“E Esena di e Mundo Aki Ta Cambiando”

“Ma esaki mi ta bisa, rumannan, tempo ta cortico.”—1 CORINTIONAN 7:29.

1, 2. Ki cambionan bo a mira durante bo bida?

KI CAMBIONAN den mundo abo a mira durante bo bida? Bo por menciona algun di nan? Por ehempel, tin e progreso cu hende a haci riba tereno medico. Gracias na investigacion den e campo ei, den algun pais awor e edad promedio cu hende ta biba, a subi. Na principio di siglo 20 nan tawata biba menos cu 50 aña y awor nan ta biba riba 70 aña! Pensa tambe riba e maneranan cu nos a beneficia di e uzo apropiado di radio, television, telefon cellular y mashin di fax. Otro avancenan importante cu nos no mester pasa por halto ta esnan cu a tuma luga riba tereno di educacion, transporte y den asuntonan di derecho humano, cuanan tur ta cos cu a drecha bida di miyones di hende.

² Claro cu no ta tur cambio tawata positivo. Ta imposibel pa nos ignora e efectonan devastador di aumento di criminalidad, e deterioro di norma y balor moral, e aumento drastico di uzo di droga, di diborcio, di inflacion y e creciente menasa di terorismo. En todo caso, lo bo ta probablemente di acuerdo cu loke apostel Pablo a skirbi hopi tempo pasa: “E esena di e mundo aki ta cambiando.”—1 Corintionan 7:31, NW.

3. Kico Pablo tawata kiermen ora el a skirbi cu “e esena di e mundo aki ta cambiando”?

³ Den e idioma Griego original, e palabranan cu Pablo a uza ta nifica cu el a compara mundo cu un escenario di teatro. E actornan riba e escenario ei—personanan famoso riba tereno politico, religioso y cultural—ta subi escenario, hunga nan respectivo rolnan, anto caba ta baha bai pa otro hende subi. Esaki ta tumando luga pa siglonan caba. Den pasado, un dinastia por tawata na mando pa decadanan —asta siglonan—y tawata tuma hopi tempo pa un cambio sosode. Awendia si no ta asina, ya cu rumbo di historia por cambia den un kinipi di wowo ora nan asesina un lider prominente! Si, den e tempo turbulento aki, nos no sa kico mañan lo trece.

4. (a) Ki punto di bista balansa cristiannan mester tin relaciona cu susesonan mundial? (b) Cua dos area di evidencia combencente nos lo considera awor?

⁴ Si mundo ta un escenario y su lidernan ta e actornan, anto cristiannan ta e publico cu ta para wak, e espectadornan. * Sinembargo, door cu cristiannan “no ta di mundo”, nan no ta precupa nan mes demasiado cu e actuacion of asta cu e caracter individual di e actornan. (Huan 17:16) Mas bien, nan ta wak ansiosamente si tin indicacionnan cu ta mustra cu e drama ta yegando su culminacion—un final catastrofico—pasobra nan sa cu e sistema aki tin cu termina prome cu Yehova introduci e mundo nobo di husticia tan spera. * Pesei laga nos analisa dos area di evidencia cu ta demostra cu nos ta bibando den e tempo di e fin y cu e mundo nobo ta serca. Nan ta (1) cronologia biblico y (2) e situacion mundial cu ta bai atras.—Mateo 24:21; 2 Pedro 3:13.

Porfin Ta Soluciona un Misterio!

5. Kico ta ‘e temponan stipula di e paganonan’, y dicon nan ta interesa nos?

⁵ Cronologia ta un estudio di e relacion cu tin entre tempo y susesonan. Hesus a papia di un tempo durante cua e lidernan di mundo lo tawata e actornan principal riba escenario, sin cu e Reino di Dios lo a interferi. Hesus a yama e periodo ei “e temponan [stipula] di e paganonan.” (Lucas 21:24) Na fin di e ‘temponan stipula’ ei Dios su Reino celestial lo a bin na poder, cu Hesus como su Gobernante legitimo. Na principio, Hesus lo a goberna “meimei di [su] enemigonan.” (Salmo 110:2) Caba, segun Daniel 2:44, e Reino lo a “garna y pone un fin” na tur gobierno humano, y lo e dura pa semper.

