ku esei a bini di e mesun grupo di hende ku a publiká e bukinan ei. Mi mayornan a pidi Ruman Atkinson pa e bin kome serka nos tur anochi i kontestá tur nos tantísimo preguntanan di Beibel. Nos a haña invitashon pa asistí na e reunionnan na kas di un ruman hòmber ku a keda algun kilometer leu. Nos a bai mesora, i asina a lanta un kongregashon chikitu na Hemsworth. No a dura muchu ku nos tabata laga sirbidónan di zona (loke nos ta yama awe superintendente di sirkuito) keda serka nos, i tambe nos tabata invitá pioneronan den bisindario bin kome serka nos. E asosiashon ku mi tabatin ku nan tabatin un bon efekto riba mi.

Nos a kuminsá lanta un negoshi, pero Tata a bisa mi ruman hòmber: “Si bo ke traha pionero, nos lo legumai e negoshi.” Bob a bai di akuerdo ku esei, i na edat di 21 aña, el a bai for di kas pa traha pionero. Dos aña despues, tempu mi tabatin 16 aña, mi a bira pionero. Mayoria di biaha, mi tabata prediká mi so den siman, i mi tabata usa karchi di testimonio i tokadisko. Pero Yehova a bendishoná mi ku un studiante di Beibel ku a hasi bon progreso spiritual. Despues, hopi miembro di su famia a bin aseptá e bèrdat. E aña despues, mi a bira pionero spesial huntu ku Mary Henshall. Nan a manda nos na un teritorio no asigná den e área di Cheshire.

Tabata meimei di Segundo Guera Mundial, i hende muhé mester a bai yuda den guera. Komo ku nos tabata den sirbishi di tempu kompleto i tabata pioneronan spesial, nos a ferwagt ku nos tambe lo a haña dispensashon manera otro ministernan religioso. Pero korte no tabata di akuerdo ku esei, i nan a sentensiá mi na 31 dia di prizòn. E siguiente aña ora mi a hasi 19 aña di edat, mi a registrá mi mes komo un hende ku no ta bai guera pa motibu di mi prinsipionan. Nan a hiba mi dilanti di  dos tribunal di korte, pero nan a kanselá mi kaso. Durante e eksperensia akí, mi tabata sa ku spiritu santu tabata yuda mi i ku Yehova tabata tene mi man i hasi mi firme i fuerte.—Isa. 41:10, 13.

Ami ku Arthur Matthews a konosé otro na 1946. Djis despues ku el a kaba di sinta un kastigu di tres luna di prizòn debí ku e no a bai guera pa motibu di su prinsipionan, el a djòin su ruman Dennis, kende tabata un pionero spesial, na Hemsworth. For di nan infansia nan tata a siña nan di Yehova, i nan a batisá ora nan tabata tiner. No a dura muchu ku Dennis a haña asignashon pa bai traha na Irlanda i a laga Arthur sin un partner pa sirbishi. E manera ku e yònkuman pionero akí, ku tabata traha duru, a komportá su mes a impreshoná mi mayornan asina tantu ku nan a invit’é pa e bin biba serka nan. Anto ora mi tabata di bishita, ami ku Arthur tabata laba tayó despues di kome. Ku tempu nos a kuminsá skirbi otro. Na 1948, Arthur a bolbe haña un kastigu di tres luna di prizòn. Nos a kasa na yanüari 1949 ku e meta pa keda den sirbishi di tempu kompleto mas tantu tempu posibel. Ku bon planiamentu i e bendishon di Yehova, nos a usa nos fakansi pa piki fruta. Asina nos por a gana un tiki plaka pa nos por a sigui traha pionero.

Un tiki mas ku un aña despues, nan a pidi nos pa bai Nort Irlanda, promé na Armagh i despues na Newry; tur dos tabata pueblonan kaminda mayoria di hende tabata katóliko. Tabatin hopi tenshon den e área ei, i nos mester tabatin masha kuidou i disernimentu ora di papia ku hende. E reunionnan tabata na kas di un parehá Testigu ku a keda 16 kilometer leu for di kaminda nos tabata biba. Mas o ménos ocho hende tabata asistí. Ora nan tabata invitá nos pa pasa anochi, nos tabata drumi riba flur i mainta nos tabata kome un bon desayuno. Ta un goso pa sa ku awor tin hopi Testigu den e área ei.

