Tito 1:1-16
1 Esaki ta un karta di ami, Pablo, esklabo di Dios i apòstel di Hesukristu ku tin e mesun fe ku e skohínan di Dios i tambe e konosementu eksakto di e bèrdat ku ta na armonia ku deboshon na Dios.
2 (E kosnan akí ta basá riba e speransa di bida eterno ku Dios, kende no por gaña, a primintí hopi tempu pasá,
3 miéntras ku na su debido tempu el a revelá su palabra pa medio di e obra di predikashon konfiá na mi di akuerdo ku e mandamentu di nos Salbador, Dios.)
4 E karta akí ta pa Tito, un berdadero yu segun e fe ku nos ta kompartí:
Bondat inmeresí i pas di parti di Dios, e Tata, i di Kristu Hesus, nos Salbador, sea ku bo.
5 Mi a laga bo na Kreta pa bo por korigí e kosnan ku tabata laga hopi di deseá i pa bo nombra ansiano den kada stat, manera mi a instruí bo:
6 Un ansiano mester ta un hòmber* liber di akusashon, kasá di un solo esposa, ku tin yu kreyente ku no ta ser akusá di bagamunderia ni ta rebelde.
7 Pasobra komo mayordomo* di Dios, un superintendente mester ta liber di akusashon, e no mester ta tèrko, ni kla pa rabia, ni buraché, ni violento,* ni golos pa ganashi desonesto.
8 Mas bien, e mester ta hospitalario,* stimadó di loke ta bon, di sano huisio, hustu, leal, ku dominio propio,
9 un hende ku ta tene firmemente na e palabra fiel pa loke ta su arte di siña, pa e por duna spièrtamentu pa medio di siñansa ku ta sano i tambe reprendé esnan ku ta kontradisí.
10 Pasobra tin hopi hende rebelde, gañadó i papiadó di kos sin sentido, spesialmente esnan entre nan ku ta pega na sirkunsishon.
11 Mester tapa nan boka, ya ku e hendenan akí, pa haña ganashi na un manera desonesto, ta sigui ruiná e fe di famianan kompleto, siñando hende kosnan ku nan no mag di siña nan.
12 Un di nan, nan mes profeta, a bisa: “Hende di Kreta semper ta gañadó, bestia feros i haragan ku ta sinta pòrnada.”
13 E testimonio akí ta bèrdat. Pa e motibu akí mes, sigui reprendé nan severamente pa nan por tin un fe firme,*
14 i pa nan no presta atenshon na fábula hudiu ni na mandamentu di hende ku ta rechasá e bèrdat.
15 Tur kos ta limpi pa hende limpi. Pero pa hende impuru i sin fe, nada no ta limpi, pasobra tantu nan mente komo nan konsenshi ta impuru.
16 Nan ta deklará públikamente ku nan konosé Dios ma ta neng’é ku nan obranan, pasobra nan ta hende despresiabel i desobediente i no ta sirbi pa ningun bon obra.
Nota
^ “Un ansiano mester ta un hòmber.” Lit.: “si tin kualke hòmber.”
^ Òf: “ku no ta kana parti sla.”
^ Lit.: “saludabel.”
