Bo ta pasando great den bo vakantie, y bo kier conta bo amigonan tur cos. Pero con? Lo bo

1.   manda cada un di nan un postkaart?

2.   manda un e-mail pa tur bo amigonan?

3.   post potret online?

 Ora bo welonan tabatin bo edad, kisas “A” tabata e unico opcion.

 Ora bo mayornan tabatin bo edad, “B” lo tabata un opcion.

 Sinembargo, awendia hopi hoben cu mag di post potret online ta prefera opcion “C.” Abo tambe? Si ta asina, e articulo aki por yuda bo evita algun trampa.

•  Kico ta e beneficionan?

•  Kico ta e peligernan?

•  Loke abo por haci

•  Loke otro hobennan ta bisa

 Bo por post potret den un frega di wowo. “Ora mi tabatin un dushi vakantie of mi a pasa great cu mi amigonan, mi por a comparti potret di e momentonan ey mientras cu ainda mi tabata hopi entusiasma.”—Melanie.

 E ta cumbiniente. “Ta hopi mas facil pa wak potret cu mi amigonan ta post regularmente en bes di uza e-mail pa haya sa kico ta pasando cu nan.”—Jordan.

 E ta yuda bo keda den contacto cu famia- y amigonan. “Algun di mi famia- y amigonan ta biba leu. Si nan post potret regularmente y mi wak nan, ta comosifuera mi ta mira nan tur dia.”—Karen.

 Bo siguridad por ta na peliger. Si bo camara tin “geotagging”, e potretnan cu bo post por revela mas di loke tabata bo intencion. Segun e website Digital Trends: “Si bo post potret y otro informacion cu ta contene dato tocante unda bo ta, bo ta duna cualkier hende cu tin e software corecto y mal motivacion e posibilidad pa haya sa precies unda bo ta.”

 Pero algun criminal ta mas interesa pa sa na unda bo no ta. Digital Trends a relata un caso caminda tres ladron a kibra drenta den 18 cas caminda niun hende no tabata na cas. Con nan por tabata sa cu no tabatin hende na cas? Nan a bay online y a busca pa sa unda e habitantenan ta. Nan a uza un tecnica cu yama “cybercasing.” Nan a logra horta cos na balor di mas cu 100.000 dollar (Mericano).

 Bo por haya bo cu cosnan ofensivo. Algun hende no tin niun tiki berguensa pa post potret pa henter mundo mira. Un teenager cu yama Sarah ta bisa: “No ta bon pa wak account di hende cu bo no conoce bon. Ta como sifuera bo ta canando den un stad desconoci sin un mapa. Bo por ta sigur cu lo bo yega na un luga cu bo no kier a bay.”

 Tempo ta bula bay laga bo. Segun un teenager cu yama Yolanda: “Ta facil pa bo djis pasa tur bo tempo ta wak potret y lesa tur comentario cu hende a pone. Ta yega un momento cu cada rato bo ta keda check bo telefon pa mira kico tin di nobo.”

 Un teenager cu yama Samantha ta di acuerdo cu esey. El a bisa: “Mi tin cu wak bon cuanto tempo mi ta uza riba e websitenan aki. Si bo kier habri un account pa comparti potret online, bo mester tin echt hopi dominio propio.”

•   Sea determina pa evita tur contenido inapropia. Bijbel ta bisa: “Lo mi no pone nada malo dilanti di mi wowo.”​—Salmo 101:3, Beibel Santu.

   “Regularmente mi ta check post di hende cu mi ta follow, y mi ta stop di follow nan si mi sinti cu nan contenido ta inapropia.”—Steven.

•   Evita di asocia cu hende cu no tin e mesun norma- y balornan cu bo, ya cu nan por hacie dificil pa bo mantene bo mes na bo principionan moral. Bijbel ta bisa: “No laga hende gaña boso. Mal compania ta daña bon custumber.”—1 Corintionan 15:33.

   “Tin account cu potret hopi popular, pero no ta pasobra tur hende ta wak nan esey kiermen cu abo mester haci mescos. Hopi bes, e accountnan ey ta contene redo, potret di hende sunu y otro cosnan ofensivo.”—Jessica.

•   Pone un limite na e cantidad di tempo cu lo bo pasa na wak y post potret. Bijbel ta bisa: “Paga bon tino pa e manera cu boso ta cana no ta manera hende imprudente sino manera hende sabi, uzando boso tempo di e mihor manera.”​—Efesionan 5:​15, 16.

   “Ami a stop di sigui hende cu ta keda post potret henter dia. Por ehempel, tin di nan ta bay lama anto post 20 potret di e mesun cocolishi. Ay no! Ta perdemento di tempo e cos ey ta.”—Rebekah.

•   Haci sigur cu e potretnan cu bo ta post no ta duna e impresion cu bo ta kere cu tur cos ta draai rond di abo. Apostel Pablo a bisa: “Mi ta bisa cada un di boso pa no pensa mas di su mes di loke ta necesario.” (Romanonan 12:3) No asumi cu bo amigonan lo disfruta di tur e potretnan cu bo ta post tocante bo mes y loke bo ta haciendo.

   “Algun hende ta keda post selfie cada rato. Si nos ta amigo di otro, mi sa caba con bo cara ta. Bo no tin nodi keda corda mi cada rato.”—Allison.