1, 2. (a) Con hopi hende ta describi un persona exitoso? (b) Con bo por haya sa kico ta bo pensamento encuanto exito?

KI ORA nos por bisa cu un hende ta exitoso? Si bo haci varios hende e pregunta ey, lo bo haya diferente contesta. Por ehempel, hopi lo bisa cu un hende exitoso ta un persona bon para financieramente, cu tin un bon trabou of bon educacion. Otronan lo bisa cu pa un persona por ta exitoso, e mester tin un bon relacion cu su famia, amigonan y coleganan di trabou. Kisas un cristian berdadero lo hasta contesta cu un persona exitoso ta un persona cu tin cierto responsabilidad den congregacion of cu tin exito den e trabou di predica.

² Awor, con bo por haya sa kico ta bo pensamento encuanto exito? Ata aki algo cu por yuda bo contesta e pregunta ey: Skirbi nomber di algun hende cu bo ta considera exitoso y cu bo ta admira y respeta hopi. Despues, wak kico e personanan aki tin en comun. Nan ta rico of famoso? Nan ta personanan prominente den comunidad? Bo contesta kisas ta revela loke tin den bo curason. Esaki por influencia e metanan cu bo ta pone den bida y bo escogencianan.​—Luc. 6:45.

3. (a) Kico Josue mester a haci pa e por tabatin exito? (b) Kico nos lo analisa awor?

³ E cos di mas importante pa nos mester ta: Ser exitoso den bista di Jehova. Dicon? Pasobra nos bida ta depende di dje. Ora Jehova a duna Josue e tarea pisa di guia e Israelitanan na e Tera Priminti, el a mand’e lesa e Ley di Moises “di dia y anochi” y haci conforme tur loke ta para skirbi den dje. Anto Dios a sigur’e: “E ora ey lo bo haci bo caminda prospera, y e ora ey lo bo tin exito.” (Jos. 1:7, 8) Y manera nos sa, Josue tabatin exito. Awor, kico di nos? Con nos por sa si nos punto di bista encuanto exito ta cuadra cu esun di Dios?  Pa nos por sa esey, laga nos analisa ehempel di dos personahe biblico.

4. Dicon nos por bisa cu Salomon tabata un homber exitoso?

⁴ Salomon tabata un homber masha exitoso den varios aspecto di bida. Con bin? Wel, pa hopi aña, el a teme y obedece Jehova, y Jehova a bendicion’e ricamente. Bo ta corda kico el a pidi ora Jehova a bis’e pa pidi loke e tabata kier? Si, el a pidi sabiduria pa guia e pueblo. Anto Jehova a dun’e tanto sabiduria como rikesa. (Lesa 1 Reynan 3:10-14.) Rey Salomon su sabiduria a “surpasa e sabiduria di tur e hombernan di oriente y tur e sabiduria di Egipto.” Salomon a bira famoso “den tur e nacionnan tur rond.” (1 Rey. 4:30, 31) Y pa loke ta su rikesa, e tabatin un entrada di 25 ton di oro pa aña, cu awe ta mas cu mil miyon dollar Mericano. (2 Cro. 9:13) Ademas, e tabata un bon comerciante, el a construi hopi cos bunita y tabatin bon relacion cu otro nacionnan. Si, tanten cu Salomon tabata fiel na Dios, e tabatin exito.​—2 Cro. 9:22-24.

5. Segun Salomon, ki ora un hende ta berdaderamente exitoso?

⁵ For di loke Salomon a skirbi den e buki di Eclesiastes, nos ta compronde cu e no tabata pensa cu un hende mester ta rico y prominente pa e por ta exitoso y feliz. El a skirbi: “Mi sa cu no tin nada mihor pa hende, cu regociha y haci bon den su bida, y tambe cu tur hende por come y bebe y mira e bon cu tin den tur su trabou​—esaki ta e regalo di Dios.” (Ecl. 3:12, 13) Ademas, Salomon a realisa cu e cosnan aki por duna un hende berdadero goso solamente ora e tin Dios su aprobacion, esta, un bon relacion cu Dios. Pesey mes el a bisa: “E conclusion di tur loke cu a wordo tendi, ta: teme Dios y warda su mandamentonan, pasobra esaki ta aplicabel na cada persona.”​—Ecl. 12:13.

