Ainda Hesus tabata na Herúsalèm i tabata sabat. E i su disipelnan tabata kanando den e stat i nan a mira un limosnero ku a nase siegu. E disipelnan a puntra Hesus: “Rabi, ta ken a peka ku e hòmber akí a nase siegu, e òf su mayornan?”—Huan 9:2.

E disipelnan lo tabata puntra nan mes si un hende lo por a peka siendo den barika di su mama. Hesus a kontestá nan: “No ta piká di e hòmber akí ni di su mayornan a pon’é nase siegu, pero ta pa hende por mira e obra di Dios pa medio di su kaso.” (Huan 9:3) Pues, no tabata falta di e hòmber ni di su mayornan ku el a nase siegu; mas bien, ta debí na e piká ku Adam a kometé, tur hende ta nase imperfekto i por haña nan ku un desabilidat, manera sieguedat. E echo ku e hòmber akí tabata siegu a duna Hesus oportunidat pa laga hende mira e obranan di Dios, manera el a hasi na e otro okashonnan ku el a kura hende.

Anto Hesus a mustra ku tabata urgente pa hasi e obranan akí. El a bisa: “Nos mester hasi e obranan di Esun ku a manda mi tanten ku ta di dia; ta bai bira anochi, i e ora ei ningun hende no por traha. Tanten ku mi ta den mundu, mi ta e lus pa mundu.” (Huan 9:4, 5) Sí, poko tempu despues Hesus lo a muri i baha den skuridat di graf kaminda e no por a hasi nada. Pero tanten ku e tabata na mundu, e tabata e lus pa mundu.

Awor, Hesus lo a kura e hòmber? Si tabata asina, kon lo el a hasi esei? Hesus a skupi abou i traha lodo ku e skupi. Anto el a hunta un tiki di e lodo akí riba wowo di e hòmber siegu i a bis’é: “Bai laba bo wowo den e tanki di awa di Siloam.” (Huan 9:7) E hòmber a obedesé, i el a haña su bista! Bo por imaginá bo kon kontentu e hòmber ei lo a bira ora ku pa promé biaha e por a mira?

Bisiña i otronan ku tabata sa ku e hòmber akí tabata siegu a keda asombrá. Nan tabata puntra: “Ma no ta e hòmber ku tabata sinta pidi limosna esaki?” Algun hende a kontestá: “Sí, t’e.” Otronan no por a kere i tabata bisa: “No t’e, ma e pars’é.” Pero e hòmber mes tabata bisa: “Ta mi mes.”—Huan 9:8, 9.

Nan a puntr’é: “Ta kon bo a haña bo bista anto?” El a kontestá nan: “E hòmber ku yama Hesus a traha poko lodo i hunt’é riba mi wowo i bisa mi: ‘Bai Siloam i laba bo wowo.’ Pues, mi a bai laba mi wowo, i mi a haña mi bista.” E ora ei nan a puntr’é: “Unda e hòmber ei ta?” El a kontestá: “Mi no sa.”—Huan 9:10-12.

E hendenan a hiba e hòmber serka e fariseonan, kendenan tambe tabata ke sa kon bini e hòmber por a mira awor. E hòmber a bisa nan: “El a hunta lodo riba mi wowo, mi a laba mi wowo i mi a haña mi bista.” Normalmente, un hende lo a keda kontentu ku e limosnero akí a kura. Pero e  fariseonan sí no a keda kontentu. Algun di nan a kuminsá kritiká Hesus severamente, bisando: “Esaki no ta un hòmber di Dios, pasobra e no ta warda sabat.” Ma otronan tabata bisa: “Kon un hende ku ta pekadó por hasi e tipo di milagernan ei?” (Huan 9:15, 16) Pues, nan tabata dividí.

Komo ku nan tabata dividí, nan tabata ke sa kiko e hòmber mes tabatin di bisa. Nan a puntr’é: “Kiko abo ta pensa di dje, mirando ku el a laga bo haña bo bista?” E hòmber no tabatin ningun duda enkuanto Hesus. El a kontestá: “E ta un profeta.”—Huan 9:17.

E fariseonan no kier a ker’é. Kisas nan a pensa ku Hesus i e hòmber akí lo a trama henter e asuntu pa gaña hende. P’esei, nan a yega na e konklushon ku e mihó manera pa solushoná e asuntu tabata di puntra e mayornan di e hòmber si realmente e tabata siegu.