STORIA DI BIDA

Depende Riba Jehova—No Tin Nada Mas Mihor cu Esey!

Segun e relato di Malcolm Allen

Bida sa tin su cosnan inespera, insigur y hasta duro pa trata cu ne. Ma Jehova ta bendiciona esnan cu ta depende riba dje, y no riba nan mes comprondemento. Esey ta loke ami cu mi esposa a siña den transcurso di nos bida largo y feliz. Ata un pida chikito di nos storia aki.

MI TATA cu mi mama a conoce otro na 1919 na e congreso di e Studiantenan Internacional di Bijbel na Cedar Point, Ohio, Merca. Nan a casa e mesun aña ey. Ami a nace na 1922, y mi ruman homber, Paul, a nace dos aña despues. Grace, mi esposa, a nace na 1930. Su mayornan, Roy cu Ruth Howell, a lanta como Studiantenan di Bijbel, y tanto Grace su wela como su welo parti di mama y di tata tambe tabata Studiantenan di Bijbel y amigo di Ruman Charles Taze Russell.

Mi a conoce Grace na 1947, y nos a casa dia 16 di juli 1949. Prome cu nos a casa, nos a papia francamente tocante nos futuro. Nos a tuma e decision di drenta den e sirbishi di tempo completo y pa no haya yiu. Dia 1 di october 1950 nos a cuminsa traha pionero hunto. Anto na 1952, nos a haya invitacion pa haci e trabou di circuito.

E TRABOU BIAHERO Y SCOL DI GALAAD

Nos tur dos a sinti cu nos tabatin mester di hopi yudansa pa cumpli cu e asignacion nobo aki. Mientras mi tabata siña for di rumannan cu mas experencia, mi a busca yudansa pa Grace tambe. Mi a acerca Marvin Holien, un amigo di cas cu tabatin hopi experencia como superintendente biahero, y mi a puntr’e: “Grace ta jong ainda y no tin mucho experencia. Bo por recomenda mi un ruman cu por traha cu ne pa e haya un poco entrenamento?” E di: “Si. Edna Winkle ta un pionero di hopi aña, e por ta un gran yudansa p’e.” Mas despues, Grace a bisa di Edna: “El a laga mi sinti mi comodo na porta di cas di e hendenan. E tabata sa bon con pa contesta hende cu tabata bin cu obhecion, y el a siña mi scucha e doñonan di cas di manera cu mi por a haya sa kico pa bisa. El a duna mi net loke mi tabatin mester!”

Ami cu Grace a sirbi den dos circuito den e estado di Iowa, incluso parti di e estado di Minnesota y South Dakota. Despues e rumannan a transferi nos pa Circuito 1 di New York, loke a inclui e areanan di Brooklyn y Queens. Hamas nos por lubida con nobato nos tabata den e asignacion  ey. E circuito a inclui e Congregacion di Brooklyn Heights, cu tabata reuni na e Salon di Reino na Betel y caminda tabatin varios miembro di e famia di Betel cu hopi experencia. Despues cu mi a duna mi prome discurso di sirbishi na e congregacion ey, Ruman Nathan Knorr a acerca mi y a bisa mi: “Malcolm, bo a duna nos algun sugerencia pa nos mehora, y esey tabata na su luga. Ma no lubida, si bo no duna nos conseho, lo bo ta di poco balor pa nos organisacion. Sigui cu bo bon trabou.” Despues di e reunion, mi a conta Grace esaki. Nos tabatin asina tanto tension cu ora nos a bay den nos camber di Betel nos tur dos a yora.

Despues di un par di luna, nos a ricibi un carta di invitacion pa asisti na e klas number 24 di Scol di Galaad, caminda nos a gradua na februari di 1955. E rumannan a informa nos prome cu nos a bay e scol cu nos entrenamento no tabata necesariamente pa prepara nos pa bira misionero. Mas bien, esey lo a sirbi pa ekipa nos pa bira mas eficaz den e trabou biahero. E scol tabata maraviyoso y el a siña nos cu nos mester ta humilde.

