Imita Yehova Su Pasenshi

‘Yehova no ta tarda cu su promesa ... ma e tin pasenshi.’—2 PEDRO 3:9.

1. Ki regalo incomparabel Yehova a ofrece hende?

YEHOVA a ofrece nos algo cu ningun otro hende no por ofrece nos. Algo sumamente atractivo y balioso, sinembargo no ta un cos cu nos por cumpra ni traha pa gan’e. Loke e ta ofrece nos ta e regalo di bida eterno, locual pa mayoria di nos ta nifica biba pa semper riba un tera transforma den un paradijs. (Huan 3:16) Ki un delicia esei lo ta! E cosnan cu ta causa asina tanto tristesa lo no t’ei mas, esta, conflicto, violencia, pobresa, criminalidad, malesa y asta morto. Hende lo biba den pas y union perfecto bou di e gobernacion amoroso di e Reino di Dios. Nos ta anhela e Paradijs ei sin fin!—Isaias 9:6, 7; Revelacion 21:4, 5.

2. Dicon Yehova no a elimina e mundo di Satanas ainda?

² Yehova tambe ta spera ansiosamente riba e tempo cu lo e establece Paradijs riba tera. Esei ta asina pasobra Yehova ta stima husticia y rectitud. (Salmo 33:5) E no tin ningun goso den mira un mundo indiferente of cu ta contra di su principionan husto, un mundo cu ta rechasa su autoridad y ta persigui su pueblo. Sinembargo, tin motibonan valido pakico e no a actua ainda pa elimina e mundo malbado di Satanas. E motibonan ei ta encera cuestionnan moral cu tin di aber cu su soberania. Yehova, den su manera di resolve e cuestionnan aki, a desplega un cualidad cu ta atrae nos na dje, un cualidad cu awe hopi hende no tin, esta, pasenshi.

3. (a) Kico ta nificacion di e palabranan Griego y Hebreo traduci como “pasenshi” den Bijbel? (b) Ki preguntanan nos lo bai considera?

³ Tin un palabra Griego den Bijbel cu literalmente ta nifica “largura di spirito of di estado emocional” y pues cu frecuencia e ta ser traduci tambe como “gran pasenshi” y “pasenshi.” Un parti integral di e palabra “pasenshi” tanto na Griego como na Hebreo ta encera e idea di tolerancia y tarda pa rabia. Con Yehova su pasenshi ta beneficia nos? Ki lesnan nos por siña for di e pasenshi y perseverancia di Yehova y di su sirbidonan fiel? Con nos sa cu Yehova su pasenshi tin limite? Laga nos mira.

Considera Yehova Su Pasenshi

4. Kico apostel Pedro a skirbi relaciona cu Yehova su pasenshi?

⁴ Apostel Pedro a skirbi relaciona cu Yehova su pasenshi: “No laga di ripara esun echo aki, stimanan, cu pa Señor un dia ta mescos cu mil aña, y mil aña mescos cu un dia. Señor no ta tarda cu su promesa manera algun tin esaki pa tardansa, ma e tin pasenshi pa cu boso, y no kier pa ningun hende bai perdi, ma pa tur bin na repentimento.” (2 Pedro 3:8, 9) Tuma nota di dos punto cu a wordo expresa den e versiculonan aki cu por yuda nos compronde Yehova su pasenshi.

5. Con Yehova su punto di bista di tempo ta influencia loke e ta haci?

⁵ E prome punto ta cu Yehova no ta mira tempo manera nos ta mir’e. Pa Esun cu ta biba pa semper, mil aña ta manera un dia. E no ta ser controla of presiona door di tempo, pero e no ta slow pa actua tampoco. Yehova su sabiduria no tin limite, pues e sa precisamente cua ta e mihor tempo pa actua na beneficio di tur esnan envolvi, y cu pasenshi e ta warda pa e dia ei yega. Sinembargo, nos no mester conclui cu Yehova no tin cu nes cu e sufrimento cu su sirbidonan kisas ta  experencia durante e tempo cu e ta warda pa actua. E ta un Dios di “misericordia tierno”, e personificacion di amor. (Lucas 1:78; 1 Huan 4:8) E tin e poder pa deshaci, completamente y permanentemente, di tur daño causa pa e sufrimento temporal cu el a permiti.—Salmo 37:10.

