1. Dicon ta bon cu nos por imagina cosnan cu nos no a mira? (Wak e prome plachi.)

JEHOVA a duna nos un regalo maraviyoso. El a duna nos e capacidad di imagina cosnan cu nos no a mira nunca. Esey ta yuda nos spera ansiosamente riba cosnan bon y tambe plania pa futuro y asina evita problema. Jehova tin e capacidad di mira cosnan cu no a sosode ainda, y den Bijbel el a bisa nos algun cos bon cu lo bay pasa. Aunke nos no por mira nan, nos por imagina si kico lo bay pasa, es decir, nos por visualisa nan y tene fe cu nan lo sosode.—2 Cor. 4:18.

2, 3. (a) Con nos imaginacion por yuda nos? (b) Ki preguntanan nos lo analisa den e articulo aki?

² Pero tin biaha nos ta imagina cosnan cu no ta basa riba realidad. Por ehempel, si un mucha chikito ta imagina su mes ta bula rond riba lomba di un barbulet, esey ta puro fantasia. En cambio, Ana a uza su imaginacion pa pensa riba algo cu sigur lo a sosode: e dia cu lo el a hiba Samuel pa sirbi na e tabernakel di Jehova hunto cu e sacerdotenan. Esey no tabata un fantasia, sino algo cu el a dicidi cu e ta bay haci. Pues, e echo cu e por a imagina su mes e dia ey a dun’e e forsa pa cumpli cu su promesa na Jehova. (1 Sam. 1:22) Asina tambe, ora nos ta imagina nos  mes e cosnan cu Jehova a priminti, nos ta pensando riba cosnan cu lo sosode sigur.—2 Ped. 1:19-21.

³ Sin duda, hopi sirbidor di Jehova den tempo biblico a imagina nan mes e cosnan cu Dios a priminti nan. Con nan a beneficia di esaki? Y dicon ta bon pa nos “mira” of imagina nos mes con bida lo ta ora Jehova cumpli cu e cosnan maraviyoso cu el a priminti hende cu ta obedec’e?

4. Ki base Abel tabatin pa imagina su mes un mihor futuro?

⁴ Abel tabata e prome sirbidor fiel di Dios. El a mira e cosnan cu Jehova a priminti? Wel, e tabata sa kico Jehova a bisa e colebra despues cu Adam cu Eva a peca: “Lo mi pone enemistad entre abo y e muher, y entre bo simia y su simia; e lo herida bo cabes, y abo lo herida su hilchi di pia.” (Gen. 3:14, 15) Aunke Abel no tabata sa precies con e palabranan aki lo a cumpli, lo e mester a keda pensa riba loke Dios a bisa. Probablemente el a imagina su mes cu e colebra lo a “herida [un hende] su hilchi di pia” pa asina humanidad por a bira perfecto atrobe. Pero, sin importa kico Abel a imagina su mes, e tabatin fe den e promesa di Dios, y pesey Jehova a acepta su sacrificio.—Lesa Genesis 4:3-5; Hebreonan 11:4.

5. Con Enok su imaginacion di futuro a anim’e?

⁵ Enok tabata un otro homber cu tabatin un fe firme den Dios. E tabata biba meymey di hende malbado cu tabata ofende Dios. El a profetisa cu Jehova lo a bin “cu su multitud di angel santo, pa ehecuta huicio contra tur, y pa declara tur e malbadonan culpabel pa motibo di tur nan echonan malbado cu nan a comete y pa motibo di tur e cosnan ofensivo cu pecadornan malbado a papia contra dje.” (Judas 14, 15) Kico a yuda Enok predica cu asina tanto curashi? Wel, casi sigur e palabranan inspira ey a yuda Enok imagina su mes un mundo sin hende malbado.—Lesa Hebreonan 11:5, 6.

