TABATA un mainta fresku i kla na Brookings, South Dakota, Merka. Aire tabata friu, i esei a pone mi kòrda ku pronto lo a bira wenter. Pero lo bo keda sorprendí di sa ku riba e dia ei ami ku un grupito di hende tabata tembla di friu den un mangasina sin kalefakshon. Nos tabata pará dilanti di un baki di awa pa bestia ku tabata parsialmente yená ku awa friu. Laga mi konta bo un tiki di mi mes pa bo komprondé dikon mi tabata einan.

Mi a nase dia 7 di mart 1936, i mi ta e ruman di mas chikí di nos kuater ku ta ruman. Nos tabata biba riba un boerderij chikitu den parti ost di South Dakota. E boerderij tabata un parti importante di nos bida, pero no e kos di mas importante. Mi mayornan a batisá komo Testigu di Yehova na 1934. Komo ku nan a dediká nan bida na nos Tata selestial, Yehova, nan promé prioridat tabata pa hasi e boluntat di Dios. Mi tata, Clarence, i mas despues mi tio, Alfred, a sirbi komo sirbidó di kongregashon (ku awor yama koordinadó di e kuerpo di ansiano) den nos kongregashon chikitu na Conde, South Dakota.

Asistensia na reunion i predikashon di kas pa kas pa konta hende tokante nos maravioso speransa pa futuro tabata parti di nos rutina di bida. E ehèmpel di mi mayornan i e entrenamentu ku nan a duna nos tabatin un impakto profundo riba nos komo yu. Ami ku mi ruman muhé, Dorothy, a bira publikadó ora nos tabatin seis aña. Na 1943, mi a inskribí mi mes den e Skol di Ministerio Teokrátiko, ku a kaba di bira un parti di nos reunionnan.

E kongreso- i asambleanan tabata un parti importante di nos bida. Ruman Grant Suiter tabata e oradó bishitante na un kongreso na 1949 na Sioux Falls, South Dakota. Ainda mi por kòrda su diskurso: “Ta Mas Lat Ku Bo Ta Kere.” El a  enfatisá ku tur kristian dediká mester hasi nan máksimo esfuerso den e trabou di proklamá e bon notisia di ku e Reino di Dios ta gobernando den shelu. Esei a motivá mi pa dediká mi bida na Yehova. Na e siguiente asamblea di sirkuito, na Brookings, mi tabata pará den e mangasina friu ku mi a deskribí na komienso, ta warda mi bùrt pa mi batisá. E baki di awa di zink tabata nos ‘pisina’ di boutismo riba 12 di novèmber 1949.

Despues, mi meta tabata pa bira un pionero, i mi a kuminsá traha pionero dia 1 di yanüari 1952, tempu mi tabatin 15 aña. Beibel ta bisa: “Esun ku anda ku hende sabí lo ta sabí.” I tabatin vários hende sabí den mi famia ku a apoyá mi desishon pa traha pionero. (Pro. 13:20) Mi tio Julius, kende tabatin 60 aña, a bira mi kompañero pionero. Apesar di nos diferensia di edat, nos a pasa dushi tempunan ku otro den sirbishi. Mi a saka hopi lès práktiko for di su eksperensianan di bida. No a dura muchu ku Dorothy tambe a bira pionero.

Durante mi hubentut, mi mayornan a invitá hopi superintendente di sirkuito i nan esposa pa keda serka nos. E pareha Jesse ku Lynn Cantwell a yuda mi hopi. Nan tabata dos di e rumannan ku a animá mi mashá pa kuminsá traha pionero. Nan interes personal den mi a lanta mi deseo pa pone metanan teokrátiko. Ora nan tabata bishitá e kongregashonnan den bisindario, tin biaha nan tabata invitá mi pa bai den sirbishi ku nan. Esei tabata masha agradabel i animante.

Despues Bud Miller ku su kasá, Joan, tabata bishitá nos kongregashon tempu nan tabata den e trabou di sirkuito. E tempu ei mi tabatin 18 aña, i mi a haña mi ku e kuestion di drenta servisio militar. Na promé instante, e komité ku tabata reklutá sòldá nobo a duna mi un klasifikashon ku segun mi no tabata di akuerdo ku e mandamentu ku Hesus a duna su siguidónan pa keda neutral den asuntunan polítiko. I ami kier a prediká e bon notisia di e Reino. (Huan 15:19) Mi a apelá nan desishon i a pidi e komité pa klasifiká mi komo un representante religioso.