6. Con e ehempel di Salomon ta yuda nos compronde kico ta berdadero exito?

⁶ Salomon a teme Dios pa hopi aña largo. Bijbel ta bisa cu e “tabata stima SEÑOR, y tabata cana den e statutonan di su tata David.” (1 Rey. 3:3) Tanten cu Salomon tabata haci esey, e tabata berdaderamente exitoso. Bou di guia di Dios, Salomon a construi un magnifico tempel pa adoracion berdadero y a skirbi tres buki biblico. Aunke nos lo no por logra e mesun cosnan cu Salomon, e ehempel cu el a pone tempo cu e tabata fiel na Dios mester yuda nos compronde kico ta berdadero exito y kico nos mester haci pa logra esey. Y corda cu Dios a inspira Salomon pa skirbi cu rikesa, sabiduria, fama y poder​—cosnan cu mayoria di hende awe ta uza pa midi exito​—ta puro banidad. Segun Salomon, hende cu ta traha duro pa logra e cosnan aki ta ‘core tras di biento’; cu otro palabra, nan ta core tras di cosnan cu no ta haci nan berdaderamente feliz. Bo no a ripara esey? Hende cu ta stima placa kier tin mas y mas. Y hopi biaha, nan ta preocupa pa nan no perde loke nan tin. Ademas, loke nan tin, tardi of trempan, lo pasa pa otro hende.​—Lesa Eclesiastes 2:8-11, 17; 5:10-12.

7, 8. Con bin Salomon a bira infiel, y kico tabata e resultado?

⁷ Manera nos sa, ora Salomon a bira bieu, el a stop di obedece Jehova. E Palabra di Dios ta bisa: “A sosode cu ora Salomon a bira bieu, su esposanan a haci su curason desvia pa sigui tras di otro diosnan; y su curason no tabata completamente dedica na SEÑOR su Dios, manera curason di su tata David tabata . . . Salomon a haci loke tabata malo den bista di SEÑOR.”​—1 Rey. 11:4-6.

⁸ Jehova no a keda contento cu Salomon y a bis’e: “Pasobra . . . bo no a warda mi  alianza y mi statutonan cu mi a ordena bo, lo mi scheur e reino kit’e for di bo sigur-sigur y dun’e na bo sirbidor.” (1 Rey. 11:11) Ki un resultado tristo pa su desobediencia! Si, aunke Salomon tabata exitoso den varios aspecto di bida, cu tempo, el a desapunta Jehova. Salomon a stop di haci e cos di mas importante: El a stop di sirbi Jehova fielmente. Pesey, cada un di nos mester puntra nos mes: ‘Lo mi haci bon uzo di loke mi a siña for di e experencia di Salomon pa mi por ta exitoso?’

9. Dicon segun e normanan di mundo, Pablo no tabata exitoso? Splica.

⁹ Apostel Pablo tabatin un bida hopi diferente for di esun di Rey Salomon. Pablo no tabatin un bida comodo: E no a biba den palacio ni come y bebe cu reynan. Al contrario, tabatin biaha cu el a pasa hamber, sed, friu y sin paña. (2 Cor. 11:24-27) Despues cu Pablo a acepta Hesus como e Mesias, el a perde fabor di e miembronan di e religion hudiu. E lidernan religioso hudiu a odi’e. Nan a encarcel’e, sut’e cu zwiep y bara y piedr’e. Pablo a indica cu e y su rumannan den fe a ser insulta, odia y persigui. El a bisa: “Te cu awor, nos ta manera e sushi di mundo, e desperdicio di tur cos.”​—1 Cor. 4:11-13.

