Loke Nos Ta Siña for di un Oracion Bon Prepara

PLAY

Loke Nos Ta Siña for di un Oracion Bon Prepara

“O cu bo nomber glorioso sea bendiciona.”—NEH. 9:5.

BO POR CONTESTA ESAKI?

Kico tabata e cosnan bon cu e Israelitanan a haci ora cu e levitanan a manda yama nan pa reuni hunto?

Ki ehempel di pasado ta mustra cu Dios ta digno di carga su nomber?

Cua ta algun les cu nos ta siña for di e oracion di e levitanan?

1. Cua reunion di e pueblo di Dios nos lo bay analisa, y lo ta bon pa nos pensa riba ki preguntanan?

“LANTA, bendiciona SEÑOR boso Dios pa semper y semper!” Cu e palabranan conmovedor aki, e levitanan a invita e pueblo di Dios pa reuni hunto pa haci un oracion na Jehova. Esaki ta e oracion di mas largo cu tin den Bijbel. (Neh. 9:4, 5) E reunion aki a tuma luga na Jerusalem, dia 24 di tishri (e di shete luna Hudiu cu ta cuadra cu september/october) di aña 455 prome cu Cristo. Den e articulo aki nos ta bay analisa e sucesonan cu a hiba na e dia memorabel ey, y lo ta bon pa nos pensa riba e siguiente preguntanan: Ki bon custumber di e levitanan a contribui na e exito di e reunion ey? Kico nos por siña for di e oracion bon prepara cu e levitanan a haci na Jehova?—Sal. 141:2.

UN LUNA SPECIAL

2. Ki bunita ehempel e Israelitanan a pone pa nos despues cu nan a reconstrui e murayanan di Jerusalem?

² Un luna prome cu e reunion special ey, e Hudiunan a termina cu e reconstruccion di e murayanan di Jerusalem. (Neh. 6:15) E pueblo di Dios a logra esey den apenas 52 dia, y despues di esaki, nan a dedica tempo na nan necesidad spiritual. Pues, riba e prome dia di e luna nobo, tishri, nan a reuni hunto riba plasa pa tende Esdras, hunto cu e otro levitanan, lesa y splica e Ley di Dios. (Plachi 1) Famianan completo, si, hasta e muchanan, tabata para riba nan pia y a scucha “for di mainta trempan te merdia.” Esta un bunita ehempel pa nos! Awe, por lo general, nos ta reuni den Salonnan di Reino comodo, pero asina mes tin biaha nos mente ta dual y nos ta cuminsa pensa riba cosnan menos importante. Esey a yega di pasa cu bo? Si ta asina, laga nos pensa un rato riba e ehempel di e Israelitanan ey. Nan no a djis scucha so, sino tambe a laga e palabranan touch nan curason. Y nan a cuminsa yora ora nan a realisa cu como pueblo nan no tabata obedece e Ley di Dios.—Neh. 8:1-9.

3. Ki instruccion e Israelitanan a obedece?

³ Pero esaki no tabata e momento pa nan confesa nan picanan. Esaki tabata un dia di fiesta, y Jehova tabata kier pa e pueblo ta contento. (Plachi 2) (Num. 29:1) Pesey Nehemias a bisa e pueblo: “Bay, come di e vet, bebe di e bibida dushi y manda porcionnan pa esun cu no tin nada prepara, pasobra e dia aki ta santo na nos Señor. No sea tristo, pasobra e goso di SEÑOR ta boso fortaleza.” E pueblo a obedece, y riba e dia ey nan a “celebra un gran fiesta.”—Neh. 8:10-12.

4. (a) Kico e cabesnan di famia di Israel a haci, y kico nan a descubri? (b) Kico tabata un aspecto importante di e Fiesta di Ramada aki?

⁴ E siguiente dia, e cabesnan di famia a reuni hunto pa studia e Ley pa wak con nan por a cumpli mihor cu tur e mandamentonan di Dios. (Plachi 3) Durante nan estudio di e Ley, nan a realisa cu e nacion mester a celebra e Fiesta di Ramada cu su reunion solem di conclusion di 15 te cu 22 di e luna di tishri. Pues, e pueblo a cuminsa prepara mesora pa esaki. (Plachi 4) Esey a resulta den e mihor Fiesta di Ramada for di tempo di Josue, y “tabatin gran goso.” Un rasgo importante di e fiesta aki tabata e lesamento publico di e Ley di Dios, “for di e prome dia te na e ultimo dia.”—Neh. 8:13-18.