6. Kico nos no mester conclui tocante Dios, y dicon no?

⁶ Naturalmente no ta facil pa warda riba algo cu bo ta anhela. (Proverbionan 13:12) Pesei, ora hende no ta cumpli umbes cu loke nan priminti, otro hende kisas ta conclui cu nan no tin intencion di cumpli cu nan promesa. Lo no ta sabi pa pensa esei di Dios! Si nos ekibocadamente ta mira Dios su pasenshi como tardansa, e ora ei segun cu tempo ta pasa nos facilmente por cuminsa duda y bira desanima, y nos ta core e riesgo di bira spiritualmente floho. Loke por ta asta piyo ta cu nos por ser engaña door di esnan cu anteriormente Pedro a spierta pa tene cuidou cu nan, esta, bofonadonan of hende sin fe. E personanan ei ta bisa na forma di bofon: “Unda e promesa di su binida ta? Pasobra desde cu e tatanan a muri, tur cos ta keda mescos cu nan tawata for di principio di creacion.”—2 Pedro 3:4.

7. Con Yehova su pasenshi ta conecta cu su deseo pa hende repenti?

⁷ Un di dos punto cu nos por saca for di e palabranan di Pedro ta cu Yehova tin pasenshi pasobra e kier pa tur hende bin na repentimento. Esnan cu di un manera cabesura ta nenga di bira for di nan mal camindanan lo ser ehecuta na man di Yehova. Sinembargo, Dios no tin placer den e morto di e malbado. Mas bien, e ta alegra pa mira hende repenti, bira bek for di nan mal camindanan y sigui biba. (Ezekiel 33:11) Ta pesei e tin pasenshi y ta manda su sirbidonan bai predica e bon nobo den henter e tera, di manera cu hende por haya tur oportunidad pa sigui biba.

8. Con Dios su pasenshi ta bisto den su trato cu e nacion di Israel?

⁸ E pasenshi di Dios ta bisto tambe den su trato cu e antiguo nacion di Israel. Pa siglonan largo el a soporta nan desobediencia. Pa medio di su profetanan, el a urgi e nacion bes tras bes: “Bira for di boso mal camindanan y warda mi mandamentonan, mi statutonan, conforme henter e lei cu mi a ordena boso tatanan, y cu mi a manda pa boso pa medio di mi sirbidonan, e profetanan.” Cu ki resultado?  Lamentablemente, “nan no a scucha.”—2 Reinan 17:13, 14.

9. Con Hesus su pasenshi a refleha e pasenshi di su Tata?

⁹ Por ultimo, Yehova a manda su Yiu, kende a haci tur su posibel pa purba combence e Hudiunan cu nan mester reconsilia nan mes cu Dios. Hesus su pasenshi a refleha perfectamente e pasenshi di su Tata. Hesus, sabiendo cu djis nan lo a mat’e, toch a lamenta: “O Herusalem, Herusalem, abo cu ta mata e profetanan y ta piedra esnan cu ta wordo manda serca dje! Cuanto biaha mi no tawata kier a hunta bo yiunan, manera un galiña ta hunta su puyitonan bou di su halanan, y boso no tawata kier.” (Mateo 23:37) E palabranan conmovedor aki no ta palabranan di un hues masha severo cu ta ansioso pa castiga hende, sino mas bien palabranan di un amigo amoroso cu tin pasenshi cu hende. Hesus, mescos cu su Tata den shelo, tawata kier pa e hendenan repenti y asina scapa huicio desfaborabel. Algun di nan a reacciona faborablemente riba e spiertamentonan di Hesus y a scapa e huicio teribel cu a bin riba Herusalem na aña 70 di nos era.—Lucas 21:20-22.

10. Den ki manera Dios su pasenshi a beneficia nos?

¹⁰ Dios su pasenshi no ta un cos realmente maraviyoso? Apesar di e magnitud di desobediencia humano, Yehova a duna cada un di nos, hunto cu miyones di otro hende, e oportunidad pa siña conoc’e y acepta e speransa di salbacion. Pesei Pedro a skirbi e rumannan cristian: “Considera e pasenshi di nos Señor como salbacion.” (2 Pedro 3:15) Nos no ta gradicido cu Yehova su pasenshi a duna nos e oportunidad pa haya e caminda di salbacion? Nos ta pidie den oracion pa e sigui tene pasenshi cu nos segun cu nos ta sirbie cada dia?—Mateo 6:12.

