Hobennan Cu Ta Haci Yehova Su Curason Contento

E articulonan di studio aki a ser prepara specialmente pa hobennan Testigo di Yehova. Pesei, nos ta anima hobennan pa studia e informacion aki bon y participa libremente y cu smak ora e wordo considera durante e Studio di Toren di Vigilancia di congregacion.

“Sea sabi, mi yiu, y haci mi curason contento, pa mi por contesta esun cu reprocha mi.”—PROVERBIONAN 27:11.

1, 2. (a) Splica dicon si bo djis sinti cu mundo ta trek bo, no ta nifica cu bo no ta sirbi pa ta un cristian. (Romanonan 7:21) (b) Ki les bo ta saca for di e ehempel di Asaf? (Wak e cuadro na pagina 13.)

IMAGINA cu bo ta buscando paña pa cumpra. Ora bo ta pasando door di e rekinan, bo bista ta cai riba un bisti cu bo ta gusta mesora. Y ta parce cu e colo y e style ta pas net pa bo, y e prijs ta indica cu ta un bon ganga bo a haya. Pero despues bo ta wak e bisti mas djacerca. Pa bo gran sorpresa, bo ta ripara cu e tela ta fraña na rand y cu e stiknan ta un tiki slons. Aunke e bisti ta great, e no ta di masha bon calidad. Lo bo gasta bo placa na un paña inferior asina?

² Awor, compara e situacion ei cu esun cu abo como un hoben cristian lo por haya bo confronta cu ne. Mescos cu e bisti, na prome bista, e cosnan cu mundo ta ofrece por parce masha atractivo. Por ehempel, bo compañeronan di scol kisas ta bai fiestanan great, nan ta uza droga, bebe, sali cu otro sin ningun compromiso y tene relacion sexual sin cu nan ta casa. Bo sa sinti gana di hiba un bida asina? Bo ta anhela pa purba djis un tiki di nan supuesto libertad? Si esei ta e caso, no pensa mesora cu definitivamente bo ta un malbado y cu bo no ta sirbi pa ta un cristian. Pasobra en realidad, Bijbel ta reconoce cu mundo por ta un tentacion fuerte—asta pa un persona cu kier agrada Dios.—2 Timoteo 4:10.

3. (a) Dicon no ta bale la pena pa bai tras di e cosnan di mundo? (b) Con un cristian a describi e banidad di bai tras di mundo?

³ Awor, mescos cu lo bo haci cu un paña cu bo kier cumpra, tira un bista mas djacerca riba e cosnan cu mundo ta ofrece. Puntra bo mes: ‘E tela y stik di e sistema di cosnan aki ta di bon calidad?’ Bijbel ta bisa cu “mundo ta pasa bai.” (1 Huan 2:17) Asta si bo por haya algun placer den dje, esei lo ta pa un tempo so. Fuera di eseinan, e prijs cu bo tin cu paga pa un conducta contra principionan biblico ta halto. Esaki sigur no ta un ganga. Un cristian cu mester a soporta loke el a yama “e resultadonan doloroso di un hubentud desperdicia”, a bisa: “Mundo por ta parce excitante y atractivo. Y e kier laga bo kere cu bo por haya e placer cu e ta ofrece,  sin dolor. Pero esei simplemente ta imposibel. Mundo ta uza bo y ora e ta cla cu bo, e ta tira bo un banda.” * Pakico desperdicia bo hubentud door di hiba un bida asina inferior?

Proteccion Contra “e Malbado”

4, 5. (a) Djis prome cu Hesus a muri, kico el a resa pidi Yehova? (b) Dicon e peticion ei tawata na su luga?

⁴ Door cu hobennan Testigo di Yehova ta realisa cu e sistema di cosnan aki no tin nada di calidad pa ofrece, nan ta trata pa evita amistad cu e mundo aki. (Santiago 4:4) Abo ta un di e hobennan fiel aki? Si ta asina, nos ta elogia bo pesei. Ta cierto cu no ta facil pa resisti presion di pareu ni pa resalta como diferente, pero tin un persona cu por yuda bo.