6. Riba kico Noe lo a keda pensa despues di Diluvio?

⁶ Noe tabatin fe den Jehova, y esey a yud’e sobrevivi e Diluvio. (Heb. 11:7) Despues cu el a sali for di e arca, su fe a motiv’e pa ofrece sacrificio di bestia. (Gen. 8:20) E tambe, mescos cu Abel, tabatin fe cu un dia humanidad lo ser libra di pica y morto. Pero despues di Diluvio mundo a bira malo atrobe. Nimrod a cuminsa goberna y el a fomenta rebelion contra Jehova. Pero Noe a keda cu su fe y speransa. (Gen. 10:8-12, NW) Sin duda, Noe a imagina su mes e tempo ora cu hende lo ser libra di gobierno opresivo, pica hereda y morto, y esaki sigur a anim’e hopi. Nos tambe por imagina nos mes e tempo maraviyoso ey cu awor ta mas cerca cu nunca.—Rom. 6:23.

7. Ki futuro Abraham, Isaak y Jacob por a mira pa nan descendientenan?

⁷ Abraham, Isaak y Jacob por a mira, of imagina, un futuro maraviyoso ya cu Jehova a priminti nan cu pa medio di nan descendiente tur e nacionnan di mundo lo a ricibi bendicion. (Gen. 22:18; 26:4; 28:14) Dios a bisa tambe cu nan famia lo a bira un nacion grandi y cu e lo a duna nan un bunita luga di biba: e Tera Priminti. (Gen. 15:5-7) Fe a pone cu e hombernan temeroso di Dios aki por a mira nan famianan ta biba caba den e tera ey. For di momento cu Adam cu Eva a peca, Jehova a sigura su sirbidornan leal cu un dia hende lo tin bida perfecto atrobe.

8. Kico a yuda Abraham demostra un fe sobresaliente?

 ⁸ Bijbel ta indica cu “aunke e promesanan no a cumpli” den tempo di Abraham y otro sirbidornan leal di Dios, “nan a mira nan di leu y a ricibi nan gustosamente.” (Lesa Hebreonan 11:8-13.) Con nan por a mira nan? Probablemente, nan a uza nan imaginacion. Abraham tabatin asina tanto motibo pa confia den Jehova cu tabata comosifuera el a mira e cosnan cu Dios a primintie, sin cu el a ricibi nan ainda. Esey a fortalece su fe y a yud’e obedece Jehova hasta bou di circunstancianan hopi dificil.

9. Con Abraham su fe den e promesanan di Dios a yud’e?

⁹ Abraham su fe den e promesanan di Dios a dun’e e fortaleza pa cumpli cu Jehova su boluntad. Por ehempel, el a sali for di e stad Ur y a nenga di establece su mes permanentemente den un di e stadnan di Canaan. Dicon? Pasobra e tabata sa cu e dianan di e stadnan rond di dje tabata conta, ya cu nan gobernantenan no tabata sirbi Jehova. (Jos. 24:2) Abraham a pasa e resto di su bida sperando “e stad cu tin berdadero fundeshi, e stad di cua Dios mes ta e diseñador y constructor.” (Heb. 11:10) Cu otro palabra, Abraham a mira su mes caba ta biba den un luga permanente, goberna pa Jehova. Abel, Enok, Noe, Abraham y otro personanan di fe a kere den e resureccion y a anticipa e bida riba Tera bou di e Reino di Dios, “e stad cu tin berdadero fundeshi.” Cada biaha cu nan a medita riba e bendicionnan ey, nan a haya mas fe den Jehova.—Lesa Hebreonan 11:15, 16.

10. Kico Sara por a imagina su mes a base di e promesa cu Jehova a haci Abraham?

¹⁰ Laga nos pensa awor riba Sara, casa di Abraham. Aunke e tabata un muher di 90 aña y no tabatin yiu, el a kere e promesa di Dios cu un dia lo e haya un yiu. Dicon e tabata asina sigur di esey? Pasobra el a imagina su mes con futuro lo tabata. Cu wowo di fe, e por a mira su descendientenan ta disfruta di e bendicionnan cu Jehova a priminti. (Heb. 11:11, 12) Jehova a bisa Abraham relaciona cu Sara: “Lo mi bendicion’e, y di berdad lo mi duna bo un yiu homber pa medio di dje. E ora ey lo mi bendicion’e y e lo ta un mama di nacionnan; reynan di pueblonan lo sali for di dje.” (Gen. 17:16) Manera Jehova a priminti, Sara a haya un yiu homber, Isaak. E milager aki a convence Sara cu Jehova lo a cumpli cu e resto di e promesa cu el a haci Abraham. Pues, nos tambe, segun cu nos ta medita riba tur e cosnan maraviyoso cu Jehova a priminti, nos fe ta bira mas fuerte.