11. Un comprondemento di Yehova su pasenshi lo motiva nos pa haci kico?

¹¹ Unabes nos compronde dicon Yehova ta tene pasenshi, esei ta yuda nos warda cu pasenshi riba e salbacion cu lo e trece. Nunca nos lo conclui cu e ta tarda pa cumpli cu su promesanan. (Lamentacion 3:26) Segun cu nos ta sigui pidi den oracion pa e Reino di Dios bin, nos ta confia cu Dios sa cua ta e mihor tempo pa contesta e oracion ei. Ademas, nos ta sinti nos motiva pa imita Yehova door di mustra mesun pasenshi cu ne den nos trato cu nos rumannan y cu e hendenan cu nos ta predica na dje. Nos tampoco no kier pa ningun bai destrui sino mas bien ta desea pa nan repenti y comparti nos speransa di bida eterno.—1 Timoteo 2:3, 4.

Considera e Pasenshi di e Profetanan

12, 13. Di acuerdo cu Santiago 5:10, con profeta Isaias a demostra gran pasenshi?

¹² Un analisis di Yehova su pasenshi ta yuda nos aprecia e cualidad ei y alabes cultiv’e. No ta facil pa hende imperfecto cultiva pasenshi, pero e ta posibel. Nos ta siña for di e sirbidonan di Dios di pasado. Disipel Santiago a skirbi: “Rumannan, tuma e profetanan cu a papia den e nomber di Señor como un ehempel di sufrimento y di pasenshi.” (Santiago 5:10) Ta un consuelo y animacion pa sa cu otro hende a enfrenta cu exito e problemanan cu nos tin cu enfrenta.

¹³ Por ehempel, profeta Isaias definitivamente tawatin mester di pasenshi den su asignacion. Yehova a indica esei na dje bisando: “Bai, y bisa e pueblo aki: ‘Sigui scucha, ma no compronde; sigui mira, ma no ripara.’ Haci curason di e pueblo aki insensitivo, haci nan horea sordo y nan wowo scur, pa nan no mira cu nan wowo, tende cu nan horea, compronde cu nan curason, y repenti y wordo cura.” (Isaias 6:9, 10) Apesar cu e pueblo tawata indiferente, Isaias cu pasenshi a sigui declara Yehova su mensahenan di spiertamento durante por lo menos 46 aña! Den mesun manera, pasenshi lo yuda nos persevera den nos trabou di predica e bon nobo, apesar cu hopi hende lo no acepta e bon nobo.

14, 15. Kico a yuda Yeremias trata cu contratiempo y desanimacion?

 ¹⁴ Claro cu segun cu e profetanan tawata cumpli cu nan ministerio, nan no solamente mester a trata cu hende indiferente; nan a asta sufri maltrato na e hendenan su man. Yeremias, por ehempel, nan a pone den sepa, ser’e den prizon y tambe tir’e den un rembak. (Yeremias 20:2; 37:15; 38:6) El a sufri e maltrato aki na man di net e hendenan cu e kier a yuda. Sinembargo, Yeremias no a bira amarga ni a tuma represaya. Cu pasenshi el a persevera durante varios decada.

¹⁵ Persecucion y bofon no a silencia Yeremias, y tampoco nan no ta silencia nos awe. Claro cu de bes en cuando nos por sinti nos desanima. Yeremias a sintie desanima. El a skirbi: “E palabra di SEÑOR a bira un reproche y bofon pa mi henter dia.” Anto Yeremias a bisa: “Lo mi no corda riba dje, ni papia mas den su nomber.” Kico a pasa e ora ei? Berdad Yeremias a stop di predica? El a sigui bisa: “Esei [e palabra di Dios] ta bira manera candela den mi curason, sera den mi wesonan; mi ta cansa di ten’e paden, y mi no por mas.” (Yeremias 20:8, 9) Tuma nota cu ora Yeremias a consentra riba e bofon cu hende a haci di dje, el a perde su goso. Ora el a bai medita riba con maraviyoso y importante e mensahe ta, el a haya su goso bek. Ademas, Yehova tawata cu Yeremias “manera un guerero poderoso”, dunand’e e fortalesa pa proclama e palabra di Dios cu celo y curashi.—Yeremias 20:11.

16. Con nos por mantene goso den nos trabou di predica e bon nobo?

¹⁶ Profeta Yeremias a haya goso den su trabou? Definitivamente cu si! El a bisa Yehova: “Bo palabranan a wordo haya y mi a come nan, y bo palabranan a bira un goso pa mi y e delicia di mi curason; pasobra mi a wordo yama na bo nomber, o SEÑOR.” (Yeremias 15:16) Yeremias a alegra den su privilegio di por a representa e Dios berdadero y predica su palabra. Nos tambe por alegra. Ademas, nos ta alegra, mescos cu e angelnan den shelo, ya cu mundialmente masha hopi hende ta acepta e mensahe di Reino, ta repenti y ta subi e caminda cu ta hiba na bida eterno.—Lucas 15:10.

