Keda Leu for di Adoracion Falso!

“‘Sali for di meimei di nan y separa boso mes’, SEÑOR ta bisa. ‘Y no mishi cu loke ta impuro.’”—2 CORINTIONAN 6:17.

1. Den ki condicion spiritual hopi hende sinsero ta haya nan mes?

HOPI hende sinsero no sa e berdad tocante Dios y e futuro di humanidad. Como cu nan no a haya contesta pa nan preguntanan spiritual di mas profundo, nan ta biba den confusion y incertidumbre. Miyones di nan ta catibo di supersticion-, rito- y celebracionnan cu ta ofende nos Creador. Probablemente bo tin biciña y famia cu ta kere den un fierno di candela, un Dios cu ta consisti di tres persona, alma inmortal of cualkier otro siñansa falso.

2. Kico lidernan religioso a haci, y cu ki resultado?

² Kico ta responsabel pa e ignorancia spiritual aki cu ta reina tur caminda? Pa straño cu por parce, ta religion ta responsabel. Spesificamente, e organisacionnan y lidernan religioso cu a siña hende ideanan contrario na e pensamentonan di Dios. (Marco 7:7, 8) Como resultado, hopi hende a ser engaña y ta kere cu nan ta adora e Dios berdadero, mientras cu en realidad ta ofende nan ta ofende Dios. Religion falso ta directamente responsabel pa e situacion tristo aki.

3. Ken ta e promotor principal di religion falso, y con Bijbel ta describie?

³ Tin un persona invisibel ta respalda religion falso. Referiendo na e persona ei apostel Pablo a bisa: “E dios di e mundo aki a ciega mente di esnan cu no ta kere, pa nan no mira e lus di e evangelio di e gloria di Cristo, kende ta e imagen di Dios.” (2 Corintionan 4:4) “E dios di e mundo aki” no ta ningun otro sino Satanas e Diabel. E ta e promotor principal di adoracion falso. Pablo a skirbi: “Satanas mes ta disfrasa su mes como un angel di lus. Pesei no ta nada straño si su sirbidonan tambe ta disfrasa nan mes como sirbidonan di husticia.” (2 Corintionan 11:14, 15) Satanas ta laga cos malo parce bon y ta gaña hende pa kere mentira.

4. Kico Dios su Lei duna na Israel di antiguedad a bisa tocante profetanan falso?

⁴ Ta pesei Bijbel ta condena religion falso cu tanto firmesa asina! Por ehempel, e Lei di Moises spesificamente a spierta Dios su pueblo scohi pa tene cuidou cu profetanan falso. Ken cu a promove siñansa falso y adoracion di diosnan falso mester a ‘wordo mata pasobra el a conseha rebelion contra Yehova.’ E Israelitanan a haya e mandamento pa ‘kita maldad for di meimei di nan.’ (Deuteronomio 13:1-5) Si, Yehova ta considera religion falso como maldad.—Ezekiel 13:3.

5. Ki spiertamentonan nos mester haci caso di dje awe?

⁵ Yehova ta masha contra di religion falso, y Hesucristo y su apostelnan a refleha e mesun actitud ei. Hesus a spierta su disipelnan: “Tene cuidou cu profeta falso, cu ta bin serca boso bisti manera carne, ma di paden nan ta lobo hambra.” (Mateo 7:15; Marco 13:22, 23) Pablo a skirbi cu “e furia di Dios ta keda revela for di shelo contra tur impiedad y inhusticia di hende cu ta oprimi e berdad.” (Romanonan 1:18) Ta masha importante anto pa cristiannan berdadero haci caso di e  spiertamentonan aki y keda leu for di ken cu ta sconde e Palabra di Dios of cu ta plama siñansa falso!—1 Huan 4:1.

Sali for di ‘Babilonia e Grandi’

6. Con Bijbel ta describi ‘Babilonia e Grandi’?

⁶ Wak con e buki biblico di Revelacion ta describi religion falso. E ta pint’e como un prostituta burachi cu tin poder riba hopi reino y nan pueblo. E mohe simbolico aki ta comete fornicacion cu hopi rei y ta burachi di e sanger di Dios su adoradonan berdadero. (Revelacion 17:1, 2, 6, 18) E tin un nomber skirbi riba su frenta cu ta cuadra cu su comportacion sushi y repugnante. E nomber ta “E Gran Babilonia, mama di prostitutanan y di e abominacionnan di tera.”—Revelacion 17:5.

