Storia di Bida

Mientras Mi Tawata Ciego, Mi Wowo A Habri!

SEGUN E RELATO DI EGON HAUSER

Despues di tawata literalmente ciego pa dos luna, mi wowo a habri pa berdadnan biblico cu mi a ignora durante henter mi bida.

ORA mi reflexiona bek riba mas cu shete decada di mi bida, e tin hopi aspecto cu ta duna mi gran satisfaccion. Pero si tawatin un cos cu mi por a cambia, lo mi a scohe pa conoce Yehova Dios mucho mas prome.

Mi a nace na 1927 na Uruguay, un pais chikito, forma di peer, cu ta keda entre Argentina cu Brazil. E ta un pais bendiciona cu kilometernan largo di paisahe bunita a lo largo di Costa Atlantico. E poblacion ta consisti principalmente di desendiente di imigrantenan Italiano y Spaño. Sinembargo, mi mayornan tawata imigrantenan Hungaro, y tempo cu mi tawata hopi chikito, nos a biba den un bario humilde pero masha uni. Nos no tawatin nodi sera porta na yabi ni pone rehas na bentana. No tawatin descriminacion di rasa entre nos. Stranhero y nativo, hende color scur y blanco, nos tur tawata amigo.

Mi mayornan tawata catoliconan activo, y cu dies aña mi a bira sirbido di misa. Como adulto, mi a colabora cu e parokia local y tawata miembro di un grupo cu a fungi como consehero di e obispo di e diocesis. Como cu mi a scohe e profesion medico, mi a haya invitacion pa participa na un seminario na Venezuela organisa door di Iglesia Catolico. Nos grupo a consisti di docternan cu a specialisa den ginecologia, y pesei nan a asigna nos pa studia pildonan anticonceptivo cu e tempo ei a cuminsa subi mercado.

 Mi Prome Impresionnan Como Studiante di Medicina

Tempo cu mi tawata studia pa docter mi a siña tocante e curpa humano. Mas mi a siña tocante dje, mas impresiona mi tawata keda cu e sabiduria manifesta den e diseño di nos curpa. Por ehempel, un cos cu a asombra mi tawata e curpa su capasidad di cura su mes y recupera di lesion, manera ora e higra of algun repchi ta logra crece bek na nan tamaño normal despues cu kita pida for di nan.

Na mesun tempo, mi a mira hopi victima di accidente grave, y mi tawata bira tristo ora nan muri debi cu nan a haya transfusion di sanger. Te awe mi ta corda con dificil tawata pa papia cu famia di pashentnan cu a muri debi na complicacion di transfusion di sanger. Mayoria biaha, docternan no tawata bisa e famianan cu ta un transfusion di sanger a causa morto di nan ser keri. Mas bien, tawata duna nan un otro motibo. Aunke hopi aña a pasa, ainda mi ta corda con perturba mi tawata sinti mi tocante transfusion di sanger, y finalmente mi a yega na e conclusion cu tin algo robes cu e practica ei. Mare mi tawata sa di Yehova su lei relaciona cu e santidad di sanger! Den tal caso, lo mi a compronde dicon e practica di duna transfusion di sanger tawata perturba mi.—Echonan 15:19, 20.

Mi Ta Haya Satisfaccion Door di Yuda Hende

Cu tempo, mi a bira ciruhano y director di un clinica na Santa Lucía. Tambe mi a traha na e Instituto Nacional di Ciencia Biologico. Esaki a duna mi hopi satisfaccion. Mi tawata yuda hende cu nan malesanan, alivia nan sufrimento fisico, y den hopi caso mi a yuda salba bida. Tambe mi a trece bida nobo na mundo door di yuda mamanan durante parto. Debi na mi experencia anterior cu transfusion di sanger, mi a evita di dun’e na mi pashentnan y mi a haci mas cu tres mil operacion sin sanger. Mi tawata rasona cu un hemoragia ta manera ora un bari tin un lekkage. E unico solucion berdadero ta di drecha e lekkage, y no djis sigui yena e bari.

Dunando Tratamento Medico na Pashentnan Testigo

Den decada di 1960 mi a sera conoci cu Testigonan di Yehova ora cu nan a cuminsa bin na nos clinica pa haci operacion sin sanger. Nunca lo mi lubida e caso di un pashent, un pionero (of predicado di tempo completo) cu tawata yama Mercedes Gonzalez. Su sanger tawata asina abou cu docternan na e hospital universitario no kier a risca oper’e, ya cu nan tawatin sigur cu lo e no sobrevivi esei. Aunke e tawata perdiendo sanger, nos si a oper’e na nos clinica. E operacion tawata un exito, y el a sigui traha pionero pa mas cu 30 aña te na su morto poco tempo pasa na edad di 86 aña.

