Yehova a duna hende e planeta Tera. Esei ta nos hogar. Pues, Dios no a krea e promé pareha humano, Adam ku Eva, pa biba den shelu; el a krea angel pa biba den shelu kaba. (Yòb 38:4, 7) Mas bien, Yehova a pone e promé hòmber den un bunita paradeis ku tabata yama Edén. (Génesis 2:15-17) El a duna Adam i su futuro desendientenan e speransa di biba pa semper riba tera.—Lesa Salmo 37:29; 115:16.

Na prinsipio, ta e hòfi di Edén so tabata un paradeis. E promé pareha lo mester a yena tera ku nan desendientenan. Ku tempu, nan lo mester a dominá tera kompleto i hasié un paradeis. (Génesis 1:28) Hamas tera lo ser destruí. Lo e keda komo hende su lugá di biba pa semper.—Lesa Salmo 104:5.

Wak e vidio Dikon Dios A Krea Tera?

Debí ku Adam ku Eva a desobedesé Dios, el a saka nan for di e hòfi di Edén. Asina nan a bin pèrdè Paradeis, i niun hende no a logra hañ’é bèk. Beibel ta bisa: “Tera ta keda entregá den man di e malbadonan.”—Yòb 9:24.—Lesa Génesis 3:23, 24.

Akaso Yehova a faya ku su propósito original pa humanidat? Nò! E ta todopoderoso; e no por faya. (Isaías 45:18) Pronto lo e sòru pa humanidat biba manera tabata su propósito.—Lesa Salmo 37:11, 34.

Tera lo bira un paradeis bou di e gobernashon di Hesus komo Rei nombrá di Dios. Den e bataya ku Beibel ta yama Armagedon, bou di direkshon di Hesus, e angelnan di  Dios lo destruí tur hende ku ta oponé Dios. Despues Hesus lo mara Satanas pa 1.000 aña. E pueblo di Dios lo sobrebibí e destrukshon pasobra Hesus lo guia nan i protehá nan. Nan lo haña bida eterno den Paradeis riba tera.—Lesa Revelashon 20:1-3; 21:3, 4.

Na ki tempu Dios lo pone fin na maldat riba tera? Hesus a duna un “señal” pa indiká ki ora e fin ta serka. E kosnan ku ta pasando aktualmente ta forma un peliger pa eksistensia di humanidat i ta mustra ku nos ta bibando den “konklushon di e era akí.”—Lesa Mateo 24:3, 7-14, 21, 22.

Durante e periodo di 1.000 aña ku Hesus lo goberná tera for di shelu lo e pone fin na tur sufrimentu. (Isaías 9:6, 7; 11:9) Ademas di sirbi komo Rei, Hesus lo sirbi tambe komo Sumo Saserdote i lo kita piká di hende ku ta stima Dios. Pues, Dios lo usa Hesus pa eliminá malesa, behes i morto.—Lesa Isaías 25:8; 33:24.

Hende ku ta obedesé Dios lo biba den Paradeis riba tera. (1 Huan 2:17) Hesus a instruí su siguidónan pa buska hende humilde i siña nan kon nan por haña Dios su aprobashon. Awe, Yehova ta preparando miónes di hende pa biba den e binidero Paradeis. (Sofonías 2:3) Na Salòn di Reino di Testigunan di Yehova, nan ta siña kon nan por ta un mihó esposo i tata i un mihó esposa i mama. Mayornan i yunan ta adorá Dios huntu i ta siña kon konosementu di Beibel por yuda nan hiba un mihó bida.—Lesa Mikéas 4:1-4.