Un mucha muher chikito a mira huma ta bolter for di schoorsteen di un fabrica. E huma tabata parce nubia. Pesey, el a pensa cu e fabrica ta traha nubia. Un ekibocacion chikito asina di un chikitin por ta pret. Pero un ekibocacion grandi por afecta nos bida. Por ehempel, si nos no lesa bon con pa uza un remedi, nos por haya nos cu consecuencianan serio.

Ekibocacion relaciona cu cosnan spiritual por ta aun mas serio. Por ehempel, algun hende no a compronde e siñansanan di Hesus corectamente. (Juan 6:48-68) En bes di haci esfuerso pa siña mas, nan a rechasa tur loke Hesus a siña hende. Esta tristo, no?

Abo sa lesa Bijbel pa haya guia? Si ta asina, esey ta hopi bon. Pero ta posibel cu bo no a compronde corectamente algo cu bo a lesa? Esey ta pasa cu hopi hende. Ban wak tres cos cu hopi biaha hende no ta compronde bon.

• Algun hende no ta compronde bon e mandamento biblico pa “teme Dios.” Nan ta kere cu nan mester tin miedo di Dios. (Eclesiastes 12:13) Pero Dios no kier pa hende cu ta sirbie tin miedo di dje. E ta bisa: “No tene miedu, pasobra Mi ta ku bo, no wak asina spantá, pasobra Ami ta bo Dios. Mi ta duna bo forsa, yuda bo, sostené bo ku mi man viktorioso.” (Isaias 41:10, BPK) Teme Dios simplemente ta nifica cu nos mester tin un admiracion y respet profundo p’e.

• Algun hende no ta compronde e palabranan inspira aki corectamente: “Tin un tempo stipula pa tur cos ... Un tempo pa nace y un tempo pa muri.” Nan ta conclui cu Dios a stipula precies ki dia cada hende lo muri. (Eclesiastes 3:1, 2) Sinembargo, e textonan ey ta papia di e ciclo di bida y di cu tur hende lo muri un dia. Ademas, e Palabra di Dios ta siña nos cu nos decisionnan personal por tin un efecto riba largura di nos bida. Por ehempel, den Bijbel nos ta lesa: “E temor di SEÑOR ta prolonga bida.” (Proverbionan 10:27; Salmo 90:10; Isaias 55:3) Con asina? Por ehempel, respet pa e Palabra di Dios lo motiva nos pa evita practicanan insaludabel manera buracheria y inmoralidad.—1 Corintionan 6:9, 10.

• Algun hende ta interpreta loke Bijbel ta bisa encuanto cielo y Tera, esta, cu nan ta “reserva pa candela”, na un manera literal y cu pesey Dios lo destrui e planeta aki. (2 Pedro 3:7) Pero Dios a priminti cu lo e no laga nos planeta ser destrui. Dios “a establece Tera riba su fundeshinan, pa asina esey no kita for di su luga nunca mas.” (Salmo 104:5; Isaias 45:18) Lo e destrui e sistema corupto di e mundo aki y no e planeta literal. Y pa loke ta e palabra cielo, ora e ta den un sentido literal, e por referi sea na cielo, e universo yen di strea of Dios su luga di biba. Niun di esakinan lo ser destrui.

Manera bo por mira di e ehempelnan ey, hopi biaha hende no ta compronde cierto parti di Bijbel corectamente. Pero dicon Dios ta permiti esey? Algun hende por pensa: Si di berdad Dios ta e Persona di mas sabi y sa tur cos, dicon e no a duna nos un buki cu ta facil pa tur hende compronde? Ban wak tres motibo pakico hopi biaha hende ta compronde Bijbel robes.

