Yehova Ta Ripara Loke Abo Ta Haci?

CON lo bo contesta e pregunta ei? Hopi hende lo bisa: ‘Mi ta kere cu Dios a tuma nota di e hazañanan di hombernan manera Moises, Gideon y David, pero mi ta duda cu E ta interesa den cualkier cos cu mi por haci. Ami sigur no ta manera Moises, Gideon of David.’

Ta cierto cu algun homber fiel den tempo biblico a efectua algun acto extraordinario di fe. Nan ‘a conkista reinonan, a sera boca di leonnan, a paga e poder di candela, y a scapa for di e filo di spada.’ (Hebreonan 11:33, 34) Sinembargo, tawatin otronan cu a desplega nan fe den maneranan menos espectacular. Y Bijbel ta sigura nos cu Dios a ripara nan actonan di fe tambe. Pa ilustra esei, laga nos considera e ehempelnan biblico di un wardado di bestia, un profeta y un biuda.

Un Wardado di Bestia Ta Ofrece Sacrificio

Kico bo ta corda di Abel, e di dos yiu homber di Adam cu Eva? Podise bo ta corda cu el a muri como martir, un experencia cu probablemente masha poco di nos lo pasa aden. Pero tin un otro motibo pakico Dios a tuma nota di Abel mas prome.

Un dia Abel a scohe algun di su miho bestianan for di su tou y a ofrece un sacrificio na Dios. Pa hende awendia, kisas e sacrificio ei ta algo masha simpel, pero Yehova si a tuma nota di dje y a mustra cu El a aprob’e. Sinembargo, esei no ta tur cos. Casi cuater mil aña despues, Yehova a inspira apostel Pablo pa skirbi tocante esaki den e buki di Hebreonan. Aunke hopi aña a pasa, Dios no a lubida e simpel sacrificio ei!—Hebreonan 6:10; 11:4.

Kico a yuda Abel dicidi ki tipo di sacrificio e mester a ofrece? Bijbel no ta bisa esei, pero Abel mester a pensa seriamente riba e asunto ei. Door cu e tawata un wardado di bestia, no tawata straño cu el a ofrece algun bestia for di su tou. Sinembargo, tuma nota cu el a duna esnan miho—esnan “vet.” (Genesis 4:4) Ta posibel tambe cu el a medita riba loke Yehova a bisa e colebra den e hofi di Eden: “Lo mi pone enemistad entre abo y e mohe, y entre bo simiña y su simiña; e lo herida bo cabes, y abo lo herida su hilchi di pia.” (Genesis 3:15; Revelacion 12:9) Aunke Abel no a compronde ken ta “e mohe” ni su “simiña”, kisas el a realisa cu e ‘machicamento di hilchi’ di e simiña di e mohe lo a encera dramamento di sanger. Siguramente el a reconoce cu nada lo no tin mas balor cu un criatura cu tin rosea di bida. En todo caso, e sacrificio cu el a ofrece tawata masha apropia.

Mescos cu Abel, cristiannan djawe tambe ta ofrece sacrificio na Dios. Nan ta ofrece, no e prome bestianan cu a nace den nan tou, sino “un sacrificio di alabansa, esta, e fruta di lipnan  cu ta haci declaracion publico di [Dios su] nomber.” (Hebreonan 13:15, NW) Nos lipnan ta haci declaracion publico ora nos ta comparti nos fe cu otro hende.

Lo bo kier mehora e cualidad di bo sacrificio? Si ta asina, pensa seriamente riba e necesidadnan di e hendenan den bo teritorio. Kico ta precupa nan? Den kico nan ta interesa? Ki parti di e mensahe di Bijbel lo atrae nan? Cada bes cu bo duna testimonio, analisa con e combersacion a bai pa asina bo por mehora y bira mas eficas. Y ora bo ta papia di Yehova, hacie cu conviccion di henter bo curason. Haci bo sacrificio un berdadero “sacrificio di alabansa.”