“E Perseverancia di Job”

17, 18. Den ki manera Job a persevera, y kico tawata e resultado?

¹⁷ Despues di a comenta riba e profetanan di pasado, disipel Santiago a skirbi: “Boso a tende di e perseverancia di Job y a mira e fin cu Señor tawatin na bista, cu Señor ta yen di compasion y ta misericordioso.” (Santiago 5:11) E palabra Griego traduci akinan como “perseverancia” tin un nificacion similar na e palabra cu Santiago a uza den e versiculo anterior pa “pasenshi.” Señalando e diferencia entre e dos palabranan un erudito a skirbi: “Esun prome ta pasenshi ora cu hende ta abusa di nos, e ultimo ta e perseverancia yen di balentia bou di cosnan cu ta angustia nos.”

¹⁸ Job a experencia angustia profundo. El a sufri ruina financiero, e morto di su yiunan y un malesa doloroso. Tambe e mester a lucha cu e acusacion falso cu ta Yehova tawata castig’e.  Job no a sufri den silencio; el a lamenta su situacion y asta a bisa indirectamente cu e tawata mas husto cu Dios. (Job 35:2) Sinembargo, nunca el a perde fe ni tampoco kibra su integridad. E no a maldiciona Dios manera Satanas a bisa cu lo el a haci. (Job 1:11, 21) E resultado? Yehova “a bendiciona e ultimo dianan di Job mas cu e promenan.” (Job 42:12) Yehova a restaura Job su salud, haci su rikesa dobel y bendicion’e cu un bida felis y satisfecho hunto cu su sernan keri. Tambe Job su fiel perseverancia a yud’e compronde Yehova mas mihor.

19. Kico nos ta siña di e echo cu Job a persevera cu pasenshi?

¹⁹ Kico nos ta siña di e echo cu Job a persevera cu pasenshi? Mescos cu Job, nos tambe por sufri di malesa y otro dificultadnan. Kisas nos no ta compronde bon bon dicon Yehova ta permiti nos pasa door di un cierto prueba. Sinembargo, di un cos nos por ta sigur: Si nos keda fiel, nos lo ser bendiciona. Yehova, sin faya, ta recompensa esnan cu ta busc’e cu empeño. (Hebreonan 11:6) Hesus a bisa: “Esun cu a persevera te na fin lo ta salba.”—Mateo 10:22; 24:13.

‘E Dia di Yehova Lo Bin’

20. Dicon nos por tin sigur cu e dia di Yehova lo bin?

²⁰ Aunke Yehova ta tene pasenshi, e ta husto tambe y lo e no tolera maldad pa semper. Su pasenshi tin limite. Pedro a skirbi: “[Dios] no a spar e mundo antiguo.” Mientras cu Dios a preserva Noe y su famia, el a trece un diluvio riba e mundo di maldad ei. Yehova a trece huicio riba Sodoma y Gomora tambe y a destrui nan completamente. E huicionan aki ta “un ehempel” pa e malbadonan di loke lo bin den futuro. Di esaki nos por tin sigur: ‘E dia di Yehova lo bin.’—2 Pedro 2:5, 6; 3:10.

21. Con nos lo por demostra nos pasenshi y perseverancia, y ki topico nos lo considera den e siguiente articulo?

²¹ Pues anto, laga nos imita Yehova su pasenshi door di yuda otro hende bin na repentimento pa asina kisas nan por salba. Laga nos imita tambe e profetanan door di declara e bon nobo cu pasenshi apesar cu e hendenan cu nos ta predica na dje ta indiferente. Ademas, nos por tin sigur cu Yehova lo bendiciona nos ricamente si nos persevera apesar di prueba y mantene nos integridad mescos cu Job. Nos tin tur motibo pa alegra den nos ministerio, specialmente ora cu nos tuma nota con Yehova a bendiciona abundantemente e esfuersonan di su pueblo pa predica e bon nobo den henter e mundo. Den e siguiente articulo nos lo mira esaki.

Bo Ta Corda?

• Dicon Yehova ta tene pasenshi?

• Kico nos ta siña di e pasenshi di e profetanan?

• Con Job a desplega perseverancia, y kico tawata e resultado?

• Con bin nos sa cu Yehova su pasenshi tin limite?

[Preguntanan di Estudio]

[Plachi na pagina 18]

Hesus su pasenshi a refleha perfectamente e pasenshi di su Tata

[Plachi na pagina 20]

Con Yehova a recompensa Yeremias su pasenshi?

[Plachi na pagina 21]

Con Yehova a recompensa Job su perseverancia?