Hobennan—Yehova Lo No Lubida Boso Trabou!

“Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.”—HEBREONAN 6:10.

1. Con e bukinan di Bijbel di Hebreonan y Malakias ta mustra cu Yehova ta aprecia bo sirbishi?

BO A yega di haci un fabor pa un amigo sin cu el a yama bo danki? Ora hende no mustra balor na un bondad cu bo a haci of asta lubida riba dje, e por haci hopi dolor. Sinembargo, ora nos ta rindi sirbishi di henter nos curason na Yehova, esei ta completamente otro! Bijbel ta bisa: “Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.” (Hebreonan 6:10) Pensa riba e nificacion di e palabranan ei. Si Yehova mester lubida loke bo a haci y ta sigui haci den su sirbishi, E ta considera esei como un inhusticia—un pica—di su parti. Yehova si ta un Dios gradicido!—Malakias 3:10.

2. Kico ta haci sirbishi na Yehova algo realmente special?

 ² Bo tin un oportunidad special pa adora y sirbi e Dios gradicido aki. Na comparacion cu e rond di seis mil miyon hende cu tin rond mundo, bo compañeronan di fe ta un seis miyon hende so. Pesei en berdad bo tin un privilegio unico. Ademas, e echo cu bo ta scucha y reacciona riba e mensahe di e bon nobo ta un evidencia cu Yehova ta interesa den bo personalmente. De echo, Hesus a bisa: “Ni un hende no por bin serca mi, si no ta e Tata cu a manda mi a hal’e.” (Huan 6:44) Si, Yehova ta yuda hende individualmente probecha di e beneficionan di e sacrificio di Cristo.

Aprecia Bo Gran Privilegio

3. Con e yiu hombernan di Core a expresa nan aprecio pa e privilegio di por a sirbi Yehova?

³ Manera e articulo anterior a mustra, bo ta den un posicion unico pa haci Yehova su curason contento. (Proverbionan 27:11) Wak pa nunca bo no mira esaki como algo gewoon. Den un di nan salmonan inspira, e yiu hombernan di Core a expresa nan aprecio pa e privilegio di por a sirbi Yehova. Nos ta lesa: “Un dia den bo pationan ta miho cu mil dia pafo. Mi ta prefera di para na entrada di e cas di mi Dios cu biba den e tentnan di maldad.”—Salmo 84:10.

4. (a) Kico por pone algun hende pensa cu adoracion di Yehova ta restringi nan? (b) Con Yehova ta mustra cu E mes ta ansioso pa observa y recompensa su sirbidonan?

⁴ Ta asina bo ta sinti tocante bo privilegio di por sirbi bo Tata celestial? Nos tin cu admiti si, cu tin bes por parce cu adoracion di Yehova ta limita bo libertad. Ta cierto cu pa biba di acuerdo cu principionan di Bijbel bo tin cu sacrifica algo. Pero finalmente, tur loke Yehova pidi di bo ta pa bo mes bon. (Salmo 1:1-3) Ademas, Yehova ta mira bo esfuersonan y ta demostra su aprecio pa bo fieldad. De echo, Pablo a skirbi cu Yehova “ta esun cu ta recompensa esnan cu ta busc’e” cu empeño. (Hebreonan 11:6) Yehova ta busca oportunidad pa haci esaki. Un profeta husto di Israel di antiguedad a declara: “Wowo di SEÑOR ta move bai bin door di henter tera, pa E por sostene fuertemente esnan cu nan curason ta completamente di dje.”—2 Cronicanan 16:9.

5. (a) Cua ta un di e miho maneranan cu bo por demostra cu bo curason ta completamente cu Yehova? (b) Dicon por parce dificil pa papia cu otronan tocante bo fe?

⁵ Un di e miho maneranan cu bo por demostra cu bo curason ta completamente cu Yehova ta door di papia cu otro hende tocante dje. Bo a yega di haya e oportunidad di papia cu algun di bo compañeronan di scol tocante bo fe? Na prome instante lo bo no tin mucho smak di haci esei, y e idea so lo por duna bo miedo. Kisas bo ta puntra: ‘Kico si nan hari mi? Kico si nan pensa cu mi religion ta straño?’ Hesus a reconoce cu no ta tur hende  lo scucha e mensahe di Reino. (Huan 15:20) Pero esaki no ta nifica cu ta henter bo bida nan lo bai tenta bo y rechasa bo. Al contrario, hopi hoben Testigo a haya hende cu kier a scucha nan. Y door cu nan a pega firmemente na nan creencianan, nan pareunan a haya mas respet pa nan.

“Yehova Lo Yuda Bo”

6, 7. (a) Con bin un hoben di 17 aña por a duna testimonio na su compañeronan di klas? (b) Kico bo a siña for di e experencia di Jennifer?