Ora nos a caba e curso, nos a haya e asignacion pa sirbi como superintendente di districto. Nos districto a inclui estado di Indiana, Michigan y Ohio. Anto pa nos sorpresa, na december 1955 nos a ricibi un carta di Ruman Knorr cu a bisa: “Sea franco den loke boso ta bisa, y sea sincero cu mi. Si boso ta dispuesto pa bin na Betel y keda aki ... of si boso ta dispuesto pa acepta un asignacion pa bay un otro pais despues cu boso sirbi aki na Betel pa un tempo, laga mi sa. Ma si boso ta prefera e trabou di districto of di circuito, lo mi tin gana di sa esey.” Nos a contest’e cu nos lo ta contento pa acepta cualkier asignacion. Casi mesora, nos a haya e instruccion pa presenta na Betel!

DUSHI AÑANAN NA BETEL

Mi dushi añanan na Betel a inclui dunamento di discurso na congregacion-, asamblea- y congresonan tur parti di Merca. Mi a yuda entrena hopi ruman homber jong cu despues a asumi responsabilidadnan mas grandi den nos organisacion. Cu tempo mi a cuminsa traha como secretario di Ruman Knorr den e oficina cu tabata organisa e obra mundial di predicacion.

Mi a disfruta masha hopi mes di e añanan cu mi a sirbi den e Departamento di Sirbishi. Ey mi a traha hunto cu ruman T. J. (Bud) Sullivan. Pa hopi aña e tabata e superintendente di e departamento ey. Pero tambe tabatin mas ruman cu mi a siña masha hopi for di nan. Un di nan tabata Fred  Rusk, kende tabata e ruman cu mester a entrena mi. Mi tin grato recuerdo di un combersacion cu mi tabatin cu ne un biaha. Mi a puntr’e: “Fred, dicon bo ta haci asina tanto cambio den algun di mi cartanan?” El a hari, pero cu un tono serio el a bisa mi: “Malcolm, ora bo bisa algo, bo por splica esey cu mas palabra. Ma ora bo skirbi algo, specialmente ora e sali for di akinan, e mester ta mas completo y mas exacto posibel.” Anto cu un stem cariñoso el a agrega: “Pero sigui asina, bo ta bayendo den bon direccion; cu tempo lo bo ta hopi mas mihor.”

Den transcurso di e añanan cu nos a sirbi na Betel, Grace a ricibi un variedad di asignacion, incluso esun di limpieza di e cambernan. E tabata gusta su trabou hopi. Te awe, ora nos topa algun di e ruman hombernan cu e tempo ey a drenta Betel na un edad jong, nan ta bisa Grace cu un smile riba nan cara: “Grace, abo si a siña mi con pa drecha cama, y mare bo por sa cuanto mi mama a gusta loke bo a haci.” Grace tabatin e placer di traha tambe den e Departamento di Revista, di Corespondencia y di Produccion di Audiocassette. E echo cu e tabatin e diferente asignacionnan ey a yud’e aprecia cu kico cu nos haci of unda cu nos sirbi den e organisacion di Jehova ta un privilegio y un bendicion pa nos. Te awe e ta pensa mescos.

NOS TABATIN CU HACI AHUSTE DEN BIDA

Meymey di añanan 70, nos a cuminsa realisa cu nos mayornan di edad tabatin mester di mas atencion. A yega e momento cu nos tabatin cu tuma un decision dificil. Nos no kier a bay for di Betel ni bay laga nos rumannan stima. Di otro banda, mi a sinti cu mi tabatin e responsabilidad di cuida nos mayornan. Pesey, cu tempo nos a bay for di Betel, cu e speransa cu dia nos situacion cambia, nos lo por a bolbe bek.

Pa mi por a gana mi pan di cada dia, mi a cuminsa bende seguro. Nunca mas mi ta lubida kico un manager a bisa mi un biaha tempo mi tabata den training. E di: “Exito di e negoshi aki ta depende di hacimento di bishita parti anochi. Ta e ora ey bo ta haya hende na cas. No tin nada mas importante cu bay tur anochi y bishita nan.” Mi a contest’e: “Mi tin sigur cu bo ta papia di experencia, y mi ta respeta bo pa esey. Pero mi tin otro responsabilidad tambe, di caracter spiritual, cu mi no por neglisha, y mi no tin intencion di cuminsa haci esey awor. Lo mi bishita algun hende anochi, pero no riba diamars ni diahuebs, pasobra e reunionnan cu mi ta bay ta masha importante.” Jehova no a laga mi na caya. El a bendiciona mi determinacion pa no falta reunion pa motibo di trabou.

