Pregunta di Lector

Un persona por ser expulsa for di e congregacion cristian pa motibo di impuresa mescos cu pa motibo di fornicacion of libertinahe?

Si, un persona por ser expulsa for di e congregacion si e ta practica sea fornicacion, cierto forma di impuresa of libertinahe sin arepenti. Apostel Pablo ta menciona tur e tres picanan aki hunto cu otro picanan cu tambe por hiba na expulsion, ora e ta skirbi: “E obranan di carni ta evidente, cuanan ta: inmoralidad [“fornicacion”, NW], impuresa, sensualidad [“libertinahe”, NW] . . . mi ta spierta boso di antemano . . . cu esnan cu practica sorto di cosnan asina lo no hereda e reino di Dios.”—Galationan 5:19-21.

Fornicacion (na Griego, por·néi·a) ta aplica na relacion sexual ilicito pafo di matrimonio biblico. E ta ensera adulterio, prostitucion y relacion sexual entre personanan cu no ta casa, y tambe sex oral y anal, y cariciamento di organonan sexual entre personanan cu no ta casa cu otro. Un persona cu ta practica fornicacion  sin arepenti no por ta parti di e congregacion cristian.

Libertinahe (na Griego, a·sél·gei·a) ta nifica “conducta desenfrena; bagamunderia, obscenidad, sensualidad.” The New Thayer’s Greek-English Lexicon ta defini e palabra Griego como “pasion desenfrena, violacion di normanan di decencia, simberguenseria, un actitud sin escrupulo.” Segun un otro diccionario, libertinahe ta un forma di conducta cu ta “surpasa tur limite di loke ta socialmente aceptabel.”

Manera e definicionnan menciona anteriormente ta mustra, “libertinahe” ta ensera dos cos: (1) E conducta mes ta un violacion serio di e leinan di Dios; y (2) e malechor ta demostra un actitud di falta di respet y sin escrupulo.

P’esei, “libertinahe” no ta referi na mal conducta di un caracter menor of insignificante. Ta trata aki di actonan cu ta violacionnan serio di e leinan di Dios y cu ta refleha un actitud sin berguensa of di desprecio flagrante—uno cu ta manifesta un falta di respet of asta desprecio pa autoridad, lei- y normanan. Pablo ta conecta libertinahe cu relacion sexual ilicito. (Romanonan 13:13, 14) Siendo cu Galationan 5:19-21 ta menciona libertinahe hunto cu varios otro practica pecaminoso cu por stroba un persona di hereda e Reino di Dios, libertinahe por bira e base pa reprende y posiblemente expulsa un persona for di e congregacion cristian.

Impuresa (na Griego, a·ka·thar·sí·a): Di e tres palabranan traduci como “fornicacion”, “impuresa” y “libertinahe”, impuresa ta esun di mas amplio. E ta ensera tur tipo di impuresa den asuntonan sexual, den abla, den accion y den relacionnan spiritual. “Impuresa” ta abarca un variedad amplio di pica serio.

Manera 2 Corintionan 12:21 ta trece dilanti, Pablo ta referi na esnan cu ‘a peca den pasado pero cu no a arepenti di e impuresa, e fornicacion y e libertinahe cu nan a practica.’ Siendo cu “impuresa” ta ser menciona hunto cu “fornicacion y libertinahe”, algun forma di impuresa ta bira motibo pa tuma accion hudicial. Pero impuresa ta un termino hopi amplio cu ta ensera cosnan cu no necesariamente lo hiba na accion hudicial. Mescos cu un cas por ta sea un poco na stof of tur sushi, asina tin varios grado di impuresa.

Na Efesionan 4:19, Pablo ta bisa cu algun hende a ‘perde tur heful y a entrega nan mes na libertinahe pa, cu golosidad, nan practica tur clase di impuresa.’ Asina Pablo ta pone ‘impuresa cu golosidad’ den e mesun categoria cu libertinahe. Si un persona batisa practica ‘impuresa cu golosidad’ sin arepenti, e por wordo expulsa for di e congregacion a base di impuresa grave.

Supone cu na varios ocasion un pareha comprometi pa casa ta caricia, brasa y sunchi otro intensamente den un manera cu ta excita nan sexualmente. E ancianonan por determina cu aunke e personanan aki no a manifesta un actitud sin berguensa cu por wordo cualifica como libertinahe, tabatin un grado di golosidad den nan conducta. Pues e ancianonan por tuma accion hudicial ya cu tabata trata aki di impuresa grave. Impuresa grave por ta un base apropia tambe pa atende un caso cu tin di aber cu un persona cu bes tras bes ta yama otro hende na telefon pa papia explicitamente tocante asuntonan sexual, specialmente si el a yega di ser conseha anteriormente caba tocante e asunto.

