1. Kico Jehova a preserva pa beneficio di humanidad?

 JEHOVA, “e Dios bibo y eterno”, ta bisa nos kico nos tin cu haci pa por biba pa semper. Y su instruccionnan no ta cambia, pasobra Bijbel ta bisa cu “e palabra di Jehova ta dura pa semper.” (1 Ped. 1:23-25) Nos ta masha contento cu Jehova a preserva e informacionnan valioso aki den su Palabra skirbi, cu ta Bijbel.

2. Kico Dios a preserva den su Palabra?

² Den su Palabra, Dios a preserva su nomber pa su pueblo por haya sa esaki. E prome biaha cu e Scritura ta menciona Jehova, * e nomber di Dios, ta den “e historia di e cielonan y tera.” (Gen. 2:4) Ademas, na un manera milagroso, Dios a skirbi su nomber varios biaha riba e tablanan di piedra cu a contene e Dies Mandamento. Por ehempel, e prome mandamento ta cuminsa bisa: ‘Ami ta Jehova, bo Dios.’ (Exo. 20:1-17) Di otro banda, Diabel ta haci tur su esfuerso pa destrui Bijbel pa asina evita cu nos ta conoce Dios y Su nomber. Pero Jehova, e Dios Soberano, no ta laga esey sosode.

3. Kico mas Dios a preserva den Bijbel?

³ Un otro cos cu Jehova a preserva den Bijbel ta e berdad. Aunke hende tin hopi idea robes encuanto Dios, nos ta contento cu Bijbel ta siña nos e berdad. (Lesa Salmo 43:3, 4.) Pues, maske mayoria di hende ta den scuridad, cu goso nos ta sigui cana den luz.—1 Juan 1:6, 7.

4, 5. Ki privilegio nos tin desde 1931?

⁴ Herencia di un pueblo ta su caracteristicanan of cualidadnan, tradicionnan of estilo di bida cu ta pasa di un generacion pa otro. Como cristian, nos tambe  tin un herencia: nos herencia spiritual. Esaki ta, entre otro, conocemento exacto di e Palabra di Dios y un bon comprondemento di e berdad tocante Dios y su propositonan. Ademas, e herencia aki ta encera un otro privilegio masha special.

⁵ E privilegio ey a bira parti di nos herencia spiritual na e congreso di 1931 cu a tuma luga na Columbus, Ohio, Merca. Riba e programa di e congreso tabatin e letternan “JW.” Un ruman muher a bisa cu varios ruman a cuminsa specula encuanto e nificacion di e letternan ey. Prome cu e tempo ey, nos tabata conoci como Studiantenan di Bijbel, pero durante un discurso special cu a tuma luga riba diadomingo 26 di juli 1931, tur hende cu tabata presente a bay di acuerdo pa—desde e tempo ey padilanti—nos carga e nomber Testigonan di Jehova (Jehovah’s Witnesses). Tabata un dia masha emocionante, pasobra nos a ricibi un nomber biblico. (Lesa Isaias 43:12. *) Un ruman homber a bisa: ‘Nunca lo mi lubida e inmenso grito di goso y e aplauso di e dia ey.’ Ningun otro religion na mundo no tabata kier e nomber ey, pero Dios a permiti nos carga e nomber special aki pa mas cu 80 aña caba. Esta un privilegio!

6. Ki informacion mas ta forma parti di nos herencia spiritual?

⁶ Nos herencia spiritual ta encera tambe informacion importante y exacto encuanto Dios su sirbidornan di pasado. Tuma por ehempel, Abraham, Isaak y Jacob. E patriarcanan aki lo mester a combersa ampliamente cu nan famia tocante con pa agrada Jehova. Pesey, no ta nada straño cu Jozef por a rechasa inmoralidad sexual y no “peca contra Dios.” (Gen. 39:7-9) Den e prome siglo tambe cristiannan a pasa informacion tocante Dios na otronan. Pablo, por ehempel, a comparti cu e congregacion cristian loke Hesus a siñ’e encuanto e Cena di Señor. (1 Cor. 11:2, 23) Tur e informacionnan aki ta registra den Bijbel pa nos por sa con pa adora Dios “cu spirito y cu berdad.” (Lesa Juan 4:23, 24.) Bijbel a ser skirbi pa beneficia tur hende, pero nos como sirbidornan di Jehova mester echt balor’e.

