Contribucionnan Cu Ta Agrada Dios

E RELATO no ta uno agradabel. Reina Atalia a podera di e trono di Huda mediante engaño y asesinato. Ekibocadamente el a asumi cu nan a mata tur e herederonan natural, y pues el a instala su mes como reina. Un otro señora, princes Josaba, kende tawata stima Yehova y su Lei masha hopi, cu curashi a sconde un desendiente real, e baby Joas. Josaba cu su casa, e sumo sacerdote Joiada, a sconde e heredero seis aña largo den nan luga di habitacion riba tereno di e tempel.—2 Reinan 11:1-3.

Ora cu Joas a haci shete aña di edad, sumo sacerdote Joiada tawata cla pa cuminsa cu su plan pa core cu e reina cu a uza mala maña pa usurpa e trono. Joiada a revela e mucha homber cu e tawatin scondi y a coron’e como e heredero legitimo di e reino. Anto e ora ei guardianan real a saca e reina malbado Atalia pafo di e tereno di e tempel y a ehecut’e. Esei a trece hopi alivio y alegria pa e pueblo. Joiada y Josaba mediante nan accionnan a duna un gran contribucion na e restauracion di adoracion berdadero den e tera di Huda. Pero mas importante, nan a contribui na e continuacion di e liña real di David cu lo a hiba na e Mesias.—2 Reinan 11:4-21.

E rei resien instala tambe a haci despues un contribucion cu a agrada Dios. E cas di Yehova mester a wordo drecha urgentemente. Atalia su ambicion descontrola pa e ta e unico gobernante di Huda no solamente a pone cu hende a neglisha e tempel sino tambe cu nan a plunder e. Pesei Joas tawata determina pa reconstrui y drecha e tempel. Sin tarda, el a saca un decreto pa recohe e fondonan necesario pa renoba e cas di Yehova. El a bisa: “Tur e placa di e articulonan santo cu nan ta trece den e cas di SEÑOR, na placa coriente, tanto e placa cu ta stipula pa cada hende, como tur e placa cu cada hende ta propone den su curason pa trece den e cas di SEÑOR, laga e sacerdotenan tuma esaki pa nan mes, cada un for di su conocinan; y laga nan drecha e dañonan na e cas, na unda cu nan haya cualkier daño.”—2 Reinan 12:4, 5.

E pueblo a contribui di buena gana. Sinembargo, e sacerdotenan no tawata cumpli di henter nan curason cu nan deber di drecha e tempel. Pesei e rei a dicidi di tuma e asunto den su mes man y a ordena pa tur contribucion bai directamente den un caha special. El a pone Joiada na encargo di esei, y e relato ta bisa: “Ma sacerdote Joiada a cohe un caha y a bora un buraco den su tapa, y a pone esaki banda di e altar, na banda drechi ora bo ta drenta e cas di SEÑOR; y e sacerdotenan cu tawata tene warda na e drempel tawata pone tur e placa cu a wordo treci den e cas di SEÑOR den dje. Y ora nan a mira cu tawatin hopi placa den e caha, e escriba di rei y e sumo sacerdote a bin mara esaki den saconan y a conta e placa cu a wordo haya den e  cas di SEÑOR. Y nan a entrega e placa cu nan a pisa den man di esnan cu tawata haci e trabou, esnan cu tawatin encargo di e cas di SEÑOR; y cu ne nan tawata paga e carpintenan y e trahadonan cu tawata traha riba e cas di SEÑOR, y e meslanan y e kapdonan di piedra, y pa cumpra palo y piedra gekap pa drecha e dañonan na e cas di SEÑOR, y pa tur e otro gastonan cu tawatin pa drecha e cas.”—2 Reinan 12:9-12.

E reaccion di e pueblo tawata di henter nan curason. Yehova su cas di adoracion a wordo drecha di manera cu su adoracion por a sigui cu dignidad. Pues, tur e fondonan contribui a wordo uza na un manera apropiado. Rei Joas a haci sigur di esei!

Awe, Yehova su organisacion visibel ta percura cuidadosamente pa tur fondo contribui ser uza corectamente pa adelanto di e adoracion di Yehova, y cristiannan berdadero a reacciona mescos cu e Israelitanan di antiguedad, esta, di henter nan curason. Podise abo ta entre esnan cu a contribui pa adelanto di interesnan di Reino durante e ultimo aña di sirbishi. Laga nos tuma nota di algun di e maneranan cu a haci uzo di bo contribucion.