6. Ki ora ‘e temponan stipula di e paganonan’ a cuminsa, cuanto nan a dura, y ki ora nan a termina?

⁶ Ki ora ‘e temponan stipula di e paganonan’ lo a termina y e gobernacion di e Reino di Dios lo a cuminsa? E contesta, cu tawata “seya te na e tempo di e fin”, tin di haci cu cronologia biblico. (Daniel 12:9) Segun cu e “tempo” ei tawata acerca, Yehova a dal paso pa revela e contesta na un grupo di studiante di Bijbel humilde. Cu yudansa di Dios su spirito santo, nan a bin compronde cu ‘e temponan stipula di e paganonan’ a cuminsa cu destruccion di Herusalem na aña 607 prome cu nos era y cu e tawata un periodo di 2.520 aña. A base di esei nan a calcula cu aña 1914 a marca fin di ‘e temponan stipula di e paganonan.’ Tambe nan a bin realisa cu 1914 tawata comienso di e fin di e sistema di cosnan aki. Como un studiante di Bijbel, bo por uza e Scritura pa splica con ta calcula e fecha di 1914? *

7. Cua ta e textonan biblico cu ta yuda nos calcula comienso, duracion y fin di e shete periodo di tempo menciona den buki di Daniel.

⁷ Nos ta haya un indicacion scondi den e buki di Daniel. Siendo cu Yehova a uza Rei Nabucodonosor di Babilonia pa destrui Herusalem na comienso di ‘e temponan stipula di e paganonan’ na aña 607, Yehova a revela mediante e gobernante ei cu e nacionnan lo a sigui goberna pa un total di shete periodo di tempo simbolico sin cu Dios ta interveni. (Ezekiel 21:26, 27; Daniel 4:16, 23-25) Con largo e shete periodo di tempo ei tawata? Segun Revelacion 11:2, 3, y 12:6, 14, tres tempo y  mei ta 1.260 dia. Pues, shete tempo ta dobel di esei, esta, 2.520 dia. Esei ta tur cos? No, pasobra Yehova a duna profeta Ezekiel, kende a biba mesun tempo cu Daniel, e regla pa interpreta e simbolismo: “Mi a stipula esaki pa bo . . . un dia pa cada aña.” (Ezekiel 4:6) Pesei e shete periodo di tempo lo ta en realidad 2.520 aña. Si nos cuminsa conta e periodo di 2.520 aña for di aña 607 prome cu nos era, nos por conclui cu e tempo stipula lo mester a termina na aña 1914.

“E Tempo di e Fin” Ta Keda Confirma

8. Ki evidencia bo por indica cu ta mustra cu e situacion di mundo a empeora desde 1914?

⁸ Susesonan mundial for di 1914 en adelante a confirma cu e comprondemento menciona ariba, basa riba cronologia biblico, ta corecto. Hesus mes a bisa cu “fin” di e sistema aki lo ta marca pa guera, hamber y pest. (Mateo 24:3-8; Revelacion 6:2-8) Anto esei sigur tawata e caso desde 1914. Apostel Pablo a agrega mas informacion, bisando cu lo tin un diferencia bisto den e actitud di hende pa cu otro. El a duna un descripcion exacto di e cambionan cu nos tur a mira.—2 Timoteo 3:1-5.

9. Kico observadonan tin di bisa tocante e situacion di mundo desde 1914?

⁹ Di berdad “e esena di e mundo aki” a cambia asina hopi desde 1914? Den e buki The Generation of 1914 (E Generacion di 1914), Profesor Robert Wohl a bisa: “Esnan cu a sobrevivi e guera nunca por a kita for di nan mente e conviccion cu na augustus 1914 un mundo a termina y un otro a cuminsa.” Confirmando esaki, dr. Jorge A. Costa e Silva, director di salu mental di e Organisacion Mundial di Salu, a skirbi: “Nos ta biba den tempo di cambionan extraordinariamente rapido, loke finalmente ta genera nivelnan di ansiedad y stress nunca bisto den historia humano.” Bo tambe a experencia esei personalmente?

10. Con Bijbel ta splica pakico e situacion di mundo a empeora desde 1914?

¹⁰ Ken ta e malechor tras di e situacion di mundo cu ta empeora? Revelacion 12:7-9 ta desenmascara e culpabel: “Tawatin guera den shelo, Miguel [Hesucristo] y su angelnan tawata haci guera contra e dragon [Satanas e Diabel]. Y e dragon y su angelnan tawata haci guera, y nan no a prevalece, y no tawatin luga mas pa nan den shelo. Y e gran dragon a wordo tira abou, ... kende ta gaña henter mundo.” Pues, Satanas e Diabel ta esun cu ta causa problema, y e echo cu nan a sac’e for di shelo na 1914 a nifica “ai di tera y lama, pasobra Diabel a baha bini serca boso cu gran furia, sabiendo cu ta ked’e solamente un poco tempo mas.”—Revelacion 12:10, 12.