⁶ Pero con bo por tuma un curashi pa papia tocante bo fe? Pakico no ser honesto y franco ora hende haci bo pregunta tocante bo religion? Considera e ehempel di Jennifer di 17 aña di edad. “Tawata den pauze na scol. E mucha mohenan na mi mesa tawata papia tocante religion y un di nan a puntra mi cua misa mi ta bai”, e ta bisa. Jennifer tawata nervioso ora e mester a contesta? “Si”, e ta admiti, “pasobra mi no tawata sigur con nan lo a reacciona.” Anto kico Jennifer a haci? “Mi a bisa e muchanan cu mi ta un Testigo di Yehova”, e ta sigui. “Na prome instante a parce cu nan a keda sorprendi. Aparentemente nan tawatin Testigonan di Yehova pa hende straño. Pesei, nan a cuminsa haci mi pregunta, y mi por a clarifica algun idea robes cu nan tawatin. Asta despues di e dia ei, algun mucha mohe tawata acerca mi de bes en cuando pa haci pregunta.”

⁷ Jennifer a sinti duele cu el a probecha di e oportunidad pa papia tocante su creencianan? Absolutamente! E ta bisa: “Ora pauze a caba, mi a sinti mi hopi bon. Awor e muchanan ei tin un miho idea ken Testigonan di Yehova realmente ta.” Awor Jennifer tin un conseho masha simpel: “Si bo tin problema pa duna testimonio na bo compañeronan di klas of maestronan, haci un oracion den pura. Yehova lo yuda bo. Lo bo sinti bo felis cu bo a probecha di bo oportunidad pa duna testimonio.”—1 Pedro 3:15.

8. (a) Con oracion a yuda Nehemias ora el a hay’e cu un situacion inespera? (b) Cua ta algun ocasion na scol cu lo bo tin cu haci un oracion breve, den silencio na Yehova?

⁸ Tuma nota cu Jennifer ta recomenda pa “haci un oracion den pura” ora cu presenta un oportunidad pa duna testimonio tocante bo fe. Esaki ta precis loke Nehemias, copero di Rei Artaherhes di Persia, a haci ora el a hay’e cu un situacion inespera. Tawata bisto cu Nehemias tawata precupa pasobra el a haya informe tocante e condicion deplorabel di e Hudiunan y cu e muraya y portanan di Herusalem tawata tur ruina. E Rei a ripara cu Nehemias tawata hopi precupa y pesei el a puntr’e kico tawata su problema. Prome cu Nehemias a contesta, el a resa pidi Yehova guia. Anto cu curashi el a pidi rei permit pa e bolbe Herusalem y yuda reconstrui e stad decai. Artaherhes a duna Nehemias permit. (Nehemias 2:1-8) Kico ta e les pa bo? Si bo ta sinti bo nervioso ora un oportunidad presenta pa bo duna testimonio tocante bo fe, no keda sin haci uzo di e chens cu bo tin pa haci oracion den silencio. Pedro a skirbi: ‘Tira tur bo precupacion riba [Yehova], pasobra E ta percura pa bo.’—1 Pedro 5:7; Salmo 55:22.

“Dispuesto pa Duna Contesta”

9. Con bin Leah di 13 aña di edad por a laga 23 buki Hovenan sa puntra?

⁹ Considera un otro experencia. Durante pauze na scol, Leah di 13 aña di edad tawata lesa e buki Loke hovenan sa puntra—Contesta práctica. * E ta bisa: “Otro mucha tawata wak mi, y djis despues un grupo a bin para mi tras pa wak den e buki. Nan a cuminsa puntra ta over di kico e buki ta bai.” Na fin di e dia ei, cuater mucha mohe a pidi Leah un ehemplar di e buki Hovenan sa puntra. No a dura masha cu e muchanan aki a laga otronan wak e buki, y esakinan tambe tawata kier un ehemplar. Durante e siguiente simannan, Leah a laga 23 buki di Hovenan sa puntra serca su  compañeronan di scol y nan amiganan. Tawata facil pa Leah expresa su mes na principio ora otro mucha a haci pregunta tocante e buki cu e tawata lesa? Sigur cu no! E ta admiti: “Na principio mi tawata nervioso. Pero mi a haci oracion, y mi tawata sa cu Yehova tawata cu mi.”

10, 11. Con un hobensita Israelita por a yuda un hefe di ehersito Sirio siña di Yehova, y ki cambio e hefe a haci despues di esei?

¹⁰ Podise Leah su experencia ta pone bo corda riba un situacion similar cu e hoben Israelita cu tawata esclabo na Siria a haya su mes aden. Naaman, un hefe di ehersito Sirio, tawatin lepra. Por ta masha bon cu ta su esposa a cuminsa e combersacion cu a impulsa e mucha chikito pa papia tocante su fe. El a bisa: “Mara mi shon Naaman tawata serca e profeta cu ta na Samaria! E ora ei e lo a cur’e di su lepra.”—2 Reinan 5:1-3.