PUBLICACION

Mundialmente, a imprimi y distribui e siguiente publicacionnan aki:

• Buki: 47.490.247

• Foyeto chikito: 6.834.740

• Foyeto grandi: 167.854.462

• Kalender: 5.405.955

• Revista: 1.179.266.348

• Tratado: 440.995.740

• Video: 3.168.611

Trabou di imprenta ta ser haci na Africa, Nort y Sur America, America Central, Asia, Europa y islanan di Oceano Pacifico, un total di 19 pais.

“Mi nomber ta Katelyn May. Mi tin ocho aña. Mi tin $28, y mi kier pa boso hay’e pa yuda paga pa e mashinnan di druk. Boso ruman chikito, Katelyn.”

“Nos a tene un reunion di famia relaciona cu e mashinnan di druk nobo. Nos yiunan, di 11 y 9 aña, a dicidi di saca placa for di nan sparpot y duna nan parti. Nos ta contento di por manda nan contribucion hunto cu esun di nos.”

 CONSTRUCCION

Aki ta sigui algun di e proyectonan di construccion cu a tuma luga pa apoya e actividadnan di Testigonan di Yehova:

• Salon di Reino den paisnan di poco recurso: 2.180

• Salon di Asamblea: 15

• Sucursal: 10

• Boluntario internacional den sirbishi di tempo completo: 2.342

“E fin di siman aki nos tawatin e prome reunion den nos Salon di Reino nobo. Nos ta masha felis di por tin un luga apropiado pa duna alabansa na nos Tata, Yehova Dios. Nos ta gradici Yehova y boso pa a duna atencion na nos necesidadnan door di traha mas Salon di Reino. De echo, nos Salon di Reino ta duna realse na e bicindario.”—Chile.

“E rumannan ta aprecia masha hopi e yudansa cu Yehova su organisacion a duna. Te cu awe, nos ta papia keto bai di e tempo maraviyoso cu nos a pasa cu e team di construccion.”—Moldova.

“Ami cu mi esposa resientemente a celebra nos di 35 aniversario matrimonial. Nos tawata purba dicidi kico nos lo regala otro pa e ocasion, y nos a dicidi di duna algo bek na Yehova y na su organisacion, pasobra sin nan yudansa, nos probablemente lo no tawatin exito den nos matrimonio. Nos kier pa uza e placa cu nos ta manda hunto cu e carta aki pa yuda den construccion di un Salon di Reino den un di e paisnan menos privilegia.”

“Resientemente mi a haya un herencia. Pero como cu e cosnan cu mi kier ta poco y e cosnan cu mi mester ta asta menos, mi kier pa boso haya e placa cu mi ta manda hunto cu e carta aki pa yuda traha Salonnan di Reino, locual hopi pais tin tanto mester di dje.”

 YUDANSA ORA DI DESASTER

Den e ultimo dianan aki, desasternan ta tuma luga sin ningun spiertamento. Hopi Testigo di Yehova ta duna extra contribucion di manera cu por yuda nan rumannan den areanan asota. Un recordatorio: Contribucionnan pa yuda ora di desaster ta ser administra como parti di e obra mundial. Aki ta sigui algun di e luganan caminda Testigonan di Yehova a yuda victimanan di desaster:

• Africa

• Asia

• Region di Caribe

• Islanan di Oceano Pacifico

“Ami cu mi esposo lo kier gradici boso masha hopi pa e materialnan cu boso a manda pa yuda cu e daño causa durante e horcannan. Esei a haci posibel cu nos por a pone un dak nobo riba nos cas. Nos a echt aprecia cu boso a reacciona asina lihe.”

“Mi nomber ta Connor, y mi tin 11 aña. Ora mi a mira loke e tsunami a haci, mi kier a yuda. Mi ta spera cu esaki lo yuda mi rumannan.”

