Expertonan riba tereno di salud mental ta bisa cu si un hende kier ta berdaderamente feliz, e tin cu reconoce su necesidad spiritual. Nos ta mira esaki den e echo cu hende kier pertenece na algo of sirbi un otro hende of un causa mas grandi. Pa satisface e necesidad aki, algun ta dedica nan tempo liber na naturaleza, arte, musica, etcetera. Pero mayoria di hende no ta haya satisfaccion permanente den e cosnan ey.

Esnan cu ta lesa Bijbel no ta keda straño cu hende a nace cu un necesidad spiritual. E prome capitulonan di Genesis ta mustra cu despues cu Dios a crea e prome pareha humano, e tabata papia cu nan regularmente, loke a permiti nan forma un relacion cu ne. (Genesis 3:8-10) Dios no a traha hende pa biba independiente di nan Creador; nan tin e necesidad pa comunica cu ne. Y Bijbel ta referi na e necesidad aki bes tras bes.

Por ehempel, Hesus a bisa: “Feliz ta esnan cu ta consciente di nan necesidad spiritual.” (Mateo 5:3) For di e palabranan ey nos por conclui cu pa nos por ta feliz y contento, nos tin cu satisface e deseo cu nos tin pa conoce Dios. Esey ta algo indispensabel. Con nos por haci esey? Hesus mes a contesta e pregunta ey ora el a bisa: “Hende no mester biba di pan so, sino tambe di tur palabra cu ta sali for di boca di Jehova.” (Mateo 4:4) Den ki manera e palabranan di Dios, esta, su pensamento- y instruccionnan cu nos ta haya den Bijbel, por yuda nos hiba un bida feliz y cu proposito? Laga nos trata tres manera basico.

Awendia, tin hopi experto cu ta cla pa duna conseho riba temanan manera relacionnan personal, amor, bida di famia, solucion pa conflicto, felicidad y hasta e nificacion di bida. Pero ken ta den e mihor posicion pa duna guia sano y balansa den tur e areanan aki? No ta e Creador di humanidad, Jehova Dios?

Por ehempel, ora bo cumpra un aparato nobo, manera un camara of un computer, bo ta spera cu  e ta bin cu un manual cu ta splica con ta e mihor manera pa bo uz’e p’e duna bon resultado. Bijbel ta manera un manual asina. E ta un manual cu Dios, como e fabricante na moda di papia, a duna nos pa nos por sa con nos tin cu uza nos bida. E “manual” aki ta splica cu ki proposito Dios a diseña e “producto” y con mester uz’e p’e duna mihor resultado.

Mescos cu cualkier manual bon hinca den otro, Bijbel ta spierta nos contra e practicanan cu por pone e siguridad y bon funcionamento di e “producto”, esta, nos bida, na peliger. Por parce mas facil pa sigui conseho di otro hende. Pero no ta logico cu e mihor manera pa evita problema y haya bon resultado ta di sigui instruccion di e “fabricante”?

Maske Jehova Dios ta duna nos guia y instruccion, e no ta obliga nos pa sigui nan. Mas bien, pa motibo cu e stima nos y kier yuda nos, e ta bisa nos di curason: “Ami ta SEÑOR bo Dios, kende ta siña bo, pa bo prospera, kende ta guia bo den e caminda cu bo mester cana. Mara bo a pone atencion na mi mandamentonan! E ora ey bo paz lo tabata manera un riu, y bo husticia manera ola di lama.” (Isaias 48:17, 18) Cu otro palabra, si nos sigui e guia di Dios, cos lo bay bon cu nos y nos lo hiba un bida feliz. Pesey, nos tin mester di Dios.

Tin hende ta pensa cu nan no tin mester di Dios, pasobra nan no por compronde con un Dios di amor por permiti tur e cosnan malo cu ta pasando aworaki. Por ehempel, nan ta puntra nan mes: ‘Dicon bon hende ta sufri?’ ‘Pakico algun baby inocente ta nace deforma?’ ‘Pakico tin tanto inhusticia?’ Ta trata aki en berdad di preguntanan valido, y ora nos haya contesta satisfactorio pa nan, nan por tin un efecto profundo riba nos bida. Pero en bes di core culpa Dios pa e problemanan ey, laga nos wak con su Palabra, Bijbel, por clarifica e punto aki.

Den e di tres capitulo di Genesis, nos ta lesa cu Satanas, scondiendo tras di un colebra, a busca tur manera pa pone e prome pareha humano come for di e palo di conocemento di bon y malo pa nan desobedece Jehova. Satanas a bisa Eva: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.”—Genesis 2:16, 17; 3:4, 5.