Loke Lo Pasa den e Ultimo Esena

11. (a) Ki metodonan Satanas ta uza pa gaña “henter mundo”? (b) Apostel Pablo a hala atencion na ki esfuerso special di Satanas?

¹¹ Sabiendo cu su fin ta yegando serca, Satanas  for di 1914 a aumenta su esfuerso pa gaña “henter mundo.” Como e gañado maestro, Satanas ta traha tras di cortina, y ta pone riba escenario como su actornan, lidernan mundial y personanan cu hopi influencia. (2 Timoteo 3:13; 1 Huan 5:19) Un di su metanan ta pa laga humanidad kere cu su manera di goberna por trece berdadero pas pa nan. Por lo general, su propaganda tin exito, pasobra hende ta keda optimista apesar di creciente evidencia cu cosnan ta bayendo di malo pa piyo. Apostel Pablo a profetisa cu un poco prome cu Dios destrui e sistema di cosnan aki, lo tin un manifestacion notabel di propaganda satanico. El a skirbi: “Mientras cu nan ta bisa: ‘Pas y siguridad!’ perdicion lo bini riba nan diripiente, manera dolor di parto riba un mohe na estado.”—1 Tesalonicensenan 5:3; Revelacion 16:13.

12. Ki esfuersonan continuo tawatin pa trece pas den nos tempo?

¹² Den ultimo añanan, politiconan cu frecuencia a uza e frase “pas y siguridad” pa describi varios plan humano. Nan a asta designa aña 1986 como Aña Internacional di Pas, aunke e aña ei no a cumpli cu su nomber. Ta e esfuersonan aki di lidernan mundial ta e cumplimento completo di 1 Tesalonicensenan 5:3, of Pablo tawata referi na un suseso spesifico asina dramatico cu henter mundo lo a tuma nota di dje?

13. Ora Pablo a profetisa e grito di “Pas y siguridad!”, cu kico el a compara e destruccion cu lo sigui, y kico nos por siña for di esaki?

¹³ Como cu hopi biaha ta te despues cu profecianan di Bijbel a cumpli of segun cu nan ta cumpli nos por compronde nan plenamente, nos lo tin cu warda pa mira kico ta bai pasa. Pero ta interesante si cu Pablo a compara e destruccion repentino despues di e grito di “Pas y siguridad!” cu dolor di parto di un mohe na estado. Durante un periodo di nuebe luna, un mama na estado pocopoco ta bira mas conciente di e baby cu ta creciendo den su bariga. Kisas e por tende e baby su curason bati of e ta sintie ta move den su bariga. Podise e baby ta asta dal e mama scop. E señalnan ta bira mas y mas cla te ora cu riba un dia e mama ta sinti un dolor fuerte, locual ta indica cu e momento tan spera—e nacemento di e baby—a yega. Pesei, sea cual sea e manera cu e grito profetisa di “Pas y siguridad!” cumpli, lo e hiba na un suseso repentino y doloroso, pero cu al final lo ta un bendicion: destruccion di maldad y comienso di un sistema mundial nobo.

14. Den ki orden general susesonan futuro lo tuma luga, hibando na ki resultado?

¹⁴ Pa cristiannan cu ta para wak como espectador, e benidero destruccion lo ta algo cu ta inspira temor. Prome, e reinan di tera (e parti politico di e organisacion di Satanas) lo ataca e apoyadonan di Babilonia e Grandi (e parti religioso) y destrui nan. (Revelacion 17:1, 15-18) Pues, den un cambio sorprendente di acontecemento, e reino di Satanas lo bira dividi contra su mes, y un parti lo ataca e otro parti, y Satanas lo no por haci nada pa evita esei. (Mateo 12:25, 26) Yehova lo pone den curason di e reinan di tera “pa ehecuta su proposito”, esta, caba cu su adversarionan religioso for di riba tera. Despues cu nan destrui religion falso, Hesucristo lo encabesa su ehersitonan celestial pa caba completamente cu loke ta resta di e organisacion di Satanas: e elementonan comercial y politico. Por ultimo, lo saca Satanas mes for di accion. Cu esei, e cortina di e escenario mundial lo baha, y e drama cu tin hopi tempo ta hunga, lo yega na su fin.—Revelacion 16:14-16; 19:11-21; 20:1-3.

15, 16. Ki impacto e recordatorio cu ‘e tempo cu a resta ta cortico’ mester tin riba nos bida?

