1. Dicon un piloto ta check su avion prome cu e lanta vuelo?

 PROME cu un piloto lanta vuelo, e tin un lista di mas cu 30 cos cu e mester check na e avion. Si e piloto no haci e control aki bon, e riesgo pa un accidente tragico ta mas grandi. Awor, ken specialmente tin cu haci un chekeo asina tur biaha? Si, pilotonan experencia. Dicon? Pasobra pilotonan cu hopi experencia facilmente por bira negligente y keda sin controla tur loke nan mester controla.

2. Ki saminacion cristiannan tin cu haci?

² Mescos cu un piloto cu ta pensa riba siguridad, nos tambe tin un lista di cos cu nos mester controla pa haci sigur cu nos fe ta keda fuerte hasta den tempo dificil. Sea cu nos ta recien batisa of tin hopi aña den e berdad, nos mester sigui samina nos mes pa wak con fuerte nos fe y nos devocion na Dios ta. Si nos no ta haci esaki regularmente y na un manera diligente, nos por sufri daño spiritual. Bijbel ta spierta nos: “Laga esun cu ta kere cu e ta para, tene cuidou pa e no cay.”—1 Cor. 10:12.

3. Kico e cristiannan na Galacia mester a haci?

³ Tuma por ehempel e cristiannan na Galacia. Nan mester a controla nan fe y balora e libertad spiritual cu nan tabatin. Dicon? Wel, Hesus, pa medio di su sacrificio, a habri caminda pa esnan cu pone fe den dje por siña conoce Dios na un otro manera: Hende por a bira yiu di Dios! (Gal. 4:9) Pa e cristiannan na Galacia por a permanece den e relacion special aki cu Dios, nan mester a rechasa siñansanan di algun cristian Hudiu cu tabata pretende cu hende mester a  cumpli cu e Ley di Moises tambe. Pero Dios no tabata uza e Ley ey mas. Ademas, cristiannan no Hudiu nunca tabata bou di Ley. Pesey, tanto e cristiannan Hudiu como esnan no Hudiu mester a haci progreso den e berdad. Esey a encera cu nan mester a reconoce cu Dios no tabata exigi mas pa hende cumpli cu e Ley di Moises pa haya su aprobacion.

4, 5. Ki conseho Pablo a duna e Galationan, y dicon esaki ta importante pa nos?

⁴ Apostel Pablo su conseho na e Galationan tabatin e proposito aki: Pa spierta tur cristian, tanto den pasado como awor, pa no bandona e berdadnan valioso di Bijbel y bay bek na e cosnan cu nan a laga atras. Si, Jehova a inspira apostel Pablo pa encurasha e congregacion di Galacia y tur otro cristian pa para firme den e berdad.

⁵ Pesey, ta bon pa nos tur corda con nos a ser libra for di sclavitud den sentido spiritual y a bira Testigo di Jehova. E siguiente preguntanan por yuda bo: Bo ta corda e pasonan cu bo a dal pa cualifica pa bautismo? Bo ta corda con bo a siña conoce Dios y con bo a sinti bo ora bo a bira conoci pa Dios?

6. Ki checklist nos lo analisa?

⁶ Basicamente, nos tur a dal nuebe paso pa bira Testigo. (Wak e cuadro  “Pasonan Cu Ta Hiba na Bautismo y Mas Progreso.”) Nos por considera e pasonan aki como puntonan cu nos mester check regularmente pa por para firme den e berdad y resisti cualkier deseo pa bolbe na e cosnan di mundo. Si, mescos cu un piloto ta uza un checklist pa check su avion bon pa e por tin un vuelo safe, nos tambe mester haci un chekeo spiritual regularmente pa nos por keda fiel den nos sirbishi na Dios.

7. Ki patronchi nos tin cu sigui, y dicon?

⁷ Prome cu cada vuelo un piloto tin cu wak e checklist cu ta cord’e di e rutina cu e tin cu sigui. Nos tambe mester samina nos mes regularmente pa wak nos progreso spiritual. Pablo a skirbi Timoteo: “Sigui pega na e patronchi di palabra sano cu bo a tende for di mi, y haci esey cu e fe y amor cu e union cu Cristo Hesus ta trece cu ne.” (2 Tim. 1:13) Nos ta haya e ‘palabranan sano’ ey den e Palabra di Dios. (1 Tim. 6:3) Mescos cu un sketch di un artista ta duna nos un idea di algo, ‘e patronchi di e berdad’ ta duna nos un idea general di loke Jehova ta rekeri di nos. Pesey, laga nos analisa e pasonan cu a hiba nos na bautismo y wak si nos ta sigui e patronchi di e berdad cuidadosamente.

8, 9. (a) Dicon nos mester sigui adkiri conocemento y crece den fe? (b) Dicon ta importante pa sigui haci progreso spiritual, y dicon esaki ta un proceso continuo? Ilustra.

