E Palabra di Yehova Ta Bibo

Puntonan Sobresaliente di e Buki di Nehemias

DIESDOS aña a pasa desde cu e susesonan cu tin para skirbi den e conclusion di e buki biblico di Esdras a tuma luga. Tawata casi tempo pa ‘e ordo wordo duna pa restaura y reconstrui Herusalem.’ Esaki lo a marca comienso di e 70 simannan di aña cu lo a hiba te na e Mesias. (Daniel 9:24-27) E buki di Nehemias ta un historia di Dios su pueblo relaciona cu e reconstruccion di e muraya di Herusalem. E ta abarca un periodo crucial di mas cu 12 aña, for di aña 456 te poco despues di 443 prome cu nos era (P.E.C.).

Gobernado Nehemias a skirbi e buki aki, y e ta un relato emocionante cu ta mustra con adoracion berdadero ta ser eleva ora cu combina accion decisivo cu pleno confiansa den Yehova Dios. E buki ta mustra bon cla con Yehova ta dirigi asuntonan pa percura cu su boluntad ta cumpli. E buki ta alabes e historia di un lider fuerte y cu curashi. E mensahe di e buki di Nehemias ta suministra lesnan balioso pa tur adorado berdadero djawe, “pasobra e palabra di Dios ta bibo y activo.”—Hebreonan 4:12.

PORFIN “E MURAYA A KEDA CLA”

(Nehemias 1:1–6:19)

Nehemias ta na e citadel of kasteel di Susa, sirbiendo rei Artaherhes Longimano den un puesto di confiansa. Nehemias ta keda profundamente perturba ora e tende e noticia cu su pueblo “ta den gran afliccion y reproche, y [cu] e muraya di Herusalem ta basha abou y su portanan ta kima cu candela.” E ta pidi Dios fervientemente den oracion pa gui’e. (Nehemias 1:3, 4) Cu tempo, e rei ta ripara Nehemias su tristesa, y Nehemias ta haya chens di bai Herusalem.

Ora Nehemias yega Herusalem, e ta bai inspecciona e muraya den anochi. Caba e ta revela na e Hudiunan su plan di reconstrui e muraya. Construccion ta cuminsa. Pero oposicion contra e trabou tambe ta cuminsa. Sinembargo, bou di Nehemias su liderato yen di curashi, porfin ‘e muraya ta keda cla.’—Nehemias 6:15.

Contesta Riba Pregunta Biblico:

1:1; 2:1—“E di binti aña” menciona den e dos versiculonan aki ta ser conta for di e mesun punto di referencia? Si, e di 20 aña ta di e reinado di rei Artaherhes. Sinembargo, e manera di conta cu a wordo uza den e versiculonan aki ta distinto for di otro. Evidencia historico ta señala aña 475 P.E.C. como e aña cu Artaherhes a subi trono. Siendo cu e escribanan di Babilonia tawatin e custumber di conta e añanan di e reinado di reinan di Persia di nisan (maart/april) pa nisan, Artaherhes su prome aña di reinado a cuminsa na nisan di aña 474. Pues, e di 20 aña di su reinado menciona na Nehemias 2:1 a cuminsa na nisan di aña 455. E luna di kisleu (november/december) menciona na Nehemias 1:1 logicamente tawata kisleu di e aña anterior, esta, aña 456 P.E.C. Nehemias ta bisa cu e luna ei tambe a cai den e di 20 aña di Artaherhes su reinado. Podise den e caso aki, el a conta e añanan for di e fecha cu e monarca a subi trono. Un otro posibilidad ta cu Nehemias a conta tempo segun  loke Hudiunan djawe ta yama un aña civil, cu ta cuminsa den e luna di tishri, cu ta coresponde cu september/october. En todo caso, e aña cu e ordo of palabra a sali pa reconstrui Herusalem tawata aña 455 P.E.C.