1. Bijbel ta pa hende humilde y cu ta dispuesto pa siña. Hesus a bisa su Tata: “Mi ta alaba bo publicamente, Tata, Señor di cielo y Tera, pasobra bo a tene e cosnan aki bon scondi pa hende sabi y intelectual y a revela nan na mucha chikito.” (Lucas 10:21) Bijbel ta skirbi di tal manera cu ta solamente hende cu tin e actitud  corecto lo compronde su mensahe. Hende orguyoso, un caracteristica comun di “hende sabi y intelectual”, hopi biaha no ta compronde Bijbel. Pero Dios ta bendiciona hende cu ta lesa Bijbel cu e actitud manera esun di “mucha chikito”, esta, humilde y cla pa siña, cu un mihor comprondemento di su mensahe. Pues, Dios a duna nos un obra magistral.

2. Bijbel ta pa hende cu di berdad kier pa Dios yuda nan compronde su Palabra. Hesus a mustra cu hende lo tin mester di yudansa pa compronde completamente loke el a siña. Con nan lo a haya e yudansa ey? Hesus a bisa: “E ayudante, e spirito santo, cu e Tata lo manda den mi nomber, lo siña boso tur cos.” (Juan 14:26) Pues Dios ta uza spirito santo, esta, su forsa activo poderoso, pa yuda hende compronde kico nan ta lesa den Bijbel. Pero Dios no ta duna su spirito na hende cu no ta depende riba dje pa yudansa, y pesey hopi biaha nan no ta compronde Bijbel. Ademas, spirito santo ta motiva cristiannan cu tin mas conocemento di Bijbel pa yuda hende cu kier compronde Bijbel mihor.—Echonan 8:26-35.

3. Algun parti di Bijbel lo bira comprendibel solamente na e debido tempo. Por ehempel, Dios a bisa profeta Daniel pa skirbi un mensahe pa futuro. Un angel a bis’e: “Daniel, tene e palabranan aki scondi y seya e buki te na e tempo di e fin.” A traves di siglonan, hopi hende a lesa e buki di Daniel, pero nan no por a echt comprond’e. En realidad, ni Daniel mes no a compronde algun cos cu el a skirbi. El a admiti humildemente: “Mi a tende, ma no por a compronde.” Cu tempo, hende lo a bin compronde corectamente e profecia di Dios cu Daniel a skirbi, pero solamente na e tempo cu Dios a stipula. E angel a bisa: “Sigui bo caminda, Daniel, pasobra e palabranan aki ta keda scondi y seya te na e tempo di e fin.” Ken lo compronde e mensahenan di Dios? E angel a sigui bisa: “Ningun di e malbadonan lo compronde, ma esnan cu tin discernimento lo compronde.” (Daniel 12:4, 8-10) Pues, Dios ta revela e nificacion di cierto partinan di Bijbel te ora e tempo pa esey yega.

Testigonan di Jehova a yega di compronde algun parti di Bijbel robes debi cu no tabata e debido tempo? Si. Pero ora Dios su tempo a yega pa aclara asunto, nan tabata cla pa ahusta nan comprondemento di Bijbel. Nan ta kere cu asina nan ta imita Cristo su apostelnan, kendenan a ahusta nan pensamento cu un actitud humilde ora Hesus a corigi nan.—Echonan 1:6, 7.

Un mucha chikito su idea tocante di unda nubia ta bin por ta djis un ekibocacion chikito. Sinembargo, loke Bijbel ta siña ta masha importante pa cada un di nos. E mensahe di Bijbel ta mucho importante pa un hende purba compronde riba su mes. Pues, nos ta anima bo pa busca yudansa pa bo compronde loke bo ta lesa. Busca yudansa cerca hende cu ta studia Bijbel cu un actitud humilde, cu ta depende riba e spirito santo di Dios pa compronde Bijbel y cu ta convenci cu nos ta bibando den un tempo cu Dios kier pa nos compronde Bijbel manera nunca prome. No duda pa papia cu testigonan di Jehova of lesa informacion basa riba Bijbel riba nan website, jw.org. Bijbel ta priminti cu “si bo sclama pa discernimento, ... lo bo ... descubri e conocemento di Dios.”—Proverbionan 2:3-5.