Pregunta di Lector

Con e congregacion cristian ta mira golosidad?

E Palabra di Dios ta condena buracheria y golosidad como comportacionnan inaceptabel pa hende cu kier sirbi Dios. Pesei, e congregacion cristian ta mira un hende cu tin custumber di haci co’i haragan golos mescos cu e ta mira un burache. Ningun burache ningun haragan golos no por ta parti di e congregacion cristian.

Proverbionan 23:20 y 21 ta declara: “No anda cu esnan cu ta gusta dal nan biña, ni cu esnan cu ta golos pa come carni. Pasobra e burache y e hende golos lo bira pober, y cabishamento lo haci un hende bisti paña kibra.” Na Deuteronomio 21:20, nos ta lesa tocante un persona “cabesura y rebelde” cu a merece castigo di morto bou di e Lei di Moises. E versiculo ei ta menciona dos caracteristica di e persona rebelde aki cu no a repenti: e tawata “un golos y un burache.” Pues ta bisto cu den antiguo Israel, golosidad a ser considera un practica inaceptabel pa hende cu kier a sirbi Dios.

Pero ki ora un hende ta golos, y kico e Scritura Griego Cristian ta bisa di e topico aki? Un hende golos ta un hende cu tin custumber di hocha of come y bebe na un manera haragan. Pa cuminsa, e Palabra di Dios ta bisa nos cu personanan “golos pa cos” ta e sorto di personanan cu lo no hereda e Reino di Dios. (1 Corintionan  6:9, 10, BPK; Filipensenan 3:18, 19; 1 Pedro 4:3) Ademas, ora cu apostel Pablo a spierta cristiannan pa no practica “e obranan di carni”, el a menciona “buracheria, parandiamento, y cosnan asin’aki.” (Galationan 5:19-21) Hopi bes buracheria y parandiamento ta bai acompaña cu comemento di mas. Ademas, ser haragan ta cai bou di e expresion cu Pablo a uza: “Cosnan asin’aki.” Mescos cu ta conta pa e otro “obranan di carni”, un cristian cu ta conoci tur caminda pa su comemento di mas y cu na un manera cabesura ta nenga di cambia su comportacion golos, mester ser saca for di e congregacion.—1 Corintionan 5:11, 13, BPK. *

Aunke e Palabra di Dios ta pone un burache den e mesun categoria cu un hende golos, ta mucho mas facil pa identifica un burache cu un hende golos. Normalmente e señalnan di buracheria ta hopi bisto. Di otro banda, ta mucho mas dificil pa determina ki ora un persona a bira un haragan persistente pasobra bo no por determina esei djis a base di su aparencia. Pa e motibo ei, ora ancianonan den congregacion ta atende e tipo di casonan aki nan tin cu tene masha cuidou y uza bon discernimento.

Por ehempel, obesidad (demasiado sobrepeso) por ta un señal di golosidad, pero no ta tur biaha esei ta e caso. E por wordo causa pa un malesa. Factornan hereditario tambe por contribui na obesidad. Ademas, nos tin cu corda cu obesidad ta un asunto fisico, mientras cu ora un hende ta haragan esei ta un asunto di actitud. Obesidad ta ora e curpa tin demasiado vet, mientras cu ser haragan ta ora un persona ta come of bebe di mas of na un manera golos. Pues, no ta e peso di un persona ta determina si e ta un haragan sino su actitud pa cu cuminda. Un persona por tin un curpa normal of por ta asta delega y toch ser un haragan. Ademas, loke hende ta considera e peso of figura ideal ta varia considerablemente di un luga pa otro.

Na kico bo ta mira cu un persona ta haragan? Mayoria biaha un persona haragan no tin dominio propio, y ta bai asina leu di prop su curpa cu cuminda te ora e cuminsa sinti su mes incomodo of e bira malo. Su falta di dominio propio ta indica cu e no ta precupa mes cu e reproche cu e ta trece riba Yehova y riba e bon reputacion di Yehova su pueblo. (1 Corintionan 10:31) Di otro banda, no ta asina cu automaticamente lo considera un persona cu de bes en cuando ta come di mas un ‘persona haragan.’ (Efesionan 5:5, BPK) No obstante, den e spirito di Galationan 6:1 [NW], kisas un cristian asina tin mester di yudansa. Pablo a declara: “Rumannan, aunke un homber dal un paso robes prome cu e realisa esei, boso cu tin cualidadnan spiritual, trata na reahusta e homber ei cu un spirito di suavidad.”

Dicon Bijbel su conseho pa no come di mas ta specialmente importante awe? Pasobra Hesus a spierta specialmente relaciona cu nos tempo: “Tene cuidou pa boso curason no ta carga pa causa di paranda [“comemento di mas”, NW] y buracheria y e precupacionnan di bida, y e dia ei no bin diripiente riba boso manera un trampa.” (Lucas 21:34, 35) Un manera importante pa evita un estilo di bida spiritualmente dañino ta di evita di come di mas.

Moderacion ta un birtud cristian. (1 Timoteo 3:2, 11) Pesei, Yehova sigur lo yuda tur persona cu sinseramente ta trata na aplica Bijbel su conseho pa ta modera den comemento y bebemento.—Hebreonan 4:16.

[Nota]