Hopi hende ta pensa cu nos no por sa sigur ta ken a skirbi Bijbel. Pero Bijbel mes no ta laga duda riba e punto aki. Na varios caminda e ta laga nos compronde bon cla ken ta su autor. Tin cierto parti di Bijbel ta cuminsa cu frase manera “e palabranan di Nehemias”, “e vision cu Isaias ... a mira” y “e palabra di SEÑOR cu a yega na Joel.”—Nehemias 1:1; Isaias 1:1; Joel 1:1, Beibel Santu.

 Mayoria escritor di Bijbel ta reconoce cu nan a skirbi den nomber di Jehova, e Dios berdadero, y cu ta e a guia nan. E profetanan cu a skirbi e Scritura Hebreo a bisa mas cu 300 biaha: “Asina SEÑOR ta bisa.” (Amos 1:3; Mikeas 2:3; Nahum 1:12, Beibel Santu) Otro escritornan di Bijbel a haya e mensahe di Dios pa medio di angel.—Zacarias 1:7, 9.

 Mas o menos 40 homber a skirbi Bijbel durante un periodo di 1.600 aña. Tin di nan a skirbi mas cu un buki di Bijbel. En realidad, Bijbel ta un bibliotheek chikito cu ta consisti di 66 buki. E tin 39 buki di e Scritura Hebreo, cu hopi hende ta yama e Testament Bieu, y 27 buki di e Scritura Griego Cristian, tambe conoci como e Testament Nobo.