4:17, 18—Con un homber por a haci trabou di reconstruccion cu un man so? Pa e cargadonan di carga esaki lo no tawata un problema. Unabes nan a pone e carga riba nan cabes of scouder, nan por a ten’e facilmente den balansa cu un solo man mientras cu “den e otro man nan tawatin un arma teni.” E trahadonan cu tawatin mester di ambos man pa haci nan trabou ‘tawatin nan spada faha na nan heup segun cu nan tawata traha.’ Nan tawata cla pa drenta den accion si acaso enemigo ataca nan.

5:7—Pakico Nehemias a “acusa e noblenan y e gobernantenan”? E hombernan aki tawata exigi interes for di nan compañeronan Hudiu locual tawata un violacion di e Lei di Moises. (Levitico 25:36; Deuteronomio 23:19) Ademas, e dunadonan di fiansa aki tawata exigi interes halto. Si nan a exigi esei mensualmente, anto pa aña “e di shen parti” lo a suma 12 porshento. (Nehemias 5:11) Tawata un cos cruel pa impone esaki riba un pueblo cu ya caba tawata carga cu e peso di belasting y scarsedad di cuminda. Pues haciendo uzo di e Lei di Dios, Nehemias a reprende nan y asina a expone nan malecho.

6:5—Siendo cu normalmente cartanan confidencial a ser poni den un saco seya, dicon Sanbalat a manda “un carta habri” pa Nehemias? Kisas Sanbalat su intencion tawata pa laga tur hende sa di e acusacionnan falso door di manda nan den un carta habri. Podise el a spera cu esaki lo a pone Nehemias rabia asina tanto cu lo el a bandona e sitio di construccion y bin defende su mes. Of Sanbalat kisas a pensa cu e contenido di e carta lo a alarma e Hudiunan asina tanto cu nan lo a para nan trabou di construccion. Pero Nehemias a nenga di ser intimida y trankilamente a sigui cu e trabou cu Dios a asign’e.

Les pa Nos:

1:4; 2:4; 4:4, 5. Ora nos ta confronta situacionnan dificil of ora di tuma decisionnan importante, nos mester “haci oracion sin stop” y actua na harmonia cu guia teocratico, es decir, e guia cu nos ta haya den Dios su palabra of mediante su organisacion.—1 Tesalonicensenan 5:17.

1:11–2:8; 4:4, 5, 15, 16; 6:16. Yehova ta contesta e oracionnan sinsero di su sirbidonan.—Salmo 86:6, 7.

1:4; 4:19, 20; 6:3, 15. Nehemias tawata un homber cu tawatin compasion, pero alabes el a pone un excelente ehempel como un homber di accion cu a para firme na fabor di husticia.

1:11–2:3. Nehemias su fuente principal di goso no tawata su puesto prestigioso como copero. Mas bien, su goso tawata den promove e adelanto di adoracion berdadero. Den nos caso tambe, no ta e adoracion di Yehova y tur loke cu ta causa e adelanto di e adoracion aki mester ta nos mayor interes y fuente principal di goso?

2:4-8. Yehova a pone Artaherhes duna Nehemias permit pa bai y reconstrui e muraya di Herusalem. Proverbionan 21:1 ta bisa: “Manera riunan di awa, asina curason di rei ta den e man di SEÑOR; e ta bir’e pa unda cu e kier.”

 3:5, 27. Nos no mester mira trabou manual haci na fabor di adoracion berdadero como algo bou di nos nivel, manera tawata e caso cu e “noblenan” di e Tekoitanan. Mas bien, nos por imita e Tekoitanan comun y coriente cu di buena gana a traha diligentemente.

3:10, 23, 28-30. Tin algun ruman cu por muda bai caminda tin mas necesidad di proclamado di Reino, pero hopi di nos ta sostene adoracion berdadero pega cu nos cas. Nos por haci esei door di participa den construccion di Salon di Reino y den trabou di rindi yudansa despues di desaster, pero principalmente door di participa den e predicacion di Reino.