 SIRBIDONAN SPECIAL DI TEMPO COMPLETO

Un cantidad di cristian ta sirbi tempo completo den e trabou di predica of den casnan di Betel. Un parti di e boluntarionan di tempo completo ta ser sosteni door di contribucionnan boluntario. Entre nan tin lo siguiente:

• Misionero: 2.635

• Superintendente biahero: 5.325

• Betelita: 20.092

“Como cu mi no por sirbi na Betel awor [mucha homber di cinco aña], mi kier manda e contribucion aki cu hopi amor. Ora mi bira grandi, mi ta bai Betel pa traha duro.”

Pa Promove Educacion Biblico

Hesucristo a duna su siguidonan e tarea pa “haci tur e nacionnan disipel.” (Mateo 28:19) Obedeciendo su palabranan, Testigonan di Yehova ta druk bezig ta predica y siña hende e mensahe di Bijbel den 235 pais. Nan ta publica y distribui literatura biblico na 413 idioma.

De echo, e contribucion di mas balioso cu un cristian por duna pa yuda mas hende siña tocante Dios y Su propositonan ta su tempo. Testigonan di Yehova a duna abundantemente di nan tempo y energia pa yuda nan prohimo. Tambe nan a contribui generosamente den sentido financiero, y tur nan contribucionnan, duna den un of otro forma, a yuda haci Yehova su nomber y su propositonan conoci rond mundo. Cu Yehova sigui bendiciona e esfuersonan aki pa yuda otro hende siña mas tocante dje. (Proverbionan 19:17) E actitud dispuesto pa yuda ei ta agrada Yehova!—Hebreonan 13:15, 16.

[Cuadro na pagina 28]

Maneranan Cu Algun Hende Ta Scohe pa Duna

CONTRIBUCION PA E OBRA MUNDIAL

Hopi hende ta aparta, of hinca den nan presupuesto, un montante pa nan pone den e cahanan di contribucion marca: “Contribucion pa e Obra Mundial—Mateo 24:14.”

Tur luna congregacionnan ta manda e montantenan aki pa e sucursal di Testigonan di Yehova cu ta sirbi nan respectivo pais. Tambe por manda donacion boluntario di placa directamente na Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, of na e oficina di sucursal cu ta sirbi bo pais. Si manda cheque, e mester ta na nomber di “Watch Tower.” Tambe por haci donacion di prenda of otro cos di balor. Un carta breve cu ta declara cu esakinan ta un regalo incondicional mester acompaña e contribucionnan aki.

AREGLO DI DONACION CONDICIONAL

Por haci donacion di placa via un areglo special den cua, riba peticion di e dunado, lo por debolbe e donacion na dje. Pa mas informacion, por fabor, tuma contacto cu e Treasurer’s Office na e adres ya menciona.

DONACION PLANIA

Ademas di regalo incondicional di placa, tin otro metodonan di duna na beneficio di e sirbishi di Reino mundial. Esakinan ta inclui:

Seguro: Por nombra Watch Tower como beneficiario di un polisa di seguro di bida of di un areglo di pension.

Cuenta di Banco: Por duna Watch Tower derecho di uza cuenta di banco, time deposit of cuenta di pension personal, of derecho di cobra nan despues di morto di nan doño, na harmonia cu rekisitonan bancario local.

Accion y Bono: Por haci donacion di accion y bono na Watch Tower como un regalo incondicional.

Propiedad: Por haci donacion di propiedad cu por ser bendi, sea como regalo incondicional of bou di e condicion cu e dunado por sigui biba den dje te na su morto. Tuma contacto cu e oficina di sucursal di bo pais prome cu traha e acta pa traspasa cualkier propiedad.

Testament y Trust: Por nombra Watch Tower como heredero di propiedad of placa via un testament legal, of por nombra Watch Tower como beneficiario di un areglo di trust. Un trust cu ta beneficia un organisacion religioso por duna cierto beneficionan fiscal.

Pa mas informacion, bo por tuma contacto cu Sosiedad Watch Tower, via carta of telefon, na e adres indica akibou, of na e oficina di Testigonan di Yehova cu ta sirbi bo pais.

Sosiedad Watch Tower

P.O. Box 4708 (Seroe Loraweg 142A)

Curaçao, N.A.

Telefon: (599-9) 461-7528

[Reconocemento pa Potret na pagina 27]

Video Fiel: Stalin: U.S. Army photo