1, 2. (a) Dicon ta importante pa nos ‘keda alerta y no neglisha oracion’? (b) Kico ta bon pa nos puntra nos mes tocante oracion?

 PA HENDE cu ta traha warda, e periodo mas dificil pa keda lanta ta ora cu nan warda ta cerca di caba, prome cu dia habri, ora cu ta hopi scur ainda. Ken cu a yega di keda lanta henter anochi lo ta di acuerdo cu esaki. Awe nos ta confronta un reto parecido na esey pasobra e fin di e mundo di Satanas ta hopi cerca. Nos tempo ta mescos cu e periodo mas scur di anochi, y cristiannan tin cu bringa pa keda lanta. (Rom. 13:12) Ta masha peligroso pa pega soño aworaki! Pues, ta importante pa nos desplega “sano huicio” y ‘keda alerta pa nos no neglisha oracion.’—1 Ped. 4:7.

² Ya cu nos ta asina cerca di e fin di e mundo di Satanas, ta bon pa nos puntra nos mes: ‘Cuanto atencion mi ta duna na mi oracionnan? Mi ta uza tur forma, of tipo, di oracion, y mi ta haci oracion continuamente? Mi tin e custumber di haci oracion pa otro hende, of normalmente mi ta resa solamente pa e cosnan cu ami mester of cu ami kier? Y con importante oracion ta pa mi salbacion?’

3. Menciona algun forma di oracion.

³ Den Pablo su carta na e Efesionan, el a menciona “tur forma di oracion.” (Efe. 6:18) Ora nos ta haci oracion na Jehova, hopi biaha nos ta pidie pa duna nos loke nos tin mester y pa yuda nos vence obstaculo. Bijbel ta bisa cu e ta Esun “cu ta scucha oracion”, y como cu e ta stima nos, e ta scucha ora nos ta pidie yudansa. (Sal. 65:2) Pero ora nos ta haci oracion, nos no mester concentra riba peticion so. Tin otro forma di oracion tambe, entre otro, oracion di alabanza, di gradicimento y di suplica.

4. Dicon nos mester alaba Jehova hopi biaha den nos oracionnan?

 ⁴ Tin hopi motibo pakico nos mester inclui palabranan di alabanza ora nos ta haci oracion na Jehova. Por ehempel, nos ta sinti nos motiva pa alab’e ora nos pensa riba “su echonan poderoso” y riba “su grandeza excelente.” (Lesa Salmo 150:1-6.) E seis versiculonan di Salmo 150 ta conseha nos 13 biaha pa alaba Jehova. Figura bo! Cu un amor y respet profundo pa Jehova e escritor di un otro salmo a canta: “Shete biaha pa dia mi ta alaba bo, pa motibo di bo ordenanzanan husto.” (Sal. 119:164) Jehova definitivamente merece alabanza. Pues, nos lo mester alab’e “shete biaha pa dia”, es decir, hopi biaha, den nos oracionnan.

5. Den ki sentido oracion di gradicimento ta un proteccion pa nos?

⁵ Un otro forma di oracion importante ta gradicimento. Pablo a bisa e cristiannan di e stad di Filipo: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan.” (Flp. 4:6) Ora nos ta expresa gratitud sincero na Jehova den oracion, e ta sirbi como un proteccion pa nos. Con? Wel, nos ta biba den e ultimo dianan di e mundo di Satanas, y nos ta rondona pa hende “malagradecido.” (2 Tim. 3:1, 2) Si, den mundo, ta bisto cu mayoria di hende ta malagradecido. Si nos no tene cuidou, nos por pega cu e actitud ey. Pero si nos tin custumber di yama Jehova danki den oracion, nos lo ta feliz y satisfecho y nos lo no ‘cana murmura y keha tocante nos suerte den bida.’ (Judas 16) Ademas, ora cabesnan di cas ta haci oracion cu nan famia y ta expresa palabranan di gradicimento den nan oracion, nan ta anima nan casa y nan yiunan pa ta agradecido.

