Storia di Bida

Determina pa Sigui Sirbi Mi Creador

SEGUN E RELATO DI CONSTANCE BENANTI

Cosnan a sosode masha lihe! Den apenas seis dia, Camille, nos yiu mohe di 22 luna, a haya un keintura halto y a muri. Mi tristesa tawata insoportabel. Mi tambe kier a muri. Pakico Dios a permiti un cos asina? Mi tawata tur confundi.

MI MAYORNAN tawata imigrante di Castellammare del Golfo, un stad na Sicilia, Italia. Nan a bini New York, caminda mi a nace dia 8 di december 1908. Nos famia tawata consisti di mi tata, mi mama y ocho yiu, cinco homber y tres mohe. *

Na 1927 mi tata, Santo Catanzaro, a cuminsa asisti na e reunionnan di un grupo chikito di Studiantenan di Bijbel, manera nan tawata yama Testigonan di Yehova e tempo ei. Giovanni De Cecca, un ruman Italiano cu tawata sirbi na e sede (cu yama Betel) na Brooklyn, New York, tawata tene e reunionnan caminda nos tawata biba na New Jersey. Cu tempo mi tata a cuminsa predica y a drenta den e sirbishi di tempo completo. El a sigui den e trabou ei te na su morto na 1953.

Tempo mi mama tawata jong, e kier a bira soeur, pero su mayornan no a permitie. Na prome instante, mi mama a influencia mi pa mi no participa cu mi tata den e estudio di Bijbel. Pero, poco despues mi  a cuminsa mira cambio den mi tata. El a bira mas calmo, mas suave, y tawatin mas trankilidad den nos famia. Anto mi a gusta esei.

Mientrastanto, mi a topa Charles, un mucha homber di mi edad cu a nace na Brooklyn. Su famia, mescos cu di mi, tambe a bini di Sicilia. Despues di poco tempo nos a compromete, y na 1931, despues cu mi tata a bini bek for di un congreso di Testigonan di Yehova na Columbus, Ohio, nos a casa. Denter di un aña, nos yiu mohe Camille a nace. Ora el a muri, mi a keda desconsola. Un dia Charles a bisa mi cu awa na wowo: “Mescos cu Camille tawata bo yiu, e tawata di mi tambe. Pakico nos no por dal bai cu nos bida, consolando otro?”

Nos A Acepta e Berdad di Bijbel

Charles a recorda mi cu ora mi tata a duna e discurso na entiero di Camille, el a papia tocante e speransa di resureccion. Mi a puntr’e: “Di berdad bo ta kere den resureccion?”

“Si, mi ta kere!” el a contesta. “Pakico nos no ta busca manera pa haya sa mas di loke Bijbel ta bisa?”

E anochi ei mi no por a drumi. Seis or di mainta, prome cu mi tata a sali pa bai trabou, mi a bai serca dje y bis’e cu ami cu Charles kier a studia Bijbel. El a keda masha contento y a brasa mi. Mi mama, kende tawata riba cama ainda, a tende nos papia. El a puntra mi kico a sosode. Mi a bis’e: “Nada. Simplemente ami cu Charles a dicidi di studia Bijbel.”

El a contesta: “Nos tur tin cu studia Bijbel.” Pues, nos tur, incluso mi rumannan—11 persona en total—a cuminsa studia hunto como famia.

E estudio di Bijbel a duna mi consuelo, y pocopoco pero sigur mi confusion mental y mi tristesa a cambia pa speransa. Un aña despues, na 1935, ami cu Charles a cuminsa comparti e berdad di Bijbel cu otro hende. Na februari 1937, despues cu nos a tende un discurso na e sede na Brooklyn cu a splica tocante e nificacion biblico di bautismo bou di awa, nos a batisa den un pisina na un hotel eibanda hunto cu hopi otro persona. Mi a dal e paso aki no solamente pasobra mi a spera di mira mi yiu mohe atrobe sino tambe pa motibo cu mi a desea di sirbi nos Creador, kende mi a siña conoce y stima.