Nos tabata na mi mama su cama di morto ora el a fayece den un cas di cuido na juli 1987. E hefe di e verpleegsternan a acerca Grace y bis’e: “Sra. Allen, bay cas y sosega bo curpa. Tur hende sa cu bo  tabat’ey tur ora pa bo suegra. Bo por keda trankil, sabiendo cu bo a haci tur loke bo tabata por.”

Na december 1987, nos a yena nos aplicacion pa sirbi na Betel atrobe, e luga cu nos a stima asina tanto. Pero djis un par di dia despues, dokternan a diagnostica cu Grace tin cancer na tripa. Despues cu nan a oper’e y cu el a recupera, nan a bisa cu e no tabatin cancer mas. Pero mientrastanto nos a haya un carta di Betel cu a recomenda nos pa sigui cu nos sirbishi den e congregacion local. Nos tabata determina pa sigui padilanti den nos actividad di Reino.

Cu tempo, mi a haya un oferta di trabou na Texas. Nos a pensa cu e clima mas cayente lo tabata mihor pa nos, loke a resulta di ta e caso tambe. Aki na Texas, pa 25 aña caba nos ta rondona pa rumannan cu nos a cera bon amistad cu nan.

LESNAN CU NOS A SIÑA

Entre tanto Grace a haya problema cu schildklier, su cancer na tripa a bin bek y recientemente el a haya cancer na pecho tambe. Pero nunca el a keha tocante su salud, falta respet pa mi como cabes di famia of nenga di apoya mi decisionnan. Hopi biaha e rumannan ta puntr’e kico ta e secreto di nos exito como pareha y e felicidad cu nos tur dos ta refleha. E ta duna cuater motibo: “Nos ta bon amigo di otro. Nos ta comunica cu otro tur dia regularmente. Nos ta gusta pasa tempo hunto tur dia. Y nunca nos ta bay drumi anochi rabia cu otro.” Claro cu de bes en cuando nos ta irita otro, pero nos ta pordona y lubida, y semper esey ta duna bon resultado.

A pesar di tur e pruebanan cu nos a pasa aden, tin varios les cu nos a siña:

(1) Semper depende riba Jehova y acepta loke e ta permiti. No depende nunca riba bo mes comprondemento.—Prov. 3:5, 6; Jer. 17:7.

(2) Busca guia di Jehova su Palabra, sin importa kico e situacion por ta. Ta masha importante pa obedece Jehova. Sea bo ta obedec’e of bo no ta obedec’e, pero bo no por haci tur dos.—Rom. 6:16; Heb. 4:12.

(3) E cos di mas importante den bida ta pa bo tin Jehova su aprobacion. Pone Jehova su boluntad na prome luga, y no rikesa material.—Prov. 28:20; Ecl. 7:1; Mat. 6:33, 34.

(4) Pidi Jehova yuda bo pa ta mas productivo y activo posibel den su sirbishi. Enfoca riba loke bo por haci, no riba loke bo no por haci.—Mat. 22:37; 2 Tim. 4:2.

(5) Realisa cu esaki ta e unico organisacion cu tin e bendicion y aprobacion di Jehova.—Juan 6:68.

Ami cu Grace a sirbi Jehova pa mas cu 75 aña, y como pareha casa, nos a sirbie pa casi 65 aña. Tabata dushi pa sirbi Jehova hunto tur e añanan aki. Nos ta spera y ta pidi pa tur nos rumannan tambe por sinti cu no tin nada mas mihor den bida cu depende riba Jehova.

[Comentario na pagina 18]

“Si bo no duna nos conseho, lo bo ta di poco balor pa nos organisacion”

[Plachi na pagina 18]

Di man robes pa man drechi: Nathan Knorr, Malcolm Allen, Fred Rusk, Lyle Reusch y Andrew Wagner

[Plachi na pagina 19]

Ariba: Fern cu George Couch hunto cu ami cu Grace na Galaad, 1954

Abou: Trahando den e Departamento di Sirbishi, 1956

[Comentario na pagina 20]

“Semper depende riba Jehova y acepta loke e ta permiti”