Un Profeta Ta Predica Serca Hende Cu No Ta Gusta e Mensahe

Awor considera profeta Enok. Kisas e tawata e unico Testigo di Yehova Dios. Abo tambe mescos cu Enok, ta e unico den bo famia cu ta sirbi Yehova fielmente? Abo ta e unico alumno den bo klas of e unico empleado na bo trabou cu ta pega na principionan di Bijbel? Si ta asina, podise bo ta haya bo cu oposicion. Amigonan, famia, compañeronan di trabou kisas ta presiona bo pa kibra Dios su leinan. Nan lo por bisa: “Ningun hende lo haya sa nunca loke bo a haci. Nos no ta bai reda riba bo.” Nan lo por insisti cu ta co’i kens bo ta haci door di precupa cu normanan moral di Bijbel, pasobra Dios no ta interesa den loke bo ta haci. Door cu nan no ta gusta cu bo no ta pensa ni haci mescos cu nan, nan lo por haci tur loke ta na nan alcanse pa kibra bo resistencia.

Nos tin cu admiti si cu no ta facil pa wanta presion, pero e no ta imposibel. Pensa riba Enok, e di shete homber den e liña di desendencia di Adam. (Hudas 14) Pa e tempo cu Enok a nace, mayoria hende a perde tur heful moral. Nan abla tawata bergonsoso; nan conducta tawata “duro” of ofensivo. (Hudas 15) Hopi cos cu nan tawata haci ta mescos cu loke hopi hende djawe ta haci.

Con Enok a trata cu e asunto? E contesta riba e pregunta ei ta importante pa nos awe. Aunke e tempo ei Enok por tawata e unico hende riba tera cu a adora Yehova, en realidad e no tawata su so. Enok a cana cu Dios.—Genesis 5:22.

Tur loke Enok a busca den bida ta pa agrada Dios. E tawata sa cu cana cu Dios a nifica mas cu djis hiba un bida moralmente limpi. Yehova tawata kier pa e predica. (Hudas 14, 15) E mester a avisa e hendenan cu Yehova a ripara nan echonan malbado. Enok a sigui cana cu Dios pa mas cu 300 aña—hopi mas cu cualkier un di nos a persevera. El a sigui cana cu Dios te na su morto.—Genesis 5:23, 24.

Mescos cu Enok, nos tambe a haya e tarea pa predica. (Mateo 24:14) Fuera di duna testimonio di cas pa cas, nos ta purba alcansa nos famianan, nos relacionnan comercial y compañeronan di klas cu e bon nobo. Sinembargo, sa sosode cu nos ta basila pa duna testimonio cu curashi. Esei sa ta e caso cu bo? No desespera. Imita e prome cristiannan y resa pidi Dios curashi. (Echonan 4:29, NW) Nunca lubida cu tanten cu bo ta cana cu Dios, hamas bo ta realmente bo so.

Un Biuda Ta Prepara un Cuminda

Imagina bo, un biuda cu Bijbel no ta menciona su nomber ta ricibi dos bendicion pasobra el a prepara un simpel cuminda! E no tawata un Israelita, sino un stranhero cu a biba den siglo 10 prome cu nos era, den e stad di Sarepta. Na  fin di un periodo largo di secura y hamber, e biuda su suministro di cuminda tawata serca di caba. Tur loke el a sobra tawata un man di hariña y suficiente azeta pa e cushina e ultimo cuminda pa e mes y pa su yiu homber.

Na e momento ei, un bishitante a yega. Tawata profeta Elias, y el a pidi e biuda dun’e for di esun tiki cuminda. Apenas tawatin suficiente pa e biuda y su yiu homber. Lo no a sobra nada pa e bishitante. Pero basa riba loke Yehova a bisa Elias, el a sigura e biuda cu si e comparti su cuminda cu ne, e cu su yiu homber lo no pasa hamber. Pa e biuda por a kere cu e Dios di Israel lo a tuma nota di dje, un biuda stranhero, e mester tawatin fe. Toch, el a kere Elias y Yehova a recompens’e. “E comchi di hariña no a bira bashi ni e butishi di azeta no a bira bashi, conforme e palabra di SEÑOR cu El a papia pa medio di Elias.” E señora y su yiu homber tawatin un suministro regular di cuminda te ora e hamber a termina.—1 Reinan 17:8-16.