Den Sirbishi di Tempo Completo

Tawata dushi y emocionante pa papia cu otro hende tocante loke mi a siña, ya cu specialmente e tempo ei hopi hende tawata reacciona faborablemente riba e mensahe di Reino  y tawata join nos den e trabou di proclam’e. (Mateo 9:37) Na 1941, ami cu Charles a bira pionero, manera Testigonan di Yehova ta yama e rumannan cu ta predica tempo completo den sirbishi. No mucho tempo despues nos a cumpra un trailer, y Charles a laga nos famia su fabrica di traha carson den man di mi ruman Frank. Despues di un tempo nos a keda sumamente emociona ora nos a ricibi un carta cu a informa nos cu nos a ser asigna como pionero special. Na prome instante nos a sirbi na New Jersey, y despues nan a manda nos na e Estado di New York.

Na 1946, mientras nos tawata asisti na un congreso na Baltimore, Maryland, nan a pidi nos pa asisti na un reunion cu representantenan special di Testigonan di Yehova. Ei nos a topa Nathan H. Knorr y Milton G. Henschel. Nan a papia cu nos tocante e trabou di misionero y, spesificamente, tocante e obra di predica na Italia. Nan a invita nos pa pensa riba e posibilidad di asisti na e Scol Biblico di Galad di Watchtower.

Nan a bisa nos: “Pensa riba dje, y despues duna nos boso contesta.” Despues cu nos a sali for di e oficina, ami cu Charles a wak otro y a bira bai paden bek. Nos a bisa nan: “Nos a pensa riba e asunto. Nos ta cla pa bai Galad.” Dies dia despues, nos a cuminsa asisti na e di shete klas di Galad.

E lunanan di entrenamento cu nos a haya tawata inolvidabel. Loke a impresiona nos hopi tawata e pasenshi y amor di e instructornan. Nan a prepara nos pa enfrenta dificultadnan den e teritorio stranhero. Despues cu nos a gradua na juli 1946, nan a asigna nos pa predica pa un tempo den e stad di New York, caminda tawatin un poblacion grandi di Italiano. Despues e gran dia a yega! Dia 25 di juni 1947 nos a sali pa Italia, nos asignacion como misionero.

Nos A Establece Nos Mes den Nos Asignacion

Nos a biaha den un barco cu anteriormente a wordo uza pa propositonan militar. Despues di a pasa 14 dia riba lama, nos a yega na e haf Italiano di Genova. Ainda e stad tawatin e cicatrisnan di Segundo Guera Mundial, locual a caba apenas dos aña prome. Por ehempel, pa motibo di e bombardeonan e stacion di trein no tawatin ningun bentana di glas. Di Genova nos a sigui cu trein di carga pa Milan, caminda e sucursal y cas di misionero tawata situa.

E condicionnan di bida despues di guera na Italia tawata hopi miserabel. E esfuersonan di reconstruccion tawata tuma luga, pero toch a reina hopi pobresa. Un poco despues mi a haya mi cu un problema serio di salud. Segun un docter, e condicion di mi curason tawata asina malo cu el a pensa cu lo tawata mihor pa mi a regresa Merca. Mi ta contento cu su diagnostico tawata robes. Despues di 58 aña, ainda mi ta den mi asignacion na Italia.

Nos tawata den nos asignacion apenas un par di aña ora cu mi rumannan na Merca kier a regala nos un auto. Pero Charles a nenga nan oferta, un decision cu mi a aprecia. Te asina leu cu nos tawata sa, e tempo ei ningun Testigo na Italia no tawatin auto, y Charles a haya cu tawata mihor pa nos a mantene un nivel di bida cu tawata comparabel na esun di nos rumannan  cristian. Ta te na 1961 nos a haya un auto chikito.

Nos prome Salon di Reino na Milan tawata den un bodega cu vloer di tera. No tawatin toilet, y e unico awa cu tawatin ta ora awa a yobe y yena e luga. Tambe nos tawatin e compania di raton chikito cu tawata core bai bini. Dos bombio di lus tawata duna iluminacion pa nos reunionnan. Apesar di e incumbiniencianan ei, tawata un animacion pa mira personanan sinsero asisti na nos reunionnan y cu tempo join nos den e trabou di predica.