7. Ki promesa animador ta forma parti di nos herencia spiritual?

⁷ E relatonan di bida den nos publicacionnan cu ta mustra con Jehova ta yuda su sirbidornan di awe tambe ta parti di nos herencia spiritual. (Sal. 118:7) E echo cu Jehova ta cu nos ta pone nos sinti nos safe hasta bou di prueba. Ademas, Bijbel ta priminti cu ‘ningun arma cu wordo forma  contra nos lo no prospera; y tur lenga cu lanta contra nos den husgamento, Jehova lo condena. Esaki ta e herencia di e sirbidornan di Jehova, y nan hustificacion ta bin for di Jehova.’ (Isa. 54:17) Si, ningun arma cu Satanas uza contra nos lo no causa nos daño permanente.

8. Kico nos lo trata den e articulo aki y esun siguiente?

⁸ Satanas a purba di destrui e Palabra di Dios, elimina e nomber Jehova for di Bijbel y sconde e berdad. Pero ta claro cu e no por a logra pasobra Jehova no a permiti esey. Den e articulo aki y esun siguiente, nos lo mira (1) con Dios a proteha su Palabra, (2) con Jehova a percura pa hende haya sa su nomber y (3) con nos Tata celestial a percura pa nos haya e berdad.

9-11. Ki esfuerso hende a haci pa destrui Bijbel, y con Jehova a proteha su Palabra?

⁹ Hende a haci hopi esfuerso pa destrui Bijbel, pero Jehova a proteha su Palabra. Segun Enciclopedia Cattolica (Enciclopedia Catolico): ‘Na aña 1229, den un intento pa opone e albigensenan y e valdensenan, e Concilio di Toulouse a prohibi laiconan di uza Bijbel cu tabata na idioma comun. Na aña 1234, na un concilio cu a tuma luga na Tarragona (Spaña) bou di direccion di Jaime I, nan a decreta un prohibicion similar. E prome biaha cu Vaticano a mete den e asunto aki tabata na aña 1559 ora cu e lista di buki prohibi di Papa Pablo IV a menciona traduccionnan di Bijbel na idioma comun como bukinan cu hende no tabatin mag di imprimi ni tin den nan poder sin autorisacion di Vaticano.’

¹⁰ Si, aunke hende a purba tur manera di destrui Bijbel, Jehova a proteha su Palabra. Con? Alrededor di aña 1382, John Wycliffe y su compañeronan a produci e prome traduccion di Bijbel na Ingles. William Tyndale tambe a traduci Bijbel na Ingles, pesey nan a mat’e na aña 1536. Hende a yega di bisa cu ora e tabata mara na staca, el a grita: “Señor, habri wowo di e rey di Inglatera.” Despues nan a strangul’e y kim’e.

¹¹ Miles Coverdale tambe a traduci Bijbel na Ingles y a presenta esaki na aña 1535. Coverdale a uza e traduccion di Tyndale pa traduci e Testament Nobo y e bukinan di Genesis te cu Cronicanan. E otro partinan di Bijbel, el a traduci for di Latin y for di e traduccion di Martin Luther cu tabata na Aleman. Awe, nos ta contento cu nos tin e Traduccion di Mundo Nobo di e Santo Scritura. E ta un traduccion exacto, facil pa compronde y facil pa uza den e trabou di predica. Si, ni Satanas ni ningun hende no por a destrui e Palabra di Jehova ni nan lo no por haci esey tampoco.

