YOMARA ta biba den un pueblo chikitu na Guatemala ku su dos rumannan—Marcelo i Hiver. Yomara a kuminsá studia Beibel ku Testigunan di Yehova, i ku tempu su dos rumannan a djòin e estudio. Pero tabatin un problema. Nan tur tres ta siegu i no por a lesa braille tampoko. P’esei, e ruman ku tabata studia Beibel ku nan tabata lesa e paragrafnan i e tekstonan di Beibel pa nan.

E Salòn di Reino mas serka di nan kas tabata 40 minüt leu. P’esei tabata hopi difísil pa nan yega Salòn riba nan mes. Pero, e rumannan tabata yuda nan asistí na tur reunion. Anto ora nan a kuminsá duna parti, e rumannan a yuda nan siña nan parti for di kabes.

Na mei 2019, a kuminsá tene reunion na nan pueblo. Pa e ora ei, un pareha kasá pionero tabata biba den e pueblo. Aunke nan mes no tabata sa nada tokante braille, nan a pone komo meta pa siña e tres hóbennan akí kon pa lesa i pa skirbi braille. P’esei nan a bai biblioteka pa fia buki tokante braille pa asina ei nan haña sa kon pa siña otro hende lesa i skirbi braille.

Denter di un par di luna, e tres hóbennan por a lesa braille sin niun problema, i asina ei nan por a progresá den sentido spiritual. a Awor nan tur tres ta pionero regular i Marcelo ta sirbidó ministerial. Henter siman nan ta okupá nan mes ku kosnan spiritual. Nan ta sirbi Yehova ku asina tantu entusiasmo ku e otro rumannan den kongregashon ke hasi meskos.

E tres hóbennan ta masha gradisidu pa e amor ku nan a haña di e kongregashon. Yomara a bisa: “For di e promé biaha ku nos a topa ku Testigunan di Yehova, nan a demostrá nos berdadero amor kristian.” Marcelo a agregá: “Nos tin bon amigu den nos kongregashon i nos ta forma parti di un hermandat internashonal ku ta uní pa amor.” Yomara i su dos rumannan ta anhelá e dia pa mira kon Yehova lo kambia e mundu akí den un paradeis.​—Sal. 37:10, 11; Isa. 35:5.