“E Hoya di Henter Galilea”

APENAS seis kilometer y mei nortwest di Nazaret, e stad caminda Hesus a lanta, tawatin un stad cu nunca a ser menciona den e Evangelionan. Pero e conocido historiado Hudiu di prome siglo, Flavio Yosefo, a aclam’e como “e hoya di henter Galilea.” Tawata trata aki di e stad di Seforis. Kico nos sa di e stad aki?

Despues di morto di Herodes e Grandi, probablemente na aña 1 prome cu nos era, e ciudadanonan di Seforis a rebela contra Roma, locual a hiba na e destruccion di nan stad. Antipas, yiu di Herodes, a hereda Galilea y Perea y a scohe e ruinanan di Seforis pa einan establece su capital nobo. E stad a ser reconstrui segun e arkitectura Grecoromano, pero e poblacion tawata principalmente Hudiu. Segun profesor Richard A. Batey, el a bira “e centro principal di control di gobierno riba Galilea y Perea”, te dia Antipas a construi Tiberias rond di aña 21 di nos era pa remplasa Seforis como capital. Den e tempo ei Hesus tawata biba den bicindario di e stad.

Profesor James Strange, kende a coba na Seforis ta kere cu un tempo e stad tawatin biblioteca, un tesoro, un deposito di arma, banco, edificio publico y plasanan caminda nan tawata bende ceramica, glas, articulo di metal, hoya y un variedad di alimento. Tawatin hende cu ta brei y tambe bendedo di paña y tienda caminda hende por a cumpra macutu, mueble, colonia y otro articulonan. Segun calculonan, e tempo ei e poblacion lo tawata entre 8.000 pa 12.000 hende.

Hesus a yega di bishita e metropolis druk aki cu a keda mas o menos un ora cana for di Nazaret? No tin ningun indicacion di esei den e Evangelionan. Sinembargo, The Anchor Bible Dictionary ta remarca cu “un ruta logico for di Nazaret pa Cana di Galilea tawata pasa duars door di Seforis.” (Huan 2:1; 4:46) For di Nazaret por mira e serito di Seforis, cu ta casi 120 meter halto riba e vaye. Algun hende ta kere cu posiblemente Hesus tawatin e stad aki na mente ora el a duna e ilustracion cu “un stad situa riba un sero no por keda scondi.”—Mateo 5:14.

Despues di e caida di Herusalem na aña 70 di nos era, Seforis a bira e stad principal di e Hudiunan na Galilea y despues e sitio di e Concilio, esta, e corte supremo Hudiu. Pa un tempo el a florece como un centro educacional di e Hudiunan.

[Mapa/Plachi na pagina 32]

(Pa e texto den su formato completo , wak e publicacion)

Lama di Galilea

GALILEA

Cana

Tiberias

SEFORIS

Nazaret

PEREA

[Reconocemento pa Potret na pagina 32]

Pochi di klei: Coba y saca door di Wohl Archaeological Museum, Herodian Quarter, Jewish Quarter. Den poder di Company for the Reconstruction of the Jewish Quarter in the Old City of Jerusalem, Ltd