¹¹ Door di e hobensita su curashi Naaman a haya sa cu “no tin ningun Dios den henter mundo, sino solamente na Israel.” Anto asta el a dicidi cu e lo “no ofrece ofrenda kima mas, ni e lo no ofrece sacrificio na otro diosnan, sino solamente na [Yehova].” (2 Reinan 5:15, 17) Yehova siguramente a bendiciona e curashi di e hobensita ei. Yehova por y lo haci  mescos pa hobennan awe. Leah a experencia esei. Cu tempo algun di su compañeronan di scol a acerc’e y a bis’e cu e buki Hovenan sa puntra a yuda nan drecha nan conducta. Leah a bisa: “Mi a keda contento pasobra mi tawata sa cu mi ta yudando otronan siña mas tocante Yehova y yuda nan cambia nan bida.”

12. Con bo por haya fortalesa pa papia di bo fe?

¹² Bo por tin e mesun experencianan cu Jennifer y Leah tawatin. Sigui e conseho di Pedro, kende a skirbi cu como cristian bo mester ta semper “dispuesto pa duna contesta na cada un cu pidi boso pa duna cuenta di e speransa cu tin den boso, sinembargo cu suavidad y reverencia.” (1 Pedro 3:15) Con bo por haci esei? Door di imita e ehempel di e cristiannan di prome siglo kendenan a resa pidi Yehova yuda nan predica “cu tur curashi.” (Echonan 4:29, NW) Despues di esei, tuma un curashi y papia cu otronan tocante bo creencianan. E resultadonan por sorprende bo. Loke ta mas importante, lo bo haci Yehova su curason contento.

Video y Proyectonan Special

13. Cua oportunidadnan algun hoben a probecha di dje pa duna testimonio? (Wak cuadronan na pagina 20 y 21.)

¹³ Hopi hoben a uza video pa splica nan fe na nan compañero- y maestronan di scol. Tin bes, proyectonan di scol tambe a habri caminda pa trece alabansa na Yehova. Por ehempel, dos mucha homber di 15 aña di edad, tur dos Testigo di Yehova, a haya e tarea como parti di nan les di historia di mundo, pa skirbi un informe tocante un di e religionnan na mundo. Nan dos a plania pa skirbi un informe tocante Testigonan di Yehova, uzando e buki Testigonan di Yehova—Proclamadonan di e Reino di Dios como nan fuente di informacion. * Tambe nan mester a duna un informe oral di cinco minuut. Despues di esei, e  maestro y e studiantenan tawatin asina tanto pregunta cu e hobennan a haya nan ta keda un 20 minuut mas dilanti klas. Pa varios siman despues di esei, nan compañeronan di klas a sigui haci pregunta tocante Testigonan di Yehova!

14, 15. (a) Dicon miedo di hende ta un trampa? (b) Pakico bo por tin confiansa ora bo ta papia tocante bo creencianan cu otro hende?

¹⁴ Manera e experencianan menciona anteriormente ta ilustra, bo por haya hopi bendicion ora bo ta conta otronan tocante bo creencianan y conviccion como Testigo di Yehova. No laga miedo di hende priva bo di bo privilegio y goso di por yuda otro hende conoce Yehova. Bijbel ta declara: “Temor pa hende ta pone un trampa, ma esun cu confia den SEÑOR lo ta halsa.”—Proverbionan 29:25.

¹⁵ Corda, como un hoben cristian, bo tin algo cu bo pareunan tin hopi mester di dje: e miho manera di biba awor y e promesa di bida eterno den futuro. (1 Timoteo 4:8) Ta interesante pa nota cu na Merca—caminda lo bo pensa cu hende en general ta mas inclina na cos di mundo y indeferente pa cu religion—un encuesta a mustra cu por lo menos mita di e hobennan ta tuma e asunto di religion masha na serio. Y un tercera parti a bisa cu fe religioso ta “e influencia di mas importante” den nan bida. Probablemente e situacion ta mescos na hopi otro partinan di mundo. Pesei, por ta masha bon cu bo pareunan na scol lo ta contento pa scucha loke bo tin di bisa di Bijbel.

Como un Hoben, Hala Serca Yehova

16. Ademas di papia cu otronan tocante Yehova, kico mas bo tin cu haci pa alegra su curason?

¹⁶ Claro cu pa bo haci Yehova su curason contento, bo tin cu haci mucho mas cu djis papia di dje. Bo conducta tambe mester ta na harmonia cu su normanan. Apostel Huan a skirbi: “Esaki ta e amor di Dios, cu nos ta warda su mandamentonan; y su mandamentonan no ta pisa.” (1 Huan 5:3) Lo bo ripara cu esaki ta cierto ora bo hala serca Yehova. Con bo por haci esei?