E amor y interes cu e Testigonan tawata demostra segun cu nan tawata cuida nan rumannan cristian hospitalisa, semper a impresiona mi. Ora mi tawata pasa wak e pashentnan den hospital, mi tawata gusta scucha e Testigonan ora nan tawata papia tocante nan creencianan, y mi tawata acepta e publicacionnan cu nan a ofrece mi. Nunca mi a imagina cu despues di poco tempo lo mi tawata no solamente nan docter, sino tambe nan ruman spiritual.

 Mi a bira mas estrechamente liga cu e Testigonan ora cu mi a casa cu Beatriz, yiu mohe di un pashent. Mayoria di su famia ya caba tawata asocia cu e Testigonan, y despues cu nos a casa, e tambe a bira un Testigo activo. Ami, di otro banda, tawata completamente absorba den mi trabou y mi tawata gosa di cierto prominencia den e campo medico. Bida tawata parce hopi bon. Mi no tawata sa cu pronto mi mundo lo a basha den otro.

Golpi di Bida

Un di e piyo cosnan cu por pasa un ciruhano ta cu e ta perde su bista. Y ta esei a pasa cu mi. Diripiente, e netvlies of retina di ambos wowo a scheur y mi a bira ciego. Mi no tawata sa mes si lo mi por haya mi bista bek. Despues cu nan a opera mi wowonan, mi tawata drumi na cama cu ambos wowo tapa y a cai den depresion. Mi a sinti mi completamente inutil y bashi, te na e punto cu mi a dicidi di pone un fin na mi bida. Mi a baha for di cama y a cana fula fula na muraya en busca di e bentana. Como cu mi tawata na di cuater piso di e clinica, mi a pensa di bula for di bentana. Sinembargo, na luga di esei mi a bai resulta den gang di hospital, y un verpleegster a hiba mi bek na mi cama.

Mi no a bolbe purba mata mi curpa. Pero den mi mundo di scuridad, mi a sigui deprimi y cu mal beis. Durante e periodo aki cu mi tawata ciego, mi a haci un promesa na Dios, si mi haya mi bista bek, lo mi lesa Bijbel di kaft pa kaft. Cu tempo, mi a haya un parti di mi bista bek, y mi por a lesa. Pero mi no por a sigui traha como ciruhano. No obstante, na Uruguay tin un dicho popular cu ta bisa: “No hay mal que por bien no venga.” Y mi tawata a punto di experencia con berdad e dicho ei ta.

Mi A Cuminsa Robes

Mi kier a cumpra e edicion di letter grandi di Biblia de Jerusalén, pero mi a tende cu Testigonan di Yehova tawatin un Bijbel menos caro, y un Testigo hoben a ofrece pa trece un pa mi na cas. E siguiente mainta, e tawata dilanti porta cu e Bijbel. Mi casa a habri porta y para papia cu ne. Na un manera bruto mi a grita for di patras di den cas cu si el a pag’e pa e Bijbel, e mucha homber no tawatin nodi ta den mi cas mas y mester bai, locual, ta mas cu claro el a haci mesora. Mi no tawata sa cu e mesun persona aki pronto lo a hunga un papel importante den mi bida.

Un dia mi a priminti mi casa un cos cu mi no por a cumpli cu ne. Pa compensa esei y pa hacie contento, mi a bis’e cu lo mi bai Memorial, e conmemoracion anual di e morto di Cristo, cu ne. Ora e dia a yega, mi a corda riba mi promesa y mi a asisti na e evento cu ne. E ambiente ameno y e bonbini caloroso cu mi a ricibi, a impresiona mi. Ora e orado a cuminsa su discurso, mi a keda sorprendi pa mira cu tawata e mesun yoncuman cu mi a pidi na un manera bruto pa bai for di mi cas. Su discurso a conmove mi profundamente, y mi a sinti mi malo pa e manera cu mi a trat’e. Con lo mi por a drecha esei?

Mi a pidi mi casa invit’e pa bin come serca nos, pero el a sugeri: “Bo no ta kere cu lo ta mas na su luga pa abo invit’e? Djis keda akinan, y lo e bin serca nos.” Y e tawatin rason. E yoncuman a bin cuminda nos y gustosamente a acepta e invitacion.

E combersacion cu nos tawatin e anochi cu el a bin di bishita tawata e principio di tantisimo cambio pa mi. El a mustra mi e buki E berdad cu ta hiba na bida eterna, * y mi a mustr’e seis ehemplar di e mesun buki. Diferente pashent Testigo a yega di duna mi nan na hospital, pero nunca mi no a lesa nan. Durante y despues di e comemento, te anochi laat, mi a keda haci pregunta un tras di otro, y el a contesta mi nan tur for di Bijbel. Nos a keda papia te den marduga. Prome cu el a bai, e yoncuman a ofrece pa studia Bijbel cu mi, uzando e buki Berdad. Nos a caba di studia e buki den tres luna y a sigui cu e buki “Babilonia e Grandi  A Cai!” E Reino di Dios Ta Domina! * Despues di esei, mi a dedica mi bida na Yehova Dios y a batisa.

