Yehova Ta Percura pa Nos Necesidadnan Diario

“No sigui precupa. Pasobra ... boso Tata sa cu boso tin mester di e cosnan aki.”—LUCAS 12:29, 30.

1. Con Yehova ta percura pa e mundo di animal?

BO A yega di wak con un mofi of cualkier otro parha ta cana coba den loke ta parce simplemente tera? Probablemente bo a puntra bo mes ta kico lo e por haya pa come door di djis cana pik den tera. Den su Sermon Riba Sero, Hesus a mustra cu nos por siña un les for di e manera cu Yehova ta percura pa parha. Hesus a declara: “Mira e parhanan di shelo cu no ta sembra ni cosecha, ni ta warda den mangasina, y toch boso Tata celestial ta alimenta nan. Boso no tin mucho mas balor cu nan?” (Mateo 6:26) Den maneranan maraviyoso Yehova ta percura cuminda pa tur su criaturanan.—Salmo 104:14, 21; 147:9.

2, 3. Ki lesnan spiritual nos por siña for di e echo cu Hesus a siña nos pidi pa nos pan di cada dia?

² Dicon anto Hesus a inclui den su oracion modelo e peticion: “Duna nos awe nos pan di cada dia”? (Mateo 6:11) Nos por siña lesnan spiritual profundo for di e peticion simpel aki. Na prome luga, e peticion ta recorda nos cu Yehova ta e berdadero fuente di tur provision cu nos mester. (Salmo 145:15, 16) Hende por planta y cultiva, pero ta Dios so por laga cos crece, tanto spiritualmente como fisicamente. (1 Corintionan 3:7) Loke nos ta come y bebe ta un regalo di Dios. (Echonan 14:17) Door di pidie duna nos loke nos mester pa cada dia nos ta mustra cu nos no ta considera e provisionnan ei como cosnan cu nos ta haya di mes. Claro cu e peticion ei no ta libra nos di e responsabilidad di traha si nos ta den posicion di por traha.—Efesionan 4:28; 2 Tesalonicensenan 3:10.

³ Na di dos luga, door di pidi pa nos “pan di cada dia”, of literalmente pa nos ‘pan pa e dia aki’, esei ta indica cu nos no mester ta demasiado precupa tocante futuro. Mas aleu Hesus a declara: “No precupa boso mes anto, bisando: ‘Kico nos lo come?’ of ‘Kico nos lo bebe?’ of ‘Kico nos lo bisti?’ Pasobra tur e cosnan aki e paganonan ta busca; ma boso Tata celestial sa cu boso tin mester di tur e cosnan aki. Ma busca prome e reino di Dios y su husticia, y tur e cosnan aki lo wordo añadi na boso. Pesei, no precupa boso mes pa e dia di mañan . . . Cada dia tin suficiente problema di su mes.” (Mateo 6:31-34) Nos peticion pa nos “pan di cada dia” ta establece e patronchi cu nos mester sigui pa nos por hiba un bida simpel di “santidad acompaña pa contentamento.”—1 Timoteo 6:6-8.

Alimento Spiritual pa Cada Dia

4. Ki incidente den bida di Hesus y di e Israelitanan ta enfatisa e importancia di tuma alimento spiritual?

⁴ Nos oracion pa nos pan di cada dia mester recorda nos tambe cu tur dia nos tin mester di alimento spiritual. Aunke Hesus tawatin hopi hamber despues di a yuna pa un periodo largo, el a resisti e tentacion di Satanas pa cambia piedra den pan, y a bisa: “Ta para skirbi: ‘Hende lo no biba di pan so, ma di tur palabra  cu ta sali for di boca di Dios.’” (Mateo 4:4) Aki Hesus a cita profeta Moises, kende a bisa e Israelitanan: “[Yehova] a humiya bo y a laga bo pasa hamber, y a alimenta bo cu mana cu bo no tawata conoce, ni bo tatanan no tawata conoce, pa e haci bo compronde cu hende no ta biba di pan so, ma cu hende ta biba di tur loke ta sali for di boca di SEÑOR.” (Deuteronomio 8:3) E manera cu Yehova a percura e mana no solamente a duna e Israelitanan alimento fisico, sino tambe a siña nan lesnan spiritual. Un di e lesnan ei tawata cu nan mester a “recohe e porcion pa un dia.” Si nan a recohe mas di loke tawata suficiente pa e dia, e loke a resta a cuminsa hole stinki y cria bichi. (Exodo 16:4, 20) Sinembargo, esaki no a sosode riba e di seis dia di siman ora cu nan mester a recohe dobel e cantidad pa satisface nan necesidadnan pa sabat. (Exodo 16:5, 23, 24) Pues anto, e mana a graba den nan mente cu nan mester tawata obedecido, y cu nan bida a depende no solamente di pan sino di ‘tur loke ta sali for di boca di Yehova.’