Experencianan Como Misionero

Un biaha nos a laga e foyeto Pas—Lo E Ta Duradero? serca un homber. Ora nos tawata bai, su esposa Santina a yega cas carga cu saconan di comestibel. E tawata un poco disgusta, bisando cu e tawatin ocho yiu mohe pa cria y cu e no tawatin ni un tiki tempo liber. Dia mi a bishita Santina atrobe, su esposo no tawata na cas, y e tawata sinta ta brei. “Mi no tin tempo pa scucha”, el a bisa. “Ademas, mi no por lesa.”

Mi a haci oracion na Yehova den silencio y despues mi a puntr’e si mi por a pag’e pa e brei un sweater pa mi esposo. Dos siman despues, mi a haya e sweater, y ami cu Santina a cuminsa studia Bijbel regularmente cu yudansa di e buki “E Berdad Lo Haci Boso Liber.” Santina a siña lesa, y apesar cu su casa tawata contra, el a progresa y batisa. Cinco di su yiu mohenan a bira Testigo, y Santina a yuda hopi otro persona tambe acepta e berdad di Bijbel.

Na maart 1951, nan a manda nos hunto cu dos otro misionero—Ruth Cannon * y Loyce Callahan, kende despues a casa cu Bill Wengert—pa Brescia, caminda no tawatin Testigo. Nos a haya un apartamento muebla, pero dos luna despues, e doño a pidi nos pa sali for di e cas den 24 ora. Siendo cu no tawatin ni un otro Testigo den e area, nos a haya nos obliga ta bai un hotel, caminda nos a keda pa casi dos luna.

Nos dieta tawata masha limita: cofi cappuccino cu croissant pa desayuno, fruta y pan cu keshi pa almuerso, y fruta y pan cu keshi pa cena. Apesar di e incumbiniencianan, nos tawata berdaderamente bendiciona. Cu tempo nos a haya un apartamento chikito, y na e Memorial di e morto di Cristo na 1952, tawatin 35 persona presente den e sala chikito cu nos tawata uza como un Salon di Reino.

Nos A Haya Nos cu Algun Reto

Den e tempo ei, ainda miembronan di clero tawatin hopi poder riba e pueblo. Por ehempel, un biaha cu nos tawata predica na Brescia, pasto a manda algun mucha homber tira nos cu piedra. Pero cu tempo, 16 persona a cuminsa studia Bijbel cu nos, y den un tempo cortico nan a bira Testigo. Y ken tawata entre nan? Un di e mucha hombernan cu a menasa di tira nos cu piedra! Awor e ta sirbi como anciano den un di e congregacionnan na Brescia. Na 1955 ora nos a bai for di Brescia, tawatin 40 publicado di Reino ta predica.

Despues di esei, nos a sirbi pa tres aña na Livorno, caminda mayoria di e Testigonan tawata hende mohe. Esaki a nifica cu nos como ruman mohe tawatin cu cumpli cu cierto debernan cu normalmente ta ser asigna na ruman homber. Despues nos a muda bai Genova, caminda nos a cuminsa 11 aña mas prome. Ora nos a yega bek tawatin un congregacion. E Salon di Reino tawata na e prome piso den e edificio caminda nos apartamento tawata situa.

Ora nos a yega Genova, mi a cuminsa studia cu un señora kende su casa un tempo tawata boxdo y gerente di un gimnasio di boxeo. E señora a progresa spiritualmente y den poco tempo a bira nos ruman mohe cristian. Sinembargo, su esposo tawata contra y a keda asina pa hopi tempo. Despues el a cuminsa acompaña su esposa pa bai e reunionnan. En bes di drenta den salon, e tawata sinta pafo y scucha. Despues cu nos a bai for di Genova, nos a tende cu el a pidi un estudio di Bijbel. Cu tempo el a batisa y a bira un superintendente cristian amoroso. El a keda fiel te na su morto.