UN DIA PA CONFESA PICA

5. Kico e pueblo di Dios a haci un poco prome cu e levitanan a haci oracion pa nan?

⁵ Dos dia despues, riba 24 di tishri, a yega e momento pa e nacion di Israel confesa nan picanan publicamente. Esaki no tabata un dia di fiesta y di comemento. Na luga di esey, e pueblo di Dios a yuna y a bisti paña di saco pa demostra cuanto a duel nan cu nan a desobedece e Ley di Dios. Un biaha mas, e levitanan a lesa e Ley di Dios pa e pueblo pa mas o menos tres ora parti mainta. Atardi, e pueblo a “confesa y adora SEÑOR nan Dios.” (Plachi 5) Despues di esey, e levitanan a haci nan oracion bon prepara na nomber di henter e pueblo. (Plachi 6)—Neh. 9:1-4.

6. Kico a yuda e levitanan haci un oracion asina significativo, y kico nos por siña for di esey?

⁶ E levitanan tabata lesa regularmente for di e Ley di Dios, y esey sin duda a yuda nan prepara e oracion significativo aki. E prome parti di e oracion a concentra exclusivamente riba e obranan y cualidadnan di Jehova. Den e resto di e oracion, e levitanan a describi e tantisimo picanan di e pueblo y a splica bon cla dicon e Israelitanan no a merece e “gran compasion” di Dios. (Neh. 9:19, 27, 28, 31) Kico nos por siña for di e levitanan? Wel, nos mester lesa e Palabra di Dios tur dia y medita riba dje, pasobra di e manera ey nos ta permiti Jehova papia cu nos. Di e manera ey, ora di haci oracion, nos lo tin mas cos pa papia cu Jehova y nos oracionnan lo ta mas significativo.—Sal. 1:1, 2.

7. Kico e levitanan a pidi Dios, y kico nos ta siña for di nan ehempel?

⁷ Un humilde peticion so e levitanan a haci na Jehova. Casi na final di e oracion, nan a pidi: “Pesey anto, nos Dios, e Dios grandi, poderoso y temibel, kende ta warda alianza y misericordia, no laga parce insignificante bo dilanti ... tur e sufrimento cu a bin riba nos, riba nos reynan, nos prinsnan, nos sacerdotenan, nos profetanan, nos tatanan y riba henter bo pueblo, for di e dianan di e reynan di Asiria te dia di awe.” (Neh. 9:32) Pues, e levitanan a pone un bon ehempel pa nos awe. Ora nos ta haci oracion, nos mester alaba y gradici Jehova prome y despues nos ta cuminsa pidie cosnan personal.

NAN A ALABA DIOS SU NOMBER GLORIOSO

8, 9. (a) Den ki manera humilde e levitanan a cuminsa nan oracion? (b) E levitanan a referi probablemente na cua dos ehercito celestial?

⁸ A pesar cu e levitanan a prepara nan oracion bon, nan tabata humilde y a sinti cu nan palabranan lo no tabata suficiente pa alaba Jehova manera realmente e merece. Pesey, nan a cuminsa nan oracion na nomber di e pueblo di Dios cu e peticion humilde aki: “O cu bo nomber glorioso sea bendiciona y halsa riba tur bendicion y alabanza!”—Neh. 9:5.

⁹ E oracion di e levitanan a sigui bisa: “Ta abo so ta SEÑOR. Abo a traha e cielonan, e cielo di cielonan cu henter nan ehercito, e tera y tur loke tin riba dje, e lamanan y tur loke tin den nan. Ta abo ta duna bida na nan tur, y e ehercito celestial ta buig bo dilanti.” (Neh. 9:6) Si, ta Jehova Dios a crea e universo y ‘henter su ehercito’, esta, e cantidad incontabel di strea organisa den galaxia. Tambe el a crea tur cos riba nos bunita planeta y a haci posibel pa e cantidad asombroso di cosnan bibo riba tera por sigui reproduci segun nan sorto. E oracion ta menciona tambe un otro ehercito. E ta describi e angelnan santo di Dios como “e ehercito celestial.” (1 Rey. 22:19; Job 38:4, 7) E angelnan aki humildemente ta haci e boluntad di Dios door di sirbi hende pecaminoso “cu lo ricibi salbacion.” (Heb. 1:14) Nos por imita e tremendo ehempel di e angelnan y sirbi Jehova unidamente manera un ehercito bon entrena!—1 Cor. 14:33, 40.

