1. Kico Pablo a tende tocante e cristiannan na Corinto cu a hacie hopi contento?

 TABATA aña 55 di nos era. Apostel Pablo tabata den e stad portuario di Troas, pero e no por a stop di pensa riba Corinto. Mas prome den e aña ey, a duel e di tende cu e rumannan di Corinto tabata pleita cu otro. E tabata stima nan manera un tata; pesey el a manda un carta pa corigi nan. (1 Cor. 1:11; 4:15) Tambe el a manda su colaborador Tito cerca nan y a pidi Tito pa bin top’e na Troas pa inform’e kico ta pasando. Awor Pablo tabata warda Tito na Troas masha deseoso pa tende con tabata bayendo cu e Corintionan. Pero Pablo a keda hopi desapunta cu Tito no a bin. Kico Pablo por a haci? El a nabega bay Macedonia y a keda masha contento di topa Tito eynan. Tito a conta Pablo cu e rumannan na Corinto a reacciona bon riba su carta y cu nan tabatin hopi gana di mir’e. Ora Pablo a tende e bon noticia ey, el a bira “mas contento ainda.”—2 Cor. 2:12, 13; 7:5-9.

2. (a) Kico Pablo a skirbi e Corintionan tocante fe y goso? (b) Ki preguntanan nos lo contesta?

² Un poco despues di esey, Pablo a skirbi e Corintionan su di dos carta. El a bisa nan: “No cu nos ta doño di boso fe, sino cu nos ta traha hunto cu boso pa boso goso, pasobra boso ta para firme pa motibo di boso fe.” (2 Cor. 1:24) Kico Pablo tabata kiermen? Y kico ancianonan cristian por siña for di e palabranan ey?

3. (a) Kico Pablo tabata kiermen ora el a skirbi cu “boso ta para firme pa motibo di boso fe”? (b) Con ancianonan di awendia ta imita e ehempel di Pablo?

³ Pablo a menciona dos cualidad importante cu cristiannan mester tin: fe y goso. Corda cu relaciona cu fe, el a skirbi: “No cu nos ta doño di boso fe, ... pasobra  boso ta para firme pa motibo di boso fe.” Cu e palabranan aki, Pablo a reconoce cu e rumannan na Corinto tabata para firme, no pa motibo di dje of cualkier otro hende, sino pa motibo di nan propio fe den Dios. Pues, Pablo no a mira e necesidad di controla e fe di su rumannan, y e no tabata kier a haci esey tampoco. E tabatin e confianza cu nan tabata cristiannan fiel cu kier a haci loke ta corecto. (2 Cor. 2:3) Awe, ancianonan ta sigui e ehempel di Pablo y ta convenci cu nan rumannan tin fe den Dios y ta sirbie cu e motivacion corecto. (2 Tes. 3:4) En bes di traha regla estricto pa e congregacion, ancianonan ta basa nan mes riba principio biblico y ta sigui e instruccionnan cu nan ta haya for di Jehova su organisacion. Al fin y al cabo, e ancianonan di awendia tampoco no ta doño di e fe di nan rumannan.—1 Ped. 5:2, 3.

4. (a) Kico Pablo tabata kiermen ora el a skirbi cu “nos ta traha hunto cu boso pa boso goso”? (b) Con ancianonan di awendia ta imita e actitud di Pablo?

⁴ Pablo a bisa tambe: “Nos ta traha hunto cu boso pa boso goso.” Cu e expresion ey, el a referi na su mes y na su colaboradornan intimo. Dicon nos ta yega na e conclusion ey? Pasobra den e mesun carta, Pablo a corda e Corintionan riba dos di e colaboradornan ey ora el a skirbi: “Nos, esta, ami, Silvano y Timoteo, a predica [Hesus] na boso.” (2 Cor. 1:19) Ademas, ki ora cu Pablo a uza e expresion Griego traduci akinan como “traha hunto” [literalmente, “compañero di trabou”] den su cartanan, semper esey a referi na su colaboradornan intimo, manera Akila, Prisca, Timoteo, Tito y otronan. (Rom. 16:3, 21; 2 Cor. 8:23) Pesey, ora Pablo a bisa, “nos ta traha hunto cu boso pa boso goso”, el a sigura e Corintionan cu tanto e como su compañeronan kier a haci tur loke nan tabata por pa promove e goso di tur miembro di e congregacion. Awe, ancianonan cristian tin e mesun deseo. Nan kier haci tur loke nan por pa yuda nan rumannan ‘sirbi Jehova cu goso.’—Sal. 100:2; Flp. 1:25.

