Sésar Ougusto, emperador di e Imperio Romano, a saka un dekreto ku ta bisa ku tur hende mester a registrá nan mes na nan stat natal. Pues, Hose ku Maria mester a bai Hose su stat natal, esta, Bètlehèm, ku tabata keda zùit di Herúsalèm.

Tabatin un kantidat di hende ku a bini Bètlehèm pa registrá nan mes. P’esei, e úniko lugá di keda ku Hose ku Maria por a haña tabata un stal, kaminda e hendenan tabata kuida buriku i otro bestia. Einan Hesus a nase. Maria a lor’é den paña i a pon’é den un pesebre, un baki ku bestia tabata kome aden.

Ta Yehova Dios mes a laga Sésar Ougusto saka e lei pa hende registrá nan mes. Dikon? Pasobra di e manera ei Hesus por a nase na Bètlehèm, e stat natal di su antepasado Rei David. Hopi tempu adelantá, e Skritura a profetisá ku e Gobernante primintí lo a nase na Bètlehèm.—Mikéas 5:2.

Tabata un anochi importante! Pafó den kunuku, tabatin algun wardadó di karné ta vigilá nan bestianan. Diripiente un lus briante a rondoná nan. Tabata e gloria di Yehova! I un angel di Yehova a bisa nan: “No tene miedu, ya ku mi a bini pa deklará bon notisia na boso ku lo hasi tur hende masha kontentu, pasobra awe den e stat di David a nase esun ku lo ta boso Salbador, kende ta Kristu, e Señor. I esaki ta un señal pa boso: Boso lo haña un yu chikitu lorá den paña i drumí den un pesebre.” I diripiente hopi angel mas a aparesé i bisa: “Gloria na Dios ku ta den shelu, i pas riba tera entre hende ku e ta aprobá.”—Lukas 2:10-14.

Despues ku e angelnan a bai, e wardadónan a bisa otro: “Laga nos ban Bètlehèm pa mira kiko a pasa einan, esta, lokual Yehova a revelá na nos.” (Lukas 2:15) I nan a bai purá i a haña e yu chikitu kaminda e angel a bisa nan. Ora e wardadónan a konta loke e angel a bisa nan, tur hende a keda asombrá. Maria a warda tur e palabranan akí den su kurason i a keda pensa riba kiko nan a nifiká.

Awendia, hopi hende ta kere ku Hesus a nase dia 25 di desèmber. Pero desèmber ta temporada di áwaseru den e área di Bètlehèm i ta hasi hopi friu. Tin ora, asta sneu ta kai. Pues, durante e temporada ei di aña, wardadónan lo no a pasa anochi pafó den kunuku huntu ku nan bestianan. Ademas, e emperador di Roma lo no a eksigí pa hende, ku ya tabatin tendensia di lanta kontra dje, hasi un biahe di dianan largu den pleno wenter pa bai registrá nan mes. Pues, aparentemente, Hesus a nase den òktober.