7, 8. Con religion falso a prostitui su mes, y cu ki resultado?

⁷ E descripcion biblico di Babilonia e Grandi apropiadamente ta referi na tur religion falso. Aunke e miles di religionnan no ta formalmente uni como un solo organisacion mundial, nan ta inseparablemente uni den proposito y accion. Mescos cu e mohe inmoral describi den Revelacion, religion falso tin un influencia masha grandi riba gobiernonan. Religion falso ta mescos cu un mohe cu no ta fiel na su promesa matrimonial, pasobra el a prostitui su mes door di sera aliansa cu masha hopi gobierno politico. Disipel Santiago a skirbi: “Boso, adulteranan, boso no sa cu amistad cu mundo ta enemistad pa cu Dios? Pesei, ken cu kier ta amigo di mundo ta haci su mes enemigo di Dios.”—Santiago 4:4.

⁸ E metemento di religion falso den gobierno a resulta den hopi sufrimento humano. Dr. Xolela Mangcu, un analista politico Africano, a bisa cu “historia di mundo tin hopi ehempel di matansanan masal causa door di combina religion cu politica.” Resientemente un corant a declara: “E disputanan di mas sangriento y peligroso awe . . . ta estrechamente mara na religion.” Miyones di hende a muri den conflictonan respalda door di religion. Babilonia e Grandi asta a persigui y mata Dios su sirbidonan berdadero, y na moda di papia a bira burachi di nan sanger.—Revelacion 18:24.

9. Con Yehova su odio pa adoracion falso ta ser expresa den e buki di Revelacion?

⁹ Loke ta bai sosode cu Babilonia e Grandi ta laga nos mira bon cla cu Yehova ta odia adoracion falso. Revelacion 17:16 ta declara: “E dies cachonan cu bo a mira, y e bestia, esakinan lo odia e prostituta y lo hacie desola y sunu, y lo come su carni y lo kim’e completamente cu candela.” Pues prome, un bestia inmenso lo habrac’e mata y come su carni. Anto caba, loke sea cu  sobra di dje lo ser kima completamente. Di acuerdo cu esei, pronto e gobiernonan di mundo lo tuma tal accion contra religion falso. Dios lo pone nan haci esei. (Revelacion 17:17) Babilonia e Grandi, e imperio mundial di religion falso, ta destina pa destruccion. “Lo [e] no wordo haya nunca mas.”—Revelacion 18:21.

10. Kico lo mester ta nos posicion pa cu religion falso?

¹⁰ Ki posicion adoradonan berdadero lo mester tuma relaciona cu Babilonia e Grandi? Cu palabra cla Bijbel ta manda: “Sali for di dje, mi pueblo, pa bo no participa den su picanan y pa bo no ricibi di su plaganan.” (Revelacion 18:4) Esnan cu kier salba mester sali for di religion falso prome cu ta mucho laat. Tempo cu Hesucristo tawata riba tera, el a profetisa cu den e ultimo dianan hopi hende lo a djis pretende di ta su siguido. (Mateo 24:3-5) Hesus ta bisa e tipo di personanan ei: “Nunca mi no a conoce boso; bai for di mi, boso cu ta haci inikidad.” (Mateo 7:23) Hesucristo, cu awor ta Rei entronisa, no tin nada di aber cu religion falso.

Keda Leu—Con?

11. Kico nos mester haci pa keda leu for di adoracion falso?

¹¹ Cristiannan berdadero ta keda leu for di adoracion falso y ta rechasa siñansanan religioso falso. Esaki ta nifica cu nos no ta scucha ni wak programanan religioso na radio ni television ni tampoco ta lesa literatura religioso cu ta siña mentira tocante Dios y su Palabra. (Salmo 119:37) Tambe lo ta sabi pa nos no asisti na actividadnan social y di recreo patrocina door di cualkier organisacion conecta cu religion falso. Ademas, nos no ta sostene adoracion falso den ningun manera. (1 Corintionan 10:21) Door di evita e cosnan aki, nos ta proteha nos mes di ser cohi “preso door di filosofia y engaño vano, segun tradicion di hende, segun e principionan elemental di mundo, y no segun Cristo.”—Colosensenan 2:8.