6, 7. Kico ta suplica, y tocante kico nos por suplica Jehova?

⁶ Suplica ta oracion sincero expresa cu fervor. Tocante kico asina nos por suplica Jehova? Wel, nos por rog’e pa yuda nos ora nos ta ser persigui of ora nos ta confronta un maleza cu ta pone nos bida na peliger. Na momentonan asina nos ta suplica, of roga, Jehova pa yudansa. Pero ta ora nos ta ser persigui of ora nos ta malo so nos por suplica Jehova?

⁷ Pa contesta e pregunta ey, laga nos considera Hesus su oracion modelo y wak kico el a bisa tocante Dios su nomber, Su Reino y Su boluntad. (Lesa Mateo 6:9, 10.) E mundo aki ta yen yen di maldad, y e gobiernonan no por duna nan ciudadanonan ni sikiera e cosnan basico cu nan tin mester. Nos tin bon motibo anto pa pidi den oracion pa Dios su nomber sea santifica y pa su Reino elimina e gobernacion di Satanas for di riba tera. Pero awor ta ora tambe pa suplica Jehova pa laga su boluntad sosode riba tera mescos cu den cielo. Pues, laga nos keda alerta y haci uzo di tur forma di oracion.

8, 9. Dicon nos no mester condena Pedro cu e otro apostelnan pasobra nan a pega soño den hofi di Getsemani?

⁸ Aunke apostel Pedro a anima cristiannan pa ‘keda alerta pa nan no neglisha oracion’, e mes, na por lo menos un ocasion, no a keda alerta. E tabata un di e discipelnan cu a pega soño mientras cu Hesus tabata haci oracion den hofi di Getsemani. Aunke Hesus a bisa nan pa “keda vigila y haci oracion continuamente”, toch nan a pega soño.—Lesa Mateo 26:40-45.

⁹ Pero en bes di condena Pedro cu e otro apostelnan pasobra nan no a keda lanta, ta bon pa nos corda cu nan a haci hopi cos e dia ey y tabata hopi cansa. Nan a haci e preparacionnan pa e Pasco Hudiu y a celebr’e e anochi ey. Despues di esey, Hesus a institui e Cena di Señor, loke a mustra su discipelnan  con nan mester a tene e Conmemoracion di su morto den futuro. (1 Cor. 11:23-25) Anto “despues di canta cantica di alabanza, nan a sali bay Sero di Oleifi.” Pa yega eynan, nan mester a cana un distancia door di e cayanan smal di Jerusalem. (Mat. 26:30, 36) Pa ora nan a yega e hofi, kisas ya tabata despues di meyanochi. Si nos tabata den hofi di Getsemani e anochi ey, kisas nos tambe lo a pega soño. En bes di Hesus critica su apostelnan cu tabata morto cansa, el a reconoce cu “e spirito tin e boluntad, ma e carni ta debil.”

10, 11. (a) Ki les Pedro a siña for di su experencia den hofi di Getsemani? (b) Kico abo ta siña for di e experencia di Pedro?

¹⁰ Pedro a siña un les doloroso pero importante e anochi ey cu el a pega soño den hofi di Getsemani. Mas prome, Hesus a bisa: “Awe nochi boso tur lo trompica pa motibo di loke lo pasa cu mi.” Pero Pedro a contest’e: “Maske tur e otronan trompica pa motibo di loke lo pasa cu bo, ami si lo no trompica nunca!” Hesus a bisa e ora ey cu Pedro lo a nenga tres biaha cu e conoc’e. Pero Pedro no a ker’e y a bisa: “Hasta si mi tin cu muri hunto cu bo, lo mi no nenga cu mi conoce bo.” (Mat. 26:31-35) Pero a sosode manera Hesus a bisa: Pedro a trompica. Ora Pedro a realisa kico el a haci, el a sintie asina malo cu el a “yora amargamente.”—Luc. 22:60-62.