5. Ki pregunta a ser haci na algun ruman homber y ruman muher, y riba kico nos tin cu pensa?

⁵ Recientemente, nos a puntra un grupo di ruman homber y ruman muher celoso cu ta biba na diferente parti di mundo: “Kico un anciano a haci of bisa cu a haci bo masha contento?” Segun cu nos ta considera e comentarionan cu e rumannan ey a duna, compara nan contestanan cu e manera cu abo lo a reacciona. Ademas, laga nos tur pensa riba kico nos por haci pa contribui na un spirito di goso den nos congregacion. *

6, 7. (a) Den ki manera e ancianonan por imita Hesus, Pablo y otro sirbidornan di Dios? (b) Dicon e rumannan ta sinti nan contento ora nos corda nan nomber?

⁶ Hopi di nos rumannan ta bisa cu nan ta sinti nan masha contento ora e ancianonan mustra interes personal den nan. Un manera basico cu un anciano por haci esaki ta siguiendo e ehempel cu David, Eliu y Hesus mes a laga pa nos. (Lesa 2 Samuel 9:6; Job 33:1; Lucas 19:5.) Cada un di e sirbidornan di Jehova aki a mustra interes sincero den un otro hende yamand’e na su nomber. Pablo tambe a compronde e importancia di corda y uza nomber di su rumannan. El a conclui un di su cartanan mandando saludo pa mas cu 25 ruman homber y muher na nan nomber, incluso Persis, un ruman muher cristian di kende Pablo a bisa: “Cuminda Persis, nos ruman muher stima.”—Rom. 16:3-15.

 ⁷ Algun anciano tin problema pa corda nomber di hende. Pero ora nan haci un berdadero esfuerso pa corda nomber di nan rumannan, nan, den un sentido, ta bisando nan ruman: ‘Bo ta importante pa mi.’ (Exo. 33:17) E rumannan lo sinti nan mas contento ainda ora e ancianonan ta corda nan nomber ora di duna nan beurt pa comenta durante e Estudio di Toren di Vigilancia of otro reunion.—Compara cu Juan 10:3.

8. Den ki manera importante Pablo a sigui e ehempel di Jehova y Hesus?

⁸ Tambe Pablo a mustra interes den otro hende dunando nan elogio sincero. Esey ta un otro manera basico pa haci e rumannan contento. Den e mesun carta cu Pablo a expresa su deseo di traha hunto cu e rumannan pa nan goso, el a skirbi: “Mi ta masha orguyoso di boso.” (2 Cor. 7:4) E palabranan di elogio ey lo mester a laga e rumannan na Corinto sinti nan hopi bon. Pablo a expresa e mesun sintimentonan aki tambe pa e otro congregacionnan. (Rom. 1:8; Flp. 1:3-5; 1 Tes. 1:8) En realidad, despues cu el a menciona Persis den su carta pa e congregacion na Roma, el a agrega: “El a traha hopi duro den Señor.” (Rom. 16:12) E compliment ey lo mester tabata un gran animacion pa e ruman muher fiel ey! Ora Pablo a duna elogio na otro hende, el a sigui e ehempel cu tanto Jehova como Hesus a pone.—Lesa Marco 1:9-11; Juan 1:47; Rev. 2:2, 13, 19.