Mi A Sinti Mi Util Atrobe

Debi cu literalmente mi tawata ciego, ‘e wowonan di mi curason’ a habri pa berdadnan biblico cu te cu e tempo ei mi a ignora! (Efesionan 1:18) Siña conoce Yehova y su proposito amoroso a cambia henter mi bida. Mi a bolbe sinti mi util y felis. Mi tawata yuda hende tanto fisicamente como spiritualmente, y mi a mustra nan con pa extende nan bida pa un par di aña mas den e sistema di cosnan aki y pa eternidad den e sistema nobo.

Mi a keda al dia cu e avancenan den medicina, y mi a haci investigacion tocante e riesgonan di sanger, tratamentonan alternativo, derechonan di pashent y bioetica. Tambe mi a haya oportunidad pa comparti e informacion aki cu e comunidad medico local ora nan tawata invita mi pa papia riba e temanan aki na seminarionan medico. Na 1994, mi a asisti na e prome congreso tocante terapia sin sanger na Rio de Janeiro, Brazil, y mi a duna un discurso tocante con pa trata cu hemoragia. Parti di e informacion ei a keda inclui den un articulo cu mi a skirbi, “Una propuesta: Estrategias para el Tratamiento de las Hemorragias”, y cu a sali publica den e revista medico Hemoterapia.

Kedando Fiel bou di Presion

Na principio, mi dudanan relaciona cu transfusion di sanger tawata basa principalmente riba conocemento cientifico. Sinembargo, ora mi mes a bira un pashent di hospital, mi a descubri cu no tawata facil pa nenga transfusion di sanger y mantene mi fe ora bo ta confronta presion fuerte di e docternan. Despues di un atake di curason pisa, mi tawatin cu splica mi posicion pa dos ora largo na un ciruhano. E tawata yiu homber di bon amigonan di mi, y el a bisa cu lo e no laga mi muri si e ta pensa cu un transfusion di sanger lo por salba mi bida. Silenciosamente mi a haci oracion na Yehova, y a pidie yuda e docter aki compronde mi posicion y respet’e asta si e no tawata di acuerdo cu ne. Finalmente, e docter a priminti di respeta mi deseo.

Na un otro ocasion, mi mester a kita un tumor grandi for di e klier di prostat. Mi tawatin un sangramento interno. Un biaha mas mi a haya mi ta splica e motibonan pakico mi ta nenga transfusion di sanger, y maske mi a perde dos tercera parti di mi sanger, e personal medico a respeta mi posicion.

Un Cambio di Actitud

Como miembro di e Asociacion Internacional di Bioetica, mi tawatin e satisfaccion di mira un cambio den e actitud di personal medico y di autoridadnan huridico pa cu derecho di pashent. Docternan su actitud autoritario a ser remplasa pa respet pa e derecho di e pashent di acepta tratamento medico basa riba informacion. Awor nan ta permiti pashentnan yuda scohe ki tratamento nan kier. Nan no ta mira Testigonan di Yehova mas como fanaticonan cu no merece atencion medico. Al contrario, nan ta considera nan como pashentnan bon informa y cu hende mester respeta nan derecho. Na seminarionan medico y den programanan na television, profesornan renombra a bisa: “Gracias na e esfuersonan di Testigonan di Yehova, awor nos ta compronde . . .” “Nos a siña for di e Testigonan . . .” y “Nan a siña nos con pa mehora.”

 Hende a yega di bisa cu bida ta mas importante cu tur otro cos, pasobra independencia, libertad y dignidad lo no nifica nada sin dje. Awor hopi hende ta acepta un concepto huridico superior, y ta reconoce cu cada persona ta doño di su propio derechonan personal y ta e so por dicidi cua di su derechonan mester tin prioridad den cualkier circunstancia. Den e manera aki ta duna prioridad na dignidad, na libertad pa scohe y na creencianan religioso. E pashent tin derecho di tuma su propio decisionnan relaciona cu su salu. Servicionan di Informacion di Hospital, estableci door di Testigonan di Yehova, a yuda hopi docter bai dilanti den nan comprondemento di e asuntonan aki.

E sosten continuo di mi famia a permiti mi ser util den e sirbishi di Yehova y tambe di sirbi como anciano den e congregacion cristian. Manera mi a declara caba, e cos cu mas mi ta lamenta ta cu mi no a siña tocante Yehova mas tempran den bida. Sinembargo, mi ta masha gradicido cu el a habri mi wowo pa e maraviyoso speransa di biba bou di e areglo di e Reino di Dios, caminda “ningun habitante lo no bisa: ‘Mi ta malo.’”—Isaias 33:24. *

[Nota]

[Plachi na pagina 24]

Aki mi tin 30 y pico aña, y tawata traha na e hospital na Santa Lucía

[Plachi na pagina 26]

Hunto cu mi casa, Beatriz, na 1995