Cu e palabranan ey, Satanas no solamente a insinua cu Dios ta un mentiroso, sino tambe cu Dios su forma di goberna ta inhusto. Diabel a pretende cu si hende scuch’e, cosnan lo a bay mihor cu nan. Con Jehova por a demostra cu e acusacionnan ey tabata sin base? Wel, el a opta pa laga cosnan sigui nan rumbo pa laga tur hende mira ken tin rason. En realidad, Dios a duna Satanas y tur esnan cu a bay su tras e  oportunidad pa demostra si hende por biba mihor sin Dios.

Kico abo ta pensa di Satanas su insinuacionnan? Bo ta kere cu hende por biba mihor y dirigi nan pasonan sin yudansa di Dios? Pensa riba tur e sufrimento, inhusticia, maleza y morto, y tambe crimen, degradacion moral, guera, genocidio y otro crueldadnan cu a asota humanidad durante siglonan. Acaso esaki no ta evidencia innegabel cu hende su esfuerso pa goberna nan mes independiente di Dios tabata un fracaso total? En bes di tene Dios responsabel pa tur e angustia cu e cosnan aki a causa, Bijbel ta mustra kico ta un di e causanan principal: “Hende ta manda riba e otro pa perhudik’é.”—Eclesiastes 8:9, BPK.

En bista di esaki, no ta claro anto cu nos tin cu acudi na Dios no solamente pa e contestanan pa e preguntanan aki cu ta causa angustia, sino tambe pa e solucion? Kico Dios lo haci?

Pa hopi tempo caba hende ta anhela e dia cu nan por biba sin maleza, biehes y morto. Nan a gasta hopi tempo, energia y recurso pa logra esaki, pero te ainda sin resultado. Algun hende a kere cu si nan bebe cierto likido, descubri e fuente di hubentud of biba na un cierto luga, nan por keda jong. Pero ningun di e soñonan aki a bira realidad.

Dios kier pa hende biba bon y pa nan ta feliz. Esey tabata su proposito original ora el a crea hende, y e no a lubida riba esey. (Genesis 1:27, 28; Isaias 45:18) Jehova a duna nos e garantia cu tur loke e priminti lo cumpli sigur. (Isaias 55:10, 11) Bijbel ta papia di e promesa di Dios pa transforma e tera aki den un paradijs, manera esun cu Adam cu Eva a perde. Den e ultimo buki di Bijbel, nos ta haya e palabranan aki: “E [Jehova] lo ... seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.” (Revelacion 21:4) Con Dios lo cumpli cu e promesa aki, y con nos por beneficia di e promesa ey?

Hesucristo, e Yiu di Dios, a siña su siguidornan pidi den oracion pa Dios su boluntad cumpli. Hopi hende conoce e oracion ey y cu frecuencia nan ta ripitie. Hopi hende ta yama e oracion ey e oracion di Nos Tata. E ta bisa: “Nos Tata cu ta den cielo, bo nomber sea santifica. Laga bo Reino bin. Laga bo boluntad sosode, mescos cu den cielo, tambe riba tera.” (Mateo 6:9, 10) Si, e Reino di Dios ta e medio cu Jehova lo uza pa elimina tur e miseria cu gobernacion humano a causa y cumpli cu su promesa di un husto mundo nobo. * (Daniel 2:44; 2 Pedro 3:13) Kico nos mester haci pa beneficia di e promesa di Dios?

 Hesucristo a bisa kico ta e paso simpel cu nos tur tin cu tuma: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.” (Juan 17:3) Si, cu yudansa di Dios, nos por biba pa semper den e mundo nobo cu Dios a priminti. Esey no ta un otro motibo mas pakico nos tin mester di Dios? Claro cu si!

Dos mil aña pasa, na Areopago, of Sero di Mars, na Atenas, apostel Pablo a bisa e Atenonan liberal lo siguiente tocante Dios: “E mes ta duna tur hende bida, rosea y tur cos. Pasobra ta pa medio di dje nos tin bida y ta move y ta existi, manera algun di boso propio poetanan a bisa: ‘Pasobra nos tambe ta su descendiente.’”—Echonan 17:25, 28.

Loke Pablo a bisa e Atenonan ta valido te awe. Nos Creador ta percura e aire cu nos ta respira, e cuminda cu nos ta come y e awa cu nos ta bebe. E cos ta masha simpel: Sin e bon cosnan aki cu Jehova a duna nos, nos no por biba. Pero dicon Dios a sigui percura e cosnan aki pa tur hende, sea cu nan ta pensa riba dje of no? Pablo a bisa cu esey ta “pa nan por busca Dios—si, busc’e fulando manera ora un hende ta busca den scuridad, y realmente hay’e—maske e no ta masha leu for di cada un di nos.”—Echonan 17:27.

Lo bo kier conoce Dios mihor? Lo bo kier siña mas tocante su proposito y su conseho pa hiba un bida feliz awor y pa semper? Si ta asina, nos ta anima bo pa papia cu e persona cu a duna bo e revista aki of pa tuma contacto cu e editornan. Nan lo ta contento pa yuda bo.