⁵ Djis prome cu Hesus su morto, el a resa pidi Yehova pa E “warda” su disipelnan for “di e malbado.” (Huan 17:15) Hesus tawatin bon motibo pa haci e peticion aki. E tawata sa cu, sin importa e edad di su disipelnan, lo no tawata facil pa nan keda fiel. Dicon? Un di e motibonan ta, manera Hesus mes a reconoce, cu su disipelnan lo tin cu enfrenta un enemigo poderoso y invisibel cu ta “e malbado”, esta, Satanas e Diabel. Bijbel ta bisa cu e criatura spiritual malbado aki “ta cana rond manera un leon cu ta gruña, buscando ken e por devora.”—1 Pedro 5:8.

6. Con nos por sa cu Satanas no ta tene compasion cu hobennan?

⁶ Atrabes di historia, Satanas a gosa ora cu hende a sufri di e crueldadnan cu el a causa nan. Pensa riba e calamidadnan horibel cu Satanas a trece riba Job y su famia. (Job 1:13-19; 2:7) Kisas abo ta corda susesonan di noticia cu ta refleha e caracteristica di Satanas su spirito violento. Diabel ta en busca di victima pa e devora, y den su buskeda, e no ta tene misericordia cu hobennan. Por ehempel, na principio di e prome siglo di nos era, Herodes a trama un plan pa laga mata tur mucha homber den Betlehem di dos aña bai abou. (Mateo 2:16) Probablemente ta Satanas a motiva Herodes. El a haci tur esaki den un intento pa mata e yiu cu un dia lo a bira e Mesias priminti di Dios y cu lo ehecuta Dios su huicio riba Satanas! (Genesis 3:15) Ta claro anto cu Satanas no tin ningun compasion cu hobennan. Su unico proposito ta pa devora mas tanto hende posibel. Esaki ta cierto  specialmente awor, pasobra Satanas a ser saca for di shelo y tira abou den bicindario di tera, “cu gran furia, sabiendo cu ta ked’e solamente un poco tempo mas.”—Revelacion 12:9, 12.

7. (a) Den ki sentido Yehova ta na contraste skerpi cu Satanas? (b) Con Yehova kier pa bo gosa di bida?

⁷ Na contraste skerpi cu Satanas, kende tin un “gran furia”, Yehova tin “misericordia tierno.” (Lucas 1:78) E ta e personificacion mes di amor. De echo, nos Creador ta desplega e cualidad aki te na e grado cu Bijbel ta bisa: “Dios ta amor.” (1 Huan 4:8) Pues, tin un gran diferencia entre e dios di e sistema di cosnan aki y e Dios cu abo tin e privilegio di adora! Mientras Satanas ta busca nos pa devora, Yehova “no kier pa ningun hende bai perdi.” (2 Pedro 3:9) Pa Yehova, bida di tur hende ta precioso, bo bida tambe. Ora Yehova ta haci un apelacion na bo via su Palabra pa no bira parti di mundo, no pensa cu E ta purba stroba bo di gosa di bida ni restringi bo libertad. (Huan 15:19) Al contrario, E ta protehando bo di e malbado. Bo Tata celestial kier pa bo tin algo mucho mas miho cu e placernan pasahero di e mundo aki. E ta desea pa bo obtene e “bida berdadero”, esta, bida eterno den paradijs riba tera. (1 Timoteo 6:17-19) Yehova kier pa bo logra e meta ei, y E ta anima bo pa traha pa esei. (1 Timoteo 2:4) Ademas di esei, Yehova ta extende un invitacion special na bo. Cua invitacion?

“Haci Mi Curason Contento”

8, 9. (a) Kico bo por regala Yehova? (b) Manera e caso di Job ta ilustra, con Satanas ta desafia Yehova?