4:14. Ora nos ta confronta oposicion, nos tambe por vence miedo door di tene Yehova na mente, “kende ta grandi y temibel.”

5:14-19. Pa superintendentenan cristian, gobernado Nehemias ta un excelente ehempel di un persona humilde, abnega y discreto. Aunke e tawata celoso pa pone e Lei di Dios na vigor, e no a domina otro hende pa haya ganashi egoista. Al contrario, el a mustra precupacion pa hende oprimi y pa esnan pober. Den mustramento di generosidad, Nehemias ta un ehempel sobresaliente pa tur sirbido di Dios.

“CORDA DI MI, O MI DIOS, PA BON”

(Nehemias 7:1–13:31)

Asina cu nan a termina e muraya di Herusalem, Nehemias ta pega e portanan y ta haci areglo pa proteha e stad. Caba e ta traha un registro di e liña di desendencia di e pueblo. Ora cu henter e pueblo a reuni “riba e plasa cu tawata keda dilanti di e Porta di Awa”, Esdras e sacerdote ta lesa e buki di Lei di Moises, y Nehemias y e Levitanan ta splica e Lei na e pueblo. (Nehemias 8:1) Ora nan ta haya sa tocante e Fiesta di Ramada (of, Fiesta di Tabernakelnan), nan ta bai celebr’e cu alegria.

Despues ta sigui un otro reunion, durante cua “e desendientenan di Israel” ta confesa e picanan di e nacion, e Levitanan ta repasa Dios su trato cu Israel, anto e pueblo ta hura cu nan lo “cana den e lei di Dios.” (Nehemias 9:1, 2; 10:29) Siendo cu ainda tin mucho tiki habitante den Herusalem, nan ta tira lot pa laga 1 di cada 10 homber cu ta biba pafo di e stad bin biba den e stad. Siguientemente, nan ta inaugura e muraya cu asina un entusiasmo cu “por a tende e goso di Herusalem for di leu.” (Nehemias 12:43) Diesdos aña despues di su yegada, Nehemias ta bandona Herusalem pa bai cumpli cu su debernan serca Artaherhes. Pero no ta tarda hopi cu cosnan impuro ta bolbe lanta cabes entre e Hudiunan. Ora cu Nehemias regresa Herusalem, e ta tuma accion decisivo pa corigi e situacion. Pa su mes, e ta haci e peticion humilde aki: “Corda di mi, o mi Dios, pa bon.”—Nehemias 13:31.

Contesta Riba Pregunta Biblico:

7:6-67—Dicon e lista cu Nehemias a traha di e resto cu a regresa Herusalem hunto cu Zorobabel ta otro for di e lista di Esdras pa loke ta trata e cifranan individual pa cada cas di famia? (Esdras 2:1-65) E motibo pa e variacionnan aki por ta cu Esdras y Nehemias cada un a uza un otro fuente di informacion. Por ehempel, e cantidad di esnan cu a skirbi nomber pa bolbe por ta distinto for di e cantidad cu di berdad a bolbe. E dos registronan por tawata distinto di otro tambe pasobra algun Hudiu cu na principio no por a establece nan liña di desendencia,  cu tempo a logra hacie. Sinembargo, ambos relato ta di acuerdo riba un punto: E cantidad total di persona cu inicialmente a regresa tawata 42.360, fuera di e catibonan y cantantenan.

10:34—Dicon e pueblo mester a suministra palo? E Lei di Moises no a manda pa duna ofrenda di palo. E rekisito aki a origina strictamente debi na necesidad. Tawatin mester di cantidadnan grandi di palo pa por kima sacrificio riba altar. Aparentemente no tawatin suficiente sirbido di tempel no Israelita (“netineo”, NW). Pesei nan a tira lot pa haci sigur cu lo tawatin un suministro continuo di palo.

