Segun ku Hesus tabata kome na kas di e fariseo, míles di persona tabata para pafó ta ward’é. Na Galilea tambe el a yega di hañ’é ku situashonnan asina. (Marko 1:33; 2:2; 3:9) Awor ku e tabata na Hudea, hopi hende a bini pa wak e i pa skuch’é; e hendenan akí tabatin un aktitut kompletamente diferente for di e aktitut di e fariseonan ku tabata paden, na e komementu.

Hesus a kuminsá papia tokante un tópiko ku tabata spesialmente importante pa su disipelnan. El a bisa: “Tene kuidou ku zürdeg di fariseo, lokual ta hipokresia.” Hesus a yega di spièrta su disipelnan kaba tokante esaki, pero loke a pasa na e komementu a kaba di mustra kon importante e spièrtamentu akí tabata. (Lukas 12:1; Marko 8:15) E fariseonan tabata skonde nan maldat i tabata hasi komo si fuera nan tabata hende masha deboto na Dios. P’esei, pa nan no a sigui forma un peliger pa hende, mester a saka nan hipokresia na kla. Hesus a bisa: “No tin nada asina bon skondí ku lo no keda revelá, ni nada sekreto ku lo no bira konosí.”—Lukas 12:2.

Podisé hopi di e hendenan ku a aglomerá rònt di Hesus tabata habitante di Hudea kendenan nunka a yega di tende loke Hesus a siña e hendenan na Galilea. P’esei, Hesus a ripití algun di e puntonan klave ku el a yega di siña hende. El a bisa su oyentenan: “No tene miedu di esnan ku ta mata e kurpa i despues di esaki no por hasi nada mas.” (Lukas 12:4) I Hesus a bolbe mustra kon importante ta pa su siguidónan konfia plenamente ku Dios lo perkurá pa nan. Ademas, nan mester deklará públikamente ku nan ta na banda di e Yu di hende i realisá ku Dios por yuda nan.—Mateo 10:19, 20, 26-33; 12:31, 32.

Den esei, un hòmber den e multitut a bisa algu ku tabata preokup’é. El a bisa Hesus: “Maestro, bisa mi ruman hòmber pa e parti e herensia ku mi tata a laga pa nos.” (Lukas 12:13) E Lei tabata bisa ku e yu mayó mester a haña dòbel porshon di un herensia, pues riba esei no mester tabatin diskushon. (Deuteronomio 21:17) Pero ta parse ku e hòmber akí tabata ke mas di loke legalmente e tabatin derecho riba dje. Wèl, Hesus a aktua na un manera sabí i no a tuma parti pa ningun di e dos rumannan akí. El a puntra e hòmber: “Ta ken a nombra mi komo hues òf komo esun ku tin ku parti boso herensia?”—Lukas 12:14.

Anto Hesus a konsehá e multitut: “Paga tinu i warda boso di tur sorto di golosidat, pasobra asta ora un hende tin na abundansia, su bida no ta dependé di loke e tin.” (Lukas 12:15) Sí, maske kon riku un hende por ta, un ora pa otro e por muri i laga tur kos atras, no ta bèrdat? Hesus a enfatisá e realidat akí ku un ilustrashon remarkabel ku a mustra tambe e balor di tin un bon nòmber serka Dios.

El a konta: “E tereno di un hòmber riku a produsí bon. P’esei, e hòmber a rasoná den su mes: ‘Kiko mi ta bai hasi awor? Pasobra mi no tin mas lugá pa warda mi kosecha.’ Di manera ku el a bisa: ‘Mi ta bai hasi esaki: Mi ta basha mi mangasinanan abou i traha otro mas grandi ainda, i den nan mi ta bai warda tur mi trigu i tur mi biennan, i lo mi bisa mi alma: “Alma, bo tin hopi kos bon wardá pa hopi aña; bai trankil, kome, bebe i gosa.”’ Ma Dios a bis’é: ‘Hòmber irasonabel, awe nochi nan ta bai eksigí bo alma for di bo. Anto ta ken lo keda ku tur loke bo a warda?’ Asina ta pasa ku e hende ku ta montoná tesoro pa su mes ma no ta riku den bista di Dios.”—Lukas 12:16-21.

Tantu e disipelnan di Hesus komo e otro oyentenan por a kai den e trampa di materialismo; nan por a kuminsá kore tras di rikesa òf montoná tesoro. Preokupashon di bida tambe por a  stroba nan di sirbi Yehova. P’esei, Hesus a ripití e konseho sabí ku el a duna un aña i mei promé den su Sermon Riba Seru.

El a bisa: “Stòp di ta anshá pa boso bida, esta, kiko boso lo kome, òf pa boso kurpa, esta, kiko boso lo bisti. . . . Wak e rafnan. Nan no ta sembra ni kosechá; nan no tin depósito ni mangasina. Tòg Dios ta alimentá nan. Boso no ta bal muchu mas ku para? . . . Wak kon e lelinan ta krese; nan no ta traha duru, ni no ta traha tela, ma mi ta bisa boso: Ni Sálomon den tur su gloria no a bisti manera un di e flornan akí. . . . P’esei, stòp di kana buska kiko boso lo kome i kiko boso lo bebe, i stòp di ta demasiado preokupá. . . . Boso Tata sa ku boso tin mester di e kosnan akí. . . . Buska su Reino kontinuamente, i lo e duna boso e kosnan akí.”—Lukas 12:22-31; Mateo 6:25-33.

Ken mester buska e Reino di Dios? Hesus a indiká ku un grupo relativamente chikitu, un “tou chikitu,” di hende fiel lo a hasi esei. Mas despues, e Skritura a revelá e kantidat: 144.000 persona. Kiko ta spera nan? Hesus a duna nan e siguiente siguransa: “Boso Tata a haña ta bon pa duna boso e Reino.” E personanan akí lo no a traha pa montoná tesoro riba tera, kaminda ladron por a hòrta nan. Mas bien, nan lo a enfoká nan kurason riba “tesoro den shelu ku no ta kaba nunka,” kaminda nan lo reina huntu ku Kristu.—Lukas 12:32-34.