E Huicio di Yehova Lo Bin Contra e Malbadonan
E Huicio di Yehova Lo Bin Contra e Malbadonan
“Prepara pa contra cu bo Dios.”—AMOS 4:12.
1, 2. Dicon nos por tin confiansa cu Dios lo caba cu maldad?
YEHOVA lo caba un dia cu maldad y sufrimento cu tin riba e tera aki? Awe, na principio di siglo 21, e pregunta ei ta parce mas na su luga cu nunca. Ta manera cos cu unda cu nos bira, nos ta mira evidencia di hende su trato inhumano pa cu otro. Nos ta anhela masha pa mira un mundo sin violencia, terorismo y corupcion!
2 E bon noticia ta cu nos por tin pleno confiansa cu Yehova lo caba cu maldad. E cualidadnan cu Dios tin ta sigura nos cu lo e tuma accion contra e malbadonan. Yehova ta husto y recto. Na Salmo 33:5, su Palabra ta bisa nos: “E ta stima husticia y huicio.” Anto un otro salmo ta bisa: “Esun cu ta gusta violencia [Yehova] su alma ta odia.” (Salmo 11:5) Siguramente anto, Yehova, e Dios todopoderoso, cu ta stima husticia y huicio, lo no keda tolera pa semper loke e ta odia.
3. Kico lo keda enfatisa den un consideracion mas a fondo di e profecia di Amos?
3 Considera un motibo mas pakico nos por tin sigur cu Yehova lo elimina maldad. Registro di su tratonan den pasado ta garantisa esaki. Den e buki biblico di Amos nos ta haya ehempelnan impresionante di Yehova su manera consistente di trata cu hende malbado. Un consideracion mas a fondo di e profecia di Amos lo enfatisa tres aspecto di huicio dibino. Prome, semper e ta un huicio mereci. Di dos, ningun malbado no por scapa di dje. Y di tres, e ta selectivo, pasobra Yehova ta ehecuta huicio riba malechornan pero e ta mustra misericordia na personanan repenti y cu tin e disposicion corecto.—Romanonan 9:17-26.
Huicio Dibino Semper Ta Mereci
4. Unda Yehova a manda Amos bai, y pa ki proposito?
4 Den tempo di Amos, e Israelitanan ya tawata parti caba den dos reino. Uno tawata e reino di dos tribu di Huda den suit, y e otro tawata e reino di dies tribu di Israel den nort. Yehova a encarga Amos pa sirbi como profeta, y a mand’e for di su stad natal na Huda pa bai Israel. Dios lo a uz’e einan pa proclama huicio dibino.
5. Contra cua nacion Amos a profetisa prome, y cua tawata un motibo cu nan a merece Dios su huicio desfaborabel?
5 Amos no a cuminsa su asignacion cu proclamacion di Yehova su huicio contra e reino rebelde di nort di Israel. Mas bien, el a cuminsa proclama huicio dibino contra seis nacion biciña di Israel. E nacionnan aki tawata Siria, Filistea, Tiro, Edom, Amon y Moab. Pero di berdad e nacionnan ei a merece Dios su huicio desfaborabel? Sigur cu si! Pa cuminsa, nan tawata enemigo mortal di e pueblo di Yehova.
6. Dicon Dios lo a bai trece calamidad riba Siria, Filistea y Tiro?
6 Por ehempel, Yehova a condena e Sirionan ‘pasobra nan a bati su pueblo na Galad.’ (Amos 1:3) E Sirionan a horta teritorio for di Galad—un region di Israel pariba di Riu Yordan—y a causa gran afliccion pa e pueblo di Dios einan. Kico di Filistea y Tiro? E Filisteonan tawata culpabel di a deporta Israelita—esta, a hiba nan preso—y bende nan cu e Edomitanan, y algun Israelita a cai den man di Tiro su traficantenan di esclabo. (Amos 1:6, 9) Figura bo, nan a bende Dios su pueblo como catibo! Pesei no ta un sorpresa cu Yehova lo a bai trece calamidad riba Siria, Filistea y Tiro.
7. Kico Edom, Amon y Moab tawatin en comun cu Israel, pero con nan a trata e Israelitanan?
7 Edom, Amon y Moab tawatin algo en comun cu otro y cu Israel. Tur tres nacion tawata famia di e Israelitanan. E Edomitanan tawata desendiente di Abraham via Yacob su morocho Esau. Di manera cu den un sentido nan tawata ruman di Israel. E Amonitanan y e Moabitanan tawata desendiente di Abraham su subrino Lot. Pero, Edom, Amon y Moab a trata nan famianan Israelita manera ruman? Ni un ora so! Edom a uza spada di un manera sin misericordia contra “su ruman homber”, y e Amonitanan tawata hopi cruel den e manera cu nan a trata preso Israelita. (Amos 1:11, 13) Aunke Amos no ta menciona directamente con Moab a maltrata e pueblo di Dios, e Moabitanan tin un registro largo di oposicion contra Israel. E castigo contra e tres nacionnan ei cu a bini di e mesun antepasado, lo ta hopi severo. Yehova a priminti di destrui nan cu candela.
