Na e bahada parti ost di Seru di Oleifi, na un distansia di mas o ménos tres kilometer for di Herúsalèm, tabatin un pueblito ku tabata yama Betania. (Huan 11:18) Hesus a bai einan i a bishitá dos ruman muhé, Marta i Maria. E dos ruman muhénan akí i nan ruman hòmber Lázaro tabata bon amigu di Hesus. Nan a dun’é un kaluroso bonbiní.

Pa nan, tabata un onor pa risibí e Mesías. Marta tabata ke sirbi Hesus bon, p’esei mesora el a kuminsá prepará henter un bankete. Miéntras ku Marta tabata okupá ku e keasernan, su ruman muhé Maria a kai sinta na pia di Hesus pa skuch’é. Un ratu despues, Marta a bin bisa Hesus: “Señor, bo no ta mira ku mi ruman ta laga mi so atendé tur kos? Bis’é bin yuda mi.”—Lukas 10:40.

Hesus no a reklamá Maria. Al kontrario, el a bisa Marta kende tabata muchu preokupá ku kosnan físiko: “Marta, Marta, bo ta anshá i preokupá ku hopi kos. Ma poko kos ta nesesario, òf asta ún so. Pa loke ta Maria, el a skohe e mihó parti, i lo no kita esei for di dje.” (Lukas 10:41, 42) Sí, Hesus a mustra ku no tabata nesesario pa prepará hopi kuminda pasobra esei lo a eksigí hopi tempu. Un kuminda simpel mes tabata bon.

Marta tabatin bon intenshon. E tabata ke ta hospitalario. Pero debí ku e tabata asina anshá i preokupá pa e kuminda, el a pèrdè un bon chèns di skucha e konseho- i instrukshonnan balioso ku e Yu di Dios tabata duna. Di otro banda, manera Hesus a mustra, Maria a tuma un desishon sabí. Su desishon lo a trese benefisionan eterno p’e i ta sirbi komo un lès pa nos.

Awor, na un otro okashon, Hesus a duna un lès mes importante pero diferente. Tabata asina ku un disipel a pidié: “Señor, siña nos hasi orashon, meskos ku Huan tambe a siña su disipelnan.” (Lukas 11:1) Hesus a yega di siña nan hasi orashon kaba, un aña i mei mas promé, den su Sermon Riba Seru. (Mateo 6:9-13) Podisé e disipel akí no tabata presente na e okashon ei, p’esei Hesus a ripití e puntonan importante. Despues, el a konta un ilustrashon pa enfatisá e importansia di persistí den orashon.

El a bisa: “Suponé ku un di boso tin un amigu, i meianochi boso ta bai serka dje i bis’é: ‘Mi amigu, fia mi tres pan, pasobra un amigu di mi a kaba di yega serka mi di un biahe i mi no tin nada pa dun’é.’ Ma for di paden e amigu ta kontestá: ‘Stòp di molestiá mi. E porta ta será na yabi kaba, i mi yu chikitunan ta drumí huntu ku mi riba kama; mi no por lanta pa duna bo nada.’ Mi ta bisa boso: Lo e lanta i duna su amigu loke e tin mester, no pasobra e ta su amigu, sino pa motibu ku e amigu tabatin e tribilidat di insistí.”—Lukas 11:5-8.

Hesus no tabata ke men ku Yehova ta manera e amigu den e ilustrashon, esta, un persona ku no ta kla pa kumpli ku petishon di otronan. Mas bien, Hesus kier a ilustrá ku si un amigu ku no tabata muchu dispuesto mes ta kumpli ku petishon di su amigu, nos amoroso Tata selestial sigur lo onra e petishonnan sinsero di su fiel sirbidónan. Hesus a sigui bisa: “Mi ta bisa boso: Sigui pidi, i boso lo risibí; sigui buska, i boso lo haña; sigui bati na porta, i lo habri pa boso. Pasobra ken ku pidi ta risibí, i ken ku buska ta haña, i pa ken ku bati na porta, lo habri.”—Lukas 11:9, 10.

Despues, pa hasi su punto mas kla ainda, Hesus a puntra: “Tin un tata entre boso ku si su yu pidié un piská, e ta dun’é un kolebra en bes di un piská? Òf si e pidié tambe un webu, e ta dun’é un skòrpion? P’esei, si boso, aunke boso ta malbado, sa di duna boso yunan bon regalo, kuantu mas e Tata ku ta den shelu lo duna spiritu santu na esnan ku pidié!” (Lukas 11:11-13) Ki un bunita komparashon! E ta duna nos e garantia ku nos Tata selestial ta kla pa skucha nos i kumpli ku nos nesesidatnan!