“YIUNAN ta un herencia di SEÑOR; e fruta di bariga ta un recompensa”, Bijbel ta bisa. (Sal. 127:3) Ta pesey mayornan cristian ta asina contento ora nan yiu nace!

Pero hunto cu e alegria ta bin tambe hopi responsabilidad. Pa e yiu por crece sano y fuerte, e tin cu come cuminda saludabel regularmente. Asina tambe, pa e por cera un bon amistad cu Jehova, e mester di cuminda spiritual y guia di su mayornan. Nan tin cu haci esfuerso pa siñ’e e principionan di e Palabra di Dios. (Prov. 1:8) Pero ki ora nan tin cu cuminsa siñ’e, y kico e yiu mester siña?

Laga nos analisa e caso di e homber fiel Manoa. E tabata di e tribu di Dan y a biba na Zora, un stad di Israel di antiguedad. Manoa cu su casa no tabatin yiu, pero un dia un angel di Jehova a bisa e casa cu lo e duna luz na un yiu homber. (Hues. 13:2, 3) Naturalmente, e noticia ey a haci Manoa cu su casa hopi contento, pero alabes nan a keda hopi preocupa. Pesey Manoa a suplica Jehova den oracion: “O SEÑOR, pa fabor, laga e homber di Dios cu bo a manda bin cerca nos atrobe, pa e siña nos kico nos mester haci pa e mucha cu mester nace.” (Hues. 13:8) Manoa cu su casa a tuma e educacion di nan yiu hopi na serio. Sin duda, nan a haci nan best pa siña nan yiu, Samson, e ley di Dios. Y nan esfuerso a duna bon resultado, pasobra Bijbel ta bisa cu ‘e spirito di Jehova a cuminsa move Samson.’ Ta pesey Samson, como un di e huesnan di Israel, por a haci hopi cos extraordinario.—Hues. 13:25; 14:5, 6; 15:14, 15.

Ki ora mayornan mester cuminsa siña nan yiu? Wel, Bijbel ta bisa di Timoteo cu “for di chikito” su mama, Eunice, y su wela, Loida, a siñ’e “e scrituranan santo.” (2 Tim. 1:5; 3:15) Pues, Timoteo su educacion den e Scritura a cuminsa for di comienso di su infancia.

Ta bon pa mayornan cristian pidi e guia di Jehova y plania di antemano pa nan por cuminsa educa nan yiunan “for di chikito.” Proverbionan 21:5 (BPK) ta bisa: “Plan bon pensá ta duna bon resultado.” Indudablemente, mayornan ta prepara nan mes bon prome cu e yiu nace. Kisas nan ta hasta traha un lista di cos cu e yiu mester. Pero ta importante tambe pa nan traha un lista di actividad spiritual cu nan lo haci cu ne. Nan meta mester ta pa cuminsa siña nan yiu tocante Jehova asina cu e nace.

Un buki tocante desaroyo di mucha a comenta lo siguiente: “E prome lunanan di bida di un baby ta decisivo pa e desaroyo di su celebro. Durante e tempo ey e cantidad di sinapsis—e conexionnan entre e celnan di nervio di e celebro cu ta haci posibel cu hende por siña cos—ta bira 20 biaha mas tanto.” (Early Childhood Counts—A Programming Guide on Early Childhood Care for Development) Ta hopi importante anto pa mayornan probecha di e periodo cortico aki den e desaroyo mental di nan yiu pa inculca e principionan di Jehova y tambe su norma- y balornan den nan yiu.

Un mama cu ta pionero regular a bisa tocante su yiu muher: “Mi ta bay cu ne den sirbishi for di tempo cu e tabatin un luna. Claro cu e no a compronde kico tabata pasa, pero mi ta kere cu esey tabatin un efecto hopi positivo riba dje. Pa ora e tabatin dos aña, ya e tabata ofrece e hendenan tratado sin ni un tiki miedo.”

No tin duda cu mayornan ta haya bon resultado ora nan cuminsa educa nan yiu for di chikito den e caminda di Jehova. Pero hopi mayor ta admiti cu no ta semper esey ta facil pa haci.

Por lo general, mucha su atencion ta kita hopi lihe y nan no gusta sinta keto. Esaki por ta un reto pa e mayornan. Pero ta e mucha su curiosidad ta pone cu e kier conoce e mundo rond di dje, y su atencion ta bula bay di un cos pa otro. Pues, con mayornan por yuda nan yiu concentra riba loke nan ta purba di siñ’e?

Pensa riba loke Moises a bisa na Deuteronomio 6:6 y 7: “E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bay drumi y ora bo ta lanta.” E texto aki ta mustra cu mayornan tin cu ripiti bes tras bes loke nan ta siña nan yiunan. Un mucha ta mescos cu un mata cu a caba di spruit y cu bo mester muha cu regularidad. Si ripiticion ta yuda hende grandi corda cosnan importante, cuanto mas esey lo no yuda mucha chikito corda cos!

Pa mayornan por siña nan yiunan e berdad, nan tin cu pasa tempo hunto cu nan. Pero den e mundo druk di awe kisas no ta ni un tiki facil pa nan saca tempo pa esey. Pero apostel Pablo a conseha nos pa ‘uza nos tempo di e mihor manera’, si, pa atende nos responsabilidadnan cristian. (Efe. 5:15, 16) Con nos por haci esaki? Por ehempel, un anciano a conta cu tabata un reto pa haya e balansa entre educa su yiu muher,  atende su responsabilidadnan teocratico y traha pa su pan di cada dia. Su casa, kende ta un pionero regular, tambe tabatin un agenda yen. Con nan a logra saca tempo pa educa nan yiu muher? E tata a splica: “Tur mainta, prome cu mi bay trabou, ami cu mi casa ta lesa sea e texto di dia p’e of algo for di Mi Buki di Relato Biblico. Anochi, prome cu e bay drumi, nos ta bolbe lesa p’e. Y ora nos ta bay predica, nos ta bay cu ne. Nos no kier perde ni un oportunidad durante e prome añanan aki di su bida.”

Naturalmente, nos tur kier pa nos yiunan bira adulto responsabel. Pero e motibo principal pakico nos ta educa nan ta pa nan siña stima Dios di curason.—Mar. 12:28-30.

Salmo 127:4 ta bisa: “Manera flecha den man di un guerero, asina ta e yiunan haya den un hende su hubentud.” Den e versiculo aki, yiunan ta ser compara cu flecha cu ta den man di un tirado di flecha. E mester mik bon riba e blanco, pasobra unabes e tira e flecha, e no por coy e bek. Mayornan tin e “flecha”, esta, nan yiu, pa un periodo relativamente cortico hunto cu nan. Pesey nan mester probecha di e tempo ey pa inculca principionan di Bijbel den e mente y curason di nan yiunan.

Apostel Juan a skirbi tocante su yiunan spiritual, esta, hende cu el a yuda pa bira sirbidor di Jehova: “No tin nada cu ta haci mi mas contento cu esaki: di tende cu mi yiunan ta sigui cana den e berdad.” (3 Juan 4) Mayornan cristian ta sinti e mesun satisfaccion ora nan mira nan yiunan “sigui cana den e berdad.”