Pregunta di Lector

Pakico e Lei di Moises a considera cierto procesonan natural relaciona cu organonan sexual como cosnan cu ta haci un hende “impuro”?

Dios a crea hende cu organo sexual pa pareha casa por sigui reproduci y tambe haya placer den nan matrimonio. (Genesis 1:28; Proverbionan 5:15-18) Sinembargo, den Levitico capitulo 12 y 15 nos ta haya leinan specifico relaciona cu impuresa causa pa emision di simiña, menstruacion y hayamento di yiu. (Levitico 12:1-6; 15:16-24) E leinan ei cu a ser duna na Israel di antiguedad a promove un estilo di bida saludabel, a sostene normanan moral halto, y a enfatisa e echo cu sanger ta sagrado y cu mester a haci expiacion pa pica.

E rekisitonan di e Lei di Moises encuanto procesonan natural relaciona cu organonan sexual a contribui, entre otro, na mihor condicionnan di salud den e comunidad Israelita. E buki The Bible and Modern Medicine ta declara: “E lei cu a prohibi relacion sexual durante e dianan di menstruacion a resulta di ta un proteccion efectivo contra cierto enfermedad sexual ... y tambe e ta yuda evita formacion y desaroyo di cancer na cueyo di matris.” E leinan ei a proteha e pueblo di Dios contra malesanan cu lo tawata desconoci pa nan of asta imposibel pa nan detecta. Higiena sexual a aumenta e fertilidad di un nacion cu Dios a bendiciona cu un promesa di crecemento y prosperidad. (Genesis 15:5; 22:17) E leinan aki a proteha tambe e salud emocional di e pueblo di Dios. Door di obedece nan, esposo y esposa a siña controla pasion sexual.

Sinembargo, e cuestion principal den e tipo di impuresanan causa pa procesonan natural relaciona cu organonan sexual tawata e fluho of perdida di sanger. E leinan cu Yehova a duna e Israelitanan relaciona cu sanger a graba den nan mente no solamente cu sanger ta sagrado, sino tambe cu sanger ta ocupa un luga special den e adoracion di Yehova, esta, den sacrificio y expiacion pa pica.—Levitico 17:11; Deuteronomio 12:23, 24, 27.

Pesei, e rekisitonan detaya di e Lei den e contexto aki ta estrechamente liga cu imperfeccion humano. E Israelitanan tawata sa cu despues cu Adam cu Eva a peca, nan no por a haya yiu perfecto. Tur nan desendientenan lo a sufri di e efectonan di pica hereda, cu ta imperfeccion y morto. (Romanonan 5:12) Pa motibo di esaki, mayornan por a procrea solamente bida imperfecto y pecaminoso, aunke hende su organonan di reproduccion a ser diseña originalmente pa procrea bida perfecto mediante e areglo matrimonial.

Pues, e rekisitonan di purificacion di e Lei lo a recorda e Israelitanan no solamente cu nan a nace como pecado sino tambe cu nan tawatin mester di un sacrificio di rescate pa cubri pica y restaura perfeccion humano. Claro cu e sacrificionan di animal cu nan a ofrece no a logra esei. (Hebreonan 10:3, 4) E proposito di e Lei di Moises tawata pa guia nan na Cristo y yuda nan compronde cu ta unicamente pa medio di e sacrificio di e bida humano perfecto di Hesus, berdadero pordon tawata posibel. Y esaki a habri caminda pa hende fiel por haya bida eterno.—Galationan 3:24; Hebreonan 9:13, 14.