Den tempo di calamidad, testigonan di Jehova ta yuda tanto nan rumannan spiritual como otro hende. Dicon? Wel, nan ta mustra amor: Un cualidad cu ta yuda hende reconoce cristian berdadero.​—Juan 13:35.

Akibou tin un resumen di e ayudo humanitario cu victimanan di calamidad a haya durante un aña (2011/2012). Ademas, manera ta custumber, tur e hendenan aki a haya sosten emocional y guia spiritual. Sucursalnan di testigonan di Jehova a apunta Comitenan di Yudansa pa dirigi un gran parti di e trabou. Y hopi biaha e congregacionnan local tambe a duna un man.

Japon: Riba 11 di maart 2011, un temblor y un tsunami a causa hopi daño den e parti noord di Japon. Miles y miles di hende a bira victima di e desaster aki. Testigonan di Jehova rond mundo a yuda cu sea placa, articulonan di prome necesidad of experticio pa duna un man cu e trabounan di reconstruccion. Wak un video tocante e yudansa cu testigonan di Jehova a duna na e victimanan na Japon.

Brazil: Inundacion, schuifmento di tera y avalancha di lodo a causa morto di cientos di hende. Testigonan di Jehova a manda 42 ton di cuminda cu no ta daña, 20.000 boter di awa, 10 ton di paña y 5 ton di producto pa limpieza y tambe remedi y otro articulonan.

Congo (Brazzaville): Ora un deposito di arma a explota, 32 cas di testigo di Jehova a sufri daño. Cuater cas a keda totalmente destrui. E victimanan a haya cuminda y paña y e Testigonan den e area ey a ofrece nan un luga di keda.

Congo (Kinshasa): E victimanan di colera a haya remedi y e victimanan di inundacion causa pa awasero pisa a haya paña. Y e refugiadonan a haya cuido medico, simia pa planta y masha hopi paña.

Venezuela: Awasero pisa a causa inundacion y avalancha di lodo. Comitenan di Yudansa a yuda 288 Testigo cu a bira victima di e desaster. Nan a traha mas cu 50 cas nobo. Ademas, nan ta yudando esnan cu nan cas ta core peliger di bay bou di awa debi cu e nivel di awa di Lago Valencia ta subiendo.

Filipinas: Despues cu algun tifon a pasa, un parti di e pais a keda inunda. Sucursal a manda cuminda y paña pa e victimanan, y e Testigonan local a haci e luga limpi ora e awa a baha.

Canada: Despues di un candela grandi na Alberta, e congregacion di Slave Lake a haya un donacion considerabel pa nan yuda cu e trabounan di limpieza. Como cu a resta placa, e congregacion a duna mas cu mitar di e suma pa yuda victimanan di calamidad na otro parti di mundo.

Côte d’Ivoire: Victimanan den e pais ey a haya articulonan di prome necesidad, luga di keda y cuido medico prome, durante y despues di guera.

Fidji: Pa motibo di yobida fuerte cu a causa inundacion, mayoria di e 192 famianan Testigo a perde nan cunucu cu ta nan fuente di cuminda y entrada. A manda cuminda pa nan.

Ghana: Victimanan di inundacion den e parti oost di e pais ey a haya cuminda, simia y casnan nobo.

Merca: Tornado a causa daño na 66 cas di testigo di Jehova den tres estado y 12 cas a keda completamente destrui. Y maske mayoria di doño di cas tabatin seguro, a pone placa disponibel pa trabounan di reparacion.

Argentina: Den e parti zuid di e pais ey, shinishi di volcan a causa daño na e casnan. E congregacionnan di testigonan di Jehova a duna un man na esnan cu a sufri daño.

Mozambique: A manda cuminda pa mas cu 1.000 victima di secura.

Nigeria: A duna yudansa financiero na mas cu 20 Testigo cu a keda herida den un accidente di bus. Ademas, a duna yudansa na hopi Testigo den e parti noord di e pais ey cu a perde nan cas pa motibo di conflicto religioso y etnico.

Benin: Victimanan di inundacion pisa a haya remedi, paña, muskitero (net contra sangura), awa pa bebe y luga di keda.

Republica Dominicana: Despues di Horcan Irene, varios congregacion a duna provision na e Testigonan y a yuda nan drecha e casnan cu a sufri daño.

Etiopia: Den dos area tabatin secura y den un area tabatin inundacion. A pone placa disponibel pa yuda e Testigonan di e areanan ey.

Kenia: A duna e victimanan di secura yudansa financiero.

Malawi: A duna yudansa na e refugiadonan den e campo di Dzaleka.

Nepal: Schuifmento di tera a causa hopi daño na e cas di un Testigo. El a haya un luga di keda temporalmente y su congregacion a yud’e.

Papua New Guinea: Malhechornan a kima ocho cas di testigonan di Jehova. A organisa e trabounan pa reconstrui e casnan.

Rumania: Algun Testigo a perde nan cas debi na inundacion y a duna nan yudansa pa reconstrui nan casnan.

Mali: Debi na secura, hopi cosecha a fracasa. Testigonan di nan pais bisiña Senegal a duna nan ayudo financiero pa nan por haya cuminda.

Sierra Leone: Dokternan testigo di Jehova di Francia a duna cuido medico na Testigonan cu ta biba caminda tabatin guera.

Tailandia: Inundacionnan a causa hopi daño na varios provincia. Boluntarionan cu ta yuda victimanan di calamidad a drecha y limpia 100 cas y 6 Salon di Reino.

Republica Checo: Despues cu un inundacion pisa a destrui varios cas di testigonan di Jehova, e Testigonan di nan pais bisiña Slovakia a duna nan un man.

Sri Lanka: Gran parti di e proyectonan pa duna yudansa na e victimanan despues di un tsunami a keda cla.

Sudan: Testigonan di Jehova cu a bira refugiado pa motibo di bringamento cu tin den e pais ey a haya cuminda, paña, sapato y lona.

Tanzania: Durante inundacionnan pisa, 14 famia a perde tur nan pertenencianan. E congregacionnan den e area ey a duna nan paña y articulonan di cas. Ademas, nan a reconstrui un cas.

Zimbabwe: Secura a causa hamber den un parti di e pais ey. A duna e victimanan cuminda y placa.

Burundi: Ta duna varios tipo di yudansa na e refugiadonan, entre otro cuido medico.