12. Con e Traduccion di Mundo Nobo ta yuda hende haya sa e nomber di Dios?

¹² Jehova Dios a percura pa su nomber no ser elimina for di su Palabra. Ora a produci e Traduccion di Mundo Nobo, e rumannan a haci sigur di pone e nomber di Dios, Jehova, na tur e luganan cu el a aparece den e Scritura original. Den e Scritura Hebreo, e nomber ta aparece 6.973 biaha y den e Scritura Griego Cristian, 237 biaha. Awe, e Traduccion di Mundo Nobo ta disponibel den mas cu 116 idioma, sea completo of en parte, y mas cu 178.545.862 ehemplar a ser imprimi caba.

13. Con nos por sa, cu for di principio di humanidad, hende tabata sa e nomber di Dios?

¹³ For di principio di humanidad, hende tabata sa e nomber di Dios. Adam cu Eva tabata sa e nomber di Dios y a uz’e. Noe tambe a uza e nomber di Dios. Despues di Diluvio, ora su yiu Cam no a mustra respet p’e, Noe a bisa: “Bendiciona sea [Jehova], e Dios di Sem.” (Gen. 4:1; 9:26) Dios mes a declara: “Ami ta [Jehova], esey ta mi nomber; lo mi no duna mi gloria na un otro.” El a bisa tambe: “Ami ta [Jehova] y no tin ningun otro; fuera di mi no tin Dios.” (Isa. 42:8; 45:5) Jehova a percura pa hende rond mundo por haya sa su nomber. Nos tin e gran privilegio di por uza e nomber di Jehova y sirbie como su Testigonan. Na moda di papia, nos ta bisa cu un bos fuerte: “Den e nomber di nos Dios nos lo lanta nos emblemanan.”—Sal. 20:5.

14. Fuera di Bijbel, unda mas e nomber di Dios ta aparece?

¹⁴ No ta den Bijbel so e nomber di Dios ta aparece. El a aparece entre otro riba e Piedra di Moab cu nan a descubri na Dhiban (Dibon), un 21 kilometer oost di Lama Morto. Riba e piedra tabatin un relato cu ta menciona Omri, Rey di Israel, y loke Mesa, Rey di Moab, a bisa tocante e bataya cu e tabatin contra Israel. (1 Rey. 16:28; 2 Rey. 1:1; 3:4, 5) Pero loke ta haci e Piedra di Moab aki interesante ta e echo cu e Tetragramaton ta aparece riba dje. E Tetragramaton ta aparece tambe varios biaha den e cartanan di Lakis, cu ta pida pida obhetonan di klei cu nan a haya na Israel.

15. Kico ta e Septuaginta, y dicon tabatin mester di esaki?

¹⁵ Traductornan di Bijbel di antiguedad tambe a percura pa e nomber divino no ser elimina for di Bijbel. Despues cu e Hudiunan tabata den exilio na Babilonia na aña 607 te na 537 prome cu nos era, hopi di nan no a bay Juda y Jerusalem bek. Cu tempo, hopi Hudiu a muda bay Alehandria, Egipto, unda hende tabata papia Griego cu e tempo ey tabata un idioma internacional. Pesey e Hudiunan aki tabatin mester di un traduccion Griego di e Scritura Hebreo. E traduccion ey a bira e Septuaginta, cu a ser completa den siglo 2 prome cu nos era. Algun copia di e Septuaginta ta contene e nomber di Dios skirbi na Hebreo.

16. Con Bay Psalm Book ta uza e nomber di Dios?

¹⁶ E nomber di Dios ta aparece tambe den Bay Psalm Book, e prome buki cu a ser publica den e colonianan Mericano di Inglatera. E edicion original di e buki aki a ser imprimi na aña 1640 y tabata un traduccion di e Salmonan traduci di Hebreo pa Ingles di e tempo ey. Den e traduccion ey, e nomber di Dios ta aparece na Salmo 1:1 y 2, cu ta bisa cu “bendiciona ta e hende” cu no ta cana den conseho di e malbadonan “ma su delicia ta den e ley di Iehovah.” Si bo kier sa mas tocante e nomber di Dios, wak e foyeto E nomber divino cu lo permanece pa semper.

17, 18. (a) Duna un definicion di e palabra “berdad.” (b) Kico “e berdad di e bon noticia” ta encera?