12. Con un persona por libra su mes di tur conexion cu organisacionnan religioso falso?

¹² Kico si un persona cu ta desea di bira un Testigo di Yehova ta actualmente registra como miembro di un religion falso? Den mayoria caso, un carta di renuncia lo sirbi como prueba cu un persona no kier ser considera mas como miembro di un religion falso. Ta specialmente importante pa e persona tuma accion decisivo pa evita di ser  contamina door di adoracion falso. E accionnan di un persona cu kier bira Testigo mester mustra bon cla na e organisacion religioso y na observadonan en general cu el a termina cu e afiliacion religioso ei.

13. Ki conseho Bijbel ta duna relaciona cu e necesidad di keda leu for di adoracion falso?

¹³ Apostel Pablo a skirbi: “No uni boso mes den yugo desigual cu incredulonan, pasobra ki compañerismo husticia tin cu inhusticia, y ki comunion lus tin cu scuridad? Of ki harmonia Cristo tin cu Belial, of kico un creyente tin comun cu un incredulo? Of ki combenio e tempel di Dios tin cu idolo? . . . ‘Pesei, sali for di meimei di nan y separa boso mes’, SEÑOR ta bisa. ‘Y no mishi cu loke ta impuro.’” (2 Corintionan 6:14-17) Nos ta haci caso di e palabranan aki door di keda leu for di adoracion falso. Pero Pablo su conseho ta rekeri pa nos keda leu tambe di adoradonan falso?

“Comporta Boso cu Sabiduria”

14. Nos mester evita tur contacto cu hende cu ta participa den adoracion falso? Splica.

¹⁴ Acaso adoradonan berdadero mester evita tur contacto cu hende cu ta participa den adoracion falso? Nos mester tene nos mes completamente separa for di esnan cu no ta comparti nos fe? E contesta ta no. Di e dos mandamentonan di mas grandi, esun di dos ta declara: “Stima bo prohimo manera bo mes.” (Mateo 22:39) Nos sigur ta demostra amor na nos prohimo ora cu nos ta comparti cu nan e bon nobo di e Reino. Tambe nos ta demostra amor na nan ora cu nos ta studia Bijbel cu nan y ta haci nan conciente di e necesidad di keda leu for di adoracion falso.

15. Kico ‘no ser parti di mundo’ ta nifica?

¹⁵ Apesar cu nos ta predica e bon nobo na nos prohimo, como siguidonan di Hesus nos ‘no ta parti di mundo.’ (Huan 15:19) E expresion “mundo” ta referi aki na sosiedad humano aleha for di Dios. (Efesionan 4:17-19; 1 Huan 5:19) Nos ta keda separa di mundo den e sentido cu nos ta evita actitudnan, abla y conducta cu ta ofende Yehova. (1 Huan 2:15-17) Ademas, na harmonia cu e principio cu “mal compania ta daña bon custumber”, nos ta evita di tin amistad cu hende cu no ta biba segun normanan cristian. (1 Corintionan 15:33) No ser parti di mundo ta nifica “conserva bo mes liber di mancha di mundo.” (Santiago 1:27) Pues anto, ser separa di mundo no ta nifica cu fisicamente nos ta evita tur contacto cu otro hende.—Huan 17:15, 16; 1 Corintionan 5:9, 10.

16, 17. Con cristiannan mester trata hende cu no conoce berdad biblico?