13:6—Pa cuanto tempo Nehemias tawata ausente for di Herusalem? Bijbel ta bisa solamente cu “despues di algun tempo”, of literalmente “na final di e dianan”, Nehemias a pidi rei permit pa e por regresa Herusalem. Pesei, ta imposibel pa determina e largura di su ausencia. Pero ora cu Nehemias a bolbe Herusalem, el a tuma nota cu e Hudiunan no tawata sostene e sacerdocio ni nan no tawata warda e lei di sabat. Hopi di nan a tuma esposa stranhero, y nan yiunan ni sikiera por a papia e idioma di e Hudiunan. Pa e situacion por a bai asina hopi atras, Nehemias mester tawata ausente pa un tempo basta largo.

13:25, 28—Nehemias a “pleita” cu e Hudiunan cu a bolbe bai den mal caminda [of, ‘a mustra nan riba nan foutnan’, NW]. Ki otro medidanan di coreccion mas Nehemias a tuma? Nehemias a “maldiciona nan” den e sentido cu el a declara contra nan e huicionan adverso cu tawatin den e Lei di Dios. El a “dal algun di nan”, podise door di duna ordo pa tuma accion hudicial contra nan. Como un simbolo di su indignacion moral, el a “ranca nan cabei.” Tambe el a core cu e nieto di sumo sacerdote Eliasib, kende a casa cu un yiu mohe di Sanbalat e Horonita.

Les pa Nos:

8:8. Como maestronan di e Palabra di Dios, nos ta ‘duna nificacion’ na dje door di les’e uzando bon pronunciacion y enfasis y door di splica e textonan biblico corectamente, mustrando bon cla con nan ta aplica.

8:10. ‘E goso di Yehova’ ta bin door di ser conciente di bo necesidad spiritual anto satisface esei, y door di sigui guia teocratico. Ta masha importante anto pa nos studia Bijbel diligentemente, asisti na reunionnan cristian regularmente y participa cu entusiasmo den e predicacion di Reino y e trabou di haci disipel.

11:2. Pa un hende bandona su herencia y bai biba den Herusalem a encera gasto personal y algun desbentaha. E Hudiunan cu a ofrece pa haci esaki a demostra e actitud di ta dispuesto pa haci sacrificio personal. Nos tambe por demostra e actitud ei ora oportunidadnan presenta caminda nos por ofrece nos servicio na fabor di otro hende na congreso y tambe na otro ocasionnan.

12:31, 38, 40-42. Cantamento ta un excelente manera pa alaba Yehova y expresa nos gratitud na dje. Nos mester canta di henter nos curason na reunionnan cristian.

13:4-31. Nos mester tene cuidou pa no laga materialismo, corupcion y apostasia infiltra den nos bida.

13:22. Nehemias tawata bon conciente di e echo cu e mester rindi cuenta na Dios. Nos tambe mester ta conciente cu nos tin cu rindi cuenta na Yehova.

Yehova Su Bendicion Mester T’ei!

E salmista a canta: “Si SEÑOR no traha e cas, ta en vano esnan cu ta trah’e ta traha cansa curpa.” (Salmo 127:1) E buki di Nehemias ta ilustra e berdad di e palabranan ei na un manera masha bunita!

E les pa nos ta hopi cla. Si nos kier tin exito den cualkier actividad cu nos ta bai haci, nos mester tin Yehova su bendicion. Acaso nos por realmente spera cu Yehova lo bendiciona nos a menos cu nos ta duna adoracion berdadero e prome luga den nos bida? Pues anto, mescos cu Nehemias, laga nos haci Yehova su adoracion y e adelanto di e adoracion ei nos interes principal.

[Plachi na pagina 8]

‘Manera riunan di awa, asina curason di rei ta den e man di Yehova’

[Plachi na pagina 9]

Nehemias—un homber di accion y compasion—ta bin Herusalem

[Plachi na pagina 10,11]

Abo sa con pa ‘duna nificacion’ na e Palabra di Dios?