Ebla​—Un Stad Antiguo Ta Surgi for di Olvido

Den zomer di 1962, Paolo Matthiae, un arkeologo Italiano hoben, a investiga e yanuranan den noordwest di Siria sin sa kico precies lo e haya. Segun expertonan, e interior di Siria tabatin masha tiki sitio di interes arkeologico. Sinembargo, for di e excavacionnan cu a tuma luga dos aña despues na Tell Mardikh, mas o menos 60 kilometer zuid di Alepo, a haya loke hopi hende ta considera ‘e descubrimento arkeologico di mas importante di siglo 20.’

INSCRIPCIONNAN antiguo tabata confirma existencia di un stad cu yama Ebla. Sinembargo, ningun hende no tabata sa ta bou di cua di e tantisimo seritonan cu a contene ruina (yama ‘tell’), plama tur rond den Medio Oriente, lo bo por a haya e stad ei. Un texto a conta di e victoria di Sargon, Rei di Akkad, riba “Mari, Yarmuti y Ebla.” Den un otro inscripcion, Rei Gudea di Sumer a menciona e palonan valioso cu el a haya for di “e seronan di Ibla [Ebla].” E nomber Ebla a aparece tambe na Karnak, Egipto, den un lista di stadnan antiguo cu Farao Tutmosis III a conkista. Ta di compronde anto dicon arkeologonan tabata purba haya Ebla.

Sinembargo, mas trabou di cobamento a duna fruta. Na 1968, nan a descubri parti di un estatua di un Rei di Ebla yama Ibbit-Lim. Riba e estatua tabatin inscribi un voto na idioma Acadio cu a revela cu e estatua a ser dedica na e diosa Ishtar, kende “a briya den Ebla.” Si, descubrimentonan arkeologico a cuminsa revela “un idioma nobo, un historia nobo y un cultura nobo.”

Na 1974/75 arkeologonan a haya confirmacion cu Tell Mardikh tabata coresponde cu e stad Ebla di antiguedad, ora cu nan a descubri tablanan skirbi na spijkerschrift cu bes tras bes a cita e nomber antiguo ei. Cobamento a revela tambe cu e stad a existi por lo menos dos biaha na e sitio ei. Despues di hunga un papel predominante pa un periodo, el a ser destrui. Nan a reconstrui Ebla, pero el a bolbe ser destrui y a pasa pa olvido pa siglonan largo.

Un Stad, Hopi Historia

E stadnan di mas antiguo tabata traha riba yanuranan fertil, manera esnan entre Riu Tigris y Riu Eufrates, caminda agricultura intensivo tabata posibel. E prome stadnan menciona den Bijbel tabata situa na Mesopotamia. (Genesis 10:10) Parce cu e nomber Ebla ta nifica “Baranca Blanco”, referiendo na e klipnan riba cua e stad tabata traha. Aparentemente nan a scohe e sitio ei pasobra e capa di klip tabata un garantia cu tabatin un deposito natural di awa einan, locual tabata importante den un region leu for di riunan grandi.

E poco awasero cu tabata cai den e area di Ebla a permiti cultivacion extenso di solamente grano, mata di wendruif y palo di oleifi. E area tabata apropia tambe pa crio di bestia, specialmente carne. Ebla su ubicacion strategico—entre e Yanura di Mesopotamia y e Costa Mediteraneo—a hacie un bon luga pa e negoshi di palo pa construccion, piedra semiprecioso y metal. E stad a domina un region habita pa alrededor di 200.000 persona, di cua casi dies porciento tabata biba den e capital.

E restonan cu nan a descubri di un palacio grandi ta duna prueba di e splendor di e fase aki  di e civilisacion di Ebla. Pa haya acceso na e palacio mester a pasa dor di un porta di 12 pa 15 meter halto. Den transcurso di tempo nan a extende e palacio pa traha luga pa e creciente necesidadnan di un gobierno cu tabata bira mas y mas poderoso. Funcionarionan tabata traha bou di un herarkia complica; e rei y su reina a haya yudansa di “señornan” y “gobernadornan.”

Arkeologonan a haya mas cu 17.000 tabla di klei y fragmento. Originalmente, nan tabata probablemente mas cu 4.000 tabla hente, cuidadosamente poni riba rekinan di palo. E documentonan aki ta duna prueba cu e comercio di Ebla tabata hopi extenso. Por ehempel, e stad a haci negoshi cu Egipto, locual por a mira na e simbolonan real di dos farao. E tablanan tabata skirbi principalmente na spijkerschrift di idioma Sumerio. Pero algun tabata na idioma di Ebla, un lenga Semitico masha bieu cu expertonan a logra descifra a base di e documentonan aki. Specialistanan den asuntonan oriental a keda sorprendi di descubri un idioma Semitico asina bieu. Ta interesante pa nota cu algun di e tablanan tabatin listanan bilingual na Sumerio-Ebla. E buki Ebla—Alle origini della civiltà urbana (Ebla—Na Origen di Civilisacion Urbano) ta yama e listanan aki “e diccionarionan di mas bieu conoci pa nos.”

Evidentemente Ebla tabata un poder militar, pasobra obra di arte cu nan a coba saca tabatin dibuho di guereronan di Ebla ta ehecuta nan enemigonan of ta presenta cabesnan kita. Sinembargo, e splendor di Ebla a termina ora cu Asiria y Babilonia tabata subiendo na poder. No ta facil pa saca afo kico precies a sosode, pero ta parce cu na prome instante Sargon I (no e Sargon menciona na Isaias 20:1) y despues su nieto Naram-Sin a ataca Ebla. E evidencia cu arkeologonan a coba saca ta mustra cu e encuentronan ei tabata violento y e invasionnan tabata feros.