¹⁵ Ki tempo tur e cosnan aki lo sosode? Nos no sa e dia ni e ora. (Mateo 24:36) Pero loke si nos sa ta cu “tempo ta cortico.” (1 Corintionan 7:29) Pesei ta importante pa nos haci bon uzo di e tempo cu ta resta. Con? Manera apostel Pablo a splica, nos mester uza nos tempo pa haci e cosnan mas importante, a costo di cosnan innecesario, y laga cada dia conta.  Pakico? “Pasobra e dianan ta malo.” Y door cu nos ta ‘compronde kico ta Yehova su boluntad’ pa nos, nos lo no malgasta e tiki tempo balioso cu a resta.—Efesionan 5:15-17; 1 Pedro 4:1-4.

¹⁶ Unabes cu nos sa cu henter e sistema di cosnan aki lo ser elimina, ki efecto esei mester tin riba cada un di nos personalmente? Apostel Pedro a skirbi pa nos beneficio: “Como cu tur e cosnan aki lo wordo destrui di e manera aki, ki sorto di hende boso mester ta den un conducta santo y deboto.” (2 Pedro 3:11) En berdad esaki ta e sorto di hende cu nos mester ta! Na harmonia cu Pedro su conseho sabi, nos tin cu (1) vigila nos conducta pa nos por tin sigur cu e ta santo y (2) haci sigur cu nos obranan di debocion y celo den Yehova su sirbishi semper ta refleha nos amor profundo p’e.

17. Contra ki trampanan di Satanas cristiannan fiel mester vigila?

¹⁷ Amor pa Dios lo yuda nos pa no pega nos curason na e mundo aki debi na e cosnan atractivo cu e tin. En bista di loke ta spera e sistema di cosnan actual, ta peligroso pa nos namora di e encanto y luho di e estilo di bida mundano y obsesiona cu placer. Aunke nos ta biba y traha den mundo, nos mester haci caso di e conseho sabi pa no haci uzo completo di mundo. (1 Corintionan 7:31) De echo, nos tin cu haci nos best pa proteha nos mes pa asina e propaganda di mundo no gaña nos. E mundo aki lo no logra soluciona su problemanan. Lo e no sigui mantene su mes pa tempo indefini. Dicon nos por ta sigur di esaki? Pasobra e Palabra inspira di Dios ta bisa esei: “E mundo ta pasa bai y su deseonan tambe, ma esun cu haci e boluntad di Dios ta permanece pa semper.”—1 Huan 2:17.

Lo Miho Tin Cu Bin Ainda!

18, 19. Cua ta e cambionan cu bo ta anhela pa mira den e mundo nobo, y dicon lo ta bale la pena cu bo a warda?

¹⁸ Pronto Yehova lo baha e cortina riba Satanas y su apoyadonan. Despues di esei, cu e bendicion di Dios, fiel sobrevivientenan di e fin di e sistema aki lo cuminsa traha pa trece cambionan riba “escenario” cu lo dura pa semper. Lo no tin guera mas pa daña e escenario mundial; Dios lo “haci gueranan stop te na e fin di tera.” (Salmo 46:9) Na luga di scarsedad di cuminda, “lo tin abundancia di maishi den e tera.” (Salmo 72:16) Ayo prizon, warda di polis, malesanan transmiti sexualmente, magnatenan di narcotrafico, tribunal di diborcio, proceduranan di bancarota y terorismo.—Salmo 37:29; Isaias 33:24; Revelacion 21:3-5.

¹⁹ Dios lo haci e grafnan conmemorativo bashi, y miles di miyones di hende resusita—mas actor—lo subi escenario. Ki un goso lo tin segun cu un generacion di hende ta topa otro generacion y ora cu sernan keri cu tawata separa for di otro pa hopi tempo ta bolbe brasa otro calorosamente! Cu tempo, tur hende cu ta na bida lo ta adora Yehova. (Revelacion 5:13) Ora cu caba di haci tur cambio, lo hisa e cortina pa revela un paradijs mundial. Con lo bo sinti segun cu bo ta mira e esena? No tin duda cu lo e conmove bo pa declara: ‘Mi a warda hopi riba esaki, pero tawata bale la pena!’

[Nota]

Con Lo Bo Contesta?

• Con e palabranan di apostel Pablo cu “e esena di e mundo aki ta cambiando” a resulta berdad den nos tempo?

• Con cronologia di Bijbel ta indica ki ora tawata fin di ‘e temponan stipula pa e paganonan’?

• Con e cambionan den e situacion di mundo ta confirma cu 1914 a marca e comienso di “e tempo di e fin”?

• Ki efecto e echo cu ‘e tempo cu a resta ta cortico’ mester tin riba nos?

[Preguntanan di Estudio]

[Plachi na pagina 20]

Porfin e misterio a keda soluciona!