Probablemente, ainda Hesus i su disipelnan tabata na kas di Zakeo. Despues, nan lo a sigui rumbo pa Herúsalèm. E disipelnan tabata kere eróneamente ku “e Reino di Dios,” ku Hesus komo Rei, lo a ser establesí den nan tempu. (Lukas 19:11) Ademas, nan no tabata komprondé ku Hesus lo mester a muri. P’esei, Hesus a konta nan un otro ilustrashon pa yuda nan komprondé ku tabata falta hopi tempu ainda pa e Reino ser establesí.

El a bisa: “Un hòmber di nasementu noble a biaha bai un tera leu pa keda koroná komo rei i bini bèk.” (Lukas 19:12) Un biahe asina lo a tuma su tempu. Ta opvio ku ta Hesus tabata e “hòmber di nasementu noble,” kende mester a biaha bai un “tera leu,” esta, shelu, kaminda su Tata lo a koron’é.

Hesus a sigui konta ku promé ku e “hòmber di nasementu noble” a bai e tera leu el a yama dies esklabo pa duna kada un di nan un mina di plata. Anto el a bisa nan: “Hasi negoshi ku nan te ora mi bini.” (Lukas 19:13) Un mina di plata tabatin hopi balor. E tabata ekivalente na algu mas ku tres luna di salario di un trahadó di kunuku.

Podisé e disipelnan a pensa ku ta na nan Hesus tabata referí ora el a papia di e dies esklabonan den e ilustrashon, pasobra Hesus a yega di kompará nan un biaha kaba ku hende ku ta hasi e trabou di kosechá. (Mateo 9:35-38) Ta klaru ku Hesus no tabata referí na kosecha literal. Mas bien, nan mester a bai hasi otro hende disipel pa e personanan akí tambe por a forma parti di e Reino di Dios. I nan a usa tur nan tempu, nan energia i asta nan kosnan material pa alkansá mas heredero di e Reino.

Kiko mas Hesus a revelá pa medio di e ilustrashon akí? Wèl, e ilustrashon ta mustra ku e paisanonan di e hòmber di nasementu noble “tabatin rabia riba [e hòmber], i nan a manda un delegashon tras di dje pa bisa: ‘Nos no ke pa e hòmber akí bira rei riba nos.’” (Lukas 19:14) E disipelnan tabata sa ku e hudiunan no a aseptá Hesus i ku algun di nan tabata ke asta mat’é. Despues ku Hesus a muri i bai shelu, e hudiunan a demostrá di bèrdat kiko nan tabata pensa di Hesus. E opositornan akí a persiguí su disipelnan mustrando asina ku nan no tabata ke Hesus komo Rei.—Huan 19:15, 16; Echonan 4:13-18; 5:40.

Awor, kon e dies esklabonan lo a usa nan mina te ora ku e “hòmber di nasementu noble” keda “koroná komo rei” i bolbe? Hesus a sigui konta: “Ku tempu, ora [e hòmber] a bini bèk despues di a keda koroná komo rei, el a manda yama e esklabonan ku el a duna e plaka, pa e por a haña sa kuantu nan a gana hasiendo negoshi. Anto e promé a bini dilanti i a bisa: ‘Señor, bo mina a gana dies mina.’ Di manera ku el a bis’é: ‘Hopi bon, bo ta un bon esklabo! Komo ku bo a demostrá ku bo ta fiel den un asuntu masha chikitu, risibí outoridat riba dies stat.’ Awor e di dos a bini i a bisa: ‘Señor, bo mina a produsí sinku mina.’ El a bisa esun akí tambe: ‘Abo tambe, tuma enkargo di sinku stat.’”—Lukas 19:15-19.

Si e disipelnan a komprondé ku nan mester tabata manera e esklabonan ku a usa nan tempu, energia i kosnan material bon pa hasi mas disipel, nan lo por tabatin sigur ku Hesus lo a keda kontentu ku nan. I nan por tabatin e konfiansa ku Hesus lo a rekompensá nan pa nan esfuerso. Ta klaru ku no ta tur disipel di Hesus tin mesun sirkunstansianan den bida ni mesun oportunidatnan, kapasidat òf abilidatnan. No opstante, Hesus, kende a keda “koroná komo Rei,” a bendishoná i lo sigui bendishoná su disipelnan pa nan esfuerso diligente den e trabou di hasi disipel.—Mateo 28:19, 20.

Na final di su ilustrashon, Hesus a hasi e siguiente kontraste: “Ma un otro [esklabo] a bini i a bisa: ‘Señor, ata bo mina akí; mi a ward’é den un pida paña. E kos ta ku mi tabatin miedu di bo, pasobra  bo ta un hòmber masha strèn; bo ta lanta loke bo no a depositá, i bo ta kosechá loke bo no a sembra.’ [E hòmber di nasementu noble] a kontest’é: ‘Esklabo malbado, mi ta usa bo mes palabranan pa husga bo. Ke men, bo tabata sa ku mi ta un hòmber masha strèn, ku ta lanta loke mi no a depositá i ta kosechá loke mi no a sembra? Pakiko anto bo no a pone mi plaka na banko? E ora ei lo mi por a lant’é ku interes ora mi yega.’ Anto el a bisa esnan pará ei banda: ‘Kita e mina for di dje i dun’é na esun ku tin dies mina.’”—Lukas 19:20-24.

Sí, e esklabo akí a sufri pèrdida pasobra e no a hasi nada pa oumentá rikesa di su doño. E apòstelnan tabata antisipá e dia ku Hesus lo a kuminsá reina den e Reino di Dios. Pues, loke Hesus a bisa tokante e último esklabo akí lo a laga nan komprondé ku nan mester tabata diligente. Di otro manera, nan lo no a haña un lugá den e Reino selestial.

Pues, Hesus su palabranan lo mester a motivá su disipelnan fiel pa hasi mas den e trabou di prediká i di hasi disipel. Hesus a konkluí su ilustrashon, bisando: “Mi ta bisa boso: Tur hende ku tin lo risibí mas, ma esun ku no tin, asta loke e tin lo ser kitá for di dje.” El a sigui bisa ku su enemigunan, kendenan no tabata ke pa e “bira rei riba nan,” lo a ser matá. Despues, Hesus a sigui su kaminda pa Herúsalèm.—Lukas 19:26-28.