9. Dicon tur hende den congregacion ta mas contento ora nan ta elogia otro?

⁹ Awe ancianonan tambe ta mira e importancia di expresa nan aprecio pa nan rumannan cu palabra. (Prov. 3:27; 15:23) Ki ora cu un anciano haci esey, ta comosifuera e ta bisa su rumannan: ‘Mi a tuma nota di loke bo a haci. Mi ta aprecia bo.’ Y nos rumannan sigur tin necesidad di tende e palabranan di aprecio ey di parti di e ancianonan. Un ruman muher di 50 y pico aña a papia pa hopi ruman ora el a bisa: “Na trabou masha poco biaha mi ta haya un compliment. Tin un ambiente seco y di competencia. Pues, ora un anciano elogia mi pa algo cu mi a haci pa e congregacion, e ta lanta mi animo, y mi ta sinti mi hopi refresca! E ta laga mi sinti cu mi Tata celestial stima mi.” Un ruman homber cu ta un tata soltero y cu ta lantando dos yiu tambe a sinti asina. Recientemente un anciano a elogi’e di curason. Ki efecto esey tabatin riba nos ruman? El a bisa: “E palabranan di e anciano a anima mi masha hopi mes!” Si, ora un anciano elogia su rumannan di curason, e ta lanta nan animo y duna nan mas goso. Esey, na su turno, lo duna nan mas forsa pa sigui cana riba e caminda di bida, “sin cansa.”—Isa. 40:31.

10, 11. (a) Con ancianonan por imita Nehemias? (b) Kico por yuda un anciano comparti un don spiritual ora e ta haci bishita di pastoreo?

¹⁰ Den ki otro manera importante ancianonan ta mustra amor na nan rumannan y yuda nan sirbi Dios cu goso? Esey ta ora nan ta actua di biaha pa yuda esnan cu tin mester di animacion. (Lesa Echonan 20:28.) E ancianonan cu ta haci esey ta imitando e wardadornan spiritual di pasado. Tuma nota, por ehempel, kico e superintendente fiel, Nehemias, a haci ora el a mira cu algun di su rumannan Hudiu a bira spiritualmente debil. E relato ta bisa cu mesora el a lanta y anima nan. (Neh. 4:14) Awe, ancianonan kier haci mescos. Nan ta “lanta”, es decir, tuma e iniciativa, pa yuda e rumannan para firme den fe. Pa nan por duna e animacion personal ey, si e circunstancianan ta permiti, nan ta bishita nan rumannan na nan cas.  Durante e bishitanan di pastoreo ey, nan ta trata na “comparti algun don spiritual” cu nan. (Rom. 1:11) Kico lo yuda e ancianonan haci esey?

¹¹ Prome cu un anciano haci un bishita di pastoreo, e tin cu tuma poco tempo pa pensa riba e persona cu e kier bishita. Por ehempel, e ta puntra su mes: Ki problema e persona aki tin? Kico mi por bisa pa edific’e? Ki texto of experencia di un personahe biblico lo ta aplicabel den su caso? Ora un anciano pensa delanta riba e ruman cu e ta bay bishita, su combersacion lo tin mas sentido, y lo no keda limita na cosnan cu no ta importante. Durante e bishita di pastoreo, un anciano ta permiti su rumannan expresa nan mes mientras e ta scucha cu atencion. (Sant. 1:19) Un ruman muher a bisa: “Bo ta sinti bo bon ora un anciano ta scucha bo di curason.”—Luc. 8:18.

12. Ken den e congregacion tin mester di animacion, y pakico?

¹² Ken lo beneficia di un bishita di pastoreo? Pablo a anima su compañeronan anciano pa “presta atencion ... na henter e tou.” Si, tur miembro di e congregacion tin mester di animacion, incluso esnan cu tin hopi aña ta sirbi como publicador y pionero. Dicon nan mester di e apoyo di wardadornan spiritual? Pasobra tin biaha e rumannan spiritualmente fuerte ey tambe ta sinti cu casi nan no por wanta mas debi na e presion di e mundo malbado aki. Pa ilustra pakico hasta un sirbidor fuerte di Dios tin biaha mester di yudansa di un compañero, laga nos wak kico a pasa den e bida di Rey David.

13. (a) Na ki momento Isbi-benob kier a ataca David? (b) Dicon Abisai por a sali net na tempo na defensa di David?