5. Con Yehova ta percura alimento spiritual diariamente pa nos?

⁵ Nos tambe tin cu alimenta nos mes diariamente cu alimento spiritual cu Yehova ta percura mediante su Yiu. Ta pa e proposito ei Hesus a nombra un “esclabo fiel y prudente” pa percura “cuminda na su debido tempo” pa e famia di fe. (Mateo 24:45) E grupo di esclabo fiel no solamente ta percura un abundancia di alimento spiritual den forma di publicacionnan pa studia Bijbel sino tambe ta anima nos pa lesa Bijbel tur dia. (Hosue 1:8; Salmo 1:1-3) Mescos cu Hesus, nos tambe por haya nutricion spiritual door di haci esfuerso tur dia pa siña tocante Yehova y haci su boluntad.—Huan 4:34.

Pordon di Pica

6. Pa cua debe nos ta pidi pordon, y bou di ki condicion Yehova ta dispuesto pa cansela nan?

⁶ E siguiente peticion den e oracion modelo ta: “Pordona nos nos debenan, mescos cu nos tambe ta pordona nos debedonan.” (Mateo 6:12) Aki Hesus no tawata papia di debe di placa. E tawatin na mente pordon di nos picanan. Den e Evangelio di Lucas e peticion aki den e oracion modelo ta bisa: “Pordona nos nos picanan, pasobra nos tambe ta pordona tur esnan cu ta debe nos.” (Lucas 11:4) Pues, ora nos peca ta como si fuera nos ta acumula un debe serca Yehova. Pero nos Dios amoroso ta dispuesto pa ‘kita’ of cansela e debe ei si nos repenti sinseramente, “comberti”, y pidie pordon a base di fe den e sacrificio di rescate di Cristo.—Echonan 3:19; 10:43; 1 Timoteo 2:5, 6.

7. Dicon nos mester resa pidi pordon tur dia?

⁷ Mira for di un otro punto di bista, nos ta peca ora nos no cumpli cu Yehova su normanan di husticia. Debi na pica hereda, nos tur ta bisa, haci y pensa cos malo of nos ta keda sin haci loke nos lo mester a haci. (Eclesiastes 7:20; Romanonan 3:23; Santiago 3:2; 4:17) Pesei, sea cu nos ta conciente cu nos a peca durante dia of no, nos tin cu inclui den nos oracionnan diario un peticion pa pordon di nos picanan.—Salmo 19:12; 40:12.

8. Nos oracion pa pordon di pica mester pone nos haci kico, y ki bon resultado esaki lo tin?

⁸ Tambe nos mester haci oracion pidi pordon despues cu nos haci un examinacion honesto di nos mes, y nos repenti y confesa a base di fe den e poder di rescate di e sanger di Cristo. (1 Huan 1:7-9) Pa duna prueba cu nos oracion ta sinsero, nos mester apoya nos peticion pa pordon cu “obranan cu ta cuadra cu repentimento.” (Echonan 26:20) E ora ei nos por tin fe cu Yehova ta cla pa pordona nos picanan. (Salmo 86:5; 103:8-14) Resultado di esaki ta un pas mental sin igual, “e pas di Dios, cu ta surpasa tur comprondemento”, loke na su turno “lo warda [nos] curason y [nos] mente den Cristo Hesus.” (Filipensenan 4:7) Pero Hesus su oracion modelo ta siña nos mas cos ainda cu nos tin cu haci pa haya pordon pa nos picanan.

 Pa Nos Ser Pordona, Nos Tin Cu Pordona

9, 10. (a) Ki comentario Hesus a agrega na e oracion modelo, y kico esaki ta enfatisa? (b) Ki ehempel adicional Hesus a duna pa mustra cu nos mester pordona otro hende?

⁹ Ta interesante pa nota cu e peticion “pordona nos nos debenan, mescos cu nos tambe ta pordona nos debedonan”, ta e unico parti di e oracion modelo cu Hesus a duna un splicacion p’e. Despues cu el a conclui e oracion, el a agrega: “Pasobra si boso pordona hende nan transgresionnan, boso Tata celestial tambe lo pordona boso. Ma si boso no pordona hende, boso Tata tampoco lo no pordona boso transgresionnan.” (Mateo 6:14, 15) Pues anto, Hesus a mustra bon cla cu Yehova su pordon ta depende di si nos ta dispuesto pa pordona otro hende.—Marco 11:25.