⁸ E prome cos cu nos a haci ta adkiri conocemento. Esaki a hiba na e di dos punto riba nos checklist cu ta cultiva fe. Pero nos mester sigui progresa den tur dos area. (2 Tes. 1:3) Pa nos progresa, of crece, den sentido spiritual nos tin cu haci varios cambio. E verbo “crece” ta nifica aumenta, bira mas grandi. Pues, despues di bautismo, nos mester sigui traha duro pa progresa spiritualmente y no keda para un caminda.

⁹ Nos por compara nos progreso spiritual cu crecemento di un palo literal. Un palo por crece bira masha grandi, specialmente si su raiznan ta profundamente y bon hancra den tera. Por ehempel, algun palo di seda di Libano por crece te na haltura di un edificio di 12 piso. E palonan aki tin raiz fuerte cu ta bay profundo, y nan troncon por tin un hanchura di mas o  menos 12 meter. (Cant. 5:15) Na cuminsamento, un palo asina ta crece hopi lihe. Pero despues, su crecemento no ta asina notabel mas. Sinembargo, segun cu añanan ta pasa, e troncon ta bira mas y mas diki y e raiznan ta bay mas profundo y mas leu, di manera cu e palo ta bira mas stabiel. Nos por bisa mescos di crecemento, of progreso, spiritual. Kisas, ora nos a cuminsa studia Bijbel, nos a progresa hopi lihe y a batisa. E rumannan den congregacion a bira masha contento ora nan a mira con nos a progresa. Podise nos ta hasta cualifica pa sirbi como pionero of pa ricibi otro privilegio. Pero segun cu añanan ta pasa, kisas nos progreso no ta asina bisto mas. Sinembargo, nos mester sigui crece den fe y sigui adkiri conocemento te ora nos bira “completamente desaroya, alcansando e pleno estatura di Cristo.” (Efe. 4:13) Pues, nos ta manera un mata chikito cu ta crece bira un palo grandi y fuerte, esta, un cristian maduro.

10. Dicon hasta cristiannan maduro mester sigui haci progreso?

¹⁰ Pero nos crecemento no mester yega te ey. Nos mester sigui adkiri conocemento y crece den fe. Di e manera ey, nos ta bira manera palo cu raiznan bon hancra den e Palabra di Dios. (Prov. 12:3) Tin hopi ruman den e congregacion cristian cu ta sigui progresa di e manera ey. Por ehempel, un ruman homber cu tin mas cu 30 aña ta sirbi como anciano a indica cu ainda e ta haci progreso. El a bisa: “Mi a haya mas aprecio pa Bijbel. Constantemente, mi ta siña maneranan nobo cu mi por aplica ley- y principionan di Bijbel. Ademas, mi ta haya mas goso den sirbishi.”

11. Con nos por siña conoce Jehova mihor a traves di tempo?

¹¹ Un otro cos cu nos mester haci pa progresa spiritualmente ta hala mas cerca Jehova. E kier pa nos mir’e como nos Tata y Amigo y pa nos sinti nos stima y proteha, mescos cu un mucha ta sintie ora e ta den brasa di su mayornan of manera nos sa sinti nos den compania di un bon amigo. Pero manera bo por compronde, bo no ta haya un amistad intimo asina cu Jehova di un dia pa otro. Ta rekeri tempo y esfuerso pa siña conoce Jehova y stim’e. Pesey, ta masha importante pa nos aparta tempo pa lesa Bijbel tur dia. Ademas, nos mester haci esfuerso pa lesa tur edicion di E Toren di Vigilancia y ¡Despertad! y e otro publicacionnan di e esclavo fiel.

12. Kico mas nos tin cu haci pa Jehova reconoce nos como su amigo?

 ¹² Oracion y bon compania tambe ta yuda Dios su amigonan progresa spiritualmente. (Lesa Malakias 3:16.) Bijbel ta bisa cu Jehova “su horea ta habri pa nan suplica.” (1 Ped. 3:12) Si, mescos cu un tata amoroso, Jehova ta presta atencion na nos suplicanan pa yudansa. Pesey, nos mester “persevera den oracion.” (Rom. 12:12) Sin Dios su yudansa, nos no por sigui disfruta di su amistad. Dicon? Pasobra riba nos mes, nos lo no por resisti e presionnan di e mundo malbado aki. Si nos no sigui persevera den oracion, nos lo no haya e forsa cu Dios ta cla pa duna nos. Pesey, conta bayendo cu bo oracionnan? Bo ta papia cu Jehova manera lo bo a papia cu un bon amigo, of bo tin cu mehora den e aspecto aki?—Jer. 16:19.

