Laga Nos Puntra Hesus

Hopi hende cu ta kere den Dios ta haya cu religion mester ta envolvi den politica. Segun nan, religion por yuda soluciona e problemanan di humanidad. Pero tin otro creyente sincero cu ta di opinion cu religion mester ta separa for di politica. Kico abo ta pensa? E dos forsanan poderoso ey mester traha hunto?

HESUCRISTO a ser describi como e personahe “cu mas a influencia e historia religioso di humanidad.” Pues, imagina si nos por a puntr’e si religion mester ta envolvi den politica, kico lo el a contesta? Wel, loke el a papia y haci ora e tabata riba tera ta contesta e pregunta ey. Por ehempel, den su famoso Sermon Riba Sero, el a duna instruccion cu a yuda su siguidonan compronde ki papel nan mester a hunga den nan comunidad. Laga nos analisa algun punto for di e sermon famoso ey.

Nan Mester Haci un Impacto den Bida di Otro Hende

Hesus a describi e actitud cu su siguidonan mester tin pa cu mundo. El a declara: “Boso ta e salo di tera, pero si salo perde su smaak, kico lo dun’e su smaak bek? E no ta sirbi pa nada mas cu pa tira afo y pa hende pasa trapa riba dje. Boso ta e luz di mundo. . . . Laga boso luz briya dilanti di hende, pa asina nan por mira boso obranan excelente y duna gloria na boso Tata cu ta den cielo.” (Mateo 5:13-16) Dicon Hesus a compara su discipelnan cu salo y cu luz?

Hesus kier a enfatisa e impacto positivo cu su siguidonan mester tin riba comunidad, pesey el a compara nan cu salo y cu luz. Salo no por conserva un cuminda si bo no mescl’e den dje. Un lampi no por lusa un camber si bo ten’e pafo di e camber. Pues, ta bon pa nota cu e palabranan di Hesus ta indica cu su siguidonan lo ta manera salo, no pa un grupo chikito so sino pa henter humanidad, y nan lo ta manera luz, no pa un cantidad limita di hende sino pa tur cu sinceramente ta busca manera pa conoce Dios. Hesus no tabata kier pa su discipelnan isola nan mes for di sociedad. E no a duna ordo tampoco pa nan bay biba na luganan aisla y forma comunidad di hende creyente eynan of pa nan evita tur contacto cu hende cu no tabata comparti nan creencia. Mas bien, mescos cu salo mester ta den e cuminda pa conserv’e y un lampi mester ta den e camber pa trece claridad, asina cristiannan mester ta envolvi den nan comunidad pa nan por tin un impacto den bida di otro hende.

“Nan No Ta Parti di Mundo”

Pesey, Hesus a manda su siguidonan pa nan tin trato cu nan prohimo. Pero esaki ta lanta un pregunta importante tocante ki actitud cristiannan mester tin pa cu politica. Dicon? Pasobra djis un poco prome cu su morto, el a haci e siguiente peticion na Dios relaciona cu su siguidonan: “Mi no ta pidi bo pa saca nan for di mundo, ma pa bo proteha nan pa motibo di e Malbado. Nan no ta parti di mundo, mescos cu ami no ta parti di mundo.” (Juan 17:15, 16) Awor bon, con ta posibel pa cristiannan no ta parti di mundo pero toch keda envolvi den nan comunidad local? Pa haya e contesta, laga nos analisa dos pregunta mas:

• Kico Hesus a pensa di politica?

• Cristiannan djawe mester ta den politica?