17. Con bo por hala serca Yehova?

¹⁷ Tuma tempo pa lesa Bijbel y publicacionnan basa riba Bijbel. Mas bo siña di Yehova, mas facil lo bira pa bo obedec’e y papia cu otronan tocante dje. “E bon hende, for di e bon tesoro di su curason, ta saca loke ta bon”, Hesus a bisa, “pasobra for di e abundancia di curason su boca ta papia.” (Lucas 6:45) Pesei, yena bo curason cu cos bon. Pakico no pone meta relaciona cu esaki? Kisas bo por mehora den preparacion pa reunionnan di congregacion pa otro siman. Bo siguiente meta lo por ta pa participa den reunion cu un comentario breve pero sinsero. Claro cu ta masha importante tambe pa bo practica e cosnan cu bo ta siña.—Filipensenan 4:9.

18. Asta si bo haya bo cu algun oposicion, kico bo por ta sigur di dje?

¹⁸ E bendicionnan cu sirbi Yehova ta trece cu ne ta duradero, en realidad, pa semper. Si, bo por haya cu de bes en cuando hende ta bai contra bo of tenta bo pasobra bo ta un Testigo di Yehova. Pero corda riba Moises. Bijbel ta bisa cu “e tawatin su bista [fiha] riba e recompensa.” (Hebreonan 11:24-26) Bo tambe por ta sigur cu Yehova lo recompensa e esfuersonan cu bo ta haci pa siña y papia di dje. Si, hamas lo E ‘lubida bo trabou y e amor cu bo a mustra pa su nomber.’—Hebreonan 6:10.

[Nota]

Bo Ta Corda?

• Dicon bo por ta sigur cu Yehova ta aprecia bo sirbishi?

• Cu ki metodonan di duna testimonio na scol algun tawatin exito?

• Con bo por haya fortalesa pa duna testimonio na compañeronan di scol?

• Con bo por hala serca Yehova?

[Preguntanan di Estudio]

[Cuadro/Plachi na pagina 20]

Asta Mucha Hopi Jong Ta Alaba Yehova!

Asta mucha hopi jong cu no ta teenager ainda por a duna testimonio na scol. Lesa e experencianan aki.

Amber, kende tin dies aña di edad y ta den vijfde klas, tawata lesa un buki tocante e atake di Nazi riba Hudiunan durante Segundo Guera Mundial. Amber a dicidi di trece e video Triangulo Biña pa su juffrouw. E juffrouw a keda sorprendi ora el a haya sa cu e regimen Nazi a persigui Testigonan di Yehova tambe. E juffrouw a laga henter klas wak e video.

Cu ocho aña di edad, Alexa a skirbi un carta na su klas pa splica nan dicon e no ta participa na nan celebracion di Pasco. E carta a impresiona e juffrouw asina tanto cu el a laga Alexa lesa e carta na bos halto pa su propio klas y tambe pa dos otro klas! Na conclusion Alexa a bisa den su carta: “Nan a siña mi pa respeta otro creencianan cu no ta mescos cu esun di mi, y mi ta gradici boso cu boso ta respeta mi decision pa no celebra Pasco.”

Djis despues cu Eric a cuminsa eerste klas, el a bai scol cu su buki Mi buki di relato bíblico y a pidi su meneer permit pa e mustra su compañeronan di klas e buki. E meneer di: “Mi tin un miho idea. Dicon bo no ta lesa un relato pa e klas?” Eric a lesa. Despues di esei el a bisa pa tur hende cu kier un buki hisa nan man. Diesocho hende, incluso e meneer, a hisa man! Awor Eric ta sinti cu e tin su propio teritorio special pa e duna testimonio.

Whitney di nuebe aña ta masha gradicido cu tin e foyeto Testigonan di Jehova i Educacion. * “Normalmente tur aña ta mi mama ta duna mi juffrouwnan e foyeto aki”, e ta bisa, “pero e aña aki mi mes a hacie. E foyeto aki a pone cu mi juffrouw a scohe mi como e ‘alumno di siman.’”

[Nota]

[Cuadro/Plachi na pagina 21]

Situacionnan Cu Algun A Probecha di Dje pa Papia Tocante Nan Fe

Ora algun hoben a haya e tarea pa traha un spreekbeurt of proyecto pa scol, nan a scohe un tema cu a permiti nan duna testimonio

Varios hoben a duna nan maestro un video of un publicacion cu tin di aber cu un tema cu nan ta considera den klas

Algun hoben a lesa Bijbel of un publicacion basa riba Bijbel den pauze, y otronan a acerca nan y haci nan pregunta

[Plachi na pagina 18]

Rumannan cu experencia por yuda entrena hobennan pa sirbi Yehova