Malbadonan No Por Scapa di Huicio Dibino
8. Dicon e seis nacionnan biciña di Israel no por a scapa for di Dios su castigo?
8 Un cos ta sigur, e seis nacionnan menciona anteriormente den e profecia di Amos a merece Dios su huicio desfaborabel. Ademas, no tawatin ningun manera pa nan scapa di dje. For di Amos capitulo 1, versiculo 3, te na capitulo 2, versiculo 1, Yehova ta bisa seis biaha: “Lo mi no revoca su castigo.” Y Yehova a cumpli cu su palabra. E no a hala atras y keda sin castiga e nacionnan ei. Historia skirbi ta proba cu mas despues cada un di nan a sufri calamidad. Anto por lo menos cuater di nan—Filistea, Moab, Amon y Edom—cu tempo a stop di existi mes como nacion!
9. Kico e habitantenan di Huda a merece, y dicon?
9 Siguientemente, e profecia di Amos a enfoca atencion riba e di shete nacion—su pais natal Huda. Amos su oyentenan den e reino di nort di Israel kisas lo a keda sorprendi di tend’e proclama huicio contra e reino di Huda. Dicon e habitantenan di Huda a merece huicio desfaborabel? “Pasobra nan a rechasa e lei di SEÑOR”, Amos 2:4 ta bisa. Pa Yehova, ta algo masha serio ora hende deliberadamente ta neglisha su Lei. Segun Amos 2:5, el a predeci: “Lo mi manda candela riba Huda, y esaki lo caba cu e citadelnan di Herusalem.”
10. Dicon Huda lo no por a scapa di calamidad?
10 Huda infiel lo no por a scapa e benidero calamidad. Pa di shete biaha, Yehova a bisa: “Lo mi no revoca su castigo.” (Amos 2:4) Huda a ricibi e castigo predeci ora e Babilonionan a hacie desola na aña 607 prome cu nos era. Un biaha mas nos ta mira cu pa e malbadonan no tin scapatorio for di e huicio di Dios.
11-13. Amos a profetisa principalmente contra cua nacion, y ki tipo di opresion tawata tuma luga einan?
11 Profeta Amos a caba di proclama Yehova su huicio contra shete nacion. Pero ken cu a pensa cu Amos a termina cu su trabou di profetisa, tawata mal ekiboca. Amos tawata leu for di cla! Amos su encargo principal tawata pa proclama un mensahe skerpi di huicio contra e reino di nort di Israel. Anto Israel a merece Dios su huicio desfaborabel pasobra e nacion tawata den un deterioro moral y religioso hopi deplorabel.
12 Amos su profecianan a expone e opresion cu a bira comun den e reino di Israel. Relaciona cu esaki, Amos 2:6 y 7 ta bisa: “Asina SEÑOR ta bisa: ‘Pa tres transgresion di Israel, si pa cuater, lo mi no revoca su castigo, pasobra nan ta bende e husto pa placa, y esnan den necesidad pa un par di sandalia. Esnan cu ta anhela pa tira stof riba cabes di e pobernan tambe ta troce caminda di e humildenan.’”
13 Nan a bende hende husto pa “placa.” Esei kisas a nifica cu e huesnan cu a acepta placa como soborno tawata sentencia hende inocente. Cobradonan tawata bende hende pober como catibo pa e prijs di “un par di sandalia”, podise djis pa paga un debe chikito. Hombernan sin heful tawata “anhela”, of tawata loco pa haya “e pobernan” den un estado asina desespera cu e pobernan tawata tira stof riba nan mes cabes, como señal di afliccion, rou of humiliacion. Corupcion tawata asina plama cu “e humildenan” no tawatin ningun speransa di haya husticia.
14. Ken tawata esnan maltrata den e reino di dies tribu di Israel?
14 Tuma nota ta ken tawata esnan cu a ser maltrata. Tawata e habitantenan husto, den necesidad, pober y humilde. Yehova su pacto di Lei cu e Israelitanan a exigi pa nan mustra compasion na hende vulnerable y den necesidad. Pero pa e personanan ei den e teritorio di e reino di dies tribu di Israel, cos no por tawata piyo.