⁸ Bo a yega di cumpra un regalo pa un bon amigo y despues wak con e ta cuminsa smile di sorpresa y di gratitud ora e hay’e? Probablemente bo a tuma bo tempo pa pensa ki tipo di regalo lo ta bon pa e persona ei. Awor pensa riba e pregunta aki: Ki sorto di regalo abo por duna Yehova Dios, bo Creador? Na prome instante, e idea so caba por parce algo absurdo. Kico e Todopoderoso tin mester di un simpel hende? Kico lo bo por dun’e cu E no tin caba? Bijbel ta contesta na Proverbionan 27:11: “Sea sabi, mi yiu, y haci mi curason contento, pa Mi por contesta esun cu reprocha Mi.”

⁹ Manera probablemente bo a haya sa for di bo studio di Bijbel, ta Satanas e Diabel ta esun cu ta reprocha of desafia Yehova. E ta pretende cu ken cu ta sirbi Dios ta haci esei pa motibonan egoista y no pa amor. Segun Satanas, si Dios permiti su sirbidonan haya nan cu problema of sufrimento, mesora nan ta bandona adoracion berdadero. Tuma por ehempel, loke Satanas a bisa Yehova tocante e homber husto Job: “Bo no a traha un trankera rond di dje, rond di su cas, y rond di tur loke e tin na tur banda? Bo a bendiciona e trabou di su man, y su propiedadnan a aumenta den e tera. Ma saca bo man awor y mishi cu tur loke e tin; siguramente e lo maldiciona Bo den bo cara.”—Job 1:10, 11.

10. (a) Con nos por sa cu no ta e integridad di Job so Satanas a cuestiona? (b) Con abo ta envolvi den e cuestion di soberania?

¹⁰ Manera e relato biblico ta revela, no ta e lealtad di Job so Satanas a cuestiona, sino tambe e lealtad di tur otro hende cu ta sirbi Dios. Esun di bo tambe. De echo, papiando di humanidad en general, Satanas a bisa Yehova: “Tur loke un hende [pues no ta Job so, sino tur hende] tin e lo duna pa su bida.” (Job 2:4) Bo a ripara ki papel bo ta hunga den e cuestion vital aki? Manera Proverbionan 27:11 ta indica, Yehova ta mustra cu tin algo cu bo por dun’e: un base pa e por contesta Satanas, esun cu ta desafi’e. Imagina bo, e Soberano Universal ta haci un apelacion na bo pa duna bo aporte pa resolve e cuestion di mas grandi cu a yega di existi. Esta un responsabilidad y privilegio asombroso bo tin! Abo por cumpli cu loke Yehova ta pidi bo? Job a cumpli. (Job 2:9, 10) Hesus tambe a cumpli cu esei y atrabes di tempo un cantidad incontabel di otro hende, incluso hopi hoben, tambe a hacie.  (Filipensenan 2:8; Revelacion 6:9) Abo por haci mescos. Sinembargo, no ekiboca bo mes. Den e asunto aki bo no por ta neutral. Pa medio di bo echonan lo bo mustra si bo ta apoya sea Satanas su reproche of Yehova su contesta. Cua di nan lo bo apoya?

Yehova Ta Interesa den Bo!

11, 12. Ta importa Yehova si bo scohe pa sirbie of laga? Splica.

¹¹ E choice cu bo haci ta importa Yehova realmente? No tin suficiente hende caba cu a keda fiel pa E por duna un contesta apropia na Satanas? Si, e acusacion di Diabel di cu ningun hende no ta sirbi Yehova pa motibo di amor, ya caba a proba di ta falso. Pero apesar di esei, Yehova kier pa abo scohe su banda den e cuestion di soberania pasobra E ta interesa den abo como persona individual. Hesus a bisa: “No ta e boluntad di boso Tata cu ta den shelo pa un di e chikitonan aki perece.”—Mateo 18:14.