¹³ Un poco despues cu e hoben David a ser ungi pa bira rey, el a enfrenta Goliat, descendiente di e gigantenan, cara cara. David tabatin hopi curashi y el a mata e gigante. (1 Sam. 17:4, 48-51; 1 Cro. 20:5, 8) Hopi aña despues, den un bataya cu e Filisteonan,  David a bolbe enfrenta un descendiente di e gigantenan cara cara. Su nomber tabata Isbi-benob. (2 Sam. 21:16) Pero e biaha aki, e gigante casi a mata David. Dicon? No pasobra David no tabatin curashi sino pasobra e no tabatin forsa. E relato ta bisa: “David a keda morto cansa.” Asina cu Isbi-benob a ripara cu David a cansa, “e kier a mata David.” Anto net prome cu e gigante por a hinca David mata cu su arma, mesora “Abisai, yiu homber di Sarvia, a yuda David y a dal e Filisteo mata.” (2 Sam. 21:15-17) Di baina David a scapa! Lo e mester a keda masha agradecido cu Abisai tabata tira bista riba dje y a bin yud’e di biaha ora su bida tabata na peliger. Kico nos por siña for di e relato aki?

14. (a) Con nos por vence dificultadnan gigantesco manera Goliat? (b) Con e ancianonan por yuda e rumannan recobra nan fortaleza y nan goso? Duna un ehempel.

¹⁴ Rond mundo, nos como pueblo di Jehova ta cumpliendo cu nos sirbishi a pesar di e obstaculonan cu Satanas y su agentenan ta pone den nos caminda. Algun di nos a yega di enfrenta problemanan gigantesco, pero cu pleno confianza den Jehova, nos a lucha contra di e “Goliatnan” aki y a vence nan. Sinembargo, tin biaha, e lucha constante cu nos ta hiba contra e presionnan di e mundo aki ta laga nos keda morto cansa y sin animo. Den e condicion debilita ey, nos ta vulnerabel y ta core peliger di sucumbi bou di e presionnan cu na otro ora nos lo a vence sin problema. Na e momentonan ey, e apoyo oportuno cu un anciano ta duna nos por yuda nos recobra nos goso y nos fortaleza, manera hopi ruman a experencia. Un pionero cu tin 60 y pico aña a conta: “Un poco tempo pasa, mi no tabata sinti mi mucho bon, y sirbishi di veld tabata caba cu tur mi energia. Un anciano a ripara cu mi tabata mustra cansa y el a acerca mi. Nos tabatin un combersacion edificante basa riba un relato di Bijbel. Mi a aplica e sugerencianan cu el a duna mi, y esey a yuda mi hopi.” E ruman a agrega: “Ta hopi amoroso di e anciano ey cu el a tuma nota di mi situacion y a duna mi yudansa!” Si, ta un animacion pa sa cu nos tin ancianonan cu ta preocupa pa nos y kendenan, mescos cu Abisai di pasado, ta para cla pa ‘yuda nos.’

15, 16. (a) Pakico e rumannan tabata stima Pablo? b) Pakico nos ta stima e ancianonan amoroso di nos congregacion?

¹⁵ Ancianonan ta hende cu ta traha duro. Tin biaha nan ta perde soño pasobra nan ta preocupa pa nan rumannan, y kisas nan ta lanta anochi laat pa resa pa nan of pa duna nan yudansa spiritual. (2 Cor. 11:27, 28) Pero asina mes, e ancianonan ta cumpli cu nan responsabilidad plenamente y gustosamente, mescos cu Pablo. El a skirbi e Corintionan: “Gustosamente lo mi duna tur loke mi tin y entrega mi mes completamente pa boso alma.” (2 Cor. 12:15) En berdad, pa motibo cu e tabata stima su rumannan, Pablo a dedica su mes completamente na fortalece nan. (Lesa 2 Corintionan 2:4; Flp. 2:17; 1 Tes. 2:8) No ta nada straño cu e rumannan tabata stima Pablo asina tanto!—Echo. 20:31-38.

¹⁶ Como sirbidor di Dios, awe nos tambe ta stima nos ancianonan y ta gradici Jehova den nos oracionnan cu e ta uza nan pa yuda nos. Debi cu nan ta interesa den cada un di nos, nan ta yuda nos sirbi Dios cu goso. Nan bishitanan di pastoreo ta enrikece nos. Ademas, nos ta agradecido cu nan ta cla pa yuda nos na momento cu e presionnan di e mundo aki ta casi aplasta nos. Si, e ancianonan atento ey di berdad ‘ta traha hunto cu nos pa nos goso.’