13. Dicon nos mester asisti regularmente na nos reunionnan si nos kier sigui progresa spiritualmente?

¹³ Jehova ta stima tur esnan cu ta “tuma refugio den dje.” Pesey, hasta despues cu nos a siña conoce Dios, nos mester keda pega na e congregacion cristian den compania di personanan cu tambe conoc’e. (Nah. 1:7) Si, den e mundo malo aki, ta sabi pa nos keda den compania di nos rumannan cu por anima nos. Con esaki ta beneficia nos? Wel, den congregacion, nos ta haya rumannan cu ta motiva nos pa “mustra amor y haci bon obra.” (Heb. 10:24, 25) Pa nos por mustra y ricibi e amor aki, nos mester asocia cu nos rumannan cristian. Pesey, nos mester asisti regularmente na nos reunionnan y duna comentario.

14. Dicon semper nos mester ta cla pa arepenti y haci cambio den nos bida?

¹⁴ Pa nos por a bira cristian, nos mester a arepenti y comberti, esta, stop di haci loke ta malo y haci loke ta bon. Pero e proceso aki no ta caba ey, semper nos mester ta cla pa arepenti y haci cambio den nos bida. Como cu nos ta imperfecto, pica ta biba den nos; e ta manera un colebra cu ta cla pa morde nos asina cu e haya un chens. (Rom. 3:9, 10; 6:12-14) Pues, nos mester reconoce cu nos ta faya. No obstante, nos ta contento cu Jehova tin pasenshi cu nos segun cu nos ta lucha cu nos debilidadnan y ta haci esfuerso pa cambia. (Flp. 2:12; 2 Ped. 3:9) Loke por yuda nos den e aspecto aki ta di uza nos tempo y energia den Jehova su sirbishi en bes di core tras di metanan egoista. Un ruman muher a skirbi: “Aunke mi a lanta den e berdad, mi punto di bista di Jehova tabata distinto for di mayoria di hende. Mi tabata pensa cu hende mester tin miedo di Dios y cu nunca lo mi por a agrad’e.” Cu tempo, e ruman muher aki a cuminsa tambalia spiritualmente debi na e erornan cu el a comete den su bida. E ruman a bisa: “No cu mi no tabata stima Jehova, pero mi no tabata conoc’e bon. Ma despues di hopi oracion intenso, mi a cuminsa haci cambio.” El a sigui bisa: “Jehova a yuda mi manera un tata ta yuda su yiu. Cu pasenshi, el a yuda mi vence un obstaculo tras di otro, mustrando mi kico mi mester a haci.”

15. Kico Hesus y su Tata ta tuma nota di dje?

¹⁵ “Sigui papia” tocante e bon noticia. Un angel di Dios a expresa e palabranan aki na Pedro y e otro apostelnan despues di a libra nan for di prizon. (Echo. 5:19-21) Si, sirbishi di veld ta un otro punto riba nos checklist. Hesus y su Tata ta tuma nota di nos fe y ta mira e esfuerso cu nos ta haci den sirbishi. (Rev. 2:19) E anciano cu nos a menciona anteriormente a bisa cu sirbishi ta un parti importante di nos bida.

16. Dicon ta bon pa nos reflexiona riba nos dedicacion na Jehova?

¹⁶ Awor reflexiona riba bo dedicacion.  E cos di mas valioso cu nos tin ta nos amistad cu Jehova. Jehova conoce esnan cu ta pertenece na dje. (Lesa Isaias 44:5.) Haci un analisis profundo di bo relacion cu Jehova y pidie yuda bo fortalece boso amistad. Reflexiona tambe riba bo bautismo, y no lubida e fecha importante ey. Esaki lo yuda bo corda cu bo bautismo ta simbolisa bo dedicacion na Jehova y ta e decision di mas importante cu bo a yega di tuma den bo bida.

17. Dicon nos mester persevera si nos kier keda cerca Jehova?

¹⁷ Den su carta na e rumannan di Galacia, Pablo a enfatisa e importancia di perseverancia. (Gal. 6:9) Esaki ta importante tambe pa tur cristian awe, pasobra nos tur por confronta situacion dificil den bida. Pero Jehova ta cla pa yuda nos. Pesey, sigui pidie pa su spirito santo. Y Jehova lo reemplasa bo tristeza cu goso y bo angustia cu paz. (Mat. 7:7-11) Pensa riba esaki: Si Jehova ta percura pa e paharitonan, cuanto mas e lo no percura pa abo cu ta stim’e y cu a dedica bo bida na dje? (Mat. 10:29-31) Sea loke sea e situacion cu bo haya bo cu ne, no entrega y bay bek na e cosnan cu bo a laga atras. Nunca lubida e bendicionnan cu nos ta disfruta di dje debi na nos amistad cu Jehova.

18. Awor cu bo “a siña conoce Dios”, kico bo ta determina pa haci?

¹⁸ Pues, sea cu nos ta recien batisa of tin hopi aña den e berdad, kico nos tur mester haci? Nos mester sigui siña conoce Jehova y progresa den e berdad. Laga nos nunca neglisha nos amistad cu Jehova. Pa haci sigur cu nos ta fortificando nos relacion cu nos Amigo, Dios y Tata celestial, Jehova, nos tur mester haci un chekeo spiritual regularmente.—Lesa 2 Corintionan 13:5, 6.