BO TA lucha tur siman pa hasi bo estudio personal? Bo ta haña ku e ta laf i ku bo no tin niun tiki gana di hasié? Esei ta pasa ku nos tur. Tin hopi kos ku nos ta hasi regularmente aunke nan ta eksigí tempu i esfuerso, manera baña. Ma despues nos ta sinti nos hopi dushi i refreská! Bo estudio di Beibel tambe por ta refreskante, meskos ku un “baño di awa pa medio di e palabra.” (Efe. 5:26) Ban wak algun tep ku por yuda bo logra esei:

• Traha un skèdjel. Bo estudio personal ta algu ku bo no por neglishá. E ta un di “e kosnan mas importante.” (Flp. 1:10) Pa yuda bo pega na bo skèdjel, pon’é un kaminda ku ta fásil pa bo mir’é, manera na frishidèr. Òf, usa bo telefòn òf tablet pa pone un alarma djis promé ku bo ora di studia.

• Adaptá na loke ta pas ku bo. Kiko ta mas fásil pa abo? Sinta studia un ora largu, òf parti e tempu den pida pida? Abo sa loke ta mihó pa bo. Pues, skohe loke ta pas ku bo. Pero kiko si ora e momento di studia yega, bo no tin gana? Wèl, purba di studia maske ta 10 minüt. Ta mihó studia un ratu so ku keda sin hasié. Anto unabes bo kuminsá, kisas bo ta haña gana di sigui.​—Flp. 2:13.

• Skohe tópikonan adelantá. Si ta ora bo ta bai studia bo ta bai pensa kiko pa studia, lo bo no ta “usando [bo] tempu di e mihó manera.” (Efe. 5:16) Ta mihó pa traha un lista adelantá di artíkulo òf tópiko ku bo ke studia. Asina un pregunta bini na bo mente, skirbié mesora. Anto na final di kada estudio, kisas bo a haña mas tópiko pa pone riba bo lista.

• Keda fleksibel. Básikamente, e kos di mas importante ta pa bo studia tur siman. Pa logra esei, si ta nesesario, ahustá e dia, ora, kiko pa studia i kon largu.

Studia tur siman ta bon pa nos mes, pasó nos lo hala mas serka di Yehova, siña tuma bon desishon i sinti nos refreská.​—Hos. 1:8.