Sinembargo, tawatin un otro bendicion ta spera e biuda. Algun tempo despues di e milager ei, su yiu homber stima a bira malo y muri. Duele a conmove Elias y el a roga Yehova pa duna e mucha homber bida atrobe. (1 Reinan 17:17-24) Esaki lo a nifica un milager sin precedente. No tin registro di ningun hende cu a yega di ser resusita prome cu esei! Yehova lo bolbe mustra misericordia na e biuda stranhero aki? El a hacie. Yehova a duna Elias poder pa resusita e mucha homber. Relaciona cu e señora privilegia aki, Hesus a bisa despues: ‘Tawatin hopi biuda na Israel y toch Elias a wordu manda na Sarepta, na tera di Sidon, serca un mohe biuda.’—Lucas 4:25, 26.

Awe asta den paisnan industrialisa, e situacion economico ta leu for di stabil. Algun compania grandi a kita trahadonan cu tawata leal na nan trabou pa hopi decada. Door cu un cristian tin chens di perde su trabou kisas e por sintie tenta pa dedica demasiado tempo na trabou, sperando cu su doño di trabou lo laga e si keda. Esei por pone cu e tin tiki tempo pa asisti na reunionnan cristian, pa participa den e sirbishi di veld, of pa percura pa e necesidadnan emocional y spiritual di su famia. Sinembargo, e ta sinti cu e tin cu mantene su trabou casi cueste loke cueste.

Un cristian cu ta den un situacion economico dificil asina, tin motibo pa ta precupa. Awendia ta dificil pa haya trabou. Mayoria di nos no ta lucha pa bira rico, pero mescos cu e biuda di Sarepta, nos kier tin e cosnan necesario pa bida. Sinembargo, apostel Pablo ta recorda nos cu Dios a bisa: “Nunca lo Mi no bandona bo, y nunca lo Mi no laga bo desampara.” Cu tur confiansa nos por bisa: “[Yehova] ta mi yudado, lo mi no tin miedo. Kico hende por haci mi?” (Hebreonan 13:5, 6) Pablo tawata dispuesto pa risca su bida pa e promesa ei, y semper Yehova a percura p’e. Dios lo haci mescos pa nos, si nos no bandon’e.

Podise nos ta pensa cu nunca nos lo por logra e hazañanan cu personanan spiritual manera Moises, Gideon y David a logra, pero nos por imita nan fe si. Y nos por corda riba e simpel actonan di fe cu Abel, Enok y e biuda di Sarepta a efectua. Yehova ta interesa den tur acto di fe—asta den esnan chikito. Ora un studiante cu ta teme Dios nenga di acepta droga for di su pareu, ora un empleado cristian rechasa avancenan inmoral na trabou, of ora un Testigo di edad asisti fielmente na e reunionnan di congregacion aunke e ta cansa y ta sufri kebranto di salu, Yehova ta ripara esei. Y E ta keda contento!—Proverbionan 27:11.

 Abo Ta Ripara Loke Otronan Ta Haci?

Si, Yehova ta ripara loke nos ta haci. Pesei, como imitadonan di Dios, nos mester ta alerta pa reconoce e esfuersonan cu otro hende ta haci. (Efesionan 5:1) Pakico no tira un bista mas djacerca riba e desafionan cu bo compañeronan cristian ta enfrenta pa nan por asisti na reunionnan di congregacion, pa participa den sirbishi di veld y asta pa cumpli cu nan actividadnan di tur dia?

Anto, laga bo compañeronan cu ta adora Yehova hunto cu bo sa cu bo ta aprecia nan esfuerso. Nan lo keda contento cu bo ta ripara loke nan ta haci. Y bo interes den nan lo por sirbi como un garantia pa nan cu Yehova tambe ta ripara loke nan ta haci.