10. Dicon por a parce cu Pablo a tira su oportunidad di logra exito afo?

¹⁰ Ta parce cu apostel Pablo tabatin hopi cos na su fabor tempo cu e tabata jong y tabata conoci como Saulo. Parce cu el a bin di un famia prominente y a haya les cerca Gamaliel, un maestro respeta. Y Pablo mes a skirbi despues cu el ‘a haci mas progreso den hudaismo cu hopi hende di su nacion cu tabata di su edad.’ (Gal. 1:14) Pablo por a papia Hebreo y Griego bon. Ademas, e tabatin ciudadania Romano, y esaki a dun’e cierto privilegio- y derechonan special cu hopi hende tabata desea. Si Pablo a sigui haci esfuerso pa logra exito den mundo, probablemente lo el a bira un persona rico y respeta. Pero el a scoge un otro rumbo; anto segun otro hende, kisas hasta algun di su famianan, esaki tabata un bobedad. Dicon el a scoge e rumbo ey?

11. Kico Pablo a balora, kico tabata su determinacion y dicon?

¹¹ Pablo tabata stima Jehova y a prefera di tin un bon relacion cu Jehova en bes di rikesa y fama. Ora Pablo a haya conocemento exacto di e berdad, el a cuminsa balora cosnan cu mayoria di hende den mundo no ta haya importante, manera por ehempel e rescate, e trabou di predica y  e speransa celestial. Ademas, Pablo tabata sa di e cuestion cu Satanas a lanta, esta, cu e por kita tur hende di sirbi Dios. (Job 1:9-11; 2:3-5) Pesey, e tabata determina pa keda fiel na Dios y a persevera den adoracion berdadero a pesar di cualkier prueba cu el a confronta pa asina proba cu Satanas ta mentiroso. Mayoria di hende cu kier bira exitoso den mundo no tin e determinacion ey.

12. Dicon abo ta pone confianza den Jehova?

¹² Abo tin e mesun determinacion cu Pablo tabatin? Wel, no ta tur ora ta facil pa keda fiel na Jehova. Pero si nos keda fiel, nos lo hacie contento y e lo bendiciona nos. Y ta esey ta haci nos berdaderamente exitoso. (Prov. 10:22) Si, Dios lo bendiciona nos awor y mucho mas den futuro. (Lesa Marco 10:29, 30.) Pesey, nos tin tur motibo pa pone pleno confianza, ‘no den rikesa insigur, sino, den Dios, kende ta duna nos tur e cosnan cu nos ta disfruta di dje.’ Haciendo esey, nos ta ‘acumula como tesoro pa nos mes un bon fundeshi pa futuro, a fin cu nos por haya un gara firme riba loke realmente ta bida.’ (1 Tim. 6:17-19) Si, nos por tin sigur cu aki shen, mil of mas aña, nos lo wak bek y bisa: “Mi tabatin un bida berdaderamente exitoso.”

13. Ki conseho Hesus a duna encuanto montona tesoro?

¹³ Relaciona cu tesoro, Hesus a bisa: “Stop di montona tesoro riba tera, caminda mot y frusto ta come nan y caminda ladron ta kibra drenta y horta. Mas bien, montona tesoro den cielo, caminda ni mot ni frusto no por come nan, ni ladron no por kibra drenta y horta. Pasobra caminda bo tesoro ta, eynan bo curason tambe lo ta.”​—Mat. 6:19-21.

14. Dicon no ta sabi pa montona tesoro riba tera?

¹⁴ Un hende su “tesoro riba tera” por encera mas cu placa. E por encera cualkier un di e cosnan cu Salomon a papia di dje y cu hende ta balora, manera prestigio, fama y poder. En realidad, Hesus a enfatisa e mesun punto cu Salomon a resalta den e buki di Eclesiastes, esta, cu tesoro cu nos por acumula den mundo no ta dura pa semper. Manera bo por a ripara, e tesoronan ey por caba na nada of bo por perde nan di un dia pa otro. Wak kico profesor F. Dale Bruner a bisa tocante “tesoro riba tera.” El a skirbi: ‘Mayoria di hende sa cu fama no ta dura pa semper. Un hende por ta famoso awe, pero mañan niun hende no sa ken e ta. Un hende por gana hopi placa e aña aki, y e siguiente aña, bati bancarota. Como cu Hesus ta stima hende, e ta spierta nos cu fama den e mundo aki ta engañoso: Awe e t’ey, pero mañan e por disparce, lagando hende sin speransa y desapunta. Esey ta pasa cu hopi hende awe, y Hesus no tabata kier pa esey pasa cu su discipelnan.’ Mayoria di hende ta di acuerdo cu loke e autor  aki a skirbi. Pero cuanto di nan ta sigui e conseho di Hesus? Abo ta hacie?

