Despues ku Hesus a duna su Sermon Riba Seru, el a bai Kapernaum. Ei, algun ansiano di e hudiunan a aserk’é na nòmber di un ofisial di e ehérsito romano.

E ofisial, òf funshonario di alto rango, akí tabatin un sirbidó ku e tabata stima mashá ku tabata hopi malu; e sirbidó tabata muriendo. Maske e ofisial no tabata hudiu, el a manda buska yudansa di Hesus. E ansianonan hudiu a bisa Hesus ku e sirbidó “ta drumí lam na kas” i ta sufri hopi; kisas e tabatin hopi doló. (Mateo 8:6) Nan a sigurá Hesus ku e ofisial ‘meresé su yudansa, pasobra e ta stima nan nashon i a laga traha snoa pa nan.’—Lukas 7:4, 5.

Hesus no a tarda pa bai ku nan. Ma ora nan tabata yegando e kas, e ofisial a manda algun amigu bai topa Hesus pa bis’é: “Señor, no molestiá, pasobra mi no ta digno pa laga bo bini bou di mi dak. P’esei mi no a konsiderá mi mes digno di bini serka bo.” (Lukas 7:6, 7) Ki un ekspreshon humilde di un hòmber ku tabatin kustumber di duna òrdu na otro hende! Su palabranan a mustra ku e tabata un hòmber diferente for di e romanonan kendenan tabata trata nan esklabonan malu.—Mateo 8:9.

E funshonario di alto rango akí sin duda tabata sa ku e hudiunan no tabatin mag di anda ni papia ku hende di otro rasa. (Echonan 10:28) Kisas ta pa e motibu ei lo el a manda su amigunan pa pidi Hesus mashá pa ‘djis papia un palabra i kura su sirbidó.’—Lukas 7:7.

Hesus a keda masha asombrá ora el a tende e palabranan ei. El a bisa: “Kere mi: Ni den Israel mi no a haña un fe asina grandi.” (Lukas 7:9) I ora e amigunan a yega kas bèk, nan a haña e esklabo, kende tabata malu, bon di salú.

Na e okashon ei, Hesus a mustra bon kla ku hende ku no tabata hudiu ku pone fe den dje tambe por a risibí bendishon. El a bisa: “Hopi hende lo bini for di ost i wèst, i nan lo sinta kome na mesa ku Abraham, Isak i Yakòb den e Reino di shelu.” Awor kiko di e hudiunan ku lo no a pone fe den Hesus? Hesus a bisa ku lo tira nan pafó, den skuridat, “kaminda nan lo yora i morde riba djente.”—Mateo 8:11, 12.

Pues, Dios lo a rechasá e hudiunan ku lo no a aseptá e invitashon ku nan a risibí, komo e promé hendenan, pa bira gobernante huntu ku Kristu. I hende di e nashonnan lo a haña chèns di sinta na mesa huntu ku Hesus “den e Reino di shelu.”