¹⁶ Con anto nos tin cu trata e hendenan cu no conoce berdadnan biblico? Pablo a skirbi na e congregacion di Colosas: “Comporta boso cu sabiduria pa cu esnan di pafo, haciendo bon uzo di e oportunidad. Laga boso palabranan ta semper cu gracia, sasona cu salo, pa boso por sa con boso mester contesta cada persona.” (Colosensenan 4:5, 6) Apostel Pedro a skirbi: “Santifica Cristo como Señor den boso curason, y sea semper dispuesto pa duna contesta na cada un cu pidi boso pa duna cuenta di e speransa cu tin den boso, sinembargo cu suavidad y reverencia [of, “respet profundo”, NW].” (1 Pedro 3:15) Pablo a conseha cristiannan “pa no calumnia ningun hende, pa no ta  pleitado, ma suave, mustrando tur consideracion pa tur hende.”—Tito 3:2.

¹⁷ Como Testigo di Yehova, nos ta evita di ta bruto of arogante cu otro hende. Definitivamente nos no ta uza palabranan ofensivo pa describi hende di otro religion. Mas bien, nos ta uza tacto, asta ora e doño di cas, biciña of colega no ta bondadoso of ta uza palabranan ofensivo.—Colosensenan 4:6; 2 Timoteo 2:24.

“Retene e Ehempel di Palabranan Sano”

18. Personanan cu bai bek na adoracion falso ta experencia ki condicion spiritual deplorabel?

¹⁸ Despues cu un hende a siña e berdadnan biblico, lo ta hopi lamentabel si e mester bai bek na adoracion falso! Bijbel ta describi e consecuencianan lamentabel di esei ora e ta bisa: “Pasobra si despues cu nan a scapa di e contaminacionnan di mundo pa medio di e conocemento di e Señor y Salbador Hesucristo, nan bolbe wordo envolvi den nan y wordo venci, e ultimo estado a bira piyo pa nan cu esun di prome. . . . A sosode cu nan conforme e proverbio berdadero: ‘Un cacho ta bolbe na su mes saca’, y ‘Un porco, despues di a wordo baña, ta bolbe bai lora den lodo.’”—2 Pedro 2:20-22.

19. Dicon ta masha importante pa keda alerta pa cualkier cos cu por peligra nos spiritualidad?

¹⁹ Nos mester keda alerta pa cualkier cos cu por peligra nos spiritualidad. E peligernan t’ei constantemente! Apostel Pablo a spierta: “E spirito ta bisa claramente cu den e ultimo temponan algun lo cai for di fe, door di paga atencion na spiritonan engañoso y doctrinanan di demoñonan.” (1 Timoteo 4:1) Nos ta bibando den “e ultimo temponan.” Cristiannan cu no keda leu for di adoracion falso por ser “tira p’aki p’aya door di olanan, y hiba door di tur biento di doctrina, door di triki di hende, door di astucia den trahamento di plan engañoso.”—Efesionan 4:13, 14.

20. Con nos por proteha nos mes contra e influencia perhudicial di religion falso?

²⁰ Con nos por proteha nos mes contra e influencia perhudicial di religion falso? Pensa riba tur loke Yehova a percura. Nos tin e Palabra di Dios, e Bijbel. (2 Timoteo 3:16, 17) Tambe Yehova a percura cuminda spiritual na abundancia mediante “e esclabo fiel y prudente.” (Mateo 24:45) Segun cu nos ta progresa den e berdad, nos tin cu cultiva un smak pa ‘cuminda solido cu ta pa hende madura’ y un deseo di asisti na e reunionnan cristian caminda nos ta siña berdadnan biblico. (Hebreonan 5:13, 14; Salmo 26:8) Laga nos ta determina pa probecha plenamente di tur loke Yehova ta percura pa nos di manera cu nos por “retene e ehempel di palabranan sano” cu nos a tende. (2 Timoteo 1:13) Di e manera ei nos por keda leu for di adoracion falso.

Kico Bo A Siña?

• Kico ‘Babilonia e Grandi’ ta?

• Kico nos tin cu haci pa keda leu for di religion falso?

• Kico nos mester evita cu ta un peliger pa nos spiritualidad?

[Preguntanan di Estudio]

[Plachi na pagina 28]

Bo sa dicon Bijbel ta describi ‘Babilonia e Grandi’ como un mohe inmoral?

[Plachi na pagina 29]

‘Babilonia e Grandi’ ta destina pa destruccion

[Plachi na pagina 31]

Nos ta demostra ‘suavidad y respet profundo’ na hende cu no ta comparti nos creencianan