¹¹ Un cos ta sigur, Pedro a siña un les for di e experencia aki y a vence e tendencia di confia mucho den su mes. Aparentemente, oracion a yud’e cu esaki. Con nos por sa? Wel, pasobra Pedro ta esun cu a skirbi cu nos mester ‘keda alerta pa nos no neglisha oracion.’ Kico di nos? Nos ta scucha e conseho inspira aki? Nos ta “haci oracion continuamente”, y asina demostra cu nos ta depende riba Jehova? (Sal. 78:7) Laga nos corda tambe riba e spiertamento di apostel Pablo: “Esun cu ta kere cu e ta para, tene cuidou pa e no cay.”—1 Cor. 10:12.

12. Dicon Nehemias ta un bon ehempel pa nos?

¹² Un otro ehempel ta Nehemias. E tabata copero di Rey Artaherhes di Persia, un 450 aña prome cu Cristo. Nehemias ta un bon ehempel di un persona cu a haci oracion cu fervor. Pa hopi dia, el a ‘yuna y haci oracion dilanti Dios’ tocante e situacion deplorabel di e Hudiunan na Jerusalem. (Neh. 1:4) Ora Artaherhes a puntr’e dicon su cara ta tristo, Nehemias a splic’e con e situacion tabata na Jerusalem. Anto e rey a puntr’e: “Kico ta bo peticion?” Di  biaha Nehemias “a haci oracion na e Dios di cielo.” (Neh. 2:2-4) Cu ki resultado? Jehova a contesta su oracionnan di tal manera cu esaki a beneficia Su pueblo. (Neh. 2:5, 6) Cuanto e experencia aki lo mester a fortalece Nehemias su fe!

13, 14. Kico nos mester haci pa nos por keda cu un fe fuerte y resisti e intentonan di Satanas pa desanima nos?

¹³ Si nos ta haci oracion continuamente, manera Nehemias a haci, esey lo yuda nos keda cu un fe fuerte. Satanas no ta tene misericordia, y hopi biaha e ta ataca nos ora nos ta debil. Por ehempel, si nos tin un maleza grave of ta lucha cu depresion, nos por cuminsa sinti cu Dios no ta keda contento cu e tiki tempo cu nos ta predica tur luna. Algun di nos kisas ta lucha cu pensamentonan negativo cu ta angustia nos, kisas debi na mal experencia cu nos tabatin den pasado. Satanas kier pa nos kere cu nos no ta bal nada. Hopi biaha su atakenan ta diseña pa desanima nos y asina debilita nos fe. Pero si nos ‘keda alerta y no neglisha oracion’, nos por tin un fe fuerte. Bijbel ta bisa cu nos fe ta manera un escudo grandi cu por yuda nos “paga tur e flechanan cendi di e Malbado.”—Efe. 6:16.

¹⁴ Ademas, si nos ‘keda alerta y no neglisha oracion’, pruebanan cu bin diripiente lo no gara nos di sorpresa y pone nos bira infiel na Jehova. Ora nos haya nos cu prueba y dificultad, nos mester corda riba e ehempel di Nehemias y haci oracion di biaha. Ta cu Jehova su yudansa so nos por resisti tentacion y para firme durante prueba.

15. Kico nos mester puntra nos mes relaciona cu hacimento di oracion pa otro hende?

¹⁵ Hesus a suplica Dios pa yuda Pedro  pa su fe no debilita. (Luc. 22:32) Epafras, un cristian di prome siglo, a imita Hesus den esaki y a haci esfuerso pa haci oracion na fabor di su rumannan na Colosas. Pablo a bisa nan: “Semper e ta resa pa boso ku masha fervor pa boso para firme komo kreyente madurá ku ta obedesé boluntat di Dios den tur kos.” (Col. 4:12, BPK) Ta bon pa nos puntra nos mes: ‘Mi ta haci esfuerso pa resa pa mi rumannan rond mundo? Cuanto biaha mi ta haci oracion pa e rumannan cu ta biba den areanan afecta pa desaster natural? Ki dia tabata ultimo biaha cu mi a haci esfuerso pa resa pa esnan cu ta carga responsabilidad di peso den e organisacion di Jehova? Mi a haci oracion recientemente pa un hende specifico den congregacion kende ta pasando den dificultad?’