Mi ruman hòmber ku su kasá, Lottie, tabata sirbi komo pionero spesial kaba na Nort Irlanda, i na 1952, nos kuater a bai un kongreso di distrito na Belfast. Tabatin un ruman hòmber ku bondadosamente a laga nos keda serka dje huntu ku Pryce Hughes, e sirbidó di sukursal di Bretaña e tempu ei. Un anochi nos tabata papia tokante e foyeto E Kaminda di Dios Ta Amor, ku a ser prepará spesialmente ku Irlanda na mente. Ruman Hughes tabata bisa kon difísil ta pa papia ku hende katóliko na Repúblika di Irlanda. E pastornan tabata instigá multitut violento pa saka e rumannan for di kaminda nan tabata biba i ataká nan. Pryce a bisa: “Nos tin mester di parehanan kasá ku tin outo pa partisipá den un kampaña spesial pa distribuí e foyeto den henter e pais.” * Mesora nos a kontestá: “Nos lo hasi esei,” manera mi a menshoná na komienso di e relato akí.

 Un kaminda ku semper pioneronan por a keda na Dublin tabata na kas di Ma Rutland, un ruman muhé ku tabatin hopi aña ta sirbi Yehova fielmente. Despues di a keda einan i despues di a bende algun pertenensia, nos kuater a subi Bob su bròmfits ku baki na banda i a bai buska un outo. Nos a haña un outo segunda mano i a pidi e persona ku a bende nos e pa e trese e outo serka nos, pasobra nos niun no por a kore outo. Arthur a pasa e anochi ei sintá riba kama ta hasi manera ta kambia e ta kambia spit di outo. Su manisé, miéntras ku e tabata purba di saka e outo for di garashi, un ruman muhé misionero ku yama Mildred Willett (kende despues a kasa ku John Barr) a pasa hasi un bishita. Komo ku e por a stür, el a siña Arthur kore outo. Awor, ku un tiki práktika nos tabata kla pa ranka sali.

Awor nos tabatin mester di un lugá di keda. Nos a haña spièrtamentu pa evitá di biba den trailer pasobra hende ku ta oponé nos por send’é na kandela, pues nos a buska un kas, pero nos no a haña. E anochi ei, nos kuater a drumi den outo. E siguiente dia, e úniko kos ku nos por a haña ta un trailer chikitu trahá na man ku tabatin dos kama ariba ku abou. Esei a bira nos kas. Afortunadamente, nos no tabatin problema pa parker e trailer riba propiedat di kunukeronan amabel. Nos a prediká den teritorionan ku a keda 16 pa 24 kilometer leu. Despues ku nos move nos trailer bai para otro kaminda, nos tabata bolbe bèk na e lugá kaminda nos tabata pará pa rebishitá e hendenan ku nos a yega di papia kuné.

Nos a bishitá tur kas den zùitost di e Repúblika sin masha problema. Nos a distribuí mas ku 20.000 foyeto i a duna e sukursal di Bretaña nòmber di e hendenan ku a mustra interes. Ta un gran bendishon ku awor tin sientos di Testigu einan.

Ku tempu, nos a haña asignashon pa bai zùit di Lònden. Denter di algun siman, Arthur a haña un yamada di telefòn di e sukursal di Bretaña i nan a pidié pa e kuminsá ku e trabou di sirkuito e siguiente dia mes! Despues di a haña entrenamentu pa un siman, nos a biaha bai nos sirkuito na Eskosia. Arthur no a haña tempu pa prepará su diskursonan, pero e echo ku e tabata dispuesto pa enfrentá e retonan den sirbishi na Yehova a animá mi mashá. Nos a ègt gusta nos asignashon den e trabou di sirkuito. Nos tabata traha den teritorionan no asigná pa algun aña, i awor tabata un bunita bendishon pa ta entre asina tantu ruman.

