LÈS 48
Skohe Bo Amigunan Bon
Ta dushi ora nos tin bon amigu. Nos por pasa tempu plasentero huntu ku nan, i nan por yuda nos den tempu difísil. Pero Beibel ta spièrta nos ku no ta tur hende ta bon amigu pa nos. Pues, kon nos por skohe bon amigu? Laga nos trata e siguiente preguntanan.
1. Kon bo amigunan por influensiá bo?
Hopi biaha, nos por bira meskos ku e hendenan ku nos ta pasa tempu kuné. Nan por tin sea bon influensia òf mal influensia riba nos. Esei ta e kaso sea nos ta pasa tempu ku nan en persona òf via ret sosial. Beibel ta bisa: “Hende ku ta anda ku hende sabí ta bira sabí, pero hende ku tin amistat ku hende bobo [hende ku no ta stima Yehova] lo sufri daño.” (Proverbionan 13:20) Amigu ku ta stima i adorá Yehova por yuda nos keda banda di Yehova i yuda nos tuma bon desishon. Pero si nos tin amistat será ku hende ku no ta stima Yehova, esei por alehá nos for di Yehova. P’esei, ku bon motibu Beibel ta animá nos pa wak bon ken nos ta skohe komo amigu. Ora nos amigunan ta stima Yehova, nan lo tin bon influensia riba nos i nos tambe lo tin bon influensia riba nan. Di e manera ei, nos por “sigui animá otro i fortalesé otro.”—1 Tesalonisensenan 5:11.
2. Ta importante pa Yehova ken nos ta skohe komo amigu?
Yehova ta wak bon ken e ta skohe komo amigu. Beibel ta bisa: “E tin amistat será ku hende rekto.” (Proverbionan 3:32) Kon Yehova lo sintié si nos skohe amigu ku no ta stim’é? Yehova lo ta hopi desapuntá i tristu! (Lesa Santiago 4:4.) Di otro banda, si nos rechasá mal amigu i hala mas serka Yehova i serka hende ku ta stim’é, Yehova lo ta kontentu ku nos i lo e skohe nos komo su amigu.—Salmo 15:1-4.
KIKO MAS NOS POR SIÑA?
Laga nos wak dikon ta masha importante pa skohe bon amigu, i wak kon bo por skohe amigu ku di bèrdat ta bon pa bo.
3. Tene kuidou ku mal amigu
Hende ku no ta stima Yehova i su normanan no ta bon amigu pa nos. Pasa e VIDIO. Despues, analisá e siguiente pregunta:
-
Kon nos por kuminsá anda ku hende ku ta mal kompania pa nos sin ku nos ripará esei?
Lesa 1 Korintionan 15:33. Despues, analisá e siguiente pregunta:
-
Ki tipo di hende por ta mal amigu pa bo, i dikon?
Lesa Salmo 119:63. Despues, analisá e siguiente pregunta:
-
Kon bo por sa si un hende lo ta un bon amigu pa bo?
Un apel putrí por daña tur e otro apelnan ku ta huntu kuné. Kon un mal amigu por influensiá bo?
4. Hende ku ta diferente for di nos por bira nos bon amigunan
Beibel ta papia di dos hòmber di Israel di antigwedat ku tabata hopi bon amigu di otro, David i Yónatan. Aunke Yónatan tabata mas grandi ku David i tabata yu di un rei, nan tabatin un amistat será ku otro. Lesa 1 Sámuèl 18:1. Despues, analisá e siguiente pregunta:
-
Dikon nos amigunan no semper mester tin e mesun edat òf posishon sosial ku nos?
Lesa Romanonan 1:11, 12. Despues, analisá e siguiente pregunta:
-
Ora nos i nos amigunan ta stima Yehova, kon nos por animá otro?
Den e siguiente vidio, wak kon un ruman hòmber hóben a haña un amigu kaminda e no a spera. Pasa e VIDIO. Despues, analisá e siguiente preguntanan:
-
Dikon e mayornan di Akil a papia kuné tokante e amigunan ku e tabatin na skol?
-
Na prinsipio, dikon Akil tabata gusta e amistat ku e tabatin ku e muchanan na su skol?
-
Kiko Akil a hasi pa e stòp di sinti su mes su so?
5. Kon bo por haña bon amigu?
Wak kiko bo por hasi pa bo por haña bon amigu i kon abo por ta un bon amigu pa otro hende. Pasa e VIDIO.
Lesa Proverbionan 18:24 i 27:17. Despues, analisá e siguiente preguntanan:
-
Kon bon amigu ta yuda otro?
-
Bo tin bon amigu asina? Si no ta asina, kiko bo por hasi pa bo haña bon amigu?
Lesa Filipensenan 2:4. Despues, analisá e siguiente pregunta:
-
Pa bo por tin bon amigu, bo mes mester ta un bon amigu. Kiko bo por hasi pa bo ta un bon amigu?
Pa bo por tin bon amigu, bo mes mester ta un bon amigu
LOKE HENDE SA BISA: “No ta importá kiko bo amigunan ta kere aden, kontal ku nan ta trata bo bon.”
-
Kiko bo ta pensa?
RESÚMEN
Ora nos skohe bon amigu, nos ta hasi Yehova kontentu i nos mes tambe ta benefisiá.
Repaso
-
Dikon ta importante pa Yehova ken nos ta skohe komo amigu?
-
Ki tipo di amigu nos mester evitá?
-
Kon bo por tin amistat será ku hende ku ta stima Yehova?
MAS INFORMASHON INTERESANTE
Wak kon bon amigu por yuda nos den tempu difísil.
“Fortalesé Bo Amistatnan Promé ku Fin Yega” (E Toren di Vigilansia di novèmber 2019)
Wak kiko ta algun kos ku bo por hasi pa bo haña bon amigu.
“Kon Mi Por Haña Bon Amigu?” (Loke Hóben Sa Puntra—Kontesta Práktiko, Tomo 1, kapítulo 8)
Kiko bo mester sa tokante amistat ku hende ku bo ta siña konosé online?
Lesa e relato “Mi Tabatin Masha Gana di Tin un Tata” pa wak dikon un hòmber a buska amigu nobo.
“Beibel Ta Kambia Bida di Hende” (E Toren di Vigilansia di 1 di aprel 2012, na spañó)
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