16. E oracionnan cu nos ta haci na fabor di otro hende realmente ta haci un diferencia? Splica dicon.

¹⁶ E oracionnan cu nos ta haci na Jehova Dios pa nos rumannan realmente por yuda nan. (Lesa 2 Corintionan 1:11.) Jehova no ta obliga di actua simplemente pasobra un gran cantidad di sirbidor ta pidie algo bes tras bes den oracion. Pero ora e ta contesta nan oracionnan, e ta tene cuenta cu e interes cu nan tin den otro y cu nan ta preocupa pa otro. Pues, nos tin cu tuma na serio e privilegio y responsabilidad cu nos tin di haci oracion na fabor di otro hende. Nos mester imita Epafras, y haci esfuerso pa resa pa nos rumannan cristian pasobra asina nos ta demostra nos amor sincero pa nan. Nos lo ta mas feliz ora nos ta haci esaki, ya cu “tin mas felicidad den duna cu den ricibi.”—Echo. 20:35.

17, 18. Si nos ‘keda alerta y no neglisha oracion’, cu kico esey ta yuda nos?

¹⁷ Un poco prome cu Pablo a bisa cu “anochi ta hopi avansa; e dia a yega cerca”, el a skirbi: “Boso sa den ki tempo nos ta biba. Ya ta ora pa boso lanta for di soño, pasobra nos salbacion ta mas cerca cu tempo nos a bira creyente.” (Rom. 13:11, 12) E mundo nobo cu Dios a priminti ta cerca, y nos salbacion ta mas cerca di loke nos ta pensa. Aworaki no ta ora pa nos pega soño den sentido spiritual. Y hamas nos mester laga e mundo aki kita tur nos tempo y stroba nos di ta nos so pa papia cu Jehova. Al contrario, nos mester ‘keda alerta pa nos no neglisha oracion.’ Esey lo yuda nos pa nos por tin un “conducta santo” y pa haci “obranan cu ta demostra devocion na Dios”, segun cu nos ta warda riba e dia di Jehova. (2 Ped. 3:11, 12) E manera cu nos ta hiba nos bida lo demostra si nos ta kedando spiritualmente lanta y si di berdad nos ta kere cu e fin di e mundo malbado aki ta cerca. Pesey nos mester “haci oracion constantemente.” (1 Tes. 5:17) Tambe nos mester imita Hesus y busca un luga caminda nos por haci oracion na Jehova den priva. Ora nos ta tuma nos tempo pa papia cu Jehova, nos lo hala mas cerca di dje. (Sant. 4:7, 8) Y esta un gran bendicion esey lo ta!

¹⁸ Bijbel ta bisa cu “tempo cu Cristo a biba riba tera, el a ofrece suplica y tambe peticion—cu sclamacion fuerte y lagrima—na Esun cu por a salb’e for di morto, y pa motibo di su temor di Dios el a ser scucha.” (Heb. 5:7) Hesus a suplica Jehova y haci peticion na dje, y el a keda fiel na Dios te na fin di su bida riba tera. Debi na esey, Jehova a lanta su Yiu stima for di morto y a recompens’e cu bida inmortal den cielo. Nos tambe por keda fiel na nos Tata celestial sin importa cua tentacion y dificultad nos haya den futuro. En realidad, nos por haya e premio di bida eterno, basta nos ‘keda alerta y no neglisha oracion.’