¹⁰ Na un otro ocasion, Hesus a duna un comparacion cu ta mustra cu ta necesario pa nos pordona otro hende si nos ta spera pa Yehova pordona nos. El a conta di un rei cu generosamente a cansela un debe enorme cu un esclabo a acumula. Pero despues e rei a castiga e mesun homber aki severamente pasobra e homber a nenga di cansela un debe hopi mas chikito di un otro esclabo. Hesus a termina su comparacion bisando: “Asina tambe mi Tata celestial lo haci cu boso, si cada un di boso no pordona su ruman di henter su curason.” (Mateo 18:23-35) E les ta bon cla: E debe di pica cu Yehova a pordona cada un di nos ta hopi mas grandi cu cualkier falta cu cualkier hende por a comete contra nos. Ademas, Yehova ta pordona nos diariamente. Siguramente, nos por pordona e ofensa cu otro hende de bes en cuando ta comete contra nos.

11. Nos lo sigui ki conseho cu apostel Pablo a duna si nos kier pa Yehova pordona nos, y cu ki bon resultado?

¹¹ Apostel Pablo a skirbi: “Sea cariñoso cu otro, misericordioso, pordonando otro,  mescos cu Dios den Cristo tambe a pordona boso.” (Efesionan 4:32) Pordonamento di otro ta promove pas entre cristiannan. Mas aleu Pablo a urgi cristiannan: “Manera esnan cu a wordo scohi di Dios, santo y stima, bisti un curason di compasion, cariño, humildad, mansedumbre y pasenshi. Y boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci. Y ademas di tur e cosnan aki bisti amor, cual ta e laso perfecto di unidad.” (Colosensenan 3:12-14) Tur e cosnan aki ta cai bou di e oracion cu Hesus a siña nos: “Pordona nos nos debenan, mescos cu nos tambe ta pordona nos debedonan.”

Proteccion Ora Nos Ta den Tentacion

12, 13. (a) Kico lo no por ta e nificacion di e penultimo peticion di e oracion modelo? (b) Ken ta e gran Tentado, y kico ta nifica ora nos ta pidi pa no ser hiba den tentacion?

¹² E penultimo peticion den Hesus su oracion modelo ta: “No hiba nos den tentacion.” (Mateo 6:13) Hesus tawata kiermen cu nos mester pidi Yehova pa no tenta nos? Esaki no por ta asina pasobra disipel Santiago a skirbi bou di inspiracion: “No laga ningun hende bisa ora cu e wordo tenta: ‘Mi ta wordo tenta door di Dios’; pasobra Dios no por wordo tenta door di maldad, y e mes no ta tenta ningun hende.” (Santiago 1:13) Ademas, e salmista a skirbi: “Si abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) Yehova no ta vigila ansiosamente pa wak delaster un eror cu nos comete, y siguramente e no ta purba tenta nos pa comete eror. Pues, kico e parti aki di e oracion modelo ta nifica?

¹³ Esun cu ta purba tenta nos pa comete eror, cu ta uza trampa pa pone nos cai, y asta ta purba devora nos ta Satanas e Diabel. (Efesionan 6:11) E ta e gran Tentado. (1 Tesalonicensenan 3:5) Ora nos pidi Yehova pa no hiba nos den tentacion, nos ta pidie pa no laga nos cai ora nos ta den tentacion. Nos ta pidie pa yuda nos pa “Satanas no tuma bentaha riba nos”, pa nos no entrega na tentacion. (2 Corintionan 2:11) Nos oracion ta pa nos keda “bou di e proteccion di e Haltisimo”, ricibiendo e proteccion spiritual cu ta ser duna na esnan cu ta reconoce Yehova su soberania den tur loke nan ta haci.—Salmo 91:1-3.

14. Con apostel Pablo ta sigura nos cu Yehova lo no bandona nos si nos acudi na dje ora nos ta den tentacion?

¹⁴ Nos por tin sigur cu si ta esei ta nos deseo sinsero—cu nos ta expresa via nos oracion- y accionnan—Yehova nunca lo no bandona nos. Apostel Pablo ta sigura nos: “Ningun tentacion, fuera di loke tur hende ta pasa aden, no a bin riba boso; y Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.”—1 Corintionan 10:13.