Mi tabata masha gradisidu na Ruman Miller ku a ofresé su mes pa bai ku mi ora e komité mester a trata mi kaso. E tabata un ruman masha mondig i no tabata laga hende intimid’é fásilmente.  E echo ku mi tabatin un hende ku e kualidatnan ei i asina spiritual huntu ku mi a duna mi hopi konfiansa. Na final di e zomer di aña 1954, e komité a klasifiká mi komo un representante religioso. Esei a habri kaminda pa mi logra un otro meta teokrátiko.

Rònt di e tempu ei, mi a haña un invitashon pa bai sirbi na Bètel, na un kompleho ku e tempu ei tabata yama Watchtower Farm, na Staten Island, New York. Mi tabatin e privilegio di sirbi einan pa mas o ménos tres aña. Mi a haña hopi eksperensia maravioso pasobra mi a konosé hopi hende sabí i a traha huntu ku nan.

E boerderij na Staten Island tabatin e radio emisora WBBR, ku Testigunan di Yehova tabata usa di 1924 pa 1957. Solamente 15 pa 20 miembro di e famia di Bètel a haña asignashon pa traha na e boerderij. Mayoria di nos tabata yòn i sin eksperensia. Pero nos tabatin Eldon Woodworth, un ruman hòmber ungí, huntu ku nos. El a demostrá di ta un hòmber berdaderamente sabí. El a mustra interes den nos manera un tata ta mustra interes den su yunan, i esei a hasi nos spiritualmente fuerte. Ora ku tin biaha tabata difísil pa trata ku e imperfekshonnan di otro hende, Ruman Woodworth tabata bisa: “Sin duda ta masha impreshonante pa mira kiko Señor a logra ku loke e tin pa traha kuné.”

Nos tabatin e privilegio spesial di tin Ruman Frederick W. Franz tambe huntu ku nos. Su sabiduria i konosementu eksepshonal di e Skritura tabatin un bon influensia riba nos tur, i el a mustra interes personal den kada un di nos. Ruman Harry Peterson tabata nos kòki; tabata mas fásil pa usa e fam ei ku su fam mes, Papargyropoulos. E tambe tabata ungí i tabatin un zelo sobresaliente pa sirbishi. Ruman Peterson tabata kumpli bon ku su trabou na Bètel, pero nunka el a neglishá sirbishi di vèlt. Tur luna e tabata laga sientos di nos revistanan. E tabata konosé e Skritura a fondo i tabata kontestá hopi di nos preguntanan.

Na e boerderij mes nos tabata prosesá e fruta- i bèrduranan ku tabata ser produsí i hinka nan den bleki. Tur aña, nos tabata hinka mas o ménos 42.600 liter di fruta ku bèrdura den bleki pa  henter e famia di Bètel. Mi tabatin e privilegio di traha huntu ku Etta Huth, un ruman muhé hopi sabí. Ta e tabata responsabel pa e resetanan ku nos tabata usa pa konserbá e fruta- i bèrduranan. Den e temporada mas drùk, ruman muhénan lokal tabata bini pa yuda, i Etta tabata yuda organisá nan trabou. Apesar ku Etta tabatin un trabou importante, el a pone un bon ehèmpel den mustra rèspèt na e ruman hòmbernan ku tabata dirigí na e boerderij. Mi a mir’é komo un bon ehèmpel di sumishon na e órden teokrátiko.

Un di e ruman muhénan yòn ku a bin yuda hinka fruta i bèrdura den bleki tabata Angela Romano. Etta a yud’é ora el a drenta e bèrdat. Pues, tempu mi tabata sirbi na Bètel, mi a konosé e ruman muhé sabí akí, ku kende mi tin awor 58 aña kasá. Ami ku Angie a kasa na aprel 1958, i huntu nos a disfrutá di hopi privilegio di sirbishi. Atraves di añanan, Angie su lealtat inkebrantabel na Yehova a fortalesé nos matrimonio mashá. Mi por konta kuné, sea kual sea e retonan ku nos enfrentá.

Na 1957, ora ku a bende e radio emisora di WBBR na Staten Island, mi a sirbi na e Bètel di Brooklyn pa un tempu kòrtiku. Despues ku ami ku Angie a kasa, mi a sali for di Bètel i pa mas o ménos tres aña nos a traha pionero na Staten Island. Pa un tempu, mi a asta traha pa e doñonan nobo di e stashon di radio, ku tabata yama WPOW.

