“DIOS ta un Spirito”, invisibel pa wowo di hende. (Juan 4:24) Toch Bijbel ta bisa cu tin hende cu, den un sentido, a yega di mira Dios. (Hebreonan 11:27) Con esey ta posibel? Di berdad nos por mira “e Dios invisibel”?—Colosensenan 1:15.

Laga nos compara nos situacion cu esun di un hende cu a nace ciego. E echo cu e ta ciego ta strob’e di compronde e mundo rond di dje? No completamente. Un persona ciego ta haya informacion den varios manera cu ta permitie capta presencia di hende y obheto, y loke ta sosode rond di dje. Un homber ciego a bisa: “Bo no ta mira cu bo wowo, sino cu bo mente.”

Mescos tambe, aunke bo no por uza bo wowonan fisico pa mira Dios, bo por uza “e wowonan di [bo] curason” pa mir’e. (Efesionan 1:18) Laga nos considera den ki tres manera bo por haci esaki.

Hopi biaha, un hende ciego su sentido di oido y di fula ta mas skerpi, y e ta uza esakinan pa capta e cosnan cu e no por mira. Asina tambe, bo por uza bo sentidonan fisico pa analisa e mundo rond di bo y compronde e Dios invisibel cu a cre’e. “Su cualidadnan invisibel ... ta ser mira bon cla for di creacion di mundo padilanti, ya cu nan ta bisto den e cosnan traha.”—Romanonan 1:20.

Pensa por ehempel riba nos planeta. E ta diseña na un manera unico, no simplemente pa nos biba riba dje, sino tambe pa nos disfruta di bida. Ora nos sinti un brisa suave, contempla e prome rayonan di solo di un dia nobo, smaak un dushi fruta of tende e canto relahante di parha, nos ta keda encanta. E regalonan aki no ta un muestra di e consideracion, cariño y generosidad cu nos Creador tin?

Y kico nos por siña di Dios ora nos wak e universo? Wel, cielo ta revela con poderoso Dios ta. E ultimo evidencianan cientifico ta indica cu e universo no solamente ta creciendo, sino cu esaki ta tumando luga mas y mas lihe! Ora bo hisa cara wak e cielo di anochi, puntra bo mes: Kico ta e fuente di e energia cu ta pone e universo crece mas rapidamente? Bijbel ta bisa nos cu e Creador tin ‘grandeza di forsa.’ (Isaias 40:26) Su creacion ta mustra nos cu e ta “e Todopoderoso”, Esun cu ta “excelente den poder.”—Job 37:23.

Un mama cu tin dos yiu ciego ta bisa: “Comunicacion ta hunga un rol masha importante den nan educacion. Bo mester ta prepara pa splica nan tur loke bo ta mira y tende. Abo ta nan wowonan.” Mescos tambe, aunke “ningun hende no a mira Dios nunca”, su Yiu, Hesus, “cu ta sinta banda di e Tata ta esun cu a splica ta ken e ta.” (Juan 1:18) Como Dios su prome creacion y Yiu unigenito, Hesus a bira nos “wowonan.” E ta den e mihor posicion pa duna nos informacion tocante e Dios invisibel.

Tuma nota di algun cos cu Hesus, kende a pasa miles di miyones di aña hunto cu su Tata, a splica di Dios:

• Dios ta traha sin cansa. “Mi Tata ta traha te ainda.”—Juan 5:17.

• Dios sa kico nos necesidadnan ta. ‘Boso Tata sa kico boso tin mester hasta prome cu boso pidie.’—Mateo 6:8.

•  Dios ta duna nos bondadosamente tur loke nos tin mester. “Boso Tata cu ta den cielo ... ta laga su solo sali riba mal hende y bon hende y ta laga awa cay riba hende husto y inhusto.”—Mateo 5:45.

• Dios ta balora cada un di nos. “No ta pa un cen preto nan ta bende dos mofi? Sinembargo, ni un di nan lo no cay na suela sin cu boso Tata sa. Pa loke ta boso, el a conta hasta e drachinan di cabey riba boso cabes. Pues, no tene miedo: boso ta bal mas cu hopi mofi.”—Mateo 10:29-31.

Hende cu ta ciego ta capta cosnan den maneranan distinto for di hende cu por mira. Pa un hende ciego, kisas un sombra no ta un area scur sin luz di solo, sino un area fresco proteha for di cayente di solo. Mescos cu un persona cu ta completamente ciego no por mira sombra ni luz di solo, nos no por compronde Jehova riba nos mes. Pesey, Jehova a manda un homber na Tera cu por a refleha su cualidadnan y personalidad perfectamente.

E homber ey tabata Hesus. (Filipensenan 2:7) Hesus no solamente a papia tocante su Tata sino tambe a mustra nos con Dios ta. Felipe, un di Hesus su discipelnan, a puntr’e: “Señor, mustra nos e Tata.” Hesus a contest’e: “Esun cu a mira mi, a mira e Tata tambe.” (Juan 14:8, 9) Kico bo por “mira” di e Tata ora bo analisa e bida di Hesus?

Hesus tabata un homber cariñoso, humilde y acercabel. (Mateo 11:28-30) Su personalidad agradabel a atrae otro hende. Hesus a sinti e dolor cu otronan a sinti, y el a comparti nan goso. (Lucas 10:17, 21; Juan 11:32-35) Ora bo ta lesa of scucha relatonan biblico tocante Hesus, uza bo sentidonan y laga e sucesonan haya bida den bo imaginacion. Si bo medita riba e manera cu Hesus a trata hende, lo bo por mira Dios su personalidad maraviyoso mas cla y lo bo sinti bo atrai na dje.

Un autor ta bisa lo siguiente relaciona cu e manera con un persona ciego ta experencia mundo: “E ta haya pida pida informacion for di varios fuente (sentido di oido, di fula, olfato y otronan), y di un manera of otro e mester pone tur e informacionnan ey hunto pa forma un cuadro.” Di mes manera, ora bo observa Dios su obranan di creacion, lesa kico Hesus a bisa di su Tata y analisa e manera con Hesus a refleha e cualidadnan di Dios, bo ta haya un bunita cuadro mental di Jehova. E lo bira mas real pa bo.

Esey ta loke a pasa cu Job, un personahe biblico. Na prome instante el a papia “sin conocemento.” (Job 42:3) Pero despues cu el a analisa Dios su maraviyanan di creacion, el a reconoce: “Ta tende mi a tende di bo, ma awor mi wowo ta mira bo.”—Job 42:5.

Esey por ta e caso cu bo tambe. “Si bo busca [Jehova], e lo laga bo hay’e.” (1 Cronicanan 28:9) Gustosamente, testigonan di Jehova lo yuda bo busca y haya e Dios invisibel.