E contesta cu Bijbel ta duna

 Bautismo ta ora hinca un hende completamente bou di awa y sac’e bek. a Bijbel ta conta di hopi bautismo cu a tuma luga. (Echonan 2:41) Un di nan tabata e bautismo di Hesus. Hesus a ser batisa den Riu Jordan. (Mateo 3:13, 16) Algun aña despues, un homber di Etiopia a pidi p’e ser batisa ora el a pasa banda di “un luga cu tabatin awa.”—Echonan 8:36-40.

 Hesus a siña su siguidornan cu pa bira su discipel un hende mester batisa. (Mateo 28:19, 20) Apostel Pedro a confirma cu esey ta asina.—1 Pedro 3:21.

Den e articulo aki

•  Nificacion di bautismo

•  Kico Bijbel ta bisa tocante bautismo di baby?

•  Kico kier men batisa den nomber di e Tata, di e Yiu y di spirito santo?

•  Ta un pica si un hende bolbe batisa?

•  Otro bautismo cu Bijbel ta papia di dje

•  Algun idea robes tocante bautismo cristian

 Nificacion di bautismo

 Un hende ta batisa pa demostra publicamente cu el a arepenti di su picanan y cu el a priminti Dios cu lo e haci Dios su boluntad pase loke pase. Esey ta nifica cu e persona semper lo obedece Dios y Hesus den tur aspecto di su bida. Hende cu batisa ta cuminsa hiba nan bida manera Dios kier pa nan por haya bida eterno.

 Bautismo ta un bon simbolo pa e cambio cu un persona ta haci den su bida. Den ki sentido? Bijbel ta compara bautismo cu deramento. (Romanonan 6:4; Colosensenan 2:12) Ora un persona bay bou di awa na momento di bautismo, esey ta simbolisa cu e persona a muri relaciona cu su manera di biba di antes. Anto ora e persona bini ariba bek for di awa, e ta mustra cu el a cuminsa su bida nobo como un cristian.

 Kico Bijbel ta bisa tocante bautismo di baby?

 Niun caminda den Bijbel tin para cu mester batisa baby. b Bijbel ta bisa cu un hende cu kier batisa mester cumpli cu cierto rekisito. Por ehempel, e persona mester compronde por lo menos e siñansanan basico di Bijbel, y e mester ta biba di acuerdo cu e siñansanan ey. E mester a arepenti di su picanan. Y e persona ey mester a priminti Dios den un oracion special cu e ta dedica su bida na Dios. (Echonan 2:38, 41; 8:12) Baby no por haci e cosnan ey.

Kico kier men batisa den nomber di e Tata, di e Yiu y di spirito santo?

  Hesus a duna su discipelnan instruccion pa haci hende discipel y “batisa nan den nomber di e Tata y di e Yiu y di spirito santo, y siña nan cumpli cu tur loke mi a manda boso.” (Mateo 28:19, 20) “Den nomber di” kier men cu e persona cu ta ser batisa ta compronde y acepta autoridad y posicion di e Tata y di e Yiu; e ta compronde y acepta tambe e papel cu Dios su spirito santo ta hunga. Ata un ehempel di esey: Apostel Pedro a bisa un homber cu a nace lam: “Den nomber di Hesucristo di Nazaret, lanta cana!” (Echonan 3:6) Ta bisto kico esey a nifica: Pedro a compronde y reconoce Cristo su autoridad, y el a mustra cu ta Cristo ta haci e curacion milagroso.

•   “E Tata” ta referi na Jehova c Dios. Jehova su autoridad ta absoluto pasobra e ta e Creador, e Dios Cu Ta Duna Bida y e Dios Todopoderoso.—Genesis 17:1; Revelacion 4:11.

•   “E Yiu” ta Hesucristo, kende a duna su bida pa nos. (Romanonan 6:23) Nos no por haya salbacion a menos cu nos ta compronde y acepta e papel importante di Hesus den Dios su proposito pa humanidad.—Juan 14:6; 20:31; Echonan 4:8-12.

•   “Spirito santo” ta Dios su forsa activo, esta, Dios su poder den accion. d Dios a uza su spirito santo pa crea, pa duna bida, pa transmiti mensahe na su profetanan y na otro hende y pa duna nan e poder necesario pa haci su boluntad. (Genesis 1:2; Job 33:4; Romanonan 15:18, 19) Dios a uza spirito santo tambe pa inspira e escritornan di Bijbel pa skirbi Dios su pensamentonan.—2 Pedro 1:21.

Ta un pica si un hende bolbe batisa?

  Hopi hende ta dicidi di cambia di religion. Pero kico si nan a batisa caba den nan religion anterior? Ta un pica nan ta comete si nan bolbe batisa den nan religion nobo? Tin hende ta bisa cu si. Kisas pasobra Efesionan 4:5 ta bisa: “Un Señor, un fe, un bautismo.” Pero e versiculo ey no ta bisa cu un hende no por bolbe batisa. Dicon nos ta bisa esey?

 Contexto. E versiculonan prome cu Efesionan 4:5 ta mustra cu Apostel Pablo tabata enfatisa cu e cristiannan berdadero mester ta uni den loke nan ta kere. (Efesionan 4:1-3, 16) Unico manera cu nan por ta uni asina ta si nan tur ta adora mesun Dios, si nan tur tin mesun fe, of comprondemento, di loke Bijbel ta siña, y si nan tur a cumpli cu e mesun rekisitonan basa riba Bijbel pa nan ser batisa.