E ancianonan tin cu uza discernimento ora di evalua un ke otro. Pa determina si mester cuminsa un caso hudicial, nan mester investiga cuidadosamente kico a tuma luga y te na ki grado esaki a tuma luga. No ta cuestion di acusa un persona di libertinahe djis pasobra e no ta acepta conseho biblico. Tampoco no ta djis un asunto di dicidi matematicamente cuanto biaha un persona por comete un cierto pica prome cu cuminsa un caso hudicial. E ancianonan tin cu analisa cada situacion a fondo hunto cu oracion y saca afo kico a sosode y cu ki frecuencia, e tipo y e grado di e mal conducta, y tambe e intencion y motibo di e malechor.

No ta picanan sexual so ta cai bou di impuresa grave. Por ehempel, kisas un mucha homber batisa ta huma un par di cigaria durante un tempo cortico y ta confesa esaki na su mayornan. E ta determina pa no huma mas. Por papia  aki di impuresa, pero cu no a escala te na e grado cu el a bira impuresa grave of ‘impuresa cu golosidad.’ Den un caso asina, conseho biblico di un of dos anciano hunto cu e apoyo di mayornan di e mucha lo mester ta suficiente. Pero si e mucha ta uza tabaco regularmente, esaki lo ta un contaminacion di carni intencional, y lo mester forma un comite hudicial pa considera e caso aki di impuresa grave. (2 Corintionan 7:1) Si e mucha no arepenti, lo e ser expulsa.

Algun cristian a haya nan envolvi den wakmento di pornografia. Esaki ta un pica contra Dios, y kisas e ancianonan lo keda asombra cu un ruman den fe a haci esaki. Pero no ta tur caso di wakmento di pornografia lo exigi un audiencia dilanti un comite hudicial. Por ehempel, supone cu un ruman homber a sinta wak e asina yama pornografia soft-core (pornografia leve) na varios ocasion. E ta sinti berguensa di loke el a haci, e ta confesa na un anciano y ta dicidido pa no ripiti e pica aki. Ta posibel masha bon cu e anciano ta yega na e conclusion cu e comportacion di e ruman no a escala te na e grado cu el a bira ‘impuresa cu golosidad’; ni e no a manifesta un actitud sin berguensa, locual ta indica libertinahe. Aunke no tin motibo pa cuminsa un caso hudicial, e tipo di impuresa aki lo rekeri conseho biblico firme y talbes mas yudansa di parti di e ancianonan.

Sinembargo, supone cu un cristian pa hopi aña a sinta wak den secreto pornografia repugnante cu ta sexualmente degradante y a haci tur loke ta posibel pa sconde e pica aki. E pornografia ei por ta inclui violacion sexual den grupo, masokismo (saca placer sexual for di abuso fisico y humiliacion), tortura sadista, maltrato di hende muher den actonan sexual of asta pornografia di mucha. Ora otro hende haya sa di su conducta, e ta sinti un berguensa profundo. Aunke e no tin un actitud sin berguensa, e ancianonan por determina cu el a ‘entrega su mes’ na e custumber sushi aki y a practica ‘impuresa cu golosidad’, esta, impuresa grave. Nan lo forma un comite hudicial pasobra esaki ta ensera impuresa grave. Si e malechor no demostra arepentimento piadoso y e determinacion pa nunca mas wak pornografia, lo e wordo expulsa. Den caso cu el a invita otro personanan na su cas pa wak pornografia, den un sentido promoviend’e, el a duna evidencia di un actitud sin berguensa cu ta caracteristica di libertinahe.

E expresion biblico “libertinahe” semper ta envolve un pica serio, por lo general un pica sexual. Ora ancianonan ta purba determina si por papia di libertinahe, nan mester wak si tabatin simberguenseria, bagamunderia, obscenidad y un comportacion escandaloso pa decencia publico. Di otro banda, un persona cu comete un falta serio contra lei di Jehova—aunke e no a manifesta un actitud sin berguensa—toch por ta dunando evidencia di “golosidad.” Mester trata e casonan aki a base di e impuresa grave cu nan ta envolve.

E responsabilidad cu ancianonan tin pa determina si un persona a bai asina leu pa e ta culpabel di impuresa grave of libertinahe ta uno serio, pasobra bida di hende ta den wega. Esnan cu ta husga casonan asina mester resa y pidi Jehova pa su spirito santo, discernimento y comprondemento. Ancianonan tin cu mantene e congregacion limpi y nan mester basa nan huicio riba e Palabra di Dios y tambe riba e guia di “e esclabo fiel y prudente.” (Mateo 18:18; 24:45) Y den e tempo malo aki, awor mas cu nunca ancianonan tin cu tene na mente e palabranan: ‘Pensa bon kico boso ta haci, pasobra no ta pa hende boso ta husga, sino pa Jehova.’—2 Cronicanan 19:6.