10. Kico nos ta siña for di loke Dios a haci pa Abraham?

¹⁰ Siguientemente, e levitanan a menciona loke Dios a haci pa Abram. Jehova a cambia su nomber pa Abraham—cu a nifica “tata di un multitud”—aunke e tabatin 99 aña y ainda no a haya yiu cu su casa Sarai, kende tabata steriel. (Gen. 17:1-6, 15, 16) Ademas, Dios a priminti Abraham cu su descendientenan lo a hereda e tera di Canaan. E levitanan a describi con Jehova a cumpli cu su promesa: “Ta abo ta SEÑOR Dios, kende a scoge Abram y a sac’e for di Ur di e Caldeonan, y a dun’e e nomber Abraham. Y abo a haya su curason fiel dilanti di bo, y a cera un alianza cu ne pa dun’e e tera di e Cananeo, ... pa duna esaki na su descendientenan. Y abo a cumpli cu bo promesa, pasobra bo ta husto.” (Neh. 9:7, 8) Laga nos tambe imita nos Dios husto y semper haci nos best pa cumpli cu nos palabra.—Mat. 5:37.

LOKE JEHOVA A HACI PA SU PUEBLO

11, 12. Kico e nomber Jehova ta nifica, y kico el a haci pa su pueblo cu ta demostra cu e ta digno di e nomber ey?

¹¹ E nomber Jehova ta nifica “E Ta Causa pa Bira”, loke ta indica cu Dios ta sigui traha pa realisa loke e ta priminti. Un bunita ehempel di esaki ta e manera cu Dios a cumpli cu su promesa na e descendientenan di Abraham ora nan tabata catibo na Egipto. E tempo ey a parce imposibel cu henter e nacion lo por a ser libra y cu nan lo a bay biba den e Tera Priminti. Pero Jehova a sigui haci loke tabata necesario te ora cu su promesa finalmente a keda realisa. Asina el a demostra cu e tabata digno di carga e nomber unico y maraviyoso ey.

¹² E oracion cu Nehemias a skirbi ta describi algun di e cosnan cu Jehova a haci pa su pueblo: “Bo a mira e afliccion di nos tatanan na Egipto, y a tende nan sclamacion na Lama Cora. E ora ey bo a haci señalnan y maraviyanan contra Farao, contra tur su sirbidornan y contra henter e pueblo di su tera; pasobra bo tabata sa cu nan tabata actua cu arogancia pa cu nan, y bo a traha un nomber pa bo mes, manera ta awe. Y bo a parti e lama nan dilanti, asina nan a pasa meymey di e lama riba tera seco; y nan persiguidonan bo a tira den e profundidadnan, manera un piedra den awanan bruto.” Anto e oracion a sigui bisa cu Jehova a yuda su pueblo conkista e Tera Priminti: “Nan dilanti bo a haci e habitantenan di e tera, e Cananeonan, somete ... Y nan a captura stadnan fortifica y un tera fertil. Nan a podera di casnan yen di tur sorto di cos bon, posnan coba, cunucunan di wendruif, hofinan di oleifi, palonan di fruta na abundancia. Asina nan a come, yena bariga, y a bira gordo y a gosa di bo gran bondad.”—Neh. 9:9-11, 24, 25.

13. Con Jehova a percura pa e necesidad spiritual di e Israelitanan, pero con e pueblo a reacciona?

¹³ Jehova a haci hopi cos mas pa cumpli cu su proposito. Por ehempel, un poco despues cu e Israelitanan a bandona Egipto, Jehova a percura pa nan necesidad spiritual: El a duna nan leynan pa nan sa con pa ador’e. E levitanan a bisa den nan oracion: “Bo a baha riba Sero di Sinai, y a papia cu nan for di cielo; bo a duna nan ordenanzanan husto y leynan berdadero, statutonan y mandamentonan bon.” (Neh. 9:13) Jehova a scoge e Israelitanan como su pueblo y tabata bay duna nan e Tera Priminti. Pesey el a siña nan con pa biba na un manera cu tabata digno di su nomber santo. Pero no a dura hopi cu nan a stop di obedece tur e bon cosnan cu nan a siña.—Lesa Nehemias 9:16-18.

E ISRAELITANAN TABATIN MESTER DI CORECCION

14, 15. (a) Con Jehova a demostra misericordia na su pueblo pecaminoso? (b) Kico nos ta siña for di e manera cu Dios a trata cu su pueblo scogi?