 Apostel Pablo a anima algun hende cu tabata batisa caba pa nan bolbe batisa. Dicon? Pasobra nan a ser batisa sin cu nan tabatin un comprondemento completo di e siñansa cristian.—Echonan 19:1-5.

 Un base corecto pa bautismo. Pa un hende su bautismo ta aceptabel pa Dios, e bautismo mester ta basa riba conocemento exacto di Bijbel. (1 Timoteo 2:3, 4) Si un persona a batisa a base di siñansa religioso cu ta contrario na loke Bijbel ta bisa, e bautismo di e persona ey no ta aceptabel pa Dios. (Juan 4:23, 24) E persona kisas tabata sincero, pero e no a ser batisa na harmonia cu “conocemento exacto.” (Romanonan 10:2) Pa e persona por haya Dios su aprobacion, e tin cu siña e berdadnan cu tin den Bijbel y pone na practica loke el a siña. Tambe e tin cu dedica su bida na Dios y ser batisa di nobo. Den tal caso, e echo cu el a bolbe batisa lo no ta un pica. Al contrario, esey lo ta e cos corecto pa haci.

Otro bautismo cu Bijbel ta papia di dje

  Bijbel ta papia di otro bautismo cu tabatin otro nificacion for di e bautismo den awa di e siguidornan di Cristo. Wak algun ehempel.

 Bautismo cu Juan Bautista tabata haci. e Juan a batisa hende hudiu y hende cu a comberti bira hudiu. Nan bautismo a simbolisa cu nan a arepenti di e picanan cu nan a comete contra Ley di Moises. Ley di Moises tabata e leynan cu Dios a duna e Israelitanan mediante Moises. E bautismonan cu Juan a haci a yuda prepara e hendenan pa reconoce y acepta e Mesias, esta, Hesus di Nazaret.—Lucas 1:13-17; 3:2, 3; Echonan 19:4.

 Hesus su propio bautismo. Juan Bautista a batisa Hesus, y esey tabata un bautismo unico. Dicon? Pasobra Hesus tabata un hende perfecto, y e no a comete niun pica. (1 Pedro 2:21, 22) Pues, Hesus su bautismo no a nifica cu el a arepenti ni cu el a haci “un peticion na Dios pa un consenshi limpi.” (1 Pedro 3:21) Mas bien, su bautismo a indica cu el a presenta su mes na Dios pa haci Dios su boluntad como e Mesias priminti, of Cristo. Anto un di e cosnan cu esey a encera ta cu Hesus mester a entrega su bida pa nos.—Hebreonan 10:7-10.

 Bautismo cu spirito santo. Tanto Juan Bautista como Hesucristo a papia tocante batisa hende cu spirito santo. (Mateo 3:11; Lucas 3:16; Echonan 1:1-5) E bautismo ey no ta mescos cu batisa den nomber di spirito santo. (Mateo 28:19) Dicon ta asina?

 Ta un cantidad relativamente chikito di siguidor di Hesus ta ser batisa cu spirito santo. E hendenan cu batisa cu spirito santo ta ser ungi cu spirito santo pasobra Dios a scoge nan pa sirbi den cielo hunto cu Cristo como rey y sacerdote pa Tera. f (1 Pedro 1:3, 4; Revelacion 5:9, 10) Nan lo goberna riba e miyones di siguidornan di Hesus cu tin e speransa di biba pa semper den Paradijs riba Tera.—Mateo 5:5; Lucas 23:43.

 Bautismo den union cu Cristo Hesus y den union cu su morto. E personanan batisa cu spirito santo ta ser batisa tambe “den union cu Cristo Hesus.” (Romanonan 6:3) Pues, e bautismo aki ta conta pa e siguidornan ungi di Hesus, esta, pa e personanan cu lo goberna hunto cu ne den cielo. Nan ta bira miembro di Hesus su congregacion ungi ora nan ser batisa den union cu Hesus. Hesus ta cabes di e congregacion, y nan ta forma e curpa.—1 Corintionan 12:12, 13, 27; Colosensenan 1:18.

 E cristiannan ungi ta ser batisa tambe “den union cu [Hesus] su morto.” (Romanonan 6:3, 4) E bautismo ey ta nifica cu nan ta imita Hesus: nan ta hiba un bida cu ta enfoca riba obedece Dios en bes di agrada nan mes. Ademas, nan ta renuncia nan speransa di biba pa semper riba Tera. Nan bautismo den union cu Hesus su morto ta ser completa ora nan muri y ser resucita pa biba den cielo como criatura spiritual.—Romanonan 6:5; 1 Corintionan 15:42-44.

 Batisa cu candela. Juan Bautista a bisa e hendenan cu tabata scuch’e: “[Hesus] lo batisa boso cu spirito santo y cu candela. E scop pa separa trigo for di bagas ta den su man, y lo e haci su plenchi di bati trigo limpi limpi. Y lo e recoge su trigo y pon’e den mangashina, ma e bagas lo e kima cu candela cu no por paga.” (Mateo 3:11, 12) Tuma nota cu tin varios diferencia entre batisa cu candela y batisa cu spirito santo. Kico Juan tabata kier men cu e ilustracion ey?

 E trigo ta representa hende cu lo scucha Hesus y obedec’e. E hendenan ey lo ser batisa cu spirito santo. E bagas ta simbolisa hende cu lo no scucha Hesus. Nan lo ser batisa cu candela, y esey ta nifica cu nan lo ser destrui pa semper.—Mateo 3:7-12; Lucas 3:16, 17.