15. Ki clase di exito nos mester traha duro pa alcansa?

¹⁵ Algun lider religioso ta siña hende cu nan no mester haci esfuerso pa bira exitoso den ningun sentido. Pero Hesus no a bisa esey. Al contrario, el a anima su discipelnan pa lucha pa alcansa berdadero exito; el a encurasha nan pa montona “tesoro den cielo”, pasobra esey lo dura pa semper. Nos deseo di mas grandi mester ta pa ta exitoso den bista di Jehova. Hesus su palabranan ta recorda nos cu cada un di nos ta scoge loke nos kier lucha p’e. Pero e realidad ta cu ta loke tin den nos curason nos ta balora y lucha p’e.

16. Kico nos por tin sigur di dje?

¹⁶ Si nos ta desea sinceramente di agrada Jehova, nos por tin sigur cu e lo duna nos loke nos tin mester. Pero tin biaha por sosode cu nos ta sufri di hamber y sed mescos cu tabata e caso cu apostel Pablo. (1 Cor. 4:11) No obstante, nos por pone tur nos confianza den e conseho aki di Hesus: “No sea nunca ansha y puntra: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ Pasobra tur e cosnan aki ta loke e nacionnan ta core tras di dje. Ma boso Tata celestial sa cu boso tin mester di tur e cosnan aki. Sigui busca anto prome e Reino y e husticia di Dios, y lo e duna boso tur e cosnan aki.”​—Mat. 6:31-33.

17, 18. (a) Di kico berdadero exito ta depende? (b) Di kico exito no ta depende?

¹⁷ Nos tur mester corda esaki: Berdadero exito no ta depende di nos logronan ni di nos posicion den e mundo aki. Ademas, berdadero exito no ta depende di e responsabilidadnan cu nos por tin den congregacion. Privilegionan asina basicamente ta resultado di obediencia y fieldad na Dios, kende ta bisa nos: “Loke ta ser verwacht di un mayordomo ta pa e ta fiel.” (1 Cor. 4:2) Y nos mester sigui haci esfuerso pa ta fiel na Dios. Hesus a bisa: “Esun cu persevera te na fin lo ser salba.” (Mat. 10:22) Bo no ta di acuerdo cu nos salbacion lo ta un prueba palpabel cu nos realmente tabata exitoso?

¹⁸ Manera nos a mira, berdadero exito ta depende di nos fieldad na Dios. Y nos tur por keda fiel na Dios a pesar di nos circunstancia den bida. Pues, nos fieldad no ta depende di nos educacion ni di cuanto fama of placa nos tin. E no ta depende tampoco di nos inteligencia, talento ni habilidad. Algun sirbidor di Dios di prome siglo tabata rico, pero otronan tabata pober. Apostel Pablo a conseha e cristiannan rico pa nan “haci bon, pa nan ta rico den bon obra, pa nan ta generoso, cla pa comparti cu otro.” Si, tanto hende rico como pober por a “haya un gara firme riba loke realmente ta bida.” (1 Tim. 6:17-19) Esey ta conta pa nos tambe. Nos tur tin e mesun oportunidad y responsabilidad: Nos mester keda fiel na Dios y ser “rico den bon obra.” Si esey ta e caso, nos lo ta exitoso den bista di nos Creador, y nos lo tin e satisfaccion cu nos ta agrad’e.​—Prov. 27:11.

19. Kico bo ta determina pa haci pa logra berdadero exito?

¹⁹ Kisas, nos no por cambia nos circunstancia den bida; loke si nos por cambia ta e manera cu nos ta trata cu esaki. Sea loke sea nos circunstancia, laga nos haci tur nos esfuerso pa keda fiel na Dios. Esey ta bale la pena. Jehova lo bendiciona nos ricamente, awor y pa semper. Nunca lubida loke Hesus a bisa cristiannan ungi: “Sea fiel, si, hasta te na morto, y lo mi duna bo e corona di bida.” (Rev. 2:10) Si, tur persona cu ricibi bida eterno tabatin un bida berdaderamente exitoso.