¹⁴ E oracion di e levitanan ta menciona specificamente dos pica cu Israel a comete un poco despues cu nan a caba di priminti na Sero di Sinai cu nan lo cumpli cu e Ley di Dios. Pa motibo di e picanan ey, nan a merece di muri den desierto. Pero Jehova a tene misericordia di nan y a sigui percura pa nan necesidadnan. E oracion a elogia Jehova pa esaki: “Abo, den bo gran compasion, no a bandona nan den desierto ... Cuarenta aña bo a provee pa nan den desierto y nan no tabatin falta di nada; nan paña no a gasta, ni nan pianan no a hincha.” (Neh. 9:19, 21) Awe tambe Jehova ta percura tur loke nos tin mester pa sirbie fielmente. Laga nos no ta manera e miles di Israelitanan cu a muri den desierto pa motibo di nan desobediencia y falta di fe. En realidad, e cosnan ey “a ser skirbi como spiertamento pa nos cu ta biba na final di e tempo aki.”—1 Cor. 10:1-11.

¹⁵ Pero lamentablemente, e Israelitanan cu a drenta e Tera Priminti no a keda fiel na Jehova. Nan a cuminsa adora e diosnan Cananeo y a adopta e ritonan sexual y e sacrificionan humano cruel cu e habitantenan di e luganan ey tabata practica. Pesey Jehova a permiti e nacionnan bisiña oprimi su pueblo scogi. Ora e Israelitanan a arepenti, Jehova, den su gran misericordia, tabata pordona nan y salba nan for di nan enemigonan. Esaki a sosode “hopi biaha.” (Lesa Nehemias 9:26-28, 31.) E levitanan a confesa: “Bo a soporta nan hopi aña, y a spierta nan door di bo spirito pa medio di bo profetanan; toch nan no kier a scucha; pesey bo a entrega nan den man di e pueblonan di e teranan.”—Neh. 9:30.

16, 17. (a) Despues di exilio, con e situacion di e Israelitanan tabata diferente for di ora nan antepasadonan a drenta e Tera Priminti? (b) Kico e Israelitanan a confesa, y kico nan a priminti di haci?

¹⁶ Despues cu e Israelitanan a regresa for di exilio na Babilonia, nan a sigui cu nan custumber di desobedece. Pero esta diferente nan situacion tabata for di nan antepasadonan! E levitanan a splica den nan oracion: “Mira, awe nos ta esclavo, y pa loke ta e tera cu bo a duna nos tatanan, pa come di su frutanan y di su abundancia, mira, nos ta esclavo den dje. Y su cosecha abundante ta pa e reynan cu bo a pone riba nos pa motibo di nos picanan [y] asina nos ta den gran angustia.”—Neh. 9:36, 37.

¹⁷ Acaso e levitanan kier a bisa cu Dios tabata inhusto pasobra el a permiti e angustia aki? Di ningun manera! Nan a confesa: “Bo ta husto den tur loke cu a bin riba nos; pasobra bo a trata cu fieldad, ma nos a actua cu maldad.” (Neh. 9:33) Anto nan a termina nan oracion cu e promesa solem cu e nacion lo a obedece Dios di e dia ey padilanti. (Lesa Nehemias 9:38; 10:29.) Pa e motibo ey nan a skirbi nan promesa den un documento y a firm’e cu e seyo di 84 lider Hudiu.—Neh. 10:1-27.

18, 19. (a) Kico nos tin cu haci si nos kier drenta Dios su mundo nobo? (b) Kico nos tin cu sigui pidi den oracion, y dicon?

¹⁸ Pa nos por drenta Jehova su mundo nobo, nos tin mester di su coreccion y disciplina. Pablo a puntra: “Cua yiu no ta haya disciplina cerca su tata?” (Heb. 12:7) Nos ta demostra cu nos ta acepta e guia di Dios den nos bida ora nos ta persevera fielmente den su sirbishi y ta laga su spirito santo refina nos. Y si nos comete un pica grave, nos por tin sigur cu Jehova lo pordona nos si di berdad nos arepenti y acepta coreccion y disciplina humildemente.

¹⁹ Loke Jehova ta bay haci pronto lo surpasa e cosnan cu el a haci ora el a libra Israel for di Egipto. Tur hende lo sa e ora ey ki un gran Dios e ta. (Eze. 38:23) Y mescos cu su pueblo di pasado a hereda e Tera Priminti, asina tambe tur cristian cu keda sirbi Jehova fielmente lo haya bida den su husto mundo nobo. (2 Ped. 3:13) Esta un bunita speransa! Pesey, laga nos sigui pidi pa Dios su nomber glorioso sea santifica. E siguiente articulo lo bay analisa un otro oracion cu por yuda nos haci loke ta necesario pa ricibi Dios su bendicion awor y pa semper.

[Preguntanan di Estudio]

[Plachi na pagina 22]

[Plachi na pagina 23]

E TOREN DI VIGILANCIA (EDICION DI ESTUDIO)