Sinembargo, manera nos a menciona, despues di un tempo nan a reconstrui e stad y el a asta haya mas importancia den e region. Nan a construi e stad nobo segun un plan masha precies cu a accentua su grandesa. Den e parti mas abou di e stad tabatin un area sagrado dedica na e diosa Ishtar, kende tabata un diosa di fertilidad pa e hendenan di Babilonia tambe. Kisas bo a tende di e famoso  Porta di Ishtar cu nan a descubri den e ruinanan di Babilonia. Tin un edificio hopi impresionante na Ebla cu aparentemente nan tabata uza pa tene e leonnan cu a ser considera sagrado pa e diosa Ishtar. Esaki ta trece nos na e topico di Ebla su religion.

Religion na Ebla

Mescos cu na otro partinan di antiguo Oriente, Ebla tabatin un panteon di dios. Algun di nan tabata Baal, Hadad (un nomber cu ta aparece como parti di e nomber di cierto reinan Sirio) y Dagan. (1 Reinan 11:23; 15:18; 2 Reinan 17:16) E hendenan di Ebla tabata venera nan tur. Nan tabata asta honra e diosnan di otro pueblo. Descubrimentonan arkeologico ta indica cu nan tabata adora tambe antepasadonan real considera como dios, specialmente den e di dos milenio prome cu nos era.

E hendenan di Ebla no tabata confia nan diosnan ciegamente. P’esei e stad nobo di Ebla tabata rondona pa dos muraya paralelo impresionante cu lo por a intimida cualkier enemigo. E muraya mas pafo tabatin un omtrek di casi tres kilometer. Te awe bo por mira bon cla con nan tabata core.

Pero asta e Ebla reconstrui a yega na su fin. Posiblemente e Heteonan rond di aña 1600 prome cu nos era a caba finalmente cu loke un tempo tabata un gran potencia. Segun un poema antiguo, Ebla a ser “destrosa manera un vas di ceramica.” Poco despues el a cuminsa disparce for di historia. Un documento skirbi pa e soldanan di e crusadanan cu a marcha rumbo pa Jerusalem na aña 1098 ta menciona e sitio caminda Ebla tabata situa un tempo, y ta referi na dje como un base militar aisla den e pais cu yama Mardikh. Hende a lubida casi completamente riba Ebla, y ta despues di hopi siglo a bolbe descubrie.

[Cuadro na pagina 14]

EBLA Y BIJBEL

Un articulo publica na 1976 den e revista Biblical Archeologist a lanta curiosidad di analistanan di Bijbel. E persona cu a descifra e tablanan di klei di Ebla a menciona e posibilidad cu e tablanan tabata contene, entre otro, nomber di hende y di luga menciona siglonan despues den Bijbel. Bayendo kisas mas leu di loke e articulo en realidad a bisa, algun analista a cuminsa skirbi cu Ebla a produci prueba arkeologico cu e relato di Genesis ta confiabel. * Segun e hesuita Mitchell Dahood, e “tablanan di klei [di Ebla] ta yuda aclara e partinan scur di Bijbel.” Por ehempel, e tabata di opinion cu nan lo por a yuda saca afo ‘for di cuanto tempo pasa Israel a cuminsa uza e nomber di Dios.’

Awor expertonan ta analisando e textonan aki cu mas exactitud. Debi cu tanto e idioma Hebreo como esun di Ebla ta idiomanan Semitico, ta existi e posibilidad cu algun nomber di stad of di persona por ta similar of identico na esnan den Bijbel. Sinembargo, esaki no ta proba cu nan ta referi na e mesun sitionan of personanan. Tempo lo mustra te con leu e descubrimentonan na Ebla lo influencia investigacionnan biblico. Pa loke ta e nomber divino, escritor di e articulo den Biblical Archeologist a nenga cu el a yega di bisa cu “Yahweh” a ser menciona den e textonan di Ebla. Pa algun experto, e simbolo di spijkerschrift cu nan ta interpreta como ja ta indica djis un di e tantisimo diosnan di e panteon di Ebla, mientras cu varios otro specialista ta interpret’e como simplemente un signo gramatical. Sea cual sea e caso, e no ta referi na e unico Dios berdadero, Jehova.—Deuteronomio 4:35; Isaias 45:5.

[Nota]

[Mapa/​Plachi na pagina 12]

(Pa e texto den su formato completo , wak e publicacion)

LAMA GRANDI

CANAN

SIRIA

Alepo

Ebla (Tell Mardikh)

Riu Eufrates

[Reconocemento]

Arkeologo: Missione Archeologica Italiana a Ebla - Università degli Studi di Roma ‘La Sapienza’

[Plachi na pagina 12, 13]

Un cadena di oro cu ta data for di alrededor di aña 1750 P.E.C.

[Plachi na pagina 13]

Restonan di un palacio grandi

[Plachi na pagina 13]

Dibuho di un artista di e tablanan di klei warda den e cuarto di archivo

[Plachi na pagina 13]

Tabla skirbi na spijkerschrift

[Plachi na pagina 13]

Klop real di Egipto, 1750-1700 P.E.C.

[Plachi na pagina 13]

Guerero di Ebla cu cabesnan di enemigo

[Plachi na pagina 14]

Un piedra conmemorativo dedica na e diosa Ishtar

[Reconocemento]

Missione Archeologica Italiana a Ebla - Università degli Studi di Roma ‘La Sapienza’

[Reconocemento pa Potret na pagina 13]

Tur plachi (cu excepcion di e restonan di e palacio): Missione Archeologica Italiana a Ebla - Università degli Studi di Roma ‘La Sapienza’