Djis un Custumber of Ta Soborno?

NA ALGUN scol na Polonia caminda nan ta duna enseñansa superior, studiantenan tin custumber di pone placa hunto pa nan cumpra regalo pa nan docentenan, cu e speransa di haya miho punto pa examen. Nada straño anto cu un hoben cristian cu yama Katarzyna a hay’e den un situacion dificil. E tawata puntra su mes: “Kico mi tin cu haci, duna placa of no?” Su compañeronan di scol a rasona: “Ta un custumber normal. Bo no ta perde nada, al contrario bo ta gana hopi. Ta dicon bo ta duda anto?”

Katarzyna a bisa: “Mi tin cu admiti cu durante mi prome aña, mi a duna placa. Ta despues mi a bin realisa cu di e manera aki mi a coopera cu pasamento di placa bou di mesa, un cos cu Bijbel ta condena.” El a corda riba textonan biblico cu ta mustra cu Yehova ta desaproba fuertemente di soborno of pasamento di placa bou di mesa. (Deuteronomio 10:17; 16:19; 2 Cronicanan 19:7) Katarzyna a agrega: “Mi a mira con facil ta pa entrega na presion di bo pareunan. Mi a bolbe pensa riba e asunto y desde e tempo ei nunca mas mi no a participa den e custumber aki.” Durante e ultimo tres añanan, apesar cu otro studiantenan ta haci bofon di dje, e por a splica algun di nan cu e no ta participa den duna placa pa e “regalonan” aki pa motibo di su conviccionnan cu ta basa riba Bijbel.

Algun studiante a acusa Katarzyna cu e tin un actitud egoista y antisocial. El a bisa: “Te ainda tin algun di nan cu no ta trata mi bon. Di otro banda, hopi di nan ta respeta mi punto di bista, loke ta pone mi sinti mi bon.” Katarzyna a bira conoci como un Testigo di Yehova cu ta pone principionan di Bijbel na practica den su bida diario.