11, 12. Kico a yuda Moises cultiva amor pa Jehova?

¹¹ Un otro persona cu tabatin fe den e promesanan di Jehova y un amor profundo p’e tabata Moises. Como cu el a lanta den e famia di e rey di Egipto, facilmente lo e por a desaroya un amor pa poder y rikesa. Pero su mayornan biologico a siñ’e tocante Jehova y tocante Su promesa di libra e Hebreonan for di sclavitud y duna nan e Tera Priminti. (Gen. 13:14, 15; Exo. 2:5-10) Moises casi sigur a pensa hopi biaha riba e bendicionnan cu tabata warda e pueblo di Dios. Kico bo ta kere lo a crece den su curason: e deseo pa un posicion prominente den Egipto of amor pa Jehova?

¹² Bijbel ta bisa riba kico Moises a medita: “Pa medio di fe Moises, ora el a bira grandi, a nenga di ser yama yiu di e yiu muher di Farao. El a scoge pa ser maltrata hunto cu e pueblo di Dios en bes di gosa  di e placernan pasahero di pica, pasobra el a considera e deshonor cu el a sufri como Ungi como un rikesa mas grandi cu e tesoronan di Egipto, ya cu e tabatin su bista fiha riba e recompensa.”—Heb. 11:24-26.

13. Dicon tabata bon cu Moises a medita riba loke Dios a priminti?

¹³ Mas Moises a medita riba loke Jehova a priminti di haci pa e Israelitanan, mas su fe y amor pa Dios a crece. Mescos cu otro sirbidor di Dios, Moises tambe probablemente a imagina su mes e dia cu Jehova lo a libra hende for di morto. (Job 14:14, 15; Heb. 11:17-19) Ta logico cu Moises a haya un gran amor pa e Dios cu tabatin asina tanto compasion pa e Hebreonan y pa henter humanidad. Fe y amor a motiva Moises durante henter su bida. (Deu. 6:4, 5) Hasta ora Farao a menas’e cu morto, e no tabatin miedo. Su fe, su amor pa Dios y probablemente e futuro briyante cu el a visualisa a dun’e e fortaleza pa enfrenta e situacion ey cu curashi.—Exo. 10:28, 29.

14. Ki tipo di pensamento ta puro fantasia?

¹⁴ Hopi hende awe ta imagina cosnan cu lo no sosode nunca. Por ehempel, aunke Bijbel ta bisa cu bida den e mundo di Satanas aki lo “no ta nada otro cu molester y pena”, toch tin hende pober ta soña cu un dia nan lo bira miyonario y cu nan lo no tin niun preocupacion mas. (Sal. 90:10) Aunke Bijbel ta indica cu ta e Reino di Dios so por soluciona e problemanan di mundo, tin hende ta imagina cu un dia lo presenta un gobierno humano cu lo soluciona tur nan problemanan. (Dan. 2:44) Y aunke Bijbel ta sigura nos cu Dios lo destrui e mundo malbado aki, hopi hende ta pensa cu nada malo no ta bay pasa. (Sof. 1:18; 1 Juan 2:15-17) Hende cu ta pasa por halto di e proposito di Jehova pa futuro ta bibando den un mundo di fantasia.

15. (a) Dicon ta bon pa nos imagina nos mes e futuro cu Dios a priminti nos? (b) Kico ta un di e cosnan cu bo ta spera ansiosamente riba dje?