¹² Ta claro anto cu Yehova ta interesa den e caminda cu bo ta scohe. Mas importante ainda, loke bo scohe tin efecto riba dje. Bijbel ta mustra bon cla cu Yehova tin sintimentonan profundo cu ta lanta ora hende haci loke ta bon of loke ta malo. Por ehempel, ora e Israelitanan a rebeldia bes tras bes, Yehova a sinti “dolor.” (Salmo 78:40, 41, NW) Prome cu e Dilubio den tempo di Noe, ora “maldad di hende tawata grandi”, Yehova “tawata tristo den su curason.” (Genesis 6:5, 6) Pensa riba e nificacion di esaki. Si bo scohe un caminda robes, lo bo por pone bo Creador sinti dolor. Esaki no ta nifica cu Dios ta suak of emocional. Mas bien, E ta stima bo y ta interesa den bo bienestar. Di otro banda, ora bo haci loke ta bon, Yehova su curason ta bira contento. E no ta felis solamente pasobra E tin un contesta mas cu E por duna Satanas, sino pasobra awor E por bira Esun cu ta recompensa bo. Y ta esei ta loke E kier bira. (Hebreonan 11:6) Esta un Tata amoroso Yehova Dios ta pa bo!

Bendicion Abundante Awor

13. Den ki manera sirbi Yehova ta trece bendicion asta awor?

¹³ Bendicion cu ta bini door di sirbi Yehova no ta pa den futuro so. Hopi hoben Testigo di Yehova ta ser bendiciona cu goso y satisfaccion aworaki mes, y cu bon motibo. E salmista a skirbi: “E preceptonan di SEÑOR ta  corecto, nan ta alegra curason.” (Salmo 19:8) Yehova sa miho cu tur hende kico ta bon pa nos. Mediante profeta Isaias, Yehova a declara: “Ami ta SEÑOR bo Dios, Kende ta siña bo, pa bo prospera, Kende ta guia bo den e caminda cu bo mester cana. Mara bo a pone atencion na mi mandamentonan! E ora ei bo pas lo tawata manera un riu, y bo husticia manera ola di lama.”—Isaias 48:17, 18.

14. Con principionan di Bijbel por yuda bo evita e dolor di debe?

¹⁴ Biba segun principionan di Bijbel lo yuda bo evita hopi dolor y sufrimento. Por ehempel, Bijbel ta bisa cu esnan cu a desaroya un amor pa placa “a traspasa nan mes cu hopi dolor.” (1 Timoteo 6:9, 10) Algun di bo pareunan a pasa den e realidad amargo cu e textonan aki ta papia di dje? Cierto hobennan a hinca nan curpa den debenan grandi djis pasobra nan ta pensa cu nan mester tin e pañanan di marca di ultimo moda y artefactonan electronico di mas moderno. Ora bo ta carga cu debenan cu interes halto pa largo tempo pa cosnan cu eigenlijk bo no por afford, bo ta den un forma di sclabitud doloroso!—Proverbionan 22:7.

15. Den ki maneranan principionan di Bijbel ta proteha bo di e dolor cu inmoralidad sexual ta trece?

¹⁵ Pensa tambe riba e asunto di inmoralidad sexual. Rond mundo tur aña un cantidad grandi di teenager ta sali na estado sin cu nan ta casa. Algun di nan ta duna lus na un yiu cu nan no tin ni deseo ni capasidad pa cria. Otronan ta comete aborto y ta paga e prijs di un consenshi cu ta tormenta nan. Tin tambe e hobennan cu ta haya malesanan transmiti sexualmente, manera AIDS. Claro cu pa un hoben cu conoce Yehova, e mayor consecuencia ta e echo cu e ta daña su relacion cu Yehova. * (Galationan 5:19-21) Pesei, ta cu bon motibo Bijbel ta bisa: “Hui for di inmoralidad.”—1 Corintionan 6:18.

