Bijbel no ta describi specificamente un grupo di “shete pica mortal.” Sinembargo, Bijbel ta siña cu hende cu practica pica serio lo no haya salbacion. Por ehempel, Bijbel ta referi na picanan serio manera inmoralidad sexual, idolatria, spiritismo, atake di rabia y buracheria como “obranan di carni.” Bijbel ta bisa: “Esnan cu ta practica e tipo di cosnan ey lo no ricibi e Reino di Dios.”​—Galationan 5:​19-​21. a

Pero Bijbel no ta menciona “shete cos cu ta un abominacion [pa Señor]”?

 Si, Bijbel ta menciona nan. Proverbionan 6:​16, ta bisa: “Tin seis cos cu SEÑOR ta odia, si, shete cos cu ta un abominacion p’e.” (Beibel Santu) Sinembargo, e lista cu ta sigui na Proverbionan 6:​17-​19 no ta inclui tur tur cos. Mas bien, e ta describi cosnan basico cu ta representa tur tipo di actonan malo, incluso cosnan cu nos ta pensa, papia y haci. b

Kico kiermen “pica mortal”?

 Algun traduccion di Bijbel ta uza e expresion ey na 1 Juan 5:​16. Por ehempel, E Testament Nobo ta bisa: “Tin pica mortal.” Por traduci e expresion “pica mortal” como “pica cu ta hiba na morto” tambe. Kico ta e diferencia entre “pica cu ta hiba na morto” y “pica cu no ta hiba na morto”?​—1 Juan 5:​16.

 Bijbel ta mustra cla cu tur pica ta hiba na morto. Sinembargo, nos por wordo salba di pica y morto mediante e sacrificio di rescate di Hesucristo. (Romanonan 5:​12; 6:​23) Pues anto, un “pica cu ta hiba na morto” ta un pica cu e rescate di Cristo no ta cubri. Un hende cu comete e tipo di pica aki ta asina determina pa sigui su rumbo di pica cu nunca lo e no cambia su actitud of conducta. Tambe Bijbel ta bisa cu esun cu practica e tipo di pica ey “lo no haya pordon.”​—Mateo 12:31; Lucas 12:10.