¹⁵ En cambio, como cristian, ta bon pa nos imagina nos mes ta disfrutando di e cosnan cu Jehova a priminti, sea cu nos speransa ta bida den cielo of bida riba Tera. Abo tin custumber di haci esey? Bo ta mira bo mes den e mundo nobo? Lo bo sinti mas feliz y lo bo tin mas animo pa sigui sirbi Jehova. Por ehempel, mira bo mes ta biba pa semper riba Tera. Imagina cu bo ta trahando hunto cu bo amigo- y amiganan pa transforma e Tera den un bunita paradijs. Esnan cu ta supervisa e trabou ey di berdad ta stima bo, y esey ta haci bo bida mas dushi ainda. Tur bo bisiñanan ta stima Jehova, mescos cu bo. Bo tin bon salud, bo ta yen di energia y bo no tin niun preocupacion. Y bo ta contento, hopi contento mes, cu bo por uza bo talento- y habilidadnan pa yuda otro hende y pa trece honor na Jehova. Kisas bo ta yudando hasta hende cu a ser resucita siña conoce Jehova. (Juan 17:3; Echo. 24:15) No, esaki no ta un soño of un mundo di fantasia. Tur loke bo a caba di imagina lo ser realisa pasobra nan ta basa riba loke Bijbel ta bisa tocante futuro.—Isa. 11:9; 25:8; 33:24; 35:5-7; 65:22.

16, 17. Dicon ta bon pa nos papia tocante e futuro cu Jehova a priminti nos?

¹⁶ Ora nos ta combersa cu nos rumannan tocante e cosnan cu nos lo kier haci den e mundo nobo, e bunita futuro aki ta bira mas real pa nos. Ta berdad cu nos no sa kico precies cada un di nos lo bay haci den e mundo nobo, pero ta bon pa papia tocante con nos ta imagina cu nos bida lo  ta. Asina nos ta anima otro y ta expresa nos fe den loke Jehova a priminti. Ora apostel Pablo a bishita e rumannan na Roma, tabatin “un intercambio di estimulo” entre nan, y sin duda nan a aprecia esey. Awe, nos tambe tin mester di esey den e tempo dificil aki.—Rom. 1:11, 12.

¹⁷ Ora nos ta imagina nos mes e bida den futuro, nos lo pensa menos riba e problemanan actual. Na un ocasion apostel Pedro a bisa Hesus: “Wak! Nos a laga tur cos y a sigui bo; kico realmente nos lo haya?” Su palabranan ta indica e preocupacion cu probablemente e cu e otro discipelnan tabatin. Kico Hesus a haci pa trankilisa nan? El a yuda nan imagina e futuro maraviyoso cu tabata spera nan. El a bisa nan: “Di berdad mi ta bisa boso: Dia tur cos bira nobo, ora e Yiu di hende sinta riba su trono glorioso, boso cu a sigui mi tambe lo sinta riba 12 trono y husga e 12 tribunan di Israel. Y tur hende cu a bandona cas, ruman homber, ruman muher, tata, mama, yiu of cunucu pa motibo di mi nomber lo haya hopi biaha mas tanto di esakinan, y tambe bida eterno.” (Mat. 19:27-29) Pues, Pedro y e otro discipelnan por a imagina nan mes ta forma parti di e gobierno cu lo a goberna mundo y trece masha hopi bendicion pa humanidad obedecido.

18. Dicon ta bon pa nos imagina nos mes e tempo cu nos lo ricibi tur loke Jehova a priminti nos?

¹⁸ Sirbidornan di Jehova semper a pensa riba e cumplimento di e promesanan di Dios, y esey a yuda nan cultiva un fe firme. Abel tabata sa suficiente tocante e proposito di Dios p’e por tabatin fe y speransa y pa imagina su mes un mihor futuro. Abraham a obedece Jehova hasta ora tabata hopi dificil. Dicon? Pasobra el a imagina su mes e tempo ora cu e promesanan di Jehova relaciona cu e simia, of “descendiente”, lo a cumpli. (Gen. 3:15) Moises a keda cu “su bista fiha riba e recompensa” cu Jehova a primintie, y esey a yuda su fe y amor pa Jehova crece. (Heb. 11:26) Nos fe y amor pa Jehova tambe lo crece si nos ta imagina nos mes e tempo cu nos lo ricibi tur loke el a priminti nos. Den e siguiente articulo, nos lo siña tocante un otro manera mas cu nos por uza nos imaginacion.