“Libra Nos for di e Malbado”

15. Dicon ta mas importante cu nunca pa nos pidi pa libra nos for di e malbado?

¹⁵ Segun e manuscritonan mas confiabel di e Scritura Griego Cristian, Hesus su oracion modelo ta termina cu e palabranan: “Libra nos for di e malbado.” * (Mateo 6:13) Proteccion contra Diabel ta asta mas necesario den e tempo di fin aki. Satanas y su demoñonan ta hibando un guera contra e resto ungi, “kendenan ta warda e mandamentonan di Dios y tin e [“trabou di duna”, NW] testimonio di Hesucristo.” (Revelacion 7:9; 12:9, 17) Apostel Pedro a spierta cristiannan: “Sea sobrio, sea alerta. Boso adversario, e Diabel, ta  cana rond manera un leon cu ta gruña, buscando ken e por devora. Ma resistie, firme den boso fe.” (1 Pedro 5:8, 9) Satanas lo tin gana di stop nos trabou di duna testimonio, y mediante su agentenan riba tera—sea ta religioso, comercial of politico—e ta purba intimida nos. Sinembargo, si nos para firme, Yehova lo libra nos. Disipel Santiago a skirbi: “Pesei, somete boso na Dios. Resisti Diabel y e lo hui for di boso.”—Santiago 4:7.

16. Ki medionan Yehova tin na su disposicion pa yuda su sirbidonan cu ta pasa den prueba?

¹⁶ Yehova a permiti Diabel tenta su Yiu. Pero despues cu Hesus a resisti Diabel, uzando e Palabra di Dios como proteccion, Yehova a manda angel pa fortalec’e. (Mateo 4:1-11) Asina tambe Yehova ta uza su angelnan pa yuda nos si nos haci oracion cu fe y haci Yehova nos refugio. (Salmo 34:7; 91:9-11) Apostel Pedro a skirbi: “Señor sa tambe con pa rescata e santonan for di tentacion, y con pa tene e inhustonan bou di castigo pa e dia di huicio.”—2 Pedro 2:9.

Liberacion Completo Ta Serca

17. Con Hesus mediante e oracion modelo a pone cosnan den nan perspectiva corecto?

¹⁷ Den e oracion modelo, Hesus ta pone cosnan den nan perspectiva corecto. Nos precupacion principal mester ta santificacion di Yehova su gran nomber santo. Siendo cu e Reino Mesianico ta e instrumento pa logra esaki, nos ta pidi den oracion pa e Reino bin y destrui tur reino of gobierno humano imperfecto y haci sigur cu Dios su boluntad ta sosode plenamente tanto den shelo como riba tera. Nos speransa pa bida eterno riba e tera comberti den paraiso ta depende di e santificacion di Yehova su nomber y di cu henter universo ta reconoce su soberania husto. Despues di pidi pa e cosnan sumamente importante aki den oracion, nos por pidi pa nos necesidadnan diario, pa pordon di nos picanan y pa ser libra for di tentacion y trampa di e malbado, Satanas e Diabel.

18, 19. Con Hesus su oracion modelo ta yuda nos keda alerta y haci nos speransa ‘firme te na fin’?

¹⁸ Nos liberacion completo for di e malbado y su sistema di cosnan corupto ta yegando serca. Satanas sa bon bon cu e tin solamente “un poco tempo mas” pa e baha su “gran furia” riba tera, particularmente riba e sirbidonan fiel di Yehova. (Revelacion 12:12, 17) Den e señal combina di e fin di e sistema aki, Hesus a profetisa susesonan excitante, di cua algun ainda tin cu tuma luga. (Mateo 24:3, 29-31) Segun cu nos ta mira e cosnan aki sosode, nos speransa di liberacion lo bira mas briyante. Hesus a declara: “Ma ora cu e cosnan aki cuminsa tuma luga, wak ariba y lanta boso cabes, pasobra boso redencion ta yegando serca.”—Lucas 21:25-28.

¹⁹ E oracion modelo cortico y al caso cu Hesus a duna su disipelnan ta duna nos un guia confiabel relaciona cu loke nos mester inclui den nos oracionnan segun cu e fin ta acerca. Laga nos keda cu e confiansa cu te na fin Yehova lo sigui percura pa nos necesidadnan diario, tanto esnan spiritual como material. Door di keda alerta encuanto oracion, nos lo por “tene firme na e principio di nos siguransa te na fin.”—Hebreonan 3:14; 1 Pedro 4:7.

[Nota]

Como Repaso

• Kico e peticion pa nos “pan di cada dia” ta encera?

• Splica e peticion “pordona nos nos debenan, mescos cu nos tambe ta pordona nos debedonan.”

• Kico nos kiermen ora nos pidi Yehova pa no hiba nos den tentacion?

• Dicon nos tin cu pidi pa “libra nos for di e malbado”?

[Preguntanan di Estudio]

[Plachinan na pagina 15]

Nos mester pordona otro hende pa Dios pordona nos

[Reconocemento pa Potret na pagina 13]

Lydekker