Sirbi “e Dios Felis”

16. (a) Con bo por sa cu Yehova kier pa bo disfruta di bo hubentud? (b) Dicon Yehova ta establece principionan pa bo sigui?

¹⁶ Bijbel ta describi Yehova como “e Dios felis.” (1 Timoteo 1:11, NW) E kier pa abo tambe ta felis. De echo, su Palabra mes ta bisa:  “Gosa di bo hubentud, gosa tanten bo ta hoben ainda.” (Eclesiastes 11:9, Beibel na papiamentu koriente) Pero Yehova ta wak mas aleu cu e momento actual, y E por mira e consecuencianan di largo alcanse di tanto bon como mal conducta. Pesei E ta spierta bo: “Corda tambe riba bo Creador den e dianan di bo hubentud, prome cu e dianan malo bin y e añanan yega serca, di cualnan lo bo bisa: ‘Mi no tin goso den nan.’”—Eclesiastes 12:1.

17, 18. Con un hoben cristian a mustra cu e ta felis den su sirbishi na Yehova, y con abo por haya e mesun goso?

¹⁷ Awe, hopi hoben ta sinti nan masha felis den nan sirbishi na Yehova. Por ehempel, Lina di 15 aña a bisa: “Mi por cana cu mi cara na laira. Mi tin un curpa salu pasobra mi no ta huma ni uza droga. E guia balioso cu mi ta haya mediante e congregacion ta yuda mi resisti e presion fuerte di Satanas. Mi cara ta briya di felicidad debi na e asociacion edificante cu tin na Salon di Reino. Y e miho cos cu mi tin ta un speransa invencibel di bida eterno riba tera.”

¹⁸ Mescos cu Lina, hopi hoben cristian ta hiba un lucha fuerte di fe, y esaki ta duna nan goso. Nan sa cu nan bida—aunke yen di problema y presion de bes en cuando—tin un berdadero proposito y un futuro real. Pesei, sigui sirbi e Dios cu ta realmente interesa den bo bienestar. Haci su curason contento, y E lo laga bo gosa awor y pa semper!—Salmo 5:11.

[Nota]

Bo Ta Corda?

• Den ki sentido “e malbado”, Satanas, ta un peliger pa bo?

• Con bo por haci Yehova su curason contento?

• Con Bijbel ta mustra cu Yehova ta interesa den bo?

• Kico ta algun di e bendicionnan cu sirbi Yehova ta trece cu ne?

[Preguntanan di Estudio]

[Cuadro/Plachi na pagina 13]

Un Homber Husto Ta Hera Trompica

Asaf tawata un musico Levita prominente den e tempel di Yehova den Israel di antiguedad. El a asta compone canticanan cu a ser uza den adoracion publico. Pero apesar di e privilegionan unico ei, tawatin un tempo cu e conducta malbado di Asaf su pareunan a atra’e. A parce cu su pareunan tawata kibra lei di Dios sin haya castigo. Asaf a admiti despues: “Mi pia a hera di trompica; parumpinga mi pasonan a slip. Pasobra mi tawata envidioso di e arogantenan, ora mi a mira e prosperidad di e malbadonan.”—Salmo 73:2, 3.

Despues, Asaf a bai na e santuario di Dios y a haci oracion tocante e asunto. Unabes cu e por a mira asuntonan desde un punto di bista spiritual atrobe, el a compronde cu Yehova ta odia maldad y cu na e debido tempo, tanto e malbado como e husto lo cosecha loke nan ta planta. (Salmo 73:17-20; Galationan 6:7, 8) Realmente e malbadonan ta riba vloer cu ta slip. Finalmente, nan lo cai ora Yehova destrui e sistema malbado aki.—Revelacion 21:8.

[Plachi na pagina 15]

Yehova ta interesa den bo bienestar, mientras cu Satanas su meta ta pa devora bo

[Plachi na pagina 16]

Hopi hoben ta haya e mayor felicidad door di sirbi Yehova hunto cu nan compañeronan cristian