 Tambe mi a yega di studia Bijbel cu un señora cu tawata comprometi cu un polis. Na prome instante, e polis a mustra cierto interes, pero despues cu nan a casa, su actitud a cambia. E polis a cuminsa opone e señora, y e señora a stop di studia. Ora el a reanuda su estudio di Bijbel despues, su casa a menas’e bisando cu si un dia e haya nos ta studia, lo e tira nos tur dos mata. Wel, e señora a progresa spiritualmente y a bira un Testigo batisa. Claro cu nunca e homber no a tira nos. De echo, añanan despues na un asamblea na Genova, un hende a para mi tras, tapa mi wowonan cu su mannan, y puntra mi si mi por a rei ken e tawata. Mi no por a wanta mi lagrimanan ora mi a mira e casa di e señora ei. Despues cu el a brasa mi, el a bisa mi cu el a simbolisa su dedicacion na Yehova mediante bautismo riba net e dia ei!

Di 1964 pa 1972, mi tawatin e privilegio di compaña Charles ora e tawata bishita congregacionnan pa fortifica nan spiritualmente. Nos a sirbi den casi henter nort Italia—na Piedmont, Lombardy y Liguria. Despues nos a reanuda nos sirbishi di pionero banda di Florence y despues na Vercelli. Na 1977, tawatin un congregacion so na Vercelli, pero ora nos a bai for di einan na 1999, tawatin tres. E aña ei, mi a cumpli 91 aña, y e rumannan a anima nos pa muda bai un cas di misionero na Roma, un bunita cas chikito den un area relativamente trankil.

Un Otro Tristesa

Na maart 2002, Charles, kende semper tawatin un bon salud, diripiente a bira malo. Su salud a sigui bai atras te ora el a muri dia 11 di mei 2002. Pa 71 aña nos a yora hunto den tempo di tristesa y a alegra hunto ora nos a ricibi bendicion. Su morto tawata un perdida inmenso y doloroso pa mi.

Hopi bes mi ta mira Charles den mi mente, cu su bachi double-breast y su sombre di e decada di 1930. Mi ta imagina su sonrisa, of ta manera cos cu mi ta tende su hari di custumber. Cu yudansa di Yehova y gracias na e amor di asina tanto ruman cristian stima, mi por a pasa door di e periodo tristo aki. Mi ta warda ansiosamente riba e dia cu lo mi mira Charles atrobe.

Siguiendo cu Mi Sirbishi

E cos di mas maraviyoso cu mi por a haci den mi bida ta di sirbi mi Creador. Atrabes di añanan, ‘mi a purba y mira cu Yehova ta bon.’ (Salmo 34:8) Mi a sinti su amor y a experencia su cuido. Aunke mi a perde mi baby, Yehova a duna mi hopi yiu homber y yiu mohe spiritual—plama rond Italia—cu a yena tanto mi curason como esun di dje cu goso.

E loke semper mi a gusta haci mas ta di papia cu otro hende tocante mi Creador. Pesei mi ta sigui predica y conduci estudio di Bijbel. Tin biaha mi ta lamenta cu pa motibo di mi salud mi no por haci mas. Pero mi ta realisa cu Yehova conoce mi limitacionnan y cu e ta stima mi y ta aprecia loke mi por haci. (Marco 12:42) Mi ta purba biba segun e palabranan di Salmo 146:2: ‘Tanten cu mi ta biba lo mi alaba Yehova; lo mi canta alabansa na mi Dios, tanten cu mi tin bida.’ *

[Nota]

[Plachi na pagina 13]

Camille

[Plachi na pagina 14]

Dia nos a casa, na 1931

[Plachi na pagina 14]

Aunke na principio mi mama no tawata interesa, despues el a haya cu nos tur mester a studia Bijbel

[Plachi na pagina 15]

Cu Ruman Knorr na graduacion di Galad, 1946

[Plachi na pagina 17]

Cu Charles un poco prome cu su morto