Con Nan A Orienta den un Lama Inmenso

E ISLANAN Marshall ta consisti di mas cu 1.200 isla grandi y chikito, y mayoria di nan no ta mas halto cu algun meter riba nivel di lama. Si bo aleha djis un tiki for di nan bai riba lama grandi, bo no ta mira nan mas. Anto toch e antiguo nabegantenan di Marshall den nan canoanan por a nabega di un isla chikito pa otro, hayando nan caminda den un area di mas o menos dos miyon kilometer cuadra di Ocean Pacifico. Con nan a haci esei? Nan tabata uza “mapanan” simpel pero remarcablemente efectivo como guia, e asina yama mapanan di palo chikito.

Experencia a siña e nabegantenan di Marshall cu presencia di tera firme ta crea cierto patronchi di ola cu ta revela cu asta 30 kilometer mas aleu por tin un isla. Nan tabatin cu siña hopi patronchi di ola y e mapanan di palo chikito a yuda nan corda esakinan. Con e mapanan di palo chikito tabata? Manera bo por mira riba e plachi, palonan chikito traha di raiz di palma di pandanus of di e parti meimei di e rama di coco tabata wordo mara hunto den forma di trali pa representa patronchi di ola. Nan tabata pega cocolishi pa marca e posicionnan relativo di e islanan.

Pa hopi aña e nabegantenan di Marshall a tene nabegacion cu uzo di mapa di palo chikito un secreto, y nan tabata revel’e na cierto hende so. Con un nabegante jong tabata siña uza un mapa di palo chikito? Solamente pa medio di entrenamento y practica. Un nabegante cu experencia tabata siña un hoben personalmente, kisas dor di bai cu ne na e islanan den cercania. Segun cu e nabegante hoben tabata siña reconoce e varios patronchinan di ola, e tabata haya mas confiansa den uzo di su mapa di palo chikito. Cu tempo e por a nabega su so riba lama grandi.

Den e mesun manera, Bijbel, e Palabra di Dios, por guia nos rumbo den bida. Na principio, kisas un persona ta yuda nos haya un comprondemento basico di e Scritura. Anto, segun cu nos ta sigui studia e Palabra di Dios y pone su principionan na practica, nos ta haya mas confiansa den loke e ta bisa. Dios a bisa Josue, lider di e Israelitanan, pa sigui lesa e Palabra di Dios pa e por a “percura di haci conforme tur loke ta para skirbi den dje.” Anto el a agrega: “E ora ei lo bo haci bo caminda prospera, y e ora ei lo bo tin exito.” (Josue 1:8) Si, Bijbel por yuda nos plania un caminda sigur y exitoso den bida.

[Reconocemento pa Potret na pagina 32]

© Greg Vaughn