Ami ku Angie tabata determiná pa mantené nos bida simpel ya nos por tabata kla pa sirbi kaminda tabatin nesesidat. Komo resultado, na prinsipio di aña 1961, nos por a aseptá e asignashon pa sirbi komo pionero spesial na Falls City, Nebraska. Poko despues ku nos a yega einan, nos a haña invitashon pa asistí na e Skol di Ministerio di Reino; e tempu ei, e tabata un kurso di un luna na South Lansing, New York. Nos a disfrutá di nos entrenamentu i a spera di usa loke nos a siña ora nos a bai bèk Nebraska. Pero nos a keda sorprendí ora nos a haña un asignashon nobo: traha komo misionero na Cambodja. Na e bunita pais akí na Zùitost Asia nos a disfrutá di paisahe-, zonido- i aromanan eksótiko ku tabata kompletamente nobo pa nos. Nos tabatin masha gana di plama e bon notisia einan.

Pero e situashon polítiko a kambia, i nos mester a muda bai Zùit Vietnam. Lamentablemente, denter di dos aña mi a bira hopi malu, i nos a haña rekomendashon pa bai Merka bèk. Mi tabatin mester di tempu pa mi rekuperá, pero unabes mi tabata bon, nos a bolbe drenta e sirbishi di tempu kompleto.

Na mart 1965 nos tabatin e privilegio di kuminsá bishitá e kongregashonnan den e trabou di sirkuito. Pa 33 aña ami ku Angie a disfrutá tantu di e trabou di sirkuito komo di distrito, inkluso e trabounan ku nos a hasi promé i durante e kongresonan. Semper mi tabata gusta kongreso, pues tabata masha dushi pa yuda organisá e eventonan akí. Pa algun aña nos tabata na New York City, i tabatin vários kongreso na e Stadion di Yankees.

Manera ta e kaso ku hopi ruman ku ta den sirbishi spesial di tempu kompleto, tabatin algun asignashon fasinante pa ami ku Angie na kaminda. Por ehèmpel, na 1995, nan a pidi mi pa  sirbi komo instruktor di e Skol di Entrenamentu Ministerial. Tres aña despues, nos a haña e invitashon pa sirbi na Bètel. Tabata un gran goso pa ta bèk kaminda mi a kuminsá mi sirbishi spesial di tempu kompleto mas ku 40 aña mas promé. Pa un tempu mi a traha den e Departamento di Sirbishi i tambe komo instruktor den vários skol. Na 2007, e Kuerpo Gobernante a pone e skolnan na Bètel bou di supervishon di un departamento nobo ku yama Departamento di Skolnan Teokrátiko, i pa algun aña mi tabatin e privilegio di sirbi komo e superintendente di e departamento ei.

Resientemente, nos a mira vários kambio grandi den e skolnan teokrátiko. E Skol pa Ansiano di Kongregashon a kuminsá na aña 2008. Durante e siguiente dos añanan, mas ku 12.000 ansiano a haña entrenamentu na Bètel di Patterson i Brooklyn. Ta sigui tene e skol ei na diferente otro sitio, i instruktornan den vèlt ku ta kapasitá ta duna e entrenamentu. Na 2010, a kambia nòmber di e Skol di Entrenamentu Ministerial pa Skol Bíbliko pa Ruman Hòmber Soltero, i tambe a forma un skol nobo: Skol Bíbliko pa Pareha Kristian.

Desde e aña di sirbishi 2015, a kombiná e dos skolnan ei i a forma e Skol pa Predikadó di Reino. E studiantenan por ta parehanan kasá òf ruman hòmber òf muhé soltero. Hopi ruman rònt mundu a keda masha kontentu di tende ku e skol akí lo ser tené na vários sukursal. Ta masha emoshonante pa mira oportunidat pa ekspandé edukashon teokrátiko, i mi ta masha gradisidu ku mi a konosé hopi ruman ku ta dispuesto pa haña e entrenamentu akí.

Ora mi wak bèk riba e tempu promé ku mi a batisá den e baki di awa te ku aworakí, mi ta gradisí Yehova pa tur e rumannan sabí ku a yuda mi riba e kaminda di e bèrdat. E rumannan ei tabata di diferente edat i kultura, i nan tabata hopi spiritual. Nan amor profundo pa Yehova tabata bisto na nan aktitut i akshonnan. Den e organisashon di Yehova tin hopi ruman sabí ku kendenan nos por sera amistat. Mi a hasi esei, i mi a saka hopi benefisio.