“Prepara pa Contra cu Bo Dios”
15, 16. (a) Dicon e Israelitanan a haya e spiertamento: “Prepara pa contra cu bo Dios”? (b) Con Amos 9:1 y 2 ta mustra cu e malbadonan no por scapa di e ehecucion di huicio dibino? (c) Kico a pasa cu e reino di dies tribu di Israel na aña 740 prome cu nos era?
15 Ya cu tawata reina inmoralidad y otro picanan den Israel, profeta Amos cu bon motibo a spierta e nacion rebelde: “Prepara pa contra cu bo Dios.” (Amos 4:12) Israel infiel lo no por a scapa e benidero ehecucion di huicio dibino pasobra pa di ocho biaha Yehova a declara: “Lo mi no revoca su castigo.” (Amos 2:6) Relaciona cu e malbadonan cu kisas lo a trata di sconde, Dios a bisa: “Nan lo no tin ningun fugitivo cu lo hui, ni ningun refugiado cu lo scapa. Maske nan coba bai te den Seol, for di ayanan mi man lo cohe nan; y maske nan subi bai na shelo, for di ayanan lo mi baha nan.”—Amos 9:1, 2.
16 Malbadonan no por a hui pa Yehova su huicio door di coba “bai te den Seol”, un manera figurativo pa indica intentonan pa sconde den e partinan mas hundo di tera. Ni nan no por a scapa di huicio dibino door di “subi bai na shelo”, esta, tratando di haya refugio den e seronan halto. Yehova su spiertamento tawata masha cla: No tin ningun luga di sconde cu ta for di su alcanse. Husticia dibino a rekeri pa e reino di Israel duna cuenta di su actonan malbado. Anto e tempo ei en berdad a yega. Na aña 740 prome cu nos era—rond di 60 aña despues cu Amos a skirbi su profecia—e reino di Israel a ser derota door di e Asirionan victorioso.
Huicio Dibino Ta Selectivo
17, 18. Kico Amos capitulo 9 ta revela tocante Dios su misericordia?
17 E profecia di Amos a yuda nos mira cu e huicio di Dios semper ta mereci y cu malbadonan no por scapa di dje. Pero e buki di Amos ta indica tambe cu Yehova su huicio ta selectivo. Dios por haya e malbado unda cu e bai sconde y ehecuta huicio riba dje. Mescos tambe e por haya hende recto y repenti, cual ta esnan cu e ta scohe pa mustra misericordia na dje. E les aki ta bin dilanti masha bunita mes den e ultimo capitulo di e buki di Amos.
18 Segun Amos capitulo 9, versiculo 8, Yehova a bisa: “Lo mi no destrui e cas di Yacob completamente.” Segun Am 9 versiculonan 13 te cu 15, Yehova a priminti cu e lo ‘trece su pueblo bek for di cautiverio.’ Nan lo ricibi misericordia y lo disfruta di siguridad y prosperidad. Yehova a priminti cu “e ploegdo lo alcansa e cosechado.” Djis imagina esei, lo tin un cosecha asina abundante cu ainda tawatin cosecha pa trece aden ora e proximo temporada pa ara y sembra yega!
19. Kico a pasa cu un resto for di Israel y Huda?
19 Nos por bisa cu Yehova su huicio contra e malbadonan den tanto Huda como Israel tawata selectivo pasobra el a mustra misericordia na e hendenan repenti y cu tawatin e disposicion corecto. Como cumplimento di e promesa di restauracion cu tin para skirbi na Amos capitulo 9, un resto repenti for di Israel y Huda en berdad a bolbe for di cautiverio na Babilonia na aña 537 prome cu nos era. Unabes bek den nan pais natal stima, nan a restaura adoracion puro. Y den un ambiente sigur nan a reconstrui nan casnan y planta hofi y cunucu di wendruif.
Yehova Su Huicio Desfaborabel Lo Bin!
20. Nos consideracion di e mensahenan di huicio proclama door di Amos mester haci nos sigur di kico?
20 Nos consideracion di e mensahenan di huicio dibino cu Amos a proclama mester duna nos e siguransa cu Yehova lo pone un fin na maldad den nos tempo. Dicon nos por kere esei? Na prome luga, e ehempelnan aki di pasado di Dios su trato cu hende malbado ta indica con e ta bai actua den nos tempo. Na di dos luga, e ehecucion di huicio dibino riba e reino apostata di Israel ta duna nos e garantia cu Dios lo trece destruccion riba cristiandad, e parti mas culpabel di ‘Babilonia e Grandi’, e imperio mundial di religion falso.—Revelacion 18:2.