Despues nos a haña nos ta tuma un desishon importante ora Arthur a haña invitashon pa asistí na un kurso di dies luna na e Skol di Galaad. Nos a yega na e konklushon ku maske mi mester a keda atras, tabata korekto pa Arthur aseptá e privilegio ei. Komo ku mi a keda sin un partner, nan a manda mi bèk Hemsworth komo pionero spesial. Ora Arthur a bini bèk un aña despues, nos a haña asignashon pa sirbi den trabou di distrito na Eskosia, nort di Inglatera i Nort Irlanda.

Na 1964 Arthur a haña asignashon pa sirbi komo sirbidó di sukursal na Repúblika di Irlanda. Nos a disfrutá mashá di e trabou di sirkuito i distrito, p’esei na promé instante, mi tabatin miedu di hasi e kambio ei. Ora mi wak bèk, awor mi ta masha gradisidu ku mi a haña e privilegio di por sirbi na Bètel. Mi ta kere ku si bo aseptá un asignashon asta ora bo no tin ègt gana di hasié, semper Yehova lo bendishoná bo. Mi dianan tabata yená ku trabou di ofisina. Ademas mi mester a paketá literatura, kushiná i limpia. Pa un tempu, nos tabata den trabou di distrito i nos por a bishitá rumannan den henter e pais. Esaki i tambe ora nos mira nos studiantenan di Beibel hasi progreso spiritual a krea un banchi fuerte ku nos famia spiritual na Irlanda. Ki un bendishon!

E promé kongreso internashonal na Irlanda a ser tené na Dublin na aña 1965. * Apesar di oposishon intenso, e kongreso tabata un éksito rotundo. Un total di 3.948 hende a asistí i 65 hende a batisá. Tur hende ku a proveé hospedahe pa e 3.500 delegadonan internashonal a haña un karta di gradisimentu. E doñonan di kas na nan turno a elogiá e kondukta di e delegadonan. Esei en bèrdat tabata un kambio grandi pa Irlanda.

Na 1966, tantu Nort Irlanda komo Repúblika di Irlanda a bin kai bou di e sukursal di Dublin. E union ei a forma un kontraste grandi ku e divishon polítiko i religioso riba e isla. Nos a keda masha kontentu di mira kuantu hende katóliko a haña e bèrdat i sirbi Yehova huntu ku rumannan ku un tempu tabata protestant.

Na 2011, nos bida a kambia por kompleto ora e sukursalnan di Bretaña i Irlanda a uni i nos a haña asignashon pa bai e sukursal na Lònden. E notisia ei a bini nèt ora mi a kuminsá preokupá pa Arthur su salú. Dòkter a diagnostik’é ku malesa di Parkinson, i riba 20 di mei 2015, mi kompañero di 66 aña a fayesé.

Den e último añanan mi a pasa den sufrimentu, periodonan di depreshon i tristesa. Den pasado, semper mi por a konta ku Arthur. Mi ta sinti su falta mashá! Pero ora bo pasa den situashonnan asina, bo ta hala mas serka Yehova. Ademas, ta masha bunita pa mira kuantu e rumannan tabata stima Arthur. Mi a haña karta di rumannan na Irlanda, Bretaña i asta Merka. E kartanan akí huntu ku animashon di parti di Arthur su ruman hòmber Dennis, su kasá, Mavis, i mi subrinanan, Ruth i Judy, a yuda mi masha hopi mes.

Un teksto ku a animá mi mashá ta Isaías 30:18. E ta bisa: “SEÑOR ta anhelá di ta miserikòrdioso ku boso, i p’esei e lo wòrdu halsá pa tene kompashon ku boso. Pasobra SEÑOR ta un Dios di huisio; bendishoná ta tur esnan ku ta spera riba dje.” Ta un gran konsuelo pa sa ku Yehova ta warda ku pasenshi pa solushoná asuntunan i duna nos asignashonnan emoshonante den su mundu nobo.

Ora mi wak bek riba nos bida, mi por mira kon Yehova a guia i dirigí e trabou di prediká na Irlanda. Ta un gran onor di por a kontribuí ku un granito den e oumento spiritual ei. Un kos ta sigur, semper nos ta haña bendishon ora nos hasi loke Yehova ta pidi.