¹⁷ Cu goso, nos ta sirbi “Jehova, e Dios di berdad.” (Sal. 31:5, NW) Awor kico e palabra “berdad” ta nifica? Segun Collins Cobuild English Dictionary, ‘e berdad tocante un asunto ta e realidad tocante e asunto ey y no loke hende ta imagina of inventa.’ Den e idiomanan original di Bijbel, hopi biaha e palabranan cu ta ser traduci como “berdad” ta referi na loke ta real, corecto y digno di confianza.

¹⁸ Jehova a haci sigur cu nos por haya e berdad. Y e ta sigui yuda nos siña mas y mas di e berdad. (2 Juan 1, 2) Esey ta precies loke Bijbel ta bisa, esta, cu “e berea di e husto ta manera luz di aurora, cu ta briya mas y mas te ora cu bira di dia cla.” (Prov. 4:18) Y nos ta completamente di acuerdo cu Hesus, kende a bisa Dios: “Bo palabra ta e berdad.” (Juan 17:17) Y ta den Bijbel nos ta haya “e berdad di e bon noticia”, cu ta encera tur e siñansanan cristian. (Gal. 2:14) Algun di e siñansanan aki ta e berdad tocante e nomber y soberania di Jehova, Hesus su sacrificio di rescate, e resureccion y e Reino. Laga nos wak awor con Dios a preserva e berdad a pesar di tur e intentonan di Satanas pa sconde esaki.

19, 20. Ken Nimrod tabata, y kico hende a trata di haci ora e tabata goberna?

¹⁹ Despues di Diluvio, Nimrod, ‘un jaagdo poderoso, a opone Jehova.’ (Gen. 10:9, NW) Como cu Nimrod tabata contra Jehova, ta Satanas e tabata adora. E tabata manera e personanan cu a opone Hesus, kendenan Hesus a bisa: “Boso ta bin di boso tata, e Diabel, y boso kier cumpli cu e deseonan di boso tata. E ... no a keda firme den e berdad.”—Juan 8:44.

²⁰ Nimrod a goberna Babel y e otro stadnan cu a keda entre e riunan Tigris y Eufrates. (Gen. 10:10) Probablemente ta bou di su guia nan a cuminsa construi Babel y su toren alrededor di aña 2269 prome cu nos era. Jehova su boluntad tabata pa hende biba riba henter tera, ma e trahadornan di Babel a bisa: “Ban, laga nos traha un stad pa nos mes y un toren cu su top ta yega te den cielo, y laga nos traha un nomber pa nos mes, pa nos no wordo plama riba superficie di henter tera.” Pero nan no por a sigui cu nan plan pasobra Dios a “confundi e idioma di henter tera” y a plama tur e trahadornan riba superficie di tera. (Gen. 11:1-4, 8, 9) Si Satanas su intencion tabata pa forma un religion pa tur hende ador’e, su plan tabata un fracaso total. Dicon? Pasobra Jehova a proteha adoracion berdadero, y awe mas y mas hende ta cuminsa adora Jehova.

21, 22. (a) Dicon religion falso nunca tabata un berdadero menasa pa adoracion berdadero? (b) Kico nos lo trata den e siguiente articulo?

²¹ Nunca religion falso tabata un berdadero menasa pa adoracion berdadero. Dicon no? Pasobra nos Gran Instructor, Jehova, semper a percura pa nos tin su Palabra, pa nos por siña conoce su nomber y adkiri conocemento di e berdad. (Isa. 30:20, 21) Ora nos ta adora Dios manera e kier, nos lo ta feliz. Pero pa nos por ador’e asina, nos mester keda spiritualmente alerta, depende completamente riba Jehova y sigui guia di su spirito santo.

²² Den e siguiente articulo, nos lo mira con algun siñansa falso a desaroya. Nos lo mira tambe con e Scritura no ta siña hende e doctrinanan aki. Ademas, nos lo mira con Jehova a bendiciona nos cu e berdad, cu ta un parti di nos herencia spiritual.