21. Dicon cristiandad ta merece Dios su huicio desfaborabel?
21 No tin duda cu cristiandad merece Dios su huicio desfaborabel. Su condicion deplorabel riba tereno religioso y moral ta papia pa su mes. Yehova su huicio contra cristiandad—y contra e resto di e mundo di Satanas—ta mereci. Ademas nan no por scapa di dje. Pasobra ora e momento yega pa ehecuta huicio, e palabranan di Amos capitulo 9, versiculo 1, lo resulta di ta cierto: “Nan lo no tin ningun fugitivo cu lo hui, ni ningun refugiado cu lo scapa.” Si, unda cu e malbadonan bai sconde, Yehova lo haya nan.
22. Ki puntonan relaciona cu huicio dibino 2 Tesalonicensenan 1:6-8 ta mustra bon cla?
22 Huicio dibino semper ta mereci, no por scapa di dje y e ta selectivo. Nos por compronde esaki for di e palabranan di apostel Pablo: “Ta husto dilanti di Dios pa paga cu afliccion esnan cu ta afligi boso, y pa duna alivio na boso cu ta wordo afligi y na nos tambe ora Señor Hesus wordo manifesta for di shelo cu su angelnan poderoso den candela tur na vlam, pa duna pago mereci na esnan cu no conoce Dios y na esnan cu no ta obedece e evangelio di nos Señor Hesus.” (2 Tesalonicensenan 1:6-8) “Ta husto dilanti di Dios” pa duna pago na esnan cu ta merece huicio desfaborabel pasobra nan a afligi su unginan. E malbadonan no por scapa for di e huicio ei, pasobra nan lo no sobrevivi ‘ora Hesus wordo manifesta cu su angelnan poderoso den candela tur na vlam.’ Tambe huicio dibino lo ta selectivo door cu Hesus lo duna pago mereci “na esnan cu no conoce Dios y na esnan cu no ta obedece e evangelio.” Y ehecucion di huicio dibino lo trece consuelo pa hende temeroso di Dios cu ta sufri afliccion.
Speransa pa Hende Recto
23. Ki speransa y consuelo nos por saca for di e buki di Amos?
23 E profecia di Amos ta contene un mensahe maraviyoso di consuelo y speransa pa personanan cu tin e disposicion corecto. Manera a keda profetisa den e buki di Amos, Yehova no a caba completamente cu su pueblo di antiguedad. Cu tempo el a reuni e presonan di Israel y Huda hunto atrobe, y a laga nan bolbe na nan pais natal y a bendiciona nan cu hopi siguridad y prosperidad. Kico esaki ta nifica pa nos tempo? Nos por tin sigur cu durante e benidero ehecucion di huicio dibino, Yehova lo haya e malbadonan na unda cu nan bai sconde, y tambe lo e localisa e personanan cu e ta considera cu merece su misericordia na unda cu nan ta biba riba e tera aki.
24. Den ki maneranan e sirbidonan di Yehova di tempo actual a ser bendiciona?
24 Mientras cu nos ta warda riba Yehova pa ehecuta huicio contra e malbadonan, kico nos ta experencia como su fiel sirbidonan? Wel, Yehova ta bendicionando nos cu un abundancia di prosperidad spiritual! Nos ta disfruta di un forma di adoracion cu ta liber di e engañonan y mal representacionnan cu a resulta for di e siñansanan falso di cristiandad. Tambe Yehova a bendiciona nos cu alimento spiritual na abundancia. Pero no lubida, hunto cu e bendicionnan rico aki for di Yehova ta bin tambe un gran responsabilidad. Dios ta spera cu nos ta spierta otro hende tocante e benidero huicio. Nos kier haci tur loke ta na nos alcanse pa busca esnan cu tin “e disposicion corecto pa bida eterno.” (Echonan 13:48, NW) Si, nos kier yuda mas tanto hende posibel pa beneficia di e prosperidad spiritual cu nos ta disfruta di dje awor. Y nos kier pa nan sobrevivi e benidero ehecucion di huicio dibino contra e malbadonan. Claro cu pa por haya e bendicionnan aki, nos mester tin e condicion corecto di curason. Manera nos ta bai mira den e siguiente articulo, esaki tambe ta algo cu e profecia di Amos ta enfatisa.
Con Lo Bo Contesta?
• Con e profecia di Amos ta mustra cu Yehova su huicionan desfaborabel semper ta mereci?
• Ki prueba Amos ta duna pa mustra cu malbadonan no por scapa di huicio dibino?
• Con e buki di Amos ta mustra cu Dios su ehecucion di huicio ta selectivo?
[Preguntanan di Estudio]
[Plachi na pagina 16, 17]
E reino di Israel no a scapa di huicio dibino
[Plachi na pagina 18]
Na aña 537 prome cu nos era